Ohng Kempoakepah kan oh Soun Ropirop kan en Rongamwahu wet
Ma ke pahn alehda kaudiahl, aktikitikla, wadawad, kapakap, oh koluhla, wenihmw en nanleng pahn retdahng uhk oh ke pahn ese me Sises iei Ihme Krais.
Mwurin souwas en Nialem ehu, ni Septempe 16,1988, nan wasahn sarawi en Vicente Lopez nan Buenos, Aires, Argentina, I pepdaislahr oh towelahr Mwomwohdiso en Sises Krais en Souleng en Imwin rahn akan. Kempoakepahi men, Alin Spannaus, me pepdaisih ie rahno, oh I ahneki pepehm en peren, marahra, oh inengieng esehla me tohto.
Rahnwet I men ehukihda soahngkei me I eselahr ni ahi songosong en pepdaisla—soahng kei me I koapwoaroapwoarki kak sewesei kumwail me rongorong me saikinte wia tohn Mwomwohdiso wet. I kapakapki me amwail pepehm oh madamadau kak kehn Ngehno duwehte ah sair ahi mohngiong.
Keiou, Tuhweng Misineri kan
Dahme aramas emen me sohte ah kahpwal laud, anahn, de peidek pahn inangiheki tuhweng misineri kan oh rong arail padahk kan? Ohng ie limpoak me kahrehda—limpoak ehng serepein men, serepein men me adaniki Renee. I inenen mwahukidahr, oh men pwoudikihda. Serepein menet weksang mehteikan oh ah koasoandi weksang serepein pwulopwul tohto kan me I ese. Ahpw I mwahukihda oh peki reh sen pwopwoudla—oh e inda soh!
I pingkihda. I leme me koaros pahn men pwoudkinie! I masamwahu, sounpar 24[rieisek pahieu], oh I neksangehr skuhl oh doadoahk mwahu. E koasoaia ah koasoandi kan—iei en pwoudkihla emen me kak wahla nan tehnpas sarawi, pwehn ahneki peneinei soutik—oh e sohte pwungki ahi pekipek en pwopwoudo. I men nan pwungat en duweduwehte, eri I pwungkihda me I pahn rong padahk en misineri koa. Kahrepe mwahu ieu met ohng tuhweng misineri kan? Ei, e mwahu ohng ie.
Ansou me I tepin tuhweng misineri koa, I sohte wehwehki soahng tohto me ira kosoia, oh pwe I en mehlel ohng uhk, I sohte nohn tehk ara padahko. I sohte inangih esehla duwen ehu pelien lamalam. I mwahukihte kasalehda me ira sapwung oh ahneki ansou mwahu en wekidala en Renee lamalam pwe en pwoudkiniehla.
Rahnwet nei serihkan papahier oh wie papah nan arail misin kan, oh I wehwehki tohnmetei kan me pwutak oh serepein pwulopwul pwukat kin wia pwe irail en padahngki rongamwahu en Sises Krais. Met I mentehnoh I kin tehk mwahu Elder Richardson, Elder Farrell, oh Elder Hyland, misineri mwahu koa me padahkihie mahso.
Eri, ohng keioun ahi padahk, I indahng kumwail kempoakepen oh soun ropiropen Mwomwohdiso wet: ni omw pahn tuhweng misineri kan, menlau mehlel ohng irail, irail tohnmeteikihla ansou kesempwal nan arail mour pwehki kumwail.
Keriau, Kohla Sarawi
Tepin ahi towehda ehu kaudek en Mwomwohdiso wet, I rongada lepin lokaia tohto me I sohte wehwehki. Ihs irail me Beehive? Dahkot Prisduhd en Aron? Relief Society?
Ma ehdin omw iang towehda ehu kaudek nan Mwomwohdiso wet oh mie mehkot me ke sohte wehwehki, dehr pwunodki! I pil sohte wehwehki mehkot mahs. Ahpw I tamatamante pepehm koa, pepehm kapw en meleilei oh peren me I ahnekio. Ansouo I sohte ese, ahpw Ngehn Sarawi mwenginingin ohng nan salengei kat oh ahi mohngionget, “Mepwukat pwung.”
Eri mweidehngie ien oaralapih padahk wet nan ehu lepin koasoai:Ma ke sohte wehwehki, dehr pwunodki—tamataman pepehm koa me ke ahnekiher; irail kohsang rehn koht.
Kesiluh, Wadwadek Pwuhk en Mormon
Mwurin ahi tuhwengehr misineri koa pangkei, I sohte kin nohn kekeirda. I pehm me I saikinte alehdi kamehlel ehu ohng mehlelpen rongamwahu wet.
Ehu rahno, Renee idek rehi, “Ke wadwadek Pwuhk en Mormon?”
I sapengki, “Soh.” I rongorong misineri koa— sohte itar mwo?
Ni pilen mese ah kerpene, Renee inou kihengie me e ese me Pwuhk en Mormon mehlel oh kawehwe iengie me, ma I men ese ma e mehlel, ihte ahl iei—ke inda dah—wadek pwuhko! Oh eri idek!
Wadek, poaden medemedewe nan omw mohngiong, oh “peki Koht, Sahm Soutik, ni mwaren Krais, … ni mohngiong mehlel, ni ineng mehlel, sang ni amwail pwoson Krais,” (Moroni 10:4) ma Pwuhk en Mormon mehlel, ma met iei Mwomwohdiso mehlelo.
Eri, kesiluhn padahk, ni oaralap: Ansou kumwail alehdier mepwukat—Pwuhk en Mormon—oh kumwail alehdier kaweid en wadek oh peki rehn Koht ma irail mehlel, menlau kumwail udahte wia!
Keimwsekla, Koluhla
Keimwseklahn dahme I lelehngehr me I men ehukihda pid koluhla. Mwurin ahi neksangehr ale en misineri kan arail padahk koa, I pil sohte kamehlele me I anahne wekidala mehkot nan ahi mour. Elder Cutler, misineri pwulopwul, eimah men me sohte nohn ese lokaiahn Spanish, me ehu rahno kosoaia, “Joaquin, kita wadek pene Alma 42, oh kita pahn doadoahngki edemwen ni ata wadawadek.”
Nan ahi madamadau e mwomw likamw, ahpw I wia dahme Elder Cutler indahu oh wadek ire tikitik 1: “Oh met, nei pwutak [Joaquin], I esehier me mie mehkei me kin kapwunode nan ahmw lamalam, me komw sohte kak wehwehkihla.” Oh! Pwuhko dokdokeie.
Oh se wadek ire tikitik 2: riau]: “Met kilang, nei pwutak [Joaquin], I pahn kawehwe ohng uhk meuwet,” oh eri Kepikipikdahu oh Pwupwilahn Adam’o ahpw kawehwehda.
Oh eri iretikitik 4[pahieu] : “Oh met kitail wehwehkier, me mie ansou ehu me mweimweiong [Joaquin] en koluhla.”
Se doula oh wie wadawad wawai, ehu ire mwuri ehu, oh kiht lela ni ire tikitik siluh me kaimwsakalahu. Eri mehkot kehlail ehu ahpw lelehng ie. Pwuhko loklokaia dokdokei ie, oh I tepida sengiseng ni ahi wie wadawad, “Eri met, [Joaquin,] nei pwutak, I men kowe en dehr mweidohng mepwukat en kin kedirepwe iuk, oh ihte mweidohng dipomw akan en kin kedirepwe iuk, sang ni kediropw wet e pahn kahrehieng uhk en … koluhla” (iretikitik 29).
I esedahr met me I kasik I en alehdi kaudiahl ni ahi sohte kin nantiheng. Mwohn ansouo sohte pak ehu I kapakap ohng Koht, oh medewe loklokaiahng aramas men me sohte mie pwe mwomwen kapweipwei. I anahne karakarahkala oh wia dahme irail peki I en wia menda ma, nan ahi madamadau en sampaht, mwomwen mwohmw likamw.
Rahno I ritingehng ahi mohngiong Ngehno, inangihada koluhla, oh mentenoh pepdaisla! Mwohn ansouo, I kin medewe me koluhla mehkot sohte mwahu, me pidete dihp oh wiewia sapwung, ahpw I mwadangete wehwehkihda ni ahi madamadau eh wekila—sang dahme I kin wehwehki me e wia mehkot mwahu me powehdi mehn perehre kan ohng keirda oh peren.
Elder Cutler mih met rahnwet, oh I men kaping ohng ih pwehki ah sewese ie I en wehwehkihla. Koasoandi koaros I wiadahr nan ahi mour mwurin rahno kaweidsangehr ansou me I karakarahkalahu, kapakapki mahk, oh Tomwpen Sises Krais ohng pein ngehi wialahr kisehn ahi mour.
Eri imwilahn ahi padahk, ni ehu oralap: Song duen koluhla, sohte mehkot kak kakerenihiukehng Kaun Sises sang ineng en wekila.
Soun ropirop kesempwal, kempoakepahn Mwomwohdiso wet, ma ke rongorong rahnwet, ke udahn karaniher alehdi peren keioun laud. Ke kerenlahr!
Mweidehng ie I en lukeiuk, sang ni kehl en ahi mohngiong unsek: oh sang wasa keioun loal en nan ngeni, kohla oh pepdaisla! E wia mehkot me pahn keioun mwahu ke pahn wia. E pahn wekidala kaidehn omw mourte ahpw pil mouren noumw serihkan oh neirail kan.
Kauno kapaikiniedahr ahi peneinei. I pwoudkihla Renee, oh nait seri masamwahu pahmen. Oh pwehki ahi pepdaisla, I kak, duwehte Soukohp Lehi en mahso, luke irail en alehda wahn tukehn komouro, me wia limpoak en Koht (tehk 1 Nephi 8:15; 11:25). I kak sewese irail en kohdo rehn Krais.
Eri menlau medewe mwahu soahng kan me I lelehngehr, oh (1) keiou] mehlelieng misineri kan, (2) keriau] kohla sarawi oh tamataman pepehm en ngehno, (3) kesiluh] wadek Pwuhk en Mormon oh idek rehn Kauno ma e mehlel, oh (4) kapahieu] song duwen koluhla oh pepdaisla.
I kadehdehieng kumwail me ma kumwail wia dahme anahn pwehn alehdi kaudiahl, karakarahkala, wadawad, kapakap, oh koluhla, nanleng pahn ritida oh ke pahn ese, duwehte ahi ese, me Sises iei me Krais, Ihme ahi Sounkomour oh Ih iei ahmw. Ni mwaren Sises Krais, ahmen.