Ao E Taraia Iesu ao E Tangiria

Tabeua te ririki n nako I weteaki, ma kainnabau, Jacqui, bwa ti na tararua Washington Spokane Mition. Ti roko n te tabo ni mitinare ma te namakin ni maaku ao ni kukurei n tibwangara ni mwakuri ma kairake ni mitinare aika tamaroa. A roko man taabo aika a kakaokoro ao ni kona ni waekoa n karikiia bwa oin natira mwaane ao aine.

I bukina bwa a karaoa te mwakuri ae moan te tamaroa, tabeman a inimaki ni kantaningaan ae mwaiti mairouia n aia mwakuri. I uringa temanna te mitinare ngke e tuangai, “Beretitenti, I aki tii tangiriia aomata.” Tabeman a tuangai bwa e keerikaaki nanoia n rawa n ira tuan te mitinare. I raraoma ao I mimi bwa tera ae ti kona ni karaoia ni bita nanoia mitinare ake tabeman ake a tuai n reiakina kakukurein te ongotaeka.

N te bong teuana ngke ti buti rinanon te marae ni wiita iaon tian Washington–Idaho, I ongongora nakon teuana te rawerawe n te Nu Tetemanti. Ngke I ongora bon rongorongon te kairake ni mwaane ae kaubwai are e kawara te Tia Kamaiu n titiraki bwa tera ae e kona ni karaoia bwa e na reke irouna te maiu ae akea tokina, I karekea te kaotioti ae aki kantaningaaki ae tamaroa are e na riki ngkai bwa te ururing ae tabu.

Imwiin ongoraau n ana taeka Iesu ibukin te tua ao ana kaeka te kairake n ataeinimwane are e a tia n nooria ngke e uarereke, I kakauongo n tuangana iroun te Tia Kamaiu: “Teuana te b’ai are ko tuai ni koro raoi iai: … nako kabo am b’ai nako, ao …. nako mai, … irirai.”¹ Ma mimiiu I ongo taeka aika onoua imwain mwakoron te kibu anne are I taraa n tuai n ongo ke ni wareki mai imwaina. Kaanga ai aron ae e karinaki inanon booki aika tabu. I mimi n ota raoi n te bwai are e a kaotaaki imwina.

Tera taeka ake onoua aika korakora? Ongora n nooria ngkana ko kinai taeka aika bon taekan, tiaki aika kona n nooraki n rongorongo tabeua n te euangkerio ma a ti kuneaki n ana Euangkerio Mareko:

“Ao e roko temanna ni biribiri … ao n titirakinna, Te Tia Reirei ae ko raoiroi, tera te b’ai ae N na karaoia ba e aonga n reke irou te maiu are aki toki iai?

“Ao E taku Iesu nakoina, …

“Ko atai taian tua, Kona tai wenenibure, Ko na tai kamateia aomata, Ko na tai ira, Ko na tai kaota aron raom n te aro ni kewe, Ko na tai babakanikawai, Ko na karineia tamam ma tinam.

“Ao e kaeka ni kangai, … , Te tia reirei, I tou mwiini baikanne ni kabane ma ngke te teei ngai.

“Ao e taraia Iesu ao e tangiria, ao e taku nakoina, ai ti teuana te bwai are ko tuai ni kororaoi iai, nako kaboi am bwai nako, ao anganiia akana aki kaubwai, ao e na reke am bwai i karawa iai; ao nakomai, ao irirai.”²

“Ao E taraia Iesu ao E tangiria.”

Ngke I ongo taeka aikai, te Tamnei e kaona au iango ngke e toki te Uea ao e taraa te kairake ni mwane aei. Taraia—n taraakin nanona ao n noora tamneina, n ataa raoiroina ao ana konabwai, n aron naba ataakin kainnanona ae korakora.

Taeka aika bebete—Iesu e tangiria. E namakina te tangira ae korakora ao te nanoanga ibukin te kairake n ataeinimwane aei, aoibukin te tangira aei, ao ma te tangira aei, Iesu e titiraki riki ibukina. I katamneia aron te bwai are e namakinna ibukin te kairake n ataeinimwane n taonaki n te tangira aei riki ngkai e tuangaki bwa e na karaoi bwaai aika matoatoa ni kabonakoi oin ana bwai ao n angania kainnano.

N te tai anne, I ataia bwa tiaki tii nanoia tabeman ara mitinare are a kainnanoa te bitaki. Bon nanou naba. Te titiraki e aki manga kangai “E na kanga te Beretitenti n te Mition n un iroun te mitinare ae kataia ni katamaroa aroarona?” Oneanmwiina, te titiraki e kangai “N na kanga ni kaonaki ma ana tangira Kristo, bwa e aonga ni kona n namakina te mitinare ana tangira te Atua rinanou ao ni kan bitaki?” N na kanga N taraa teuanne ke neienne n aron are e taraia te Uea n taraakin te kairake n ataeinimwane ae kaubwai, n nooria bwa antai ngaiia ao aroia are a kona ni karekea, nakon are ti ibukin are a karaoia ke aki karaoia? N na kanga n riki n aron te Tia Kamaiu?

“Ao E taraia Iesu ao E tangiria.”

Man te tai anne ao imwiina, I kaitara n tekateka ma te kairake ni mitinare are e aki ongotaeka, inanou I a noora ngkai te kairake n mitinare aei bwa e a kakaonimaki ke nakoia naba ataeinnaine are e a tia ni mwakuri iaon nanona ni kan nako ni mitinare. Ngkanne I a kona n taekinna ma te namakin ni kabane anne mairoun te karo:³ “Unimwaane ke Titita, ngke arona bwa I aki tangiriko, N na bon aki tabe n te bwai ae e riki iaon am mition. Ma I bon tangiriko, ao ibukina bwa I tangiriko, I tabeaianga n aron am kaangaanga. Ngaia are I kaoko bwa ko na bitii anuam akanne ao matoatoan nanom, ao karaoa te bai are e tangiria te Uea mairoum.”

Ni katoa tai ngkana I nako n intawiu ma mitinare, I tataro moa ibukin te bwaintangira n te tangira ae Itiaki bwa I aonga ni kona n nooriia mitinare mwaane ao aine n aron are e nooria te Uea.

Imwain aia Maungatabu mitinare, Titita Palmer ao Ngai ti butimwaia mitinare n tatabemaniia nako temanna imwiin temanna, N na bae n tei ao n tarai mataia, taraiia—ni karaoa te intawiu ma ngaiia n akea aia kaangaanga—ao a na nako raoi baai ni kabane, I kaonaki n te tangira ae korakora ibukiia nati mwane ao aine aika kakaawaki iroun te Atua.

I a tia n reiakin reirei iaon bitakin maiu aika a bati man te bwai ae I rinanona aei ma Mareko mwakoro 10. Aikai aua man reirei aikai ake I kakoaua bwa a na ibuobuoki nakoira n tatabemaniira:

1. Ngkai ti reiakinna n noorira i bon iroura ngkai e nooria te Uea man matara, ara tangira ibukiia e na rikirake ao e na korakora nanora ni kan buokiia. Ti na noora aia konabwai tabeman are a kona n aki kona n nooria i bon irouia. Ma ana tangira Kristo ti na bon aki maaku n taetae n ninikoria, ma “te tangira ae kororaoi ni kanakoa te maaku.”⁴ Ao ti na bon aki bwarannano, n uringnga bwa naake e kaangaanga tangiraia bon ngaia aika a rang kainnanoa riki te tangira.

2. Akea te reirei ke reiakinana ae e kona n riki ngkana e karaoaki inanon te teennano ke te un, ao naano a na bon aki bitaki ngkana e aki oti te tangira. Ngkana ti karaoia bwa ngaira kaaro, taan reirei, ke taan kairiiri, te reirei ni koaua e na bon tii riki n te tabo n onimaki nakon te tabo ni kabuakaka. Mweengara a riai n tainako ni kamanoaki ibukiia natira—tiaki te tabo ae kiriwe.

3. Te tangira e riai n aki anaaki mai iroun te teei, te rao, ke kain te utu are e kabwaka ni maiuakina are e kantaningaaki. Ti aki ataia bwa tera ae e riki nakon te kairake are e kaubwai ngke e nako ma te nanokawaki, ma I ataia bwa Iesu e bon teimatoa n tangiria e ngae ngke e rinea te kawai ae e bebete riki. Tao imwiina inanon te maiu, ngke e kunea bwa e a bane kaubwaina, e uringa ao e karaoa are e a tia n rinanona ma te Uea e tangiria, ao ni kaoa bwa e na iriiria.

4. Ibukina bwa E tangiriira, te Uea e kantaninga ae mwaiti mai iroura. Ngkana ti nanorinano, ti na butimwaea ana kakao te Uea nakon te rairannano, n anganano, ao ni beku bwa kaotan Ana tangira ae kororaoi ibukira. Ti na ataia bwa te kakao nakon te rairannano bon karekean te bwaintangira n te kabwarabure ao te rau. Ai ngaia are, “ko na tai riba … kataeream n reireiaki iroun te Iehova, ao e na tai toki nanom ngkana ko booaki irouna: Ba ane e tangiria Iehova e kamarakia n reireia.”⁵

Tariu ao mwaaneu, ngkai n te tai are ko namakinna bwa ko tuangaki bwa ko na karaoa te bwai ae matoatoa—katuka te anua ae buakaka ke te anua ae kareke, katikui bwain te aonaaba, katikui bwaai ake ko tatangiria ibukina bwa te Tabati, kabwara ana bure temanna are e bure nakoim—iangoa te Uea n taraiko, n tangiriko, ao ni kaoko bwa ko na kanakoa ao n n I riria. Ao karabwa ibukina bwa e tangiriko ao e kaoiko bwa ko na karaoa ae mwaiti riki.

I kakoaua ara Tia Kamaiu, Iesu Kristo, ao n ingainga nakon te bong are E na mwaneira ni baina n tatabemaniira, n taraira ao ni katobibiira n Ana tangiraae kororaoi. N aran Iesu Kristo, amen.