I Uo ma Tagata Sailiili o le Ekalesia
Afai e te totogia le tau o faaaliga, lotomaualalo oe lava, faitau, tatalo, ma salamo, o le a matala mai le lagi ma o le a e silafia ai o Iesu o le Keriso.
I le aoauli o le aso Faraile, 16 Setema1988, i le falelotu o le Uarota a Vicente López i Buenos Aires, Atenitina, sa papatiso ai au o se tagata o Le Ekalesia a Iesu Keriso o le Au Paia o Aso e Gata Ai. Sa papatiso au e se uo lelei i lena aso, ma sa ou lagona le fiafia, mafanafana, ma le naunau e aoao atili.
Ou te fia faasoa atu i le aso ni lesona sa ou aoaoina i lo’u ala i le liua—o lesona ou te faamoemoe e mafai ona fesoasoani ia te outou o loo faafofoga mai e le o ni tagata o le Ekalesia.Ou te tatalo ina ia pa’i atu le Agaga i o outou loto e pei o au.
Muamua, Feiloai i Faifeautalai
Aisea e manao ai se tagata e aunoa ma ni luitau faamalosi, manaoga, po o ni fesili e feiloai i faifeautalai ma faalogo i a latou lesona? Ia, mo au o le alofa—o le alofa mo se teine, o se teine e suafa ia Renee. Sa ou alofa ia te ia, ma sa ou manao e faaipoipo ia te ia. Sa ese o ia ma sa i ai ni tulaga faatonuina e ese mai le tele o tamaitai talavou sa ou iloa. Ae sa ou alofa ia te ia ma talosagaina o ia e faaipoipo ia te au—ma sa ia fai mai e leai!
Sa ou lē mautonu. Sa ou faapea ou te aulelei! Sa ou aulelei, 24 tausaga le matua, ma o sē na faauu mai le kolisi faatasi ma se galuega lelei tele. Sa ia talanoa e uiga i ana sini—o le faaipoipo atu i se tasi na te mafai ona ave o ia i le malumalu—ma sa ia teena lau talosaga. Sa ou manao e faaauau le faigauo, o lea sa ou ioe ai e faalogo i faifeautalai. Pe o se mafuaaga lelei ea lenei e feiloai ai i faifeautalai? Ia, sa lelei mo au.
Ina ua ou feiloai i faifeautalai mo le taimi muamua, ou te lei malamalama tele i mea sa la tau mai, ma e tau atu le mea moni ia te outou, masalo sa ou le faalogo tele ia i laua. Ou te lei fia faalogo i se tapuaiga fou. Sa na o lou manao lava e tau atu e sese i latou ma maua le taimi e tauanau ai Renee e faaipoipo pea ia te au.
I le aso, sa auauna atu lau fanau ma o loo auauna atu i misiona, ma ou te malamalama i osigataulaga o loo faia e nei alii ma tamaitai talavou e aoao atu le talalelei a Iesu Keriso. Ia ou te momoo maimau pe ana ou gauai atili atu ia Elder Richardson, Elder Farrell, ma Elder Hyland, o faifeautalai lelei tele na aoaoina au.
O lea, mai la’u lesona muamua, ou te faapea atu ia te outou o uo ma tagata sailiili o le Ekalesia: o le taimi tou te feiloai ai i faifeautalai, faamolemole ia gauai atoatoa ia i latou, ua latou tuu atu tausaga taua o o latou olaga mo outou.
Lua, Alu i le Lotu
O le taimi muamua sa ou auai ai i se sauniga Lotu, e tele upu sa ou faalogo i ai ou te lei malamalama i ai. O ai sa avea ma Ofagapi? O le a le Peristiua Arona? o le Aualofa?
Afai o le taimi muamua lenei ua e auai ai i se sauniga Lotu ma o loo e lagona le lē mautonu i se mea e te le malamalama ai, aua le popole! Sa leai foi sou iloa. Ae ou te manatua pea lagona, lagona fou o le filemu ma le olioli sa ou oo i ai.Ou te le’i iloa i lena taimi, ae sa musumusu mai le Agaga Paia i ou taliga ma i lou loto,“E sao le mea lenei.”
Ia sei ou tuuina atu lenei lesona i se fuaiupu se tasi: afai o e lē mautonu, aua le popole—manatua lagona na e oo i ai; o na lagona e sau mai le Atua.
Tolu, Faitauina o le Tusi a Mamona
I le mavae ai o nai feiloaiga ma faifeautalai, sa ou le alualu tele i luma. Sa ou lagona ou te le’i mauaina se faamautinoaga o le moni a’ia’i o le talalelei.
I se tasi aso, sa fesili mai Renee ia te au, “O e faitauina le Tusi a Mamona?”
Sa ou tali atu, “Leai.” Sa ou faalogo i faifeautalai—e lē lava ea lena mea?
Ma loimata i ona fofoga, sa faamautinoa mai e Renee ia te au sa ia iloa e moni le Tusi a Mamona ma faamatala mai, a ou manao e iloa pe moni, na o le pau le auala o le—mate mai la—ia faitau i ai! Ona ole atu lea!
Faitau, mafaufau i o outou loto, ma “ole atu i le Atua, le Tama Faavavau, i le suafa o Iesu Keriso, … ma le loto faamaoni, ma le manatu moni i ai, ma le faatuatua ia Keriso” (Moronae 10:4) pe moni le Tusi a Mamona, pe o le Ekalesia moni ea lenei.
O le lesona lona tolu la, i se fuaiupu se tasi: pe a outou maua nei mea—le Tusi a Mamona—ma ua apoapoaiina oe e faitau ma ole atu i le Atua pe moni nei mea, tau lava o le fai!
Mulimuli, Salamo
O le aafiaga mulimuli ou te manao e faasoa atu, o le salamo. Ina ua maea ona ou aoao uma i lesona a faifeautalai, ou te lei talitonu lava ou te manaomia ona sui se mea i lou olaga. O le Alii faifeautalai o Cutler, o se alii talavou mautinoa ma sina faaSipaniolo, sa fai mai i se tasi o aso, “Joaquin, ta faitau faatasi le Alema 42, ma o le a ta tuu i ai lou igoa a o ta faitauina.”
Sa ou manatu e faavalevalea, ae sa ou faia e pei ona fai mai ai Elder Cutler ma faitau i le fuaiupu 1: “Ma o lenei, lo’u atalii e [Joaquin], ua ou vaai ua i ai isi mea e tele teisi atu ua popole i ai lou mafaufau, ia ua le mafai ona e malamalama i ai.” Oi! Sa talanoa mai le Tusi ia te au.
Ma sa ma faitau i le fuaiupu 2: “O lenei faauta, lo’u atalii e [Joaquin], o le a ou faamalamalama atu ia te oe lenei mea,” ma ona faamatala mai ai lea o le Pau o Atamu.
Ona sosoo ai lea i le fuaiupu 4: “Ma ua faapea ona tatou vaai ai, e i ai se taimi ua tuu mai [ia] [Joaquin] e salamo ai.”
Sa ma faaauau le faitauina lemu, fuaiupu i le fuaiupu, seia ma taunuu i fuaiupu mulimuli e tolu. Ona taia lea o au e se mana malosi. Sa talanoa sao mai le tusi ia te au, ma sa amata ona ou tagi a o ou faitauina, “Ma o lenei, [Joaquin,] lo’u atalii e, ou te manao ia e tuu nei mea ia le toe faalavelave ia te oe, ae ia nao au agasala ia e popole i ai, le popole lena e aumai ai oe … i le salamo” (fuaiupu 29).
Ua ou iloa nei sa ou faamoemoe e maua le faaaliga e aunoa ma le faia o le taumafaiga e manaomia. Seia oo i lena taimi, ou te lei talanoa moni lava i le Atua, ma o le manatu e talanoa i se tasi e le o i ai iina na foliga faavalevalea. Sa ao ona faamaualalo au lava ma fai le mea sa talosagaina au e fai e tusa lava pe, i lou mafaufau faalelalolagi, e pei e faavalevalea.
Sa tatala atu lou loto i lena aso i le Agaga, manao ia salamo, ma manao ia papatiso! A o lei oo i lena taimi, sa ou mafaufau i le salamo o se mea e lē lelei, e na o le agasala ma mea sese e fesootai ai, ae sa faafuasei lava ona ou vaaia i se malamalama—e pei o se mea lelei sa faamamaina le ala i le tuputupu ae ma le fiafia.
O loo iinei Elder Cutler i le aso, ma ou te fia faafetai atu ia te ia mo le fesoasoani mai ia te au ina ia ou malamalama. O faaiuga uma sa ou faia i lou olaga talu mai lena taimi sa uunaia e lena taimi sa ou faalotomaualaloina ai au lava, tatalo mo le faamagaloga, ma o le Togiola a Iesu Keriso mo au na avea ma vaega o lou olaga.
Ia o le lesona mulimuli, i se faaupuga e tasi: ia faatino le salamo; e leai se mea e te latalata atili ai i le Alii o Iesu Keriso i lo se manao e suia.
Ou tagata sailiili pele, uo o le Ekalesia, afai o e faafofoga mai i le aso, ua e latalata tele i le ausiaina o le olioli silisili Ua e latalata lava!
Ou te valaaulia outou, ma le malosi atoa o lou loto, ma mai i le taele o lou agaga, o atu ma ia papatisoina! O le mea silisili lava lea e te faia. E le gata e suia ai lou olaga ae faapena foi olaga o lau fanau ma fanau a fanau.
Ua faamanuiaina a’u e le Alii i se aiga. Sa ou faaipoipo ia Renee, ma e toafa le ma fanau aulelei. Ma ona o lo’u papatisoga, ou te mafaia ai, e pei o le perofeta o Liae anamua, ona valaaulia i latou e aai i le fua o le laau o le ola, o le alofa lea o le Atua (tagai 1 Nifae 8:15; 11:25 E mafai ona ou fesoasoani ia i latou e o mai ia Keriso.
O lea, faamolemole ia mafaufau i o’u aafiaga, ma (1) gauai atoatoa i faifeautalai, (2) alu i le lotu ma manatua lagona faaleagaga, (3) faitau le Tusi a Mamona ma ole atu i le Alii pe moni, ma (4) faatino le salamo ma ia papatiso.
Ou te molimau atu ia te outou afai e te totogia le tau o le faaaliga, lotomaualalo oe lava, faitau, tatalo, ma salamo, o le a matala mai le lagi ma o le a e silafia, e pei ona ou iloa, o Iesu o le Keriso, o Ia o lo’u Faaola ma lou Faaola. I le suafa, o Iesu Keriso, amene.