Lōke Irooj im Jab Atartar
Jemaron̄ leļo̧k mour ko ad n̄an Rilo̧mo̧o̧r itok jān ad jeļā E, im Enaaj kwaļo̧k kajjien iaļ ko ad.
Ke iaar ekkāke n̄an Asia kaņ, juon sister ejitōnbōro eaar itok ippa.Eaar atbokwōje eō, im ekar kajjitōk, “Kwoj ke lukkuun tōmak bwe gospel in em̧ool?”Sister en, Ijeļā bwe em̧ool. Ij lōke Irooj.
Ilo Jabōn Kōnnaan Ko 3:5–6, jej riiti kapilōk in:
“Kwōn lōke Irooj kōn aolepen būruom̧, im kwon jab atartar ioon jeļāļo̧kjeņ eo am̧.
“Kwōn kwaļo̧k E ilo iaļ ko am̧ otemjeļo̧k, innām Enaaj ba kajjien iaļ ko am̧.”
Ippān tok eoon in rej naan in katak ko ruo an Irooj, kakkōl, im kalim̧m̧ur ko reaibojoj. Naan in katak ko ruo an Irooj: “Lōke Irooj kōn aolepen būruōm̧, im “kwōn kwaļo̧k E ilo iaļ ko am̧.” Kakkōl eo: “Jab atartar ioon jeļāļo̧kjeņ eo am̧.” Kalim̧m̧ur eo eaibojoj: “Enaaj ba kajjien iaļ ko am̧.”
Jen kōnono mōk kōn kakkōl in. Ad pijaik ļo̧k ekōm̧m̧an bwe jen lukkuun kājokļo̧kjeņ kake. Kakkōl eo ej waļo̧k ilo naan ko “jab atartar ioon”—“jab atartar ioon jeļāļo̧kjeņ eo am̧.” Ilo kajin Pālle naan in atartar meļeļein em̧akūt n̄an jait eo juon. N̄e jej lukkuun atartar ilo jait eo juon ak ijo rājet, jej em̧akūt jān ioļap, jejjab bāļan, im jej wōtļo̧k. N̄e jej atartar ilo mour in jetōb ioon jeļāļo̧kjeņ ko ad make, jej atartar ettoļo̧k jān ad Rilo̧mo̧o̧r. N̄e jej atartar, jejjab pād ioļap; jejjab bāļan; jejjab mije Kraist.
Sister raņ, kemeemej, ilo mour eo ad m̧okta jaar rōjetake Rilo̧mo̧o̧r. Jaar ļoor E. Jaar kwaļo̧k ad rōjetake, itok limo, im lan̄lōn̄ kōn karōk eo Ekam̧ōņōņō eo kar karōk jān Jemādwōj Ilan̄. Jaar jab atartar. Jaar tariņae kōn naan in kam̧ool ko ad im “kobaik kōj make ippān kajoor an Anij, im aolep kajoor kein raar anjo̧.1 Tariņae in ikōtaan em̧m̧an im nana ekar em̧akūt tok n̄an laļ in. Bar juon alen ewōr ippād eddo ko rekwojarjar n̄an jutak āinwōt jet rikam̧ool ro im likūt ad lōke ilo Irooj.
Jej aikuj kajjitōkin kōj make: Ewi wāween ad pād wōt ioļap im jab atartar ioon jeļāļo̧kjeņ ko ad make? Ewi wāween aō kile im ļoor ainikien Rilo̧mo̧o̧r n̄e ainikien ko an laļ in reļļaaj? Ewi wāween aō kōļapļo̧k aō lōke Rilo̧mo̧o̧r?
Imaron̄ kwaļo̧k jilu wāween ko n̄an kōļapļo̧k jeļāļo̧kjeņ ko ad im lōke Rilo̧mo̧o̧r. Kwonaaj lo bwe katak kein rejjab kāāl, ak ewōr aer pedped. Rej al kaki ilo kūlaaj ko an Būraimere, rej waļo̧k ilo katak ko an Doulul eo an Jiron̄ ro, im rej uwaak ko n̄an elōn̄ kajjitōk ko an Kōrā ro. Rej pād ioļapļap—im rejjab jet katak ko rej—atartar.
Kein kajuon, jemaron̄ jeļā Irooj im lōke E āinwōt ad “kwojkwoj ioon naan ko an Kraist; bwe lo, naan ko an Kraist renaaj jiron̄ kom̧ aolep men ko kom̧ij aikuj kōm̧m̧an.”2
Jejjo allōn̄ ko rem̧ootļo̧k, baam̧le eo aō rekar ekkatak jeje ko rekwojarjar. Ļaddik eo jibū ruo an iiō ekar jijet ioon neeū ke kōm̧ro ej jim̧or riit. Iaar lukkuun pād ilo jekjek eo me juon bubu en kar kōm̧m̧ane, lukkuun m̧ōņōņō kōn lotok in an baam̧le eo an ļaddik eo nejū.
Ke ej dedeļo̧k amro ekkatak jeje ko rekwojarjar, iaar kiili bok eo. Ļaddik eo jibū ekar jeļā bwe epaak iien kiki. Ej kalimjōk eō ilo an ikdeleel im ekar kōnono kōn mour indeeo: “Bar riit wōt, Nana.”
Ļaddik eo nejū, ro jinen im jemān rem̧m̧an, raar kakkōl eō, “Mama, kwon jab anlo̧ke. E ej kajjieon̄ men bwen jab kiki.”
Ak ke ļaddik eo jibū ej kajjitōk bwe komro en riit wōt, komro kar bar riit jet eoon! Elōn̄ eoon ko raar kōmeramļo̧k kōļmenļo̧kjeņ ko am, kōmoururi jetōb ko am, uwaaki kajjitōk ko am, kōļapļo̧k lōke eo am ilo Irooj, im kajjejet mour ko am n̄an E. “Keememej n̄an niknik lin̄ōri, bwe kom̧in ļapļo̧k āinwōt.”3
Kein Karuo, jemaron̄ jeļā ad Irooj im lōke E kōn jar. Ej juon kōjeraam̧m̧an bwe jen maron̄ jar n̄an ad Anij! “Jar n̄an Jemād kōn aolep kajoor in bōro.”4
Ewōr juon aō ememļo̧kjeņ kōn jar eo me ij lukkuun kaorōke. Juon jam̧m̧ar iien kakkije jān college eo ij jikuul ie, ekar wōr juon aō jerbal ilo Texas. Iaar aikuj kattōr jibuki maeļ jān Idaho n̄an Texas kōn wa mo̧r eo waaō, juon wa ikar likūt etan Vern. Vern ekar lukkuun obrak kōn mweiuk, im iaar pojak n̄an jinoe juon kōmejatoto ekāāl.
Ke ij tin jino diwōj jān m̧weo, iaar bokwōj kōrā eo jinō ejitōn bōro im eaar ba, “Jen jar m̧okta jān am etal.
Kōm̧ro kar bukwelōlō im jinō eaar jino jar eo. Eaar akweļap bwe Jemādwōj Ilan̄ en kōjparok eō. Ekar jar kōn wa eo waaō me ejjeļo̧k an air-condition, kajjitōk bwe wa eo en maron̄ jerbal ilo aō aikuji. Ekar kajjitōk bwe enjeļ ro ren pād ippa ilo aolepān jam̧m̧ar eo. Ekar jar im jar im bar jar.
Aeņōm̧m̧an eaar itok jān jar eo im kar letok n̄an eō kajoor n̄an lōke Irooj im jab atartar ioon jeļāļo̧kjeņ eo aō make. Irooj eaar kwaļo̧k kajjien iaļ ko aō ilo aō kar kōm̧m̧ani kālōt ko aō.
Āinwōt ad kōm̧m̧ane iminene in n̄an kepaak Jemādwōj Ilan̄ ilo jar, jenaaj jeļā ad Rilo̧mo̧o̧r. Jenaaj lōke E. Ikdeleel ko ad renaaj erom āinwōt ikdeleel ko An. Jenaaj maron̄ bōk kōjparok n̄an kōj make im n̄an kōjeram̧m̧an ko an ro jet me Jemādwōj Ilan̄ ej pojak n̄an letok eļan̄n̄e jenaaj kajjitōk ilo tōmak.5
Kein kajilu, jemaron̄ jeļā Irooj im lōke E ilo ad jerbal n̄an ro jet. Iaar kwaļo̧k bwebwenato in kōn mālin in jān Amy Wright, eo eaar meļeļe kōn katak in jipan̄ ro jet men̄e eaar ioon juon nan̄inmej enana im ekamijak. Amy eaar jeje:
“Ilo Oktoba 29, 2015, iaar lo bwe iaar nan̄inmej in kāānjer. Kāānjer eo aō ekar 17 bōjāān aō nej mour ālkin aō nej bōk uno ko rekajoor. Raan in mour ko aō raar jab em̧m̧an. Iaar jeļā bwe ij aikuj tariņaeik nan̄inmej in ilo mour eo aō. Iaar ļōmņak bwe ij aikuj anjo̧ jān nan̄inmej in ippa ejjab n̄an n̄a ak, eļapļo̧k an aorōk, n̄an baam̧le ko aō. Ilo Tijem̧ba eo, Iaar jino Kiimo. Iaar jeļā kōn elōn̄ nan̄inmej ko itok jān bōki uno ko rekajoor n̄an tariņaeik nan̄inmej in kāānjer, ak iaar jab jeļā ke emaron̄ kar waļo̧k menin n̄an juon armej eo elukkun nan̄inmej ak emaron̄ mour wōt.
“Ilo juon tōre, iaar kwaļo̧k bwe eaar wōr aō maron̄ n̄an kōpojrak aō kiimo. Iaar ba n̄an ļeo pāleeō bwe em̧ōj ejem̧ļo̧k aō kōjerbale. Iaar bōjrak! Iaar jab bar kōņaan rool ļo̧k n̄an aujpitōļ. Kōn mālōtlōt eo ippān, in ejitōn bōro ippa eaar lukkuun kijenmej ilo an ron̄jake innām ekar uwaak, ‘Ekwe, jenaaj aikuj pukot juon bwe jen jipan̄e.”
“Ta?” Ekar ke likjab ke kōrā eo pāleen eaar wōr ippān kāānjer im ejjab maron̄ wōnm̧aanļo̧k wōt kōn nan̄inmej in me ej kōmaļōn̄ļōn̄e ak kōmetake?
Amy eaar wōnm̧aanļo̧k wōt im kōmeļeļeiki: “Metak kein aō relukkuun nanaļo̧k ijo me ewōr juon ak ruo raan ko ‘rem̧m̧an’ [n̄e] imaron̄ kar jerbal ilo jet wāween āinwōt juon armej emour, im ej emenono. Ilo tōre ko baam̧le ko am̧ rekkar lo wāween ko n̄an jipan̄.”
Ilo juon iaan raan ko, baam̧le eo an Amy rekar ajeji kein kiimo ko n̄an jipan̄ rinan̄inmej ro jet, nien men kein raar obrak kōn mweiuk ko rekam̧ōņōņō im n̄an jipan̄ kadikļo̧k metak ko. Ke Amy eaar jab maron̄ kiki, eaar ļōmņak kōn wāween an kam̧ōņōņōik ro jet. Ilo wāween ko jet raar eļļap, ak elōn̄ raar jet no̧o̧t jidik ko ak enaan ilo taļboon ko n̄an kōperan im kwaļo̧kiakwe. Ilo bon̄ōn ko me ekar lukkuun metak jon̄an eban kiki, ekkā an babu ilo peet kōn iPad eo nejin ilo an kōjerbale n̄an lali kain̄i ko me ej aikuj kadedeikļo̧k ilo etan ro jibūn etto. Kabwilōn̄lōn̄ eo, metak ko rekar dik ļo̧k, im ekar maron̄ niknik m̧aantak.
“Jerbal in Jipan̄,” Amy eaar kam̧ool, “eaar lo̧mo̧o̧ren eō. Ijo āliktata iaar bōk aō kajoor n̄an wōnm̧aanļo̧k wōt eaar kōn m̧ōņōņō eo me iaar en̄jake ke ij kajjieon̄ meļo̧kļo̧k metak ko me iaar pād kaki. Iaar reim̧aanļo̧k n̄an juon iien jerbal in jipan̄ kōn lan̄lōn̄ eļap im ikdeleel. N̄an rainin ilo kalimjōkļo̧k ej āinwōt juon men ekabwilōn̄lōn̄. Komaron̄ ļōmņak bwe juon armej epiļaļ, ebaijin, im ej tariņaeik nan̄inmej ko an ekar jejjet ilo kōlmenļo̧kjeņ bwe ‘kiiō ij aikuj lōmņak wōt kōn n̄a.’ Ijoke, ke iaar ļōmņak kōn n̄a make, jekjek eo ipād ie, aō en̄taan im metak, laļ in eaar jino marok im kaburomōjmōj. Ke iaar mije ro jet, eaar wōr meram, kōjatdikdik, kajoor, peran, im lan̄lōn̄. Ijeļā bwe emaron̄ kar bōk jikin kōn rōjetak, kōmour, im kajoor im maron̄ eo an Pinmuur eo an Jisōs Kraist.
Amy ekar lōke Irooj ke ekar jeļā kajjien. Eļan̄n̄e en kar atartar jidik wōt ioon jeļāļo̧kjeņ eo an make, bolen enkar makoko kōn ļōmņak in n̄an an jipan̄. Jipan̄ ro jet ekar kōm̧m̧an bwe en eļļā jān metak ko an im en̄taan ko im n̄an mour kōn eoon in: “Eļan̄n̄e kom̧ij jerbal n̄an armej ro ami kom̧ij jerbal wōt n̄an ami Anij.”6
Jisōs Kraist eaar anjo̧ jān laļ. Im kōn E, kōn Pinmuur eo an, eļap unin bwe jen lōke, jeļā bwe āliktata aolep men renaaj em̧m̧an.
Sister raņ, kajjojo iaad jemaron̄ lōke Irooj im jab atartar. Jemaron̄ leļo̧k mour ko ad n̄an Rilo̧mo̧o̧r itok jān ad jeļā E, im Enaaj kwaļo̧k kajjien iaļ ko ad.
Jej pād ilo laļ in n̄an kwaļo̧k ejja lōke eo wōt jaar lōke E bwe jen kar kwaļo̧k ad rōjetake Jisōs Kraist ilo an kar ba, “N̄a e, jilkinļo̧k eō.”7
Kōrā ro rejitōn bōro, Būreejtōn Thomas S. Monson eaar kam̧ool bwe “kōjeraam̧m̧an ko em̧ōj kalim̧m̧ur kōj kaki retarjānjon̄an. Mekarta kōdo̧ ko remaron̄ ejouj ioon doon, mekarta wōt ko remaron̄ wōtlo̧k iood, jeļāļo̧kjeņ eo ad kōn gospel eo im iakwe eo ad n̄an Jemedwōj Ilan̄ im ad Rilo̧mo̧o̧r renaaj kaenōm̧m̧an im rōjetake kōj … ilo ad ilo̧k ilo jim̧we. … Enaaj ejjeļo̧k men ilo laļ in enaaj kabōjrak kōj.”8
Ij kakobaik ļo̧k naan in kam̧ool eo aō ippān rikanaan eo ad ejitōn bōro. Eļan̄n̄e jej lōke Jemādwōj Ilan̄ im ad Rilo̧mo̧o̧r im jab atartar ioon jeļāļo̧kjeņ ko ad make, renaaj kwaļo̧k kajjien iaļ ko ad im erļo̧ke pein tūriamo̧ n̄an kōj. Ilo etan Jisōs Kraist, amen.
No̧o̧t: Ilo Eprōļ 1, 2017, Sister Cordon kar kōļo̧k e āinwōt Rikakpilōklōk eo Kein Karuo ilo Būreejtōnji eo Eutiej an Būraimere im kar kūr āinwōt Rikakpilōklōk eo Kein Kajuon.