E tiʼaruri ia Iehova ʼe ʼeiaha e turuʼi atu i tō ʼoe iho ra haʼapaʼo
E nehenehe tā tātou e faʼatumu i tō tātou oraraʼa i niʼa i te Faʼaora nā roto i te ʼiteraʼa Iāna, ʼe Nāna e ʼarataʼi i tō tātou mau haereʼa.
I tōʼu tereraʼa i Asia, ’ua haʼafātata mai te hōʼē tuahine here iāʼu. ’Ua tauahi mai ’oia iāʼu ʼe ’ua ui mai, « tē tiʼaturi mau ra ānei oe ē e parau mau teie ʼevānelia ? » E teie tuahine here, ’ua ʼite au ē e parau mau te reira. Tē tiʼaturi nei au i te Fatu.
Tē taiʼo nei tātou i roto i te Maseli 3:5-6, i teie aʼo :
« E ti’aturi ia Iehova ma tō ʼāʼau atoʼa ra ; ’eiaha rā e tiʼaturi (turuʼi) i tō ’oe ihora haʼapa‘o.
« ’Eiaha e haʼamo’e iāna i tō ’oe atoʼa ra mau haereʼa ; e nāna e faʼaʼite ia ’oe i tō ʼoe ra mau haereʼa ».
Tē vai nei i roto i teie pāpaʼiraʼa moʼa e piti aʼo, hōʼē faʼararaʼa, ʼe hōʼē fafauraʼa hanahahana. Nā a’o e piti : « E ti’aturi ia Iehova ma tō ʼāʼau atoʼa ra » ʼe « ’Eiaha e haʼamoʼe iāna i tō ʼoe atoʼa ra mau haereʼa ». Te faʼaararaʼa : « ʼEiaha rā e ti’aturi (turuʼi) i tō ʼoe ihora haʼapao ». E te fafauraʼa hanahana : « E Nāna e faʼaʼite ia ʼoe i tō ʼoe ra mau haereʼa ».
E tuatāpapa nā tātou i te faʼaararaʼa. Tē hōroʼa mai nei te hōhoʼa ia tātou e rave rahi tumu parau nō te feruri. Tē tae mai nei te faʼaararaʼa nā roto i te mau taʼo « ʼeiaha e tiʼaturi (turuʼi) »—« ʼeiaha rā e tiʼaturi (turuʼi) i tō ʼoe ihora haʼapaʼo ». I roto i te reo Peretāne te auraʼa o te taʼo turuʼiʼo te huriraʼa ïa ʼaore rā te nuʼuraʼa i te hōʼē noa pae. ’Ia turuʼi anaʼe tātou i tō tātou tino i te hōʼē pae aore rā i te tahi atu pae, e ātea ē ïa tātou i te ropuraʼa, ’aita ïa tātou i ʼaifāito faʼahou, ʼe e marua tātou. ’Ia turuʼi anaʼe tātou i te pae vārua i niʼa i tō tātou iho haʼapaʼo, e ātea ē ïa tātou i tō tātou Faʼaora. Mai te mea e turuʼi tātou i te hōʼē pae, ʼaita ïa tātou i ropu ; ʼaita ïa tātou i ʼaifāito ; ʼaitā ïa tō tātou mata i rōtahi i niʼa i te Mesia.
E te mau tuahine, ’a ha’amana’o i roto i tō tātou oraraʼa mātāmua, ’ua tiʼa nā tātou i piha’i iho i te Faʼaora. ’Ua ti’aturi tātou Iāna. ’Ua parau tātou i tō tātou pāturu, tō tātou ʼanaʼanatae, ʼe tō tātou ʼoaʼoa nō te ʼōpuaraʼa nō te ʼoaʼoa tei hōhorahia mai e tō tātou Metua i te Ao ra. ʼAita tātou i turuʼi i te hōʼē atu pae. ’Ua ʼaro tātou ma tō tātou mau ʼiteraʼa pāpū ē « ’ua ’āmui atu tātou i te mau nuʼu ʼa te Atua, ʼe ’ua manuia taua mau nuʼu ra ».1 ’Ua nuʼu mai teie aroraʼa i rotopū i te maitaʼi ʼe te ʼino i niʼa i te fenua nei. ’Ua fāriʼi faʼahou ā tātou i te hōpoiʼa moʼa ’ia tiʼa ʼei hō’ē ʼite ʼe ’ia tuʼu i tō tātou tiʼaturiraʼa i niʼa i te Fatu.
E tiʼa ia tātou ’ia ui tātaʼitahi : Nāhea vau ’ia faʼaea noa i rōpū ʼe ’ia ʼore e turuʼi i niʼa i tōʼu iho haʼapaʼo ? Nāhea vau ’ia ʼite ʼe ’ia peʼe i te reo ʼo te Faʼaora ’ia pūai anaʼe te mau reo o tō te ao nō te faʼahema ? Nāhea vau ’ia faʼatupu i te tiʼaturiraʼa i te Faʼaora ?
E hōroʼa atu vau e toru rāveʼa nō te faʼarahi i tō tātou ʼite ʼe tō tātou tiʼaturi i te Faʼaora. E ʼite ïa ʼoutou ʼe e ʼere teie mau parau tumu i te mea ʼāpī, e mea faufaʼa rahi rā. ’Ua hīmenehia te reira i roto i te mau Paraimere atoʼa, ’ua tāvevohia i roto i te mau haʼapiʼiraʼa ʼa te Feiā ’Āpī Tamāhine, ʼe tē riro nei ’ei mau pāhonoraʼa i te mau uiraʼa ʼe rave rahi ʼa te Sōtaiete Tauturu. E mau parau tumu o te faʼahaere i rōpū—eʼita e turuʼi.
’A tahi, e nehenehe ia tātou ’ia ʼite i te Fatu ʼe ’ia tiʼaturi Iāna ’ia « popou anaʼe tātou i te parau ʼa te Mesia ; inaha hoʻi, e faʼaʼite te parau ʼa te Mesia ia ʼoutou i te mau mea tā ʼoutou e haʼapaʼo ».2
E rave rahi mau ʼāvaʼe aʼe nei, tē taiʼo ra mātou ʼe te ʼutuāfare i te pāpaʼiraʼa moʼa. ’Ua pārahi tāʼu moʼotua tamāroa e piti matahiti i niʼa i tōʼu nei turi ʼa taiʼo ai mātou. ’Ua ʼoaʼoa rahi au i tōʼu tiʼaraʼa mama rū’au, ʼe te haereraʼa mai te ʼutuāfare ’o tōʼu nei tamaiti.
I te hoperaʼa tā mātou taiʼoraʼa i te pāpaʼiraʼa moʼa, ’ua tāpiri au i tāʼu buka. ’Ua ʼite tāʼu moʼotua tamāroa ʼe ’ua fātata te taime nō te haere e taʼoto. ’Ua hiʼo mai ʼoia ma tōna nā mata ninamu ʼanaʼanatae rahi ʼe ’ua parau i te hōʼē parau mau mure ’ore : « Faʼahou ā te mau pāpaʼiraʼa moa, e Nana ».
‘Ua faʼaara mai tāʼu tamaiti, e metua maitaʼi hoʼi ʼoia, « e mama, ʼeiaha e faʼatiʼa i tōna hinaʼaro. Tē tamata ra ʼoia ’ia ’ore e haere e taʼoto ».
’Ia ani faʼahou rā tāʼu moʼotua tamāroa i te tahi ā mau pāpa’iraa mo’a, ’ua taiʼo māua i te tahi ā mau pāpa’ira’a mo’a ! E haʼamāramarama te mau pāpa’ira’a mo’a i tō tātou feruriraʼa, e faʼa’amu i tō tātou vārua, e pāhono i tā tātou mau uiraʼa. « ’Ia itoito ʼoutou i te ʼimi māite i taua mau parau nei, ’ia faufaʼahia ʼoutou i te reira ».3
Te piti, e nehenehe e noaʼa ia tātou ’ia ʼite i te Fatu ʼe ’ia tiʼaturi Iāna nā roto i te pure. Auē ïa haʼamaitaʼiraʼa ’ia nehenehe e pure i tō tātou Atua ! ’Ia « pure atu i te Metua ma te pūai hope ʼo te ʼāʼau ».4
Tē vai nei tāʼu hōʼē haʼamanaʼoraʼa maitaʼi nō niʼa i te pure tāʼu e faʼaherehere nei. I te hōʼē o te mau tau faʼafaearaʼa a te fare haʼapiʼiraʼa teitei i te tau māhanahana, ’ua fāriʼi au i te hōʼē ʼohipa i Texas. ’Ua tiʼa iāʼu ’ia faʼahoro e rave rahi hanere maile mai Idaho e tae atu i Texas nā niʼa i tōʼu pereoʼo uira tahito, te hōʼē pereoʼo tāʼu i piʼi ʼo Vern. ’Ua ’ī roa ʼo Vern i te tauihaʼa ʼe ’ua ineine au nō te hōʼē tere ʼāpī.
I tōʼu haereraʼa i rāpae nā te ʼōpani, ’ua tauahi au i tōʼu metua vahine here ʼe ’ua parau mai ʼoia, « e pure tāua hou ʼoe e haere atu ai ».
’Ua tūturi māua e ’ua haʼamata tōʼu metua vahine i te pure. ’Ua tāparu ʼoia i te Metua i te Ao ra ’ia pāruruhia vau. ’Ua pure ʼoia nō tōʼu pereoʼo uira ʼaita e faʼahaumarūraʼa, ma te ani e ’ia tere te pereoʼo mai tāʼu i hinaʼaro. ’Ua ani ʼoia i te mau melahi ’ia pārahi mai i piha’i iho iā’u i te roaraʼa o te tau māhanahana. ’Ua pure ʼoia ʼe ’ua pure ʼe ’ua pure.
Te hau tei tae mai nā roto i taua pure ra ’ua hōroʼa ia te reira iāʼu te itoito ’ia tiʼaturi i te Fatu ʼe ’ia ʼore e tiʼaturi i tōʼu iho haʼapaʼo. ’Ua arataʼi te Fatu i tōʼu haereʼa i roto i te mau faʼaotiraʼa e rave rahi tāʼu i rave i taua tau māhanahana ra.
’Ia haʼamātau anaʼe tātou i te haʼafātata atu i te Metua i te Ao nā roto i te pure, e noaʼa ïa ia tātou te ʼite i te Faʼaora. E noaʼa ïa ia tātou te tiʼaturi Iāna. E riro ïa tō tātou mau hinaʼaro mai Tōna ra mau hinaʼaro. E nehenehe ïa ia tātou ’ia haʼapāpū nō tātou iho ʼe nō vetahi ’ē i te mau haʼamaitaʼiraʼa tā te Metua i te Ao ra i ineine i te hōroʼa mai te mea e ani tātou ma te faʼaroʼo. 5
Te toru, e nehenehe e noaʼa ia tātou te ʼite i te Fatu ʼe ’ia tiʼaturi Iāna ʼa tāvini ai tātou ia vetahi ’ē. E faʼaʼite atu vau i teie ʼāʼamu ma te parau faʼatiʼa ʼa Amy Wright, tei māramarama i te haʼapiʼiraʼa nō niʼa i te tāviniraʼa noa atu tōna maʼi riʼariʼa rahi i roto i tōna oraraʼa. ’Ua pāpaʼi Amy :
« I te 29 nō atopa 2015, ’ua ʼite au e maʼi māriri ʼai taʼata tōʼu. E 17 i niʼa i te hānere e ora tōʼu nei maʼi māriri ’ai ta’ata. E ʼere i te mea maitaʼi roa te tiʼaturiraʼa e ora mai au. ’Ua ʼite au ē e tiʼa iāʼu ’ia ʼaro nō tōʼu ora. ’Ua faʼaoti au ’ia hōroʼa i te mau mea atoʼa ’eiaha noa nōʼu iho, te mea hau atu rā i te faufaʼa, nō tōʼu ia ʼutuāfare. I te ʼāvaʼe tītema, ’ua haʼamata vau i te rapaʼauraʼa (chimeo). ’Ua mātau vau i te mau mea e rave rahi e tupu mai nā roto i te mau rāʼau e aro nei i te maʼi māriri ’ai ta’ata, ʼaita rā vau i ʼite ē e nehenehe i te hōʼē taʼata tei maʼi-rahi-hia ʼe ’ia ora noa ā.
« I te hōʼē taime, ’ua parau vau e ’ua riro te rapaʼauraʼa (chimeo) ʼei hōʼē ʼōfatiraʼa i te tiʼaraʼa taʼata. ’Ua parau vau i tāʼu tāne faʼaipoipo ē ’ua nāvaʼi te reira. Tē faʼaruʼe nei au ! E’ita vau e hoʼi faʼahou i te fare maʼi. I roto i tōna paʼari, ’ua faʼaroʼo tōʼu hoa here ma te faʼaʼoromaʼi ʼe ’ua pāhono mai ʼoia i muri iho, ‘nā reira ïa, e ʼimi ïa tātou i teie nei i te tahi taʼata nō te tāvini’».
E aha ? ʼAita ānei ʼoia i ʼite ē e maʼi māriri ’ai ta’ata tō tāna vahine faʼaipoipo ʼe eʼita e noaʼa faʼahou iāna i te faʼaʼoroma’i i te pihaʼe ʼaore rā i te tahi faʼahou ā taime māuiui rahi ?
’Ua fa’ata’a mai ʼo Amy : « ’Ua rahi roa te ʼino o tōʼu huru ’e ’ua noaʼa iāʼu hōʼē noa ʼaore rā ʼe piti mahana ‘maitaʼi’ i te ʼāvaʼe e nehenehe ai iā’u ’ia riro ʼei taʼata ora e huti ra i te aho. I taua mau mahana ra ’a ʼimi ai tōʼu ʼutuāfare i te mau rāveʼa nō te tāvini ».
I te hōʼē o taua mau mahana ra, ’ua ’ōpere haere te ʼutuāfare ʼo Amy i te mau puʼohu rāʼau maita’i (chimeo) nā te tahi atu feiā maʼi, te mau puʼohu tei ’ī i te mau mea nō te faʼaʼanaʼanatae ʼe nō te tamarū i te maʼi. ’Ia ʼore anaʼe e nehenehe ia Amy i te ta’oto, e nehenehe ’oia e feruri i te mau rāveʼa nō te faʼaʼanaʼana i te mahana ʼo te tahi taʼata. E mea huru rahi te tahi mau rāveʼa, te rahiraʼa rā e mau poroʼi noa ïa aore rā e rata iti nō te faʼaitoito ʼe nō te here. I tera mau pō ’ia rahi roa ana’e tōna māuiui nō te taʼoto, e tārava ʼoia i niʼa i te roʼi ʼe tāna Ipad ʼe e ʼimi ʼoia i te mau ʼōroʼa e tītauhia ’ia rave nō tōna mau tupuna tei pohe. Mai te hōʼē semeio e ʼiti mai te māuiui, ʼe e nehenehe iāna ’ia faʼaʼoromaʼi.
’Ua faʼaʼite pāpū Amy ē, « ’ua faʼaora te tāviniraʼa i tōʼu nei ora ». Te mea tei hōroʼa iāʼu te pūai nō te tāmau noa i te haere i mua ’o te ʼoaʼoa ïa tāʼu i ʼite nā roto i te tamataraʼa i te tamarū i te māuiui ʼo te mau taʼata nā piha’i iho iāʼu. ’Ua tiaʼi au ma te ʼoaʼoa ʼe te ʼanaʼanatae rahi i te mahana nō tā mātou mau ʼohipa tāviniraʼa. E tae noa mai ā i teie nei mahana e au ra ē e mea huru ē riʼi teie feruriraʼa. E manaʼo ʼoutou ē te hōʼē taʼata upoʼo pāhure, tei taero i te rāʼau, ʼe tē aro ra nō [tōna] iho ora, ’ua tano ïa ʼoia i te feruri ē ‘teie nei e ha’apa’o noa vau iā’u.’ʼ Area rā, ’ia feruri anaʼe au nō niʼa iāʼu iho, tōʼu huru, tōʼu māmae ʼe tōʼu māuiui, ’ua riro te ao ’ei mea pōuri ʼe te ʼanaʼanatae ʼore. ’Ia fāriu anaʼe vau i te tahi atu mau taʼata, e vai mai te māramarama, te tiʼaturi, te pūai, te itoito, ʼe te ʼoaʼoa. ’Ua ʼite au e tupu te reira maoti te mana pāturu, te faʼaora, ʼe te pūai ʼo te Tāraʼehara ʼa Iesu Mesia ».
’Ua noaʼa te ti’aturi ’o Amy i te Fatu ’a mātau ai ’oia Iāna. Ahani ’ua turuʼiriʼi ʼoia i niʼa iho i tōna iho haʼapaʼo, e vaiiho paha ïa ʼoia i te manaʼo ē tē tāvini ra ʼoia. ’Ua faʼatiʼa te tāviniraʼa iāna ’ia faʼaʼoromaʼi i tōna māuiui ʼe i tōna mau ’ati ʼe ’ia ora i teie pāpaʼiraʼa moʼa : « ’A tāvini ai ʼoutou i te taʼata nei, te tāvini ra ïa ʼoutou i tō ʼoutou Atua ra ».6
’Ua upo’oti’a Iesu Mesia i ni’a te ao nei. ’E maoti ʼOia, maoti Tāna Tāraʼehara mure ʼore, e tumu rahi tō tātou ’ia tiʼaturi, ma te ʼite ē i te pae hopeʼa e maitaʼi te mau mea atoʼa.
Te mau tuahine, e nehenehe tātou tātaʼitahi e tiʼaturi i te Fatu ʼe ’eiaha ’ia turuʼi. E nehenehe tātou e faʼatumu i tō tātou oraraʼa i niʼa i te Faʼaora nā roto i te mātaura’a Iāna, ʼe e ʼarataʼi ’Oia i tō tātou mau haereʼa.
Tei niʼa tātou i te fenua nei nō te faʼaʼite i taua ā tiʼaturiraʼa Iāna tei faʼatiʼa ia tātou ’ia tiʼa i piha’i iho ia Iesu Mesia, ʼa parau ai ʼOia, « teie au, ʼa tono Iā’u ».7
Tōʼu mau tuahine here, ’ua faʼa’ite pāpū mai te peresideni Thomas S. Monson ē « eʼita e noaʼa ’ia fāitohia te mau haʼamaitaʼiraʼa i fafauhia ia tātou. Noa atu e ha’aputuputu mai te mau ata vero, noa atu e topa mai te ua i ni’a ia tātou, e tāmāhanahana ’e e turu mai tō tātou ’itera’a i te ’evanelia ’e tō tātou here i tō tātou Metua i te Ao ra ’e i tō tātou Fa’aora ia tātou… ’a ora parau ti’a ai tātou… ’Aita hō’ē mea i roto i teie nei ao e nehenehe e rē i ni’a ia tātou ».8
Tē ʼāpiti nei au i tōʼu ʼiteraʼa pāpū i tō to tātou peropheta here. Mai te mea e tiʼaturi tātou i tō tātou Metua i te Ao ra ʼe i tō tātou Faʼaora ʼe ’ia ʼore e turuʼi i niʼa i tō tātou iho haʼapaʼo, e arataʼi Rāua i tō tātou mau haereʼa ʼe e faʼatoro mai Rāua i te rima aroha ia tātou. Nā roto i te i’oa ʼo Iesu Mesia ra, ’āmene.
Nota : I te 1 nō ’ēperēra 2017, ’ua ha’amāuruuruhia te tuahine Cordon ’ei tauturu piti i roto i te Peresidenira’a Rahi o te Paraimere ’e ’ua pi’ihia ’ei tauturu hō’ē.