Ki na iTokani kei na Dauvakatataro ni Lotu

Na cava na vuna me sotava kina e dua e sega nona ibolebole, gagadre, se vakatataro kei rau na daukaulotu ka rogoca na nodrau lesoni? Ia, kivei au na dodomo—noqu domona e dua na goneyalewa, na yacana o Renee. Au a domoni koya, kau sa vinakata meu vakamautaki koya. E duatani o koya ka duatani na nona ivakarau ni bula mai vei ira tale eso na goneyalewa au kila. Ia au sa vinakati koya ka kerea me vakamautaki au—a qai kaya sega!

iVakatakilakila

Elder kei Sisita Costa

Au a veilecayaki. Au nanuma ga niu taleitaki! Au cauravou totoka, yabaki 24, tauri vola mai na koliji ka cakacaka vinaka. A tukuna mai na nona lalawa—ni na vakamautaka ga o koya e dua ena kauti koya ki vaketabu, me na dua na matavuvale tawamudu—ka vakasuka kina na noqu kerekere. Au sa vinakata meu tomana na neirau veimaliwai, kau sa mani vakadonuya meu rogoci rau na daukaulotu. Oqo beka sa inaki dodonu meu sotavi rau na daukaulotu? Ia, e a vakakina vei au.

Na imatai ni gauna meu sotavi rau na daukaulotu, au sega tu ni kila vinaka na ka rau tukuna tiko, kau kaya vakaidina, a rairai sega sara ga niu malele vei rau. Na yaloqu sa sogo tu ki na dua na lotu vou. Au a vinakata ga meu kaya ni rau cala ka rawata na gauna meu uqeti Renee kina me keirau vakamau ga.

Era sa kaulotu oti ka kaulotu tiko nikua na luvequ, kau kila vinaka na solibula era sa cakava na caurvou kei na goneyalewa oqo me ra vakavulica na kosipeli i Jisu Karisito. Ia au mai diva tu oqo keu a vakarorogo vagumatua ga vei Elder Richardson, Elder Farrell, kei Elder Hyland, o iratou na daukaulotu totoka a vakavulici au.

Ia mai na imatai ni noqu lesoni, Au kaya vei kemuni na itokani kei na dauvakatataro ni Lotu: ni gauna ga o sotavi rau kina na daukaulotu, yalovinaka tauri rau vakabibi; rau sa solia tu e rua na yabaki bibi ni nodrau bula me baleti iko ga.

Na imatai ni gauna au a gole kina ki Lotu, au a rogoca kina e vuqa na vosa a sega ni vakaibalebale vei au. O cei o ira na Maqusa? Na cava na Matabete Vaka Eroni? na iSoqosoqo ni Veivukei?

Ke oqo na imatai ni gauna o laki soqoni ni Lotu kina ka o sa vakila ni ko veilecayaki ena ka o sega ni kila, kakua ni leqa! Sa sega talega niu kila rawa. Ia au se nanuma tikoga na veivakauqeti, na yalo vou ni vakacegu kei na reki a yaco vei au. Au a sega ni kila ena gauna o ya, ia na Yalo Tabu a vosa malua tiko ki daligaqu kei na yaloqu, “Oqo e dodonu.”

Meu sa na biuta na lesoni oqo ena dua na yatuvosa: kevaka o sa veilecayaki, kakua ni lomaleqa—nanuma na veika o a vakila; era sa lako mai vua na Kalou.

Ni oti e vica na sota kei rau na daukaulotu, au a sega ni gumatua. Au a vakila niu se bera ni ciqoma e dua na veivakadeitaki ni dina na kosipeli.

Dua na siga, a tarogi au o Renee, “O sa wilika tiko beka na iVola i Momani?”

Au a sauma, “Sega.” Au a vakarogoci rau na daukaulotu—sega beka ni se rauta o ya?

Ni tonawanawa na matana, a vakadeitaka vei au o Renee ni sa kila ni dina na iVola i Momani ka kaya keu vinakata meu kila ni dina, na kena sala ga—mo vakilakila mada—o ya meu wilika! Ka qai kerea!

Wilika, tugana e yalomu, ka “kerea vua na Kalou, na Tamada Tawamudu, ena yaca i Karisito, … ena yalodina, ena lomamudou taucoko, ka vakabauta na Karisito” (Moronai 10:4) ke sa dina na iVola i Momani, ke oqo na Lotu dina.

Ka ikatolu ni lesoni, ena dua ga na yatuvosa: ni ko sa ciqoma na veika oqo—na iVola i Momani—ka o sa vakauqeti mo wilika ka kerea vua na Kalou ke sa dina, cakava sara!

Na iotioti ni ka au sotava meu wasea o ya na veivutuni. Niu sa taura oti taucoko na lesoni ni kaulotu, au se bera ga ni vakadeitaka na veika e gadrevi me veisau kina na noqu bula. Dua na siga a kaya vei au o cauravou daukaulotu yalodei o Elder Cutler e kila ga vakalailai na vosa vaka-Sipeni, “Joaquin, mo tou wilika vata mada na Alama 42, ka na biu kina na yacamu ni tou wilika tiko”

Au nanuma ni ka lialia, ia au a cakava me vaka a kerea o Elder Cutler ka wilika na tikina e 1: “Ia oqo, au kila na luvequ [Joaquin], ni tiko tale eso na ka ko sega ni kila, ka vakaleqa tiko na lomamu.” Isa! Sa vosa tiko vei au na ivola.

Ka keitou a wilika na tikina e 2: “Ia raica oqo, na luvequ [Joaquin], au na vakamacalataka vei iko.” ka sa vakamacalataki na Lutu i Atama.

Kei na tikina e 4: “Ia eda raica ni sa soli tiko e dua na gauna me veivutuni kina [o Joaquin].”

Keitou a wilika tale vakamalua, na veitikina yadua, me yacova ni keitou sa yacova na iotioti ni tolu na tikina. Au a qai sobuti ena dua na kaukauwa. Sa vosa vakadodonu vei au na ivola, kau sa tekivu tagi niu wilika, “Ia oqo, [Joaquin,] na luvequ, au gadreva me kakua tale ni vakaleqa tiko na lomamu na veika oqo; ia mo kauwaitaka ga na nomu ivalavala ca ka na vakavuna mo veivutunitaka sara” (tikina e 29).

Au sa mai kila oqo niu a namaka meu ciqoma na ivakatakila ka sega ni sauma na kena isau.Me yacova o ya au se bera mada ni vosa vakaidina vua na Kalou, kei na vakasama ni vosa vua e dua a sega ni tiko e vaka me ka lialia. Sa gadrevi meu yalomalumalumu ka cakava na ka au a kerei meu cakava, dina ga niu vakasamataka vakavuravura, ni rogorogo baleca.

Ena siga o ya au a dolava na yaloqu vua na Yalo, ka gadreva meu veivutuni, ka vinakata meu sa papitaiso! Ni bera o ya, au a vakasamataka ni veivutuni e ka cala, e veisemati ga ki na ivalavala ca kei na caka cala, ia vakasauri ga au a raica ena dua tale na rarama—ni sa ka dodonu e caramaka na salatu ki na tubucake kei na bula marau.

E tiko oqo nikua o Elder Cutler, kau gadreva meu vakavinavinakataki koya ena nona dolava na mataqu. Na vakatulewa yadua ni noqu bula mai na siga o ya a vakauqeti ena noqu a vakayalomalumalumutaki au, masu meu vosoti, kei na Veisorovaki i Jisu Karisito vei au sa mai tiki ni noqu bula.

Ia na iotioti ni lesoni, ena dua ga na malanivosa: mo veivutuni sega tale ni dua na ka mo na voleka kina vua na Turaga o Jisu Karisito me vakataka na gagadre mo veisau.

Noqu dauvakatataro lomani, itokani ni Lotu, ke o vakarorogo tiko nikua, o sa voleka sara ni yacova yani na reki cecere. O sa voleka sara!

Au sureti kemuni, mai na lomaqu taucoko kei na vu ni yaloqu: lako ka laki papitaiso! Oqori na ka vinaka duadua mo qai cakava. Ena sega walega ni veisautaka na nomu bula ia na nodra bula talega na luvemuni kei na makubumuni.

iVakatakilakila

Na siga ni nodrau vakamau o Elder kei Sister Costa

Sa vakalougatataki au na Turaga ena dua na matavuvale. Au a vakamautaki Renee, ka va na luvei keirau totoka. Ena vuku ni noqu papitaiso, au sa rawa, me vakataki parofita Liai makawa, ni sureti ira me ra kania na vua ni vunikau ni bula, sai koya na loloma ni Kalou (raica na 1 Nifai 8: 15; 11:25). Au sa rawa ni vukei ira me ra lako mai vei Karisito.

Yalovinaka mo ni qai raica na ka au a sotava, ka (1) tauri rau vakabibi na daukaulotu, (2) gole ki lotu ka nanuma na veivakauqeti vakayalo, (3) wilika na iVola i Momani ka kerea na Turaga ke sa ka dina, ka (4) mo veivutuni ka papitaiso.

Au vakadinadinataka ke mo sauma na isau ni ivakatakila, vakayalomalumalumutaki iko, wiliwili, masu, ka veivutuni, ena tadola ko lomalagi ka ko na kila ni o Jisu na Karisito, ni sai Koya na nodaru iVakabula. Ena yacai Jisu Karisito, emeni.