Im Jisōs Ej Lale E im Yokwe E

Jet iiō ko remootļo̧k ke kar kūr eō, ippān lio pāleeō, Jacqui, n̄an tōl Washington Spoken Mission. Kōm kar itakļo̧k ilo mijen eo kōn en̄jake jim̧or lōļn̄o̧n̄ im laudin̄din̄ kōn eddo in jerbal eo kōn elōn̄ mijinede ro reddik rekabwilōn̄lōn̄. Raar itok jān elōn̄ kain jekjek in mour ko rokoktak im m̧ōkaj aer erom ļaddik im leddik ro nejim make.

Men̄e elōn̄ wōt iaer raar kanooj em̧m̧an aer jerbal, jet raar kakkōt wōt ippān kōtmene ko routiej an kūr eo aer. Ij keememej juon mijinede eaar jiron̄ eō, “Būreejtōn, ijjab kōņaan armej.” Jet raar jiron̄ eō ejako limo eo aer n̄an ļoor kakien ko reppen an mijinede. Iaar inepata im ļōmņak ta eo kōmij aikuj kōm̧m̧ane n̄an ukōt būruwōn mijinede ro me rejjab ellōn̄ me rejjan̄in kar katak lan̄lōn̄ eo an pokake.

Juon raan ke iaar ettōr ilo meļaaj in wiit ko ilo juon iaļ em̧m̧an ilo ikōtaan Washington–Idaho, iaaar ron̄jake juon kejet kōn Kallim̧ur Ekāāl. Ke iaar ron̄jake juon bwebwenato ijeļā kōn ļaddik eo em̧wie kar etal n̄an Rilo̧mo̧o̧r eo n̄an kajjitōk ta eo emaron̄ kōm̧m̧an n̄an bōk mour indeeo, iaar bōk juon revelesōn aō make eo jab kōtmene kake bōtaab m̧wilaļ bwe kiiō ej juon ememļo̧kjeņ ekwojarjar.

Ālkin an Jisōs kōnono kien ko im likao eo eaar uwaak bwe em̧ōj an kōm̧m̧ani aolepāer jān ke eaar jodikdik, iaar ron̄jake kajim̧we eo em̧m̧an an Rilo̧mo̧o̧r eo: “Juon men eo kwōj aikuji: … wiakake men ko otemjej am̧, im … itok, … ļoor eō.”¹ Ak n̄an bwilōn̄ eo aō, ijello̧kin iaar ron̄ jiljino naan ko m̧okta jān eoon ko me āinwōt ijjan̄in kar ron̄ ak riiti m̧okta. Eaar āinwōt eļan̄n̄e raar kobaiki n̄an jeje ko rekwojarjar. Iaar bwilōn̄ kōn meļeļe eo eim̧we me eaar waļo̧k tok.

Ta naan kein jiljino me eaar kanooj ļap kilaer? Ron̄jake n̄an lo eļan̄n̄e komaron̄ kūli naan kein me āinwōt rejjab kāāl, jab loi ilo bok in gospel ko jet ak loi wōt ilo Gosepl eo an Mark:

“Juon ej tōrtok … im kajjitōk ippān, Ri Kaki Em̧m̧an, ta eo in kōm̧m̧an bwe en aō jolōt mour indeeo?

“Im Jisōs e ba n̄an e, …

“Kwōn jeļā kien ko, Kwōn jab ļōn̄, Kwōn jab uror, Kwōn jab ko̧o̧t, Kwōn jab riab ņae, Kwōn jab m̧an, Kwōn koutiej jemam̧ im jinōm̧.

“Im e uwaak … , Ri Kaki, men kein otemjej I ar kōjparoki jān iien aō ajri.

“Im Jisōs ej lale e im yokwe e, im e ba n̄an e, Juon men eo kwoj aikuj: kwōn ilo̧k im wiakaki men ko otemjej am̧, im leļo̧k n̄an ro ri jeram̧ōl, im enaaj wōr m̧weiōm̧ i lan̄: im itok, im ļoor eō.”²

“Im Jisōs ej lale e im yokwe e.”

Ke iaar ron̄ naan kein, juon pija ealikkar eaar kaobrak ļōmņak eo aō kōn an ad Irooj bōjrak im lale likao eo. Lale—āinwōt lale ilo m̧wilaļ im tōļon̄e jetōb eo an, kile em̧m̧an eo an im barāinwōt aorōk eo an, barāinwōt jeļā aikuj eo an eļaptata. likao eo.

Innām naan ko relemwaan—Jisōs eaar iakwe e. Eaar en̄jake iakwe eo etōr jān jon̄an im meanwōd eo n̄an likao in em̧m̧an, im kōnkōnke kōn an iakwe, im kōn iakwe in, em̧ool eaar ļapļo̧k an Jisōs kajjitikini. Iaar pijaik ta eo eaar āinwōt n̄an likao in ilo an jepooļ kōn kain iakwe in em̧ool ilo an kar kajjitōk n̄an kōm̧m̧ane juon men ekanooj in kar ļap an pen n̄an wia kake aolep men ko m̧wien im liļo̧k n̄an rijeram̧ōl.

Ilo iien eo, iaar jeļā eaar jab wōt būruwōn jet iaan mijinede ro am me raar aikuj in oktak. Eaar barāiwōt būruwō. Kajjitōk eo eaar jako an “Ekōjkan an juon mijen būreejtōn inepata kōm̧m̧an bwe juon mijinede en em̧m̧anļo̧k m̧wilin? Ijello̧kin, kajjitōk eo eaar “Ekōjkan aō maron̄ obrak kōn iakwe eo an Kraist, bwe mijinede eo en maron̄ en̄jake iakwe eo an Anij jān n̄a im kōņaan oktak?” Ekōjkan aō maron̄ lale ļeo ak lio ilo ejja wāween eo Irooj ej lale likao rim̧wie eo, lo er kōn wōn lukkuun er im wōn eo remaron̄ erom, ijello̧kin baj wōt jān ta eo rej kōm̧m̧ane ak jab kōm̧m̧ane? Ekōjkan aō maron̄ eromļo̧k āinwōt Rilo̧mo̧or?

“Im Jisōs ej lale e im yokwe e.”

Jān iien eo m̧aanļo̧k, ke iaar bukwelōlō ippān mijinede eo edik ej kakkōt kōn jet m̧ōttan pokake, ilowaan būruwō ijeļā ij kiiō lo juon likao ak jiron̄ etiljek me eaar jerbal bwe ikdeelel eo n̄an itok n̄an juon mijen. Innām iaar maron̄ in ba kōn aolep en̄jake āinwōt me an juon jemen ak jenen ejouj:³ “Elder ak Sister, eļan̄n̄e ijjab iakwe eok, iban kar kea kōn ta eo ej waļo̧k ilo mijen eo am̧. Bōtaab ij iakwe eok, im kōnke ij iakwe eok, ij kea kōn wōn eo kwōj erom. Kōn menin ij kūr eok n̄an ukōt men ko me rej eppen n̄an eok im erom wōn eo Irooj ekōņaan bwe kwōn erom.”

Kajjojo iien iaar intōrpiuik mijinede ro, iaar m̧oktata jar kōn menin letok eo an iakwe eo em̧ool bwe in maron̄ lo kajjojo elder im sister āinwōt an Irooj lo er.

M̧okta jān kweilo̧k ko an zone, āinwōt an Sister Palmer im n̄a kar iak iakwe kajjojo mijinede juon illo̧k juon, ikōn bōjrak im kanooj kalimjōk mejāer, lale er—juon intōrpiu ejjeļo̧k naan—innām ilo ejjeļo̧k likjab, iaar obrak kōn lakwe eļap n̄an ļaddik im leddik rein raorōk nejin Anij.

Iaar katak elōn̄ katak ko rej ukōt-mour jān en̄jake ko aō make rem̧wilaļ kōn jepta10 in Mark. Ijin rej katak ko emān ij tōmak renaaj jipan̄ kajjojo iaad:

1. Ilo ad katak n̄an lo ro jet āinwōt an Irooj lo er ijello̧kin kōn mejād make, ad iakwe n̄an er enaaj eddōkļo̧k im barāinwōt ad ikdeelel n̄an jipan̄ er. Jenaaj lo kōjatdikdik eo ilo ro jet me reban lo ilo er make. Kōn iakwe āinwōt an Kraist jejjamin naaj lōļn̄o̧n̄ n̄an kōnono kōn peran, bwe “yokwe e weeppān ej joļo̧k lōļn̄o̧n̄.”⁴ Im jejjamin naaj ebbeer, keememej bwe ro me epen tata iakwe er aikuj iakwe er eļap tata.

2. Ejjeļo̧k katakin ak katak enaaj n̄an jidik waļo̧k n̄e kōm̧m̧ane ilo inepata ak illu, im bōro ko rejjamin naaj ukōt ijo iakwe ejjab pād ie. Men̄e jej jerbale eddo ko ad āinwōt ro jinen im jemen, rūkaki ro, ak ritōl ro, katak m̧ool enaaj waļo̧k wōt ilo juon mejatoto in lōke ijello̧kin kaje. Im̧ōko im̧ōd rej aikuj iien otemjej jikin em̧m̧an n̄an ro nejid—en jab juon jikin enana.

3. Iakwe ejjab aikuj n̄an jidik bōjrak n̄ej juon ajri, m̧ōttan, ak uwaan baam̧le eo ej likjab n̄an mour ekkar n̄an kōtmene ko. Jejjab jeļā ta eo eaar waļo̧k n̄an likao eo em̧wie ālkin an ilo̧k būrom̧ōj, bōtaab ij lōke Jisōs ej iakwe wōt e jekdo̧o̧n eļan̄n̄e eaar kālet iaļ eo epidodoļo̧k. Bōlen tokālik ilo mour eo an, ilo an kar lo m̧weiuk ko an rōjaorōk, eaar keememej im jerbale en̄jake eo emake kōn An Irooj lo e, iakwe e, im karuwaineneik e n̄an ļoor E.

4. Kōnke Ej iakwe kōj, Irooj ej kōtmene eļap jān kōj. Eļan̄n̄e jej ettā, jenaaj karuwaineneik kūr ko an Irooj n̄an ukweļo̧k, n̄an kaarmejete, im n̄an jerbal āinwōt kein kam̧ool an iakwe eo An eweppān n̄an kōj. Ālkin men otemjej, kūr eo n̄an ukweļo̧k ej barāinwōt kūr eo n̄an bōk menin letok eo aiboojoj an jeorļo̧k bōd im aenōm̧m̧ān. Kōn menin, “kwōn jab kajekdo̧o̧n … kaje an Iroj, im jab kijeļo̧k n̄e Ej eno̧uk eok: bwe Irooj ej kajeik eo ej yokwe.”⁵

Ro jeiū im jatū, kiiō jabdewōt iien kwōj en̄jake jabdewōt iien kwōj en̄jake kar kajjitōk ippam̧ n̄an kōm̧m̧ane juon men epen n̄an kōm̧m̧ane—joļo̧k iminene eo enana ak an̄ūrlep eo, likūt iturejet jibadbad ko an laļ in, kaarmejete m̧akūtkūt eo em̧m̧an tata kōnke ej Jabōt, jeorļo̧k bōd an ro jet me raar bōd ņae eok—ļōmņak kōn an Irooj lale lale eok, iakwe eok, im kūr eok n̄an kōtļo̧ke im ļoor E. Im kam̧oolol E kōn An iakwe eok n̄an kūr eok n̄an am̧ kōm̧m̧an eļapļo̧k.

Ij kam̧ool kōn ad Rilo̧mo̧o̧r, Jisōs Kraist, im reim̧aanļo̧k n̄an raan eo n̄e Enaaj likūt pā ko Pein iood kajjojo, lale kōj im atbakoje kōj kōn An iakwe eweppān. Ilo etan Jisōs Kraist, amen.