“Lakaw Uban Kanako”

Minahal kong mga kaigsoonan sa priesthood, tuyo nako karon ang pagpaniguro ug pagpalagsik kaninyo sa inyong priesthood nga pagserbsiyo. Sa ubang paagi, susama kini sa akong nahunahuna nga katuyoan sa Manluluwas dihang gikatagbo Niya ang adunahang batan-ong lalaki, “Unsa bay maayong buhaton ko aron makapanag-iya ako sa kinabuhing dayon?” (Mateo19:16). Tingali mianhi mo niining komperensya, sama sa pag-adto niining batan-on ngadto sa Manluluwas, naghunahuna kon ang inyong pagserbisyo igo ba. Ug sa samang higayon, tingali gibati ninyong may dugang pang buhaton—tingali mas daghan pa! Manghinaot ko nga akong mahatud ang mapinanggaong pag-uyon sa Ginoo sa inyong nahimo, samtang magtanyag usab og makaawhag nga daklit nga panan-aw kon unsa ang inyong makab-ot, uban sa Iyang tabang, isip tighupot sa Iyang balaan nga priesthood.

Ang adunahan nga batan-ong lalaki gihangyo nga ibaligya ang tanan nga naa kaniya ug mohatag sa kabus ug mosunod sa Manluluwas; ang inyong umaabut nga kalamboan tingali wala magkinahanglan niana, apan nanginahanglan kini og pagsakripisyo. Bisan sa unsang paagi, manghinaot ko nga ang akong mensahe dili hinungdan nga kamo “[molakaw] nga masulub-on” sama sa gibuhat sa batan-ong lalaki. (Tan-awa sa Mateo 19:20–22.) Apan, mosalig ko nga kamo “[mo]lakaw sa [inyong] agianan nga magmaya” (D&P 84:105) tungod kay gusto ninyong molambo ug nagtuo mo nga makahimo kamo sa paglambo.

Bisan pa, natural lang nga mobati og kakulang kon magkonsiderar kita unsay gipabuhat kanato sa Ginoo. Sa tinuod, kon inyo kong sultihan nga mibati kamo nga hingpit ninyong matuman ang inyong mga katungdanan sa priesthood, tingali mabalaka ko basin og wala kamo makasabut niini. Sa laing bahin, kon ingnon ko ninyo nga daw kasurenderon na mo tungod kay dili makaya sa inyong abilidad ang inyong tahas, nan motabang ko nga masabtan ninyo sa unsang paagi mopasarang ug molig-on ang Ginoo sa mga tighupot sa Iyang priesthood sa paghimo og mga butang nga dili nila mahimo nga sila ra.

Pareho ra kini sa akong calling ug sa inyong calling. Walay usa kanato ang makahimo sa buhat sa priesthood, ug maayong mohimo niini, nga mosalig ra sa kaugalingon natong kaalam ug mga talento. Tungod kay dili kini atong buhat—buhat kini sa Ginoo. Mao nga ang bugtong paagi aron molampus mao ang pagsalig Kaniya, bag-ong deacon man kamo nga gisaligan og tahas sa pagdala og igong gahum para sa ordinansa sa sakrament; o batan-ong home teacher nga gi-assign sa Ginoo sa paghigugma ug pag-alagad sa pamilya nga wala pa ninyo mailhi ug ingon og dili ganahan sa inyong gugma o sa inyong pangalagad; o amahan kamo nga nahibalong kamo ang mag-preside sa inyong panimalay diha sa katarung, apan dili sigurado unsaon sa paghimo niini, ug ang panahon nagkapupos na, tungod kay paspas nga nagdako ang mga bata ug ang kalibutan ingon og bangis og dili mahigalaon.

Busa kon mibati kamo nga daw nabug-atan, himoa kana nga maayong timailhan. Nagpasabut kana nga inyong nabatyagan ang gidak-on sa pagsalig nga gihatag sa Dios kaninyo. Nagpasabut kana nga may gamay kamong nasabtan unsa gayud ang priesthood.

Diyutay ra kaayo ang mga tawo sa kalibutan nga aduna niana nga panabut. Bisan gani kadtong maka-recite og taas nga depinisyon tingali wala gayud makasabut niini. Dunay mga kasulatan nga, pinaagi sa gahum sa Espiritu nga dala niini, makapalawom sa atong pagbati sa katingala bahin sa balaang priesthood. Ania ang pipila niadto nga mga kasulatan:

“Ang gahum ug pagtugot sa … Melchizedek nga Pagkapari, mao ang paghupot sa mga yawe sa tanan nga espirituhanon nga mga panalangin sa simbahan—

“Aron makaangkon sa kahigayunan sa pagdawat sa mga misteryo sa gingharian sa langit, aron maabli ang kalangitan ngadto kanila, makahimamat sa kinatibuk-an nga pundok ug sa simbahan sa Una nga Natawo, ug aron makasinati sa pakig-ambit ug sa pagtambong sa Dios nga Amahan, ug ni Jesus ang tigpataliwala sa bag-o nga pakigsaad.

“Ang gahum ug pagtugot sa … Aaronic nga Pagkapari,mao ang paghupot sa mga yawe sa pagpangalagad sa mga anghel” (D&P 107:18–20).

“Diha sa mga ordinansa [sa priesthood], ang gahum sa pagka-diosnon gipakita. …

“Kay kon wala kini walay tawo nga makakita sa nawong sa Dios, gani sa Amahan, ug mabuhi” (D&P 84:20, 22).

“Kini nga halangdon nga pagkapari … gisunod sa kapunongan sa [Anak sa Dios], kansang kapunongan gikan sa katukuran sa kalibutan; o sa lain nga pagkasulti, ingon nga walay sinugdanan sa mga adlaw o katapusan sa mga tuig, ingon nga giandam gikan sa kahangturan ngadto sa tanan nga mga kahangturan, sumala sa iyang daan nga kasayuran sa tanan nga mga butang” (Alma 13:7).

“Ang matag usa ka binuhat nga gi-orden sunod niini nga kapunongan ug balaan nga tawag kinahanglan makabaton og gahum, pinaagi sa hugot nga pagtuo, sa pagbuak sa mga bukid, sa pagbahin sa mga dagat, sa pagpahubas sa mga tubig, sa pagbalhin kanila gikan sa ilang agianan;

“Sa pagpasukol sa mga kasundalohan sa mga nasud, sa pagbahin sa yuta, sa pagbungkag sa matag pundok, sa pagbarug diha sa atubangan sa Dios; sa pagbuhat sa tanan nga mga butang sumala sa iyang kabubut-on, sumala sa iyang sugo, sa pagbuntog sa mga kagamhanan ug mga gahum; ug kini pinaagi sa kabubut-on sa Anak sa Dios diin gikan sa wala pa ang katukuran sa kalibutan” (Hubad ni Joseph Smith, Genesis 14:30–31 [sa Giya ngadto sa mga Kasulatan]).

Usa ka paagi nga masanong ang ingon ka makadasig nga deskripsyon sa gahum sa priesthood mao ang paghunahuna nga dili kini haum kanato. Laing paagi sa pagsanong mao ang makasiksik sa kalag nga mga pangutana, nga gipangutana sa atong kasingkasing, sama niini: Mibati na ba ko nga ang kalangitan naabli ngari nako? May mogamit ba sa mga pulong nga “pagpangalagad sa mga anghel” sa paghulagway sa akong priesthood nga pagserbisyo? Gidala ba nako ang “gahum sa pagka-diosnon” sa kinabuhi sa akong giserbisyuhan? Nakabuak ba ko og bukid, misukol sa sundalo, mibugto sa mga higot sa uban, o mibuntog sa mga kalibutanong gahum—bisan sa mahulagwayong paagi lamang—aron matuman ang kabubut-on sa Dios?

Ang ingon nianang pagtimbang-timbang magdala og pagbati nga daghan pa kita’g mahimo sa pagserbisyo sa Ginoo. Hinaot nga magdala usab kini og pagbati nga gustohon ninyo ang paghimo pa og daghan—usa ka pangandoy nga mas hingpit nga moapil sa milagrusong buhat sa Ginoo. Ang ingon nianang mga pagbati maoy unang lakang sa pagkahimong tawo nga maoy tuyong moresulta sa priesthood nga pagserbisyo.

Ang sunod nga lakang gihulagway nga usa ka inter-aksyon tali kang Jehova ug kang Enoch. Nailhan nato si Enoch isip talagsaong propeta kinsa miestablisar sa Zion taliwala sa grabing kadautan. Apan sa wala pa siya mahimong talagsaong propeta, nakita ni Enoch ang iyang kaugalingon nga “usa lamang ka batan-on, … dili maayo nga mosulti,” ug gidumtan sa tanang katawhan (Moises 6:31). Paminawa ang mga pulong nga gigamit sa Ginoo sa pagdasig kang Enoch. Iya usab kining mga pulong diha ninyo kinsa gitawag sa pag-alagad sa uban isip tighupot sa priesthood:

“Ug ang Ginoo miingon ngadto ni Enoch: Lakaw ug buhata ingon nga Ako misugo kanimo, ug walay tawo makatulisok kanimo. Bukha ang imong ba-ba, ug kini mapuno, ug Ako mohatag kanimo og igsusulti, kay ang tanan nga unod ania sa akong mga kamot, ug Ako mobuhat ingon sa akong gihunahuna nga maayo. …

“Tan-awa ang akong Espiritu anaa kanimo, busa ang imong tanan nga mga pulong Ako mohatag og kaangayan; ug ang mga bukid mahanaw sa imong atubangan, ug ang mga sapa mobalhin sa ilang agianan; ug ikaw magpuyo ngari kanako, ug Ako nganha kanimo; busa lakaw uban kanako” (Moises 6:32, 34).

Mga kaigsoonan, ang atong pagka-orden sa priesthood usa ka pagdapit gikan sa Ginoo sa paglakaw uban Kaniya. Unsay buot ipasabut sa paglakaw uban sa Ginoo? Nagpasabut kana sa paghimo unsay Iyang gihimo, sa pagserbisyo sama sa Iyang pagserbisyo. Gisakripisyo Niya ang kaugalingon Niyang kaharuhay sa pagpanalangin niadtong nanginahanglan, mao nga kana ang paningkamutan natong buhaton. Ingon og piho Niyang gitagad ang mga tawo nga nataligam-an ug sinalikway sa katilingban, mao nga paningkamutan usab nato kana. Maisugon apan mapinanggaon Siyang mipamatuod sa tinuod nga doktrina nga Iyang nadawat gikan sa Iyang Amahan, bisan og dili ganahan ang uban niini, ug mao usab kita. Miingon Siya sa tanan, “Umari [kamo] kanako” (Mateo 11:28), ug moingon kami sa tanan, “Duol kamo Kaniya.” Isip mga tighupot sa priesthood, Iya kitang mga representante. Molihok kita dili para sa atong kaugalingon apan para Kaniya. Mosulti kita dili sa atong mga pulong apan sa Iyang mga pulong. Ang mga tawo nga atong serbisyuhan mas makaila Kaniya tungod sa atong pagserbisyo.

Kon dawaton na nato ang pagdapit sa Ginoo “Lakaw uban kanako,” mausab ang pamaagi sa atong priesthood nga pagserbisyo. Mas motubo ug mas dungganon dayon kini apan mas daling makab-ot, tungod kay nasayud kita nga wala kita mag-inusara. Gibati nako kini sa hilabihan gayud dihang si Presidente Thomas S. Monson mipandong sa iyang mga kamot sa akong ulo siyam ka tuig nang milabay ug mipanalangin kanako dihang gisugdan nako ang akong pagserbisyo sa karon nako nga calling. Niana nga panalangin, gilitok niya ang mga pulong sa Manluluwas: “Ug kinsa kadto nga modawat kaninyo, didto atua usab Ako, kay Ako molakaw diha sa inyong atubangan. Ako anaa sa inyong tuo nga kamot ug sa inyong walà, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo” (D&P 84:88).

Misalig ako niana nga saad sa daghang higayon, ug akong nakita nga natuman kini sa daghang paagi sa 72 ka tuig nako nga priesthood nga pagserbisyo. Nahitabo kini sa bag-o pa kong nakahupot sa Aaronic Priesthood nga may assignment nga moapud-apud sa sakrament. Sa kahadlok basin og masayop ko, migawas ko sa chapel sa wala pa magsugod ang miting ug nag-ampo sa dakong tinguha nga tabangan ko sa Dios. Miabut ang tubag. Akong gibati nga kauban nako ang Ginoo. Akong gibati ang Iyang kamasaligon kanako, ug mao nga mibati ko og kamasaligon sa akong bahin sa Iyang buluhaton.

Nahitabo na usab kana dihang nagserbisyo ko isip bishop. “Nakadawat ko og tawag sa telepono gikan sa usa ka babaye kinsa nakahimo og seryusong sayop ug nag-atubang og lisud, makausab sa kinabuhi nga desisyon. Sa pagbisita nako niya, gibati nakong nasayud ko sa tubag sa iyang problema, apan kusog usab ang akong pagbati nga dili nako ihatag kana nga tubag—kinahanglan nga siya mismo ang makaangkon niini sa iyang kaugalingon. Ang akong gisulti kaniya mao “Nagtuo ko nga sultihan ka sa Dios unsay buhaton kon mangutana ka Kaniya.” Wala madugay mireport siya nga nangutana siya Kaniya ug Siya misulti kaniya.

Sa laing okasyon usa ka tawag sa telepono ang miabut sa dihang bishop ko—niining higayuna gikan sa pulis. Gisultihan ko nga gidusmog sa usa ka hubog nga drayber ang iyang sakyanan lahos sa bildo ngadto sa lobby sa banko. Sa dihang ang nakalitan nga driver nakakita sa gwardya nga giwara ang armas, misinggit siya, “Ayaw pagpabuto! Mormon ko!”

Nadiskubrihan nga ang hubog nga drayber sakop diay sa akong ward, bag-o lang nabunyagan. Samtang naghulat ko nga makig-istorya kaniya sa office sa bishop, nagplano ko’g unsay akong isulti aron magbasol siya tungod sa iyang pagsupak sa pakigsaad ug pagpakaulaw sa Simbahan. Apan sa dihang naglingkod ko nga nagtan-aw niya, nakadungog ko og tingog diha sa akong hunahuna nga nag-ingon, sama ka klaro kon adunay tawo nga mamulong kanako, “Pakit-on ka nako unsay akong nakita kaniya.” Ug dayon, sa mubo nga panahon, ang tibuok niyang panagway nausab sa akong panan-aw. Dili ang lipong nga batan-ong tawo ang akong nakita apan usa ka sanag, mabuot nga anak sa Dios. Kalit nga gibati nako ang gugma sa Dios kaniya. Kadto nga panan-awon miusab sa among panagsulti. Nakapausab kini kanako.

Nakakat-on ko og importanting mga leksyon gikan niining mga kasinatian sa paglakaw uban sa Ginoo sa paghimo sa Iyang mga buluhaton. Gusto kong mopaambit kaninyo og tulo niini. Ang una mao nga ang Dios makamatikud ug mosuporta bisan sa pinakabag-o ug pinakabata nga deacon. Dili gayud kamo angayang mobati nga gamay ra kaayo o walay kahulugan Kaniya aron makamatikud Siya kaninyo ug sa serbisyo nga inyong gihatag pinaagi sa Iyang pangalan.

Ang ikaduhang leksyon mao nga ang buluhaton sa Ginoo dili lang pagsulbad og mga problema; paglig-on kini og mga tawo. Busa kon kamo mouban Kaniya sa paglakaw sa priesthood nga pagserbisyo, inyong makita nga usahay ang butang nga daw epektibong sulbad dili maoy gipili sa Ginoo nga sulbad tungod kay dili kini makapalambo sa mga tawo. Kon maminaw kamo, tudloan mo Niya sa Iyang pamaagi. Hinumdumi nga ang buhat ug himaya sa Dios dili lang ang pagpadagan og epektibong organisasyon; kini ang “pagpahinabo sa pagka-imortal ug sa kinabuhi nga dayon sa tawo” (Moises 1:39). Mao kini ang rason nganong gihatag Niya ang Iyang awtoridad sa priesthood ngadto sa dili perpektong mga tawo sama ninyo ug nako ug midapit nga kita moapil sa Iyang buhat. Ang atong pag-uswag mao ang Iyang buhat!

Karon ang ikatulong leksyon: Ang paglakaw uban sa Ginoo sa priesthood nga pagserbisyo mousab sa inyong pagtan-aw sa uban. Tudloan Niya kamo nga inyo silang makita pinaagi sa Iyang mga mata, nagpasabut nga ilapas ang pagtan-aw sa panagway ug motan-aw sa kasingkasing (tan-awa sa 1 Samuel 16:7). Sa ingon niining paagiha nakita Niya si Simeon dili isip madali-daliong mangingisda apan isip si Pedro, ang sama kalig-on sa bato nga umaabut nga lider sa Iyang Simbahan (tan-awa sa Lucas 5:1–11). Sa ingon niining paagiha nakita Niya si Zacheo dili isip kurakot nga kolektor sa buhis nga maoy tan-aw sa uban apan usa ka matinuoron, tarung nga anak ni Abraham (tan-awa sa Lucas 19:1–9). Kon maglakaw kamo uban sa Manluluwas sa igong panahon, makakat-on kamo sa pagtan-aw sa tanan isip anak sa Dios nga walay limit ang potensyal, bisan unsa pa ang iyang mga nangagi. Ug kon padayon kamong maglakaw uban sa Manluluwas, makapalambo kamo og laing gasa nga naa Kaniya—abilidad sa pagtabang sa mga tawo nga makakita niana nga potensyal diha sa ilang kaugalingon ug maghinulsol.

Minahal kong mga igsoon sa priesthood, sa daghang paagi, sama kita sa duha ka mga disipulo kinsa naglakaw sa dalan sa Emmaus nianang unang Adlaw sa Pagkabanhaw. Buntag kadto sa Pagkabanlaw, apan dili pa sila sigurado kon may pagkabanhaw ba gyud ug unsay ipasabut sa pagkabanhaw. Sila “nanaglaum … nga [si Jesus sa Nazareth] mao gayud ang magtubos sa Israel,” apan ang ilang “kasingkasing hinayan nga motuo” sa tanan nga gitudlo sa kasulatan mahitungod sa pagkabanhaw. Samtang naglakaw sila ug nagpangutan-anay, “si Jesus miduol ug mikuyog kanila. Apan ang ilang mga mata nahipugngan aron dili sila makaila kaniya.” (Tan-awa sa Lucas 24:13–32.)

Mopamatuod ko nga kon maglakaw kita sa dalan sa priesthood nga pagserbisyo, ang Manluluwas nga si Jesukristo mag-uban kanato, kay Iya kana nga dalan, Iyang agianan. Ang Iyang kahayag mag-una kanato, ug ang Iyang mga anghel managlibut kanato. Posibling magkulang kita sa hingpit nga panabut kon unsa ang priesthood o kon unsaon sa paggamit niini sama sa Iyang gihimo. Apan kon hatagan nato og dakong pagtagad kadtong mga panahon nga ang atong kasingkasing “nagdilaab sulod nato”(Lucas 24:32), maabli ang atong mga mata ug makita nato ang Iyang mga kamot sa atong kinabuhi ug sa atong pagserbisyo. Mopamatuod ko nga mas mailhan nato Siya pinaagi sa pakigtambayayong Kaniya ug pagserbisyo Kaniya sa dakong buluhaton sa pagdala og kaluwasan sa mga anak sa Dios. “Kay unsaon pagkasayud sa usa ka tawo sa agalon kinsa siya wala makaalagad, ug kinsa usa ka dili kaila ngadto kaniya, ug layo gikan sa mga lawom nga mga pagbati ug katuyoan sa iyang kasingkasing?” (Mosiah 5:13). Si Jesukristo ang atong Agalon. Kini ang Iyang Simbahan. Iya nga priesthood ang atong gihuptan. Unta ang matag usa kanato mopili sa paglakaw uban Kaniya ug makahibalo sa unsang paagi Siya molakaw uban kanato.

Akong ipaambit kaninyo ang sagrado nakong pagsaksi nga si Jesus mao ang Kristo, ang atong nabanhaw nga Ginoo. Mohatag ko sa akong pagpamatuod kaninyo nga ang priesthood nga Iyang gisalig kanato mao ang gahum sa pagsulti ug pagbuhat pinaagi sa Iyang ngalan. Mga anak kita sa mapinanggaong Langitnong Amahan kinsa motubag sa mga pag-ampo ug mopadala sa Espiritu Santo sa paglig-on kanato sa matag priesthood nga responsibilidad nga gipanalangin kanato nga madawat. Si Joseph Smith nakakita sa Amahan ug sa Anak. Nadawat niya ang mga yawe sa priesthood, ug kini napasa ngadto kang Presidente Thomas S. Monson, nga naggamit niini karon. Niini ako mopamatuod sa pangalan ni Jesukristo, amen.