Epinukunuku ewe Samon me Ousap Pereingingino
Sia tongeni angonga manauach won ewe Chon Amanau ren ach sinei I, me I epwe emweni aanach.
Nupwen ua sai non Asia, emon pwii achengicheng a feito ren. A turufieino ren poun, me eis, “En mi nuku pwe ei kapas allim mi ennet?” Pwii achengicheng, ngang mi sinei pwe mi ennet. Ua epinukunuku ewe Samon.
Non Proverbs 3:5–6, sia anneani ei aurour:
“Kopwe epinukunuku ewe Samol ren unusen netipom. Kosap epinukunuku met ka ekieki pwe ka sinei:
“Kopwe chechemeni ewe Samol non mettoch meinisin ka fori, iwe epwe pwar ngonuk ewe aan mi pung.”
Ei uwokisin mi fiti ew aurour, ew fon, me ew pwon mi ning. Ekkewe ru aurour: “Kopwe epinukunuku ewe Samon ren unusen netipom” me “kopwe chechemeni ewe Samol non mettoch meinisin ka fori.” Ewe aurour: “Kosap epinukunuku met ka ekieki pwe ka sinei.” Me ewe pwon mi ning: “I epwe pwar ngonuk ewe aan mi pung.”
Sipwe akkom porous usun ewe aurour. Ewe napanapan ach ekieki mi watte ach sipwe ekipwichi. Ewe aurour a kawor non ekkewe kapas “kosap wunneni” —“kosap epinukunuku met ka ekieki pwe ka sinei.” Non fosun Merika ewe kapas epinukunuku a awewen inisich a pereinging ngeni epek. Nupwen sia inisich a pereinging ngeni epek ika pwan ew, sia mwokut seni nukanapan, sise chiwen wenoch, iwe sia turuno. Nupwen sia pereingin non pekin ngun won ach pwisin sinei, sia pereingingino seni ach Chon Amanau. Ika sia pereingin, sise non nukanapan; sise wenechar; sise anonga Kraist.
Pwii kana, chechemeni, non ach manau me mwen fonufan, sia anisi ewe Chon Amanau. Sia nuku I. Sia affata ach aninis, mwasangasang, me pwapwaiti ewe kokkotun pwapwa a for me ren Semach won Nang. Sise pereingingino seni. Sia fiu ne aea ach kapasen pwarata me choni sounfiun Kot, me ekkena sounfiu ra win.”1 Ei maun nefinen och me ngau a mwokut ngeni fonufan. Iwe a pwan wor rech sefan ewe wis mi monomon ne uta pwe chon pwarata me wanong ach nuku non ewe Samon.
Mi auchea sipwe ais: Ifa usun upwe upwe chok nom nukanapan me usapepinukunuku met ua ekieki pwe ua sinei? Ifa usun upwe esinna me tapweno mwirin neuwen ewe Chon Amanau nupwen neuwen fonufan ra pochokun? Ifa usun upwe amari nuku non ewe Chon Amanau?
Upwe pesei unungat aan ne awatteno ach miriti me nuku non ewe Chon Amanau. Kopwe kuna pwe ekkei nongonong mi minafo, nge ir mi nongonongoch. Sia konur non Kinter meinisin, affat me non nesenin Ekkewe Fopun, me ponuwen chommong an Fin Anisi kapas eis. Ra nukanapeni—me esap pereinging—nongonong.
Akkom, sia tongeni sinei ewe Samon me nuku I nupwen sia “kametip won ekkewe kapasen Kraist; pun nengeni, ekkewe kapasen Kraist repwe erenikemi mettoch meinisin met oupwe fori.”2
Ekkoch maram a no aua kaeo ekkewe pukefel non am famini. Noun nei we anuon at a mwot won pechei nupwen aua annea. Ua sani ai emon inenap, ua fokkun pwapwaiti an nei at famini kunouto.
Nupwen a wesino am kaeo pukefel, ua apungu nei we puk. Noun nei we a sinei pwe ekisino epwene no mour. A neta fiti anean non mesan kewe mi arauarau me apasa ew ennet esemuch: “Pwan ekkoch uwokisin Nana.”
Nei we at, emon sam mi och me soun fori met a fori, a fonouei, “Mama, kosap fangeta ngeni. A chok achocho ngeni an esap no mour.”
Nge nupwen noun nei we a tingor pwan ekkoch uwokisin, aua annea pwan ekkoch uwokisin! Pwan ekkoch uwokisin ra asaramano ach ekiek, tumunu ngunuch, ponuweni ach kapas eis, anapano ach nuku non ewe Samon, me anisikich ne anonga manauach non I. “Chechemeni pwe oupwe achocho ne attonaochur, pwe oupwe tongeni tufich seni ir.”3
Oruwan, sia tongeni sinei ewe Samon me nuku I seni iotek. A fokkun ew feioch ach tongeni iotek ngeni ach Kot! “Iotek ngeni ewe Samon ren unusen pochokunen netip.”4
A wor ew achemenen ai iotek mi och ua aucheani. Fansoun ew me nein ai asoson summer seni college, ua etiwa ew angang non Texas. Upwe uwei wai we taraku mi mes non fite puku mwain seni Idaho ngeni Texas, efoch taraku ua aita ngeni Vern. Vern a uruno tori asachikin, me ua mwon ngeni ew minafon manau.
Ai ua pwereu ngeni ewe asam, ua foropachei inei we me a apasa, “Sipwe iotek me mwen kopwe no.”
Aua fotopukutiw me inei we a poputa ne iotek. A sio ngeni Semach won Nang ren ai upwe tumun. A iotek fan iten ewe erkanin ewe taraku, tingor pwe ewe taraku epwe och usun mi auchea ngeniei. A tingor chon nang repwe nonnom ren non unusen ewe summer. A iotek me iotek me iotek.
Ewe kinamwe a feito seni ena iotek a pesei ei ne nuku non ewe Samon me use epinukunuku met ua ekieki pwe ua sinei. Ewe Samon a emweni aanei non chommong mettoch upwe fori non ena summer.
Ika sia fori ew oreni ne feinno ren Semach won Nang non iotek, sipwe sinei ewe Chon Amanau. Sipwe nuku I. Ach mochen epwe winiti usun An. Sipwe tongeni isonano ngenikich me ekkoch ekkewe feioch Semach won Nang a mwoneta ne ngenikich ika sipwe chok tingor non nuku.5
Aunungatin, sia tongeni sinei ewe Samon me nuku I nupwen sia angang ngeni ekkoch. Upwe aporousa ew porous fiti mumuta seni Amy Wright, ewe a weweiti nongonongen angang ngeni ekkoch pwan mwo fansoun ew semwen mi anoninen me anuokus. Amy a makkei:
“Non October 29, 2015, ua sinei pwe a uriei kanser. Ai we kanser a chok kukkun ewe tufichin manau ren. Ai tufichin pwak sefan ese och. Ua sinei pwe upwene fiu ngeni manauei. Ua ekieki pwe upwe amuchu ai met ua tongeni esap chok fan itei, nge auchean, fan iten ai famini. Non December, ua poputani chemo. Ngang mi sinei usun mwirimwirn ekkewe safei, nge use sinei pwe mi tufich ngeni emon an epwe kon semwen nge mi chiwen manau.
Non ew fansoun, ua apasa pwe chemotherapy a attai an aramas pung. Ua ureni punuwei we pwe ua wes. Ua fang! Usap chiwen niwin no ngeni ewe pioing. Non an mirit, punuwei achengicheng a ausenging non tipepos me mwirin a ponueni, ‘Iwe, mi auchea sipwe kutta emon epwe angang.’”
Met? Ese kuna pwe punuwan we mi uri kanser me ese chiwen tongeni engino ngeni an tori eningaw ika ew pwan fansoun riaffoun metek?
Amy a sopweno ne wewei: “Esisinen ai semwen ra ngaweno tori an a chok ew ika ru ran mi ‘OCH’ non ew maram [nupwen] ua ekis tongeni mwokut usun emon aramas mi manau me ngasangas. Ina non ekkena ran nupwen ai we famini a kan kutta aanen am pwe angang.”
Non ew ekkena ran, An Amy we famini a fori ew mwichen kon non ewe pioing me einet pisekin chemo ngeni ekkewe ekkoch chon kampio, pisek mi masou ren mettoch ne apwapwai me anisi ar samau. Nupwen Amy ese tongeni mour, a kan ekiekieta ekkoch aanen an epwe aochu an emon ran. Ekkoch ekkewe aan mi watte, nge chommong ir kukkun toropwe ika porousen pesepes me tong. Non ekkewe pwinin an metek ra fokkun watte ngeni an epwe mour, a kan kokkon won an pet fit noun kukkun kampiuter me kut angang mi pin mi auchea ngeni mwirmwirin kewe ra mano. A ew manaman pun ewe metek a kan kisino, me a tongeni engino ngeni.
“Angang ngeni ekkoch” Amy a pwarata, “a amanaua ei. Ikewe ua kuna ai pochokun me soposopono ren ewe pwapwa ua kuna non ai achocho ne angasa riaffoun ekkewe ir mi nom unukui. Ua esuku ach angang ngeni ekkoch ren pwapwa me ameseik. Pwan mwo ikenai mi usun ew mettoch mi wewefesen. Epwe pung ach ekieki pwe emon mi pancho, poison, me fiu fan iten [manauan] mi pung ne ekieki pwe ‘upwe chok ekieki pwisin manauei.’ Nge, nupwen ua ekieki usun ngang, nonnomui, ai riaffou me metek, ewe fonufan a fokkun rochokpwakun me anoninen. Nupwen ua ekieki ekkoch, a wor sasram, epinukunuk, pochokun, pwaracho, me pwapwa. Ngang mi sinei pwe ei mi tufich pokiten ewe aninisin, echikaren, me pochokunen ewe Achasefanin Jises Kraist.”
Amy a nuku non ewe Samon nupwen a sinei I. Ika pwe a chok ekis epinukunuku an pwisin sinei, epwe fen takiri ewe ekiekin an angang ngeni ekkoch. Angang ngeni ekkoch a atufichi an epwe ungeni an metek me riaffou me manaueni ei uwokisin: “Nupwen oua angang ngeni chiechiemi aramas oua chok angang ngeni ami Kot.”6
Jises Kraist a fen akkufu ewe fonufan. Iwe pokiten I, pokiten an we Achasefan esemuch, mi wor watten popun sipwe nuku, pwe sia sinei amuchunon mettoch meinisin epwe murino.
Pwii kena, emon me emon kich sia tongeni nuku non ewe Samon me sisap pereingingino. Sia tongeni angonga manauach won ewe Chon Amanau ren ach sinei I, me I epwe emweni aanach.
Sia nom won fonufan pwe sipwe pwomeni ena chok nuku nonI ewe a mut ngenikich ne anisi Jises Kraist nupwen a apasa, pwe Semach won Nang epwe tinano I.”7
Pwii achengicheng, Preseten Thomas S. Monson a pwarata pwe “ach kewe feioch mi pwon ra nap seni ach sipwe auku. Ina mwo ika rochopwaken monumon repwe ioifengen, me pungun ran epwe achoukichetiw, ach miritin ewe kapas allim me ach tongen Semach won Nang me ach Chon Amanau epwe ekinamwei me anisikich … ika sipwe manau wenechar. … Esap wor mettoch non ei fonufan epwe akkufu kich.”8
Ua apachata ai kapasen pwarata ngeni ena an nouch soufos achengicheng. Ika sia nuku non Semach won Nang me non ach Chon Amanau me sisap epinukunuku met sia ekieki pwe sia sinei, Repwe pwar ngeni kich aanach me eitieu poun umoumoch ngenikich. Non iten Jises Kraist, amen.
Esinesin: Non April 1, 2017, Sister Cordon a wesino seni wisan Aruemonun Chon Aninis non ewe Presetensin Kinter Unus me kokko ngeni ewe wisen Aemonun Chon Aninis