Nakoia Raoraora ao Taan Ukoukora te Ekaretia
Ngkana ko kabwaka boon te kaotioti, ka nanorinanoko, wareware, tataro, ao rairananom, e na kaukaki karawa ao ko na ataia bwa Iesu bon te Kristo.
N tawanoun te Tabati, Tebetembwa 16, 1988, n ana auti ni bootaki te Vicente López Uoote i Buenos Aires, Argentina, I bwabetitoaki bwa kaain Ana Ekaretia Iesu Kristo ibukiia Aika Itiaki ni Boong Aika Kaitira. Raoraou ae moan te raoiroi Alin Spannaus, e bwabetitoai n te bong anne, ao I namakina te kukurei, te bebete, te kan reiakina ae mwaiti riki.
N te bong aei, ao I tangiria n tibwauai reirei aika I reiakin inanon kawaiu nakon te bwabetito—reirei aika I taku bwa a na buoki ngkami aika kam kakauongo aika tiaki kaain te Ekaretia. I tataro bwa nanomi ao ami iango aika korakora a riingaki n te Tamnei, n te kawai are e riingaki iai nanou.
Te Moan, Kaitibo ma Mitinare
Bukin tera te aomata ae akea ana kaangaanga, kainnanona, ke titiraki n iai nanoia e kaitibo ma mitinare ao n ongora nakon aia reirei? Eng, irou bon te tangira—te tangira ibukin te aine, te aine ae arana Renee. I tangira ma ngaia ao I tangiria ni mare ma ngaia. E kaokoro ao iai ana kainibaire aika a kaokoro ma angiia ataeinnaine ae I atai. Ma I rangin n tangiria ao I tuangnga bwa e na mare ma ngai—ao e taku I aki!
I aki ota raoi iai. I taku bwa I rangin n tatanaki! I rangin ni botonimwaane, 24 au ririki, ao e reke au beeba n te kaoreti ao e reke au mwakuri ae tamaroa. E taekin ana kouru—e na mare ma te aomata ae kona ni kairia nakon te tembora, ni karekea te utu ae akea tokina—ao e aki butimwaea au bubuti ibukin te mare. I tangiria n reitanako te reitaki aei, ngaia ae I a ongora irouia mitinare. Aio te tai ae tamaroa ni kaitibo ma mitinare? Eng, bon ibukiu.
Ngke I moa ni kaitibo ma mitinare, I aki ota n angiin bwaai aika a taekin, ao ni koauana raoi, I aki kabanea raoi au iango nakoia. Akea raoi nanou n reirei taekan te aro ae boou. I tangiria ni kakoauaia mitinare n aki tabe ngkana a bure ke aki ma e kakawaki ae n anaa nanon Renee bwa e na mare ma ngai.
N te bong aei natiu a tia ni beku ao ni karaoi aia mitinare, ao I ota n te anganano ae a karaoi ataeinimwaane ao ataeinnaine aikai n reirei taekan ana euangkerio Iesu Kristo. Ngkai I kantaningaia bwa N na kabanea riki au tai nakoia Unimwaane Richardson, Unimwaane Farrell, ao Unimwaane Hyland, mitinare aika tikiraoi aika reireinai.
Ngaia ae, man au moan reirei, I taekinna nakoimi raoraou ao taan ukoukora te Ekaretia: n te tai are ko kaitibo iai ma mitinare, taiaoka ongora irouia; a anga aia ririki aika kakawaki ni maiuia ti ibukim.
Te Kauoua, Nakon te Taromauri
Te moan tai ngke I nakon bootakin te Ekaretia, I ongo taeka aika mwaiti aika I aki ota iai. Antai tenaan Biaiwe? Tera te Nakoanibonga ae te Aaron? te Bootaki n Aine?
Ngkana aio te moan tai ae ko ira bootakin te Ekaretia ao ko namakina te mangaongao man te bwai ae ko aki ota iai, tai raraoma! I aki mwaatai naba iai. Ma I teimatoa n uringa te nano, te namakin ae boou n te rau ao te kimwareirei ae I taneiai iai. I aki ataia n te tai anne, ma te Tamnei ae Raoiroi e wirikiriki nakon taningau ao nakon nanou, “E bon eti aei.”
Ngaia ae N na kakimototoa te reirei aei n teuana te tiententi: Ngkana ko aki ota, tai raraoma—uring namakin aika ko a tia n rinanoi, a roko mairoun te Atua.
Te Kateniua, Warekan Ana Boki Moomon
Imwiin tabeua marooro ma mitinare, I aki karekea te rikirake. I namakinna I tuai ni karekea koauan raoi te euangkerio.
Te bong teuana, e titirakinai Renee, “Ko wareka Ana Boki Moomon?”
I kaeka, “I aki.” I ongora irouia mitinare—e aki tau anne?
Ma rannimatana aika ranran, Renee e kakoaua nakoiu bwa e ataia bwa e koaua Ana Boki Moomon ao e kabwarabwara bwa, ngkana I tangiria n ataia bwa e koaua, ti te kawai bwa—ketinna bwa tera—ko na warekia! Ao ngkanne titiraki!
Warekia, iangoia inanom, ao “titirakina te Atua, te Tama ae Akea tokina, n aran Kristo, … ma te nano ae koaua ma nanomi raoi, te onimaki iroun Kristo” (Moronaai 10:4) ngkana e koaua Ana Boki Moomon, ngkana aio te Ekaretia ae koaua.
Ngaia te kateniua n reirei, e kabwarabwaraaki ni kabongakin te tiententi ae ti teuana:Ngkana ko karekei bwaai aikai—Ana Boki Moomon—ao ko kaungaaki bwa ko na wareware iai n tuanga te Atua ngkana a koaua, ao bon karaoia!
Te Kabanea, Te Rairannano
Te kabanea n atatai ae I tangiria n tibwauaia bon te rairannano. Imwiin ae bane aia reirei mitinare, e aki anaaki naba nanou I tangiria te bitaki nakon maiu. Bon Unimwaane Cutler, te kairake, ni mitinare ae matoatoa ma ana taetae n Tibein ae tau, are n te bong teuana e taku, “Joaquin, ti a uaia ni wareka Aramwa 42, ao ni karina aram ngkana ti warekia.”
I taku bwa e baba, ma I karaoia n aron are tuangai Unimwaane Cutler ao I wareka te kibu 1: “Ao ngkanne natiu ae te mwaane [Joaquin], I nooria bwa iai riki bwaai aika a katabetabea am iango, are ko aki oota iai.” O! E taetae te boki nakoiu.
Ao ti wareware inanon te kibu 2: “Ngkai nooria, natiu ae te mwaane [Joaquin], N na kabwarabwara te bwai aio nakoim,” e kabwarabwaraaki te Karikibwai ao Bwakan Atam.
Ao inanon te kibu 4: “Ao ngaia are ti a nooria, bwa bon iai te tai are e a tia [Joaquin] n anganaki ana tai bwa e na rairananona.”
Ti wareware ni karaurau, te kibu teuana imwiin teuana, ni karokoa ti roko ni kabanean kibu aika teniua. Ngkanne I rootaki n te kairoro ae korakora. Te Boki e taetae ni kaineti nakoiu, ao I moanna n tang ngke I wareware, “Ao ngkai, [Joaquin,] natiu te mwaane, I tangiria bwa a na aki manga katabetabeaki bwaai aikai, n te katabetabe are e na uotiko … nakon te rairannano” (te kibu 29).
I namakinna bwa I a tia ni kantaningaia ni karekea te kaotioti n akean karaoan te mwakuri ae riai ni karaoaki. Man te tai anne I tuai man taetae raoi nakon te Atua, ao te iango n taetae nakon temanna ae akea rabwatana e taraa n nanobaba. N na nanorinano ao ni karaoa te bwai ae I a tia n tuangaki bwa N na karaoia e ngae ngke, n au iango n aon te aba, e taraa ni burababa.
N te bong anne I kauka nanou nakon te Tamnei, n tangiria n raira nanou, ao n tangiria ni bwabetitoaki! Imwain te tai anne, I a tia n iangoa te rairannano bwa te bwai ae aki raoiroi, e irekereke riki ma te bure ao karaoan bwaai aika bure, ma n te tai ae waekoa I nooria n te taratara ae kaokoro—I a ataia bwa te bwai ae aki raoiroi are e riki bwa te totoko nakon te rikirake ao te kukurei.
Unimwaane Cutler ae mena irarikira n te bong aei, ao I tangiria ni kaitaua ibukin kaotaakiu. Iango ni kabane ake I a tia ni karaoi ni maiu man te tai anne ngke I kananorinanoai, n tataro ibukin kabwaraan au bure, ao Ana Mwakuri ni Kamaiu Iesu Kristo ibukiu e riki bwa mwakoron maiu.
Ngaia are te kabanea n reirei, n taekana teuana: rinanon te rairannano; akea te bwai ae na kaniiko riki nakon te Uea Iesu Kristo irarikin tangiran te bitaki n nano.
Taan kakaae aika tangiraki, raoraou n te Ekaretia, ngkana kam kakauongo n te bong aei, kam a rangin ni kaan nakon te kimwareirei ae korakora. Kam rangin ni kaan!
Kariaia bwa N na kaoko, ma korakoran nanomi ni kabane ao mai kabin nanou: naako ao bwabetitoaki! Bon te kabanea n tamaroa ni bwai ae ko na karaoia. E na bita tiaki ti maium ma maiuia naba natim ao tibum.
E a tia te Uea ni kakabwaiaai ma au utu. I mare ma Renee, ao ni karekeia aman natira aika tikiraoi. Ao ibukin au bwabetito, I kona, n aron te burabeti Riaai are ngkoa, ni kaoia bwa a na kana uaan te aroka ni kamaiu, are bon ana tangira te Atua (taraa 1 Nibwaai 8:15; 11:25). I kona ni buokiia bwa a na nakon Kristo.
Ngaia ae taiaoka iangoa au atatai, ao (1) ongora irouia mitinare n te aki mani kangare, (2) naako nakon te taromauri ao uring namakin n tamnei, (3) wareka Ana Boki Moomon ao titirakina te Atua ngkana e koaua, ao (4) rinanon te rairannano ao te bwabetitoaki.
I kakoaua nakoim bwa ngkana ko karaoa ae kainnanoaki n te kaotioti, nanorinano, wareware, tataro, ao te rairannano, a na uki karawa ao ko na ataia, n aron ae I ataia, bwa Iesu bon te Kristo, boni Ngaia au Tia Kamaiu ao am Tia Kamaiu naba. N aran Iesu Kristo, amen.