Tso Siab rau Tus Tswv thiab Tsis Txhob Ib
Peb yuav coj peb lub neej raws li tus Cawm Seej thaum peb nrog Nws sib raug zoo, thiab Nws yuav coj peb txoj hau kev.
Thaum kuv ncig teb chaws nyob hauv Axias, ib tug viv ncaus tuaj cuag kuv. Nws khawm kuv, thiab nug hais tias, “Koj puas ntseeg tiag tiag hais tias txoj moo zoo no muaj tseeb?” Kuv hais rau tus viv ncaus no hais tias, kuv paub txoj moo zoo no muaj tseeb. Kuv tso siab rau tus Tswv.
Nyob hauv Paj Lug 3:5–6, peb nyeem cov lus ntuas no:
“Tso siab rau tus Tswv kom kawg nej lub siab lub ntsws; thiab tsis txhob cia siab rau nej tej kev txawj ntse.
“Txhua yam uas nej ua cia li nco ntsoov tus Tswv, nws thiaj yuav coj nej txoj hau kev.
Nqe vaj lug kub no muaj ob lo lus txib, ib lo lus ceeb toom, thiab ib lo lus cog tseg zoo kawg. Ob lo lus txib hais tias: “Tso siab rau tus Tswv kom kawg nej lub siab lub ntsws” thiab “txhua yam uas nej ua cia li nco ntsoov tus Tswv.” Lus ceeb toom: “Tsis txhob cia siab rau nej tej kev txawj ntse.” Thiab lo lus cog tseg zoo kawg: “Nws yuav coj nej txoj hau kev.”
Cia peb hais txog lus ceeb toom ua ntej. Cov lus no ua rau peb xav txog ntau yam. Lus ceeb toom yog los ntawm qhov uas tej lus “tsis txhob cia siab” piv txog kev ib rau ib qho dab tsi kom thiaj tsis vau—“tsis txhob ib rau nej tej kev txawj ntse.” Phau Akiv siv lo lus lean uas txhais hais tias yus txav mus ib rau ib sab twg. Thaum peb muab peb lub cev ib rau ib sab twg, peb tsis sawv ntsug, tsis sawv ncaj, thiab ua rau peb sawv tsis khov. Thaum peb cia peb sab ntsuj plig ib rau peb tej kev txawj ntse, peb tsis ib rau peb tus Cawm Seej. Thaum peb ib, peb tsis sawv ntsug; peb sawv tsis khov; peb tsis ntsia ntsoov Yexus Khetos.
Cov viv ncaus, cia li nco ntsoov tias, nyob hauv peb lub neej ua ntej lub neej no, peb twb nyob nrog tus Cawm Seej. Peb tso siab rau Nws. Peb tau hais tias peb txhawb nqa, zoo siab, thiab muaj kev xyiv fab txog txoj hau kev zoo siab uas peb Leej Txiv Saum Ntuj Ceeb Tsheej qhia rau peb. Peb tsis tau ib. Peb hais lus tim khawv tawm tsam kev phem thiab “koom nrog Vajtswv cov tub rog, thiab cov tub rog ntawd twb kov yeej.”1 Kev ua tsov ua rog ntawm kev phem thiab kev zoo twb yog nyob hauv lub ntiaj teb no lawm. Peb rov qab muaj kev lav ris dawb ceev kom sawv ua tim khawv thiab tso siab rau tus Tswv.
Peb txhua tus yuav tsum nug hais tias: Kuv yuav ua li cas kom sawv ntsug thiab tsis txhob cia siab rau kuv tej kev txawj ntse? Kuv yuav paub thiab mloog tus Cawm Seej lub suab li cas thaum tej lub suab ntawm neeg ntiaj teb nrov ua luaj? Kuv yuav ua li cas kom tso siab ntxiv rau tus Cawm Seej?
Kuv yuav hais txog peb txoj kev uas yuav pab peb paub thiab tso siab rau tus Cawm Seej ntxiv. Tej no tsis yog tej ntsiab cai tshiab, tiam sis yog tej ntsiab cai tseem ceeb heev. Txhua lub Koom Haum Me Nyuam Yaus hu nkauj txog tej ntsiab cai no, Koom Haum Ntxhais Hluas qhia txog tej no, thiab teb tau ntau lo lus nug nyob hauv Koom Haum Niam Tsev. Tej ntsiab cai no pab yus sawv ntsug—thiab tsis txhob ib.
Qhov thib ib, peb yuav paub tus Tswv thiab tso siab rau Nws thaum peb mloog ntsoov “Khetos tej lus; vim saib seb, Khetos tej lus yuav qhia nej txhua yam uas nej yuav tsum ua.”2
Ob peb lub hlis tas los lawm peb tsev neeg kawm vaj lug kub. Kuv tus tub xeeb ntxwv uas muaj ob xyoos zaum ntawm kuv ncej puab thaum peb nyeem. Kuv zoo siab kawg uas kuv yog nws pog, xyiv fab heev vim kuv tus tub tsev neeg tuaj xyuas.
Thaum peb kawm vaj lug kub tas, kuv muab kuv phau ntawv kaw. Kuv tus tub xeeb ntxwv paub hais tias tsis ntev nws yuav tsum mus pw. Nws qhov muag xim xiav ntsia ntsoov kuv thiab nws hais ib yam uas muaj tseeb mus ib txhis: “Nyeem vaj lug kub ntxiv ’os, Pog.”
Kuv tus tub, ib tug txiv tsev zoo heev, ceeb toom kuv hais tias, “Niam, tsis txhob mloog nws. Nws tsis xav mus pw xwb.”
Tiam sis thaum kuv tus tub xeeb ntxwv xav nyeem vaj lug kub ntxiv, peb yeej yuav nyeem vaj lug kub ntxiv xwb! Kev nyeem vaj lug kub ntxiv ua rau peb to taub zoo dua, ua rau peb sab ntsuj plig muaj zog, txais lus teb rau peb tej lus nug, pab peb tso siab rau tus Tswv, thiab pab peb tsom ntsoov rau Nws. “Nco ntsoov rau siab ntso [tshawb hauv cov vaj lug kub], xwv kom … yuav pab tau nej.”3
Qhov thib ob, peb yuav paub tus Tswv thiab tso siab rau Nws los ntawm kev thov Vajtswv. Yog ib txoj koob hmoov zoo kawg uas peb thov tau peb tus Vajtswv! Peb yuav tsum thov Leej Txiv kawg siab kawg ntsws.4
Kuv nco ntsoov ib zaj thov Vajtswv uas muaj nqi rau kuv. Muaj ib zaug thaum lub caij sov kuv phab kawm ntawv college, thiab kuv yuav ua hauj lwm nyob hauv Texas. Kuv yuav tsum tsav tsheb ntau puas mais los ntawm Idaho mus rau Texas nyob hauv kuv lub tsheb uas qub qub heev. Kuv twb tso khoom rau hauv kom puv lub tsheb, thiab kuv twb npaj mus lawm.
Thaum kuv tab tom yuav mus, kuv khawm kuv niam thiab nws hais tias, “Cia wb thov Vajtswv ua ntej koj yuav mus.”
Wb txhos caug thiab kuv niam pib thov Vajtswv. Nws thov Leej Txiv Saum Ntuj Ceeb Tsheej kom kuv muaj kev nyab xeeb. Nws thov Vajtswv pab kuv lub tsheb uas tsis muaj ev txias, kom kuv lub tsheb yuav khiav zoo. Nws thov kom cov tim tswv yuav nrog nraim kuv nyob tas lub caij sov. Nws twb thov ntev heev.
Nws txoj kev thov ua rau kuv nyob kaj siab lug kuv thiaj ua siab loj tso siab rau tus Tswv thiab tsis tau cia siab rau kuv tej kev txawj ntse. Tus Tswv tau coj kuv txoj hau kev thaum kuv txiav txim siab ua tej yam thaum lub caij sov ntawd.
Thaum peb pheej thov Leej Txiv Saum Ntuj Ceeb Tsheej, peb yuav paub tus Cawm Seej. Peb yuav tso siab rau Nws. Peb tej kev xav yuav zoo ib yam li Nws tej kev xav. Peb yuav txais cov koob hmoov rau peb tus kheej thiab rau lwm tus uas Leej Txiv Saum Ntuj Ceeb Tsheej yeej xav pub rau peb yog peb yuav muaj kev ntseeg thov Nws.5
Qhov thib peb, peb yuav paub tus Tswv thiab tso siab rau Nws thaum peb ua hauj lwm pab lwm tus. Amy Wright tau tso cai rau kuv hais zaj dab neeg no. Nws twb kawm txog lub ntsiab cai ntawm kev pab lwm tus txawm yog nws raug mob txaus ntshai uas ntshe yuav ua rau nws tas sim neej. Amy sau hais tias:
“Thaum lub Kaum Hli Ntuj hnub tim 29, xyoo 2015, kuv kawm tias kuv muaj mob cancer. Kuv hom mob cancer ntshe 17 feem pua tus neeg xwb kov yeej tau. Kuv paub tias kuv yuav tsum sib zog tawm tsam kom thiaj ua tau neej. Kuv muaj siab xav ua txhua yam kuv ua tau tsis yog rau kuv tus kheej xwb, tiam sis, qhov tseem ceeb tshaj, yog rau kuv tsev neeg. Thaum lub Kaum Ob Hli Ntuj, kuv pib kev txhaj tshuaj tua cancer. Kuv twb paub tias cov tshuaj tua cancer yuav ua li cas rau lub cev, tiam sis kuv yeej tsis tau paub hais tias yuav ua rau yus mob npaum li ntawd thiab tseem ciaj.
“Muaj ib zaug, kuv hais tias kev txhaj tshuaj tua cancer yog kev txhaum kev cai. Kuv qhia kuv tus txiv hais tias kuv tsis ua ntxiv. Kuv xav tso tseg! Kuv tsis kam rov qab mus tom lub tsev kho mob. Kuv tus txiv nws muaj tswv yim heev, nws mloog thiab teb hais tias, ‘Yog li ntawd ces, wb yuav tsum nrhiav ib tug neeg uas wb pab tau.’”
Ua cas hais li ntawd? Nws tsis paub hais tias nws tus poj niam muaj mob cancer thiab nyiaj tsis tau ib zaug ntxiv thaum nws xeev siab los yog mob kawg nkaus li?
Amy piav hais tias: “Kuv mob heev zuj zus mus txog thaum tsuas muaj ib los sis ob hnub uas kuv tiv tau ua neej zoo li ib tug neeg ciaj. Yog tej hnub zoo li ntawd uas wb tsev neeg tau nrhiav kev mus pab lwm tus.”
Muaj ib hnub, Amy tsev neeg muab tej pob khoom pub rau cov neeg mob uas tseem txhaj tshuaj tua cancer, yog tej pob khoom uas muaj tej yam ua rau lawv zoo siab thiab pab kom tsis txhob mob heev. Thaum Amy pw tsis tsaug zog, nws xav txog tej yam uas nws ua tau kom ua rau lwm tus zoo siab. Tej yam uas nws xav ua yeej loj heev tiam sis feem ntau yog tej yam me me xws li kev sau ntawv kom txhawb nqa thiab hlub lwm tus. Thaum twg nws mob heev ua rau nws tsis tsaug zog, nws pw hauv nws lub txaj siv nws lub iPad thiab nrhiav cov poj koob yawm txwv uas tas sim neej lawm seb yuav tsum ua kab ke rau leej twg. Yog ib qho txuj ci tseem ceeb uas nws txoj kev mob yuav nqig zuj zus, ua rau nws nyiaj tau.
Amy ua tim khawv tias, “Kev pab lwm tus yog qhov uas cawm kuv txoj sia. Qhov uas pab kuv nrhiav dag zog kom mus tau tom ntej yog kev zoo siab uas kuv muaj thaum kuv sim pab lwm tus nyob ib puag ncig kuv. Kuv yeej zoo siab kawg tos ntsoov rau lub sij hawm uas kuv pab tau lawv. Txij ntawd los kuv xav tias yog ib qho txawv heev. Tej zaum yus xav tias tus uas do do hau, txhaj tshuaj tua cancer, thiab sib sib zog kom ua tau neej los yeej tsim nyog uas tus ntawd xav txog nws tus kheej xwb. Tiam sis, thaum kuv tau xav txog kuv tus kheej, kuv lub neej, kuv txoj kev raug txom nyem thiab txoj kev mob, ua rau kuv xav tias lub ntiaj teb no tsaus ntuj nti thiab tu siab heev. Thaum kuv xav txog lwm tus, ua rau kuv muaj qhov kaj, kev cia siab, muaj zog, ua siab loj, thiab muaj kev xyiv fab. Kuv paub tias muaj li no vim yog los ntawm lub hwj chim ntawm Yexus Khetos txoj Kev Theej Txhoj uas txhawb nqa, kho thiab pab kuv.
Amy tau kawm tso siab rau tus Tswv thaum Amy los paub Nws ntxiv. Yog tias nws cia siab rau nws txoj kev txawj ntse me ntsis xwb, tej zaum nws yuav tsis xav hais tias nws yuav tsum pab lwm tus. Kev pab lwm tus ua rau nws nyiaj tau nws txoj kev mob thiab kev raug txom nyem thiab ua neej raws li nqe vaj lug kub no: “Thaum nej ua hauj lwm rau nej tej neeg nruab ze ces nej tsuas ua hauj lwm rau nej tus Vajtswv xwb.”6
Yexus Khetos twb kov yeej lub ntiaj teb lawm. Thiab los ntawm Nws, los ntawm Nws txoj Kev Theej Txhoj uas nyob mus ib txhis, peb txhua tus yeej tso siab rau Nws los tau, vim peb paub thaum kawg txhua yam yuav zoo.
Cov viv ncaus, peb txhua tus yeej muaj peev xwm tso siab rau tus Tswv thiab tsis cia siab rau peb tej kev txawj ntse. Peb yuav coj peb lub neej raws li tus Cawm Seej thaum peb nrog Nws sib raug zoo, thiab Nws yuav coj peb txoj hau kev.
Peb nyob hauv lub ntiaj teb no kom qhia tias peb tso siab rau Nws ib yam li thaum peb koom nrog Yexus Khetos thaum Nws hais tias, “Kuv nyob ntawm no, xa kuv mus.”7
Kuv cov viv ncaus, Thawj Tswj Hwm Thomas S. Monson ua tim khawv tias “cov koob hmoov uas tau cog lus rau peb lawm los muaj ntau suav tsis txheeb.” Txawm muaj huab tsaus nti roos peb, txawm ntuj los nag nplawm peb los, qhov uas peb paub txog txoj moo zoo thiab peb Leej Txiv Saum Ntuj Ceeb Tsheej thiab tus Cawm Seej txoj kev hlub yuav nplij peb lub siab thiab txhawb nqa peb … thaum peb taug kev ncaj ncees. … Tsis muaj dab tsi nyob hauv lub ntiaj teb uas kov yeej taus peb.”8
Kuv koom nrog peb tus yaj saub hais lus tim khawv. Yog peb tso siab rau peb Leej Txiv Saum Ntuj Ceeb Tsheej thiab peb tus Cawm Seej thiab tsis txhob cia siab rau peb tej kev txawj ntse, Nkawd yuav coj peb txoj hau kev thiab yuav muab txhais npab hlub tshua cev tuaj rau peb. Los ntawm Yexus Khetos lub npe, amees.
Lus Cim: Thaum Plaub Hlis Ntuj 1, 2017, tau tso Viv Ncaus Cordon tso ua tus Pab Cuam thib Ob nyob hauv lub Koom Haum Me Nyuam Yaus Pawg Tuam Thawj Tswj Hwm thiab tau hu nws ua tus Pab Cuam thib Ib.