“Nakonako ma Ngai”

Tariu n te nakoanibonga aika kam tangiraki, bukin raoi te bong aei bwa ti na reita te kauring bwa kam na aki raraoma, ma kam na karina te korakora iroumi, n ami beku n te nakoanibonga. Ni kawai tabeua, I taku bwa ti te arona ma te kantaninga are e iangoia te Tia Kamaiu ni kaaitibona ma te rorobuaka ae kaubwai are e titirakinna, “Tera te b’ai ae raoiroi ae N na karaoia, ba e aonga n reke irou te maiu are akea tokina?” (taraa Mataio 19:16). Tao rokomi n te maungatabu aei, ai aron kawain te rorobuaka n nakon te Tia Kamaiu, n iangoia bwa tao ami beku a tia ni kariaiakaki. Ao te tai naba anne, kam na kangai bwa iai riki ae a na karaoaki—bwa tao a mwaiti riki! I tataro bwa N na kona n reitaki n ana kariaia ae tangira te Uea ibukin bwaai ake kam a tia ni karaoi, ngkai kam anga naba te kaunganano n te tai ae tau bwa tera ko riai ni karaoia, ma Ana ibuobuoki, ni katiaaki ngkai kam taua Ana nakoanibonga ae mimitong.

Te rorobuaka e tuangaki ni kaboinako ana bwai ni kabane ao n anganiia rarikin man ririmwiin te Tia Kamaiu; ami waaki n taai aika a na roko e na aki kainnanoa anne, ma kanga ai aron e kainnanoa aekakin nako anganano. Teuana man te kawai, Au kantaninga bwa au rongorongo ko na aki “[nako] n rawawata nanom” n aron are e karaoia te rorobuaka. (Taraa Mataio 19:20–22.) Nakon ae, N na onimakiniko nako iaon kawaim ni kukurei (taraaD&C 84:105) ibukina ko tangira te rikirake ao n am iango ko kona..

Riki n anne, e bon tabangaki namakinan akean nakoraoina tabeua ngkana ti iangoia bwa tera ae e weteira iai te Uea ni karaoia. Ni koauana, ngkana ko tuangai bwa ko namakina te kororaoi ni konaa ni kakoroi tabem n te nakoanibonga, n na bae n raraoma bwa ko na aki mataata iaoia. E ngae n anne, ngkana ko tuangai bwa ko namakinna bwa ko na bubai bukina bwa e riaon am konabwai te mwakuri, ngkanne N na tangiria ni buokiko ni kamataata bwa e kanga te Uea ni karikirakeia ao ni kakorakoraia naake iai irouia Ana nakoanibonga ni karaoi bwaai ake aki kona ni karaoi n tii ngaiia.

Aio bon ti koauana irou inanon weteau n au beku n aron are iroumi. Akea mai buakora ae konaa ni karaoa ana mwakuri te nakoanibonga, ao ni karaoia raoi, n onimakin ri oin wanawanara ao ara tarena. Bwa aio bukina tiaki ara mwakuri—bon ana mwakuri te Uea. Ngaia ae tii te kawai are ti na tokanikai iai bon ti man Onimakinana, e ngae ngke ngkoe te riikan ae ko tibwa weteaki ae onimakinaki ni karaoan mwaakan te tamnei n te otenanti n toa; ke te kairake n tia reirei n te mweenga ae mwiokoaki iroun te Uea n tangiriia ao ni mwakuri ma te utu ae ko aki kinaia ao a taraa n aki kainanoa am tangira ke am mwakuri; ke te karo are e ataia are ko na kaira mweengam n te raoiroi, ma n aki koaua ni mwakuriana, ao e birimwaaka te tai, ibukina ataei aikanne a waekoa n ikawai rake ao te aonaaba e taraa ni matoatoa ao n aki raoiroi.

Ngaia ae ngkana ko namakina te karawawataaki, anaia bwa te kanikina ae tamaroa. E kaotaki bwa ko kona ni kabongana kakawakin te onimakinaki are e katukua iaom te Atua. E nanonaki bwa iai teutana am atatai bwa tera te nakoanibonga.

Iai tabeman aomata n te aonaaba ake iai te atatai anne irouiia. Riki irouia naake a kona n takarua nanonakina ae riai n aki koaua ni mataata iai. Iai koroboki aika tabu bwa, n rinanon mwaakan te Tamnei are a uotia, ni konaa ni kananoa ara atatai n namakina karineakin te nakoanibonga. Aikai tabeua koroboki aika tabu aikanne:

E taekinna te Uea n Reirei ao Berita aika Tabu bwa te mwaaka ao te kariaiakaki n te Nakoanibonga ae te Merekitereka bon tauan kiingin ni kabane kakabwaia n tamnei n te ekaretia.

Te mwaaka naba aio e karekea bwain abanuean karawa aika raba, bwa e na kaukaki karawa nakoia, bwa a na marooro ma te botaki ae taabangaki ao ana ekaretia te Karimoa n Nati, ao ni kukurei n rinanon kakabwai n te reitaki ao ni kaotin te Atua te Tama, ao Iesu te tia raoi n te berita ae tabu ae boou.

Te mwaaka ao te kariaia n te Nakoanibonga ae te Aaron, bon taua kiingin aia mwakuri n ibuobuoki anera (taraaD&C 107:18–20).

E kaotaki mwaakan te aro n Atua n te otenanti n te nakoanibonga. …

N akean te mwaaka ao otenanti n te nakoanibonga, akea te aomata ae kona n noora ubun te Atua ao e maiu (taraaD&C 84:20, 22).

“Te nakoanibonga ae rietaata aio [bon] ana rabwata ae tabu natina temwaane [Atua], are te rabwata are mani moan te aonaaba; ke n taekana teuana, n akea moan ana bong ao ke kabanean ana ririki, are katauraoaki man akea tokina nakon akea tokina ni kabane, n aron kamanenaakin bwaai ni kabane irouna” (Aramwa 13:7).

“Ni kabane a katabuaki imwin karekean te rabwata ao te nakoa a riai ni karekea te mwaaka, man te onimaki, n urui maunga, ni katabwena taari, ni kaoraa te ran, n bitiia ni kaburei aroia;

“Ni katoka aki kan ongoia tanga ni buaka n te aba, ni katabwena te aba, n urui kabaebae nako, n tei imatan te Atua; ni karaoi bwaai ni kabane nakon ana kantaninga, nakon ana taeka, n moana taua taekan te aba iroun te natinuea ni mwaane ma te mwaaka; ao aio man ana kantaninga Natin te Atua temwaane are man moan aan te aonaaba” (Joseph Smith Translation, Karikani Bwaai 14:30–31 [n ana abentekiti te Baibaira]).

Teuana te kawai ni kaeka nakon te kabwarabwara ni karinerine mai ieta iaon mwaakan te nakoanibonga bon katautauaia bwa a aki kaineti nakoira. Teuana te kawai ni kaeka bon man titiraki ni ukeuke n tamnei, n titiraki n oin nanora, n aron aikai: I tia n namakina mataroan karawa ni kaukaki nakoiu? Ana kona tabeman ni kabongana te taeka “aia mwakuri n ibuobuoki anera” ni kabwarabwara au beku n te nakoanibonga? I a tia ni uota mwaakan taian atua” inanon maiuiia aomata ake I buokiia? I a tia n urua te maunga, n totokoia te tanga ni buaka, n urui kabaeakiia tabeman, ke n tautaekanaki ni mwaakan te aonaaba—riki ngkana tii te arona—n te aro ni kakoroa bukin ana kantaninga te Atua?

N aron iangoan oin ami kantaninga e aki toki ni uota te namakin are e kona ni karaoaki riki inanon ana mwakuri te Uea. Au kantaning bwa e na anganiko te namakin are kotangiriani karaoia riki—te nano ni kan ira bwaninin ana mwakuri ni kakai ae kamimi. N aron namakinan te moan mwaneka n riki n aroia mwaane bwa ana beku te nakoanibonga e nanonaki ni kaotaki.

Te mwaneka are imwina e kabwarabwaraki te maroro imarenan Iehova ao Enoka. Ti ataia bwa e na riki Enoka bwa Ana burabeti ae korakora are e katea Tion n tain korakoran te buakaka. Ma imwain rikina bwa te burabeti ae korakora, n ana iango Enoka e taku bwa ngaia bon te teinimwaane, e aki kona n taetae raoi ao e riribaaki irouia aomata ni kabane(Moses 6:31). Ongora nakon ana taeka te Uea are kabongana ni kaungaa Enoka. Bon Ana taeka naba nakoimi ake kam weteaki bwa kam na ibuobuoki nakoia tabeman ngkai iai iroumi te nakoanibonga:

E taku te Uea nakon Enoka bwa e na waaki nako ao ni karaoa are e a tia n tuangnga, ao akea te aomata ae e na niniko. E riai ni kaurea wiina, ao e na kaonaki, ao E na anganna te konabwai n taetae, bwa a bane aomata ni mena inanon Baina, ao ni karaoa are e taku bwa e tamaroa Ibukina. …

Bukina bwa e mena Tamneina iaona, ngaia are ana taeka ni kabane E na kariaia; ao a na mwaing maunga imoana, ao karaanga a na bitii kawaia; ao a na mena Irouna, ao Ngai iroumi.(taraaMoses 6:32, 34).

Tariu, katabuakira nakon te nakoanibonga bon te kakao mairoun te Uea n nakonako ma Ngaia. Ao tera ae e nanonaki n nakonako ma te Uea? E nanonaki ni karaoan te bwai ae E karaoia, ni beku n aron are E beku. E anganano n Oin mweraoina ni kakabwaiaia ake a kainanoia, ngaia anne ae ti kataia ni karaoia. E taraa n ae e taraia riki aomata ake aki tabeakinaki ao ake a katinanikuaki irouiia kaain te kaawa, ngaia ti kataia ni karaoa anne naba. E kaota ana kakoaua ma te ninikoria riki ma tangiran te reirei ae koaua are E karekea mairoun Tamana, e ngae ngke e aki rangin n ataaki, ma ti riai ni karaoa naba anne. E taku nakoia ni kabane, “Nakomai Nakoiu” (Mataio11:28), ao ti taku nakoia ni kabane, “Nakomai Nakoina.” N taben te nakoanibonga, ngaira Ana tia tei. Ti aki mwakuri ibukira ma Ibukina. Ti aki taekina ara taeka ma Ana taeka. Aomata ake ti buokiia a Kinaa riki ibukin ara mwakuri n ibuobuoki.

Ngke ti waekoa ni kariaia ana kakao te Uea “Nakonako ma ngai,” aron ara mwakuri n te nakoanibonga e bibitaki. E roko n ti te taina n rietaata ao ni kakannato riki ma ni kaikoro riki bukiia, bukina bwa ti ataia bwa ti aki tiku n ti ngaira. I namakina aio ni korakora riki ngke Beretitenti Thomas S. Monson e katokai baina iaon atuu ruaiwa te ririki n nako ao nikakabwaiaai ngke I moana au beku inanon nakoau ae ngkai. N te kakabwaia anne, e atongi taeka aikai mairoun te Tia Kamaiu, bwa ane e butimwaeai, N na butimwaeia naba, bwa E na rimoau. E na mena iangataiu ao iangamaingiu, ao Tamneina e na mena inanou, ao Ana anera a na mena i buakora, n tabekairake (taraaD&C 84:88).

I a tia ni katine iaon te berita anne ni mwaitin te tai, ao I tia n nooria ni koro bukiia ni kawai aika mwaiti rinanon au 72 n ririki ni beku n te nakoanibonga. E riki ngke I boou n taua te Nakoanibonga ae te Aaron ma au mwakuri ni kabuta te toa. I maaku bwa tao e na bure au mwakuri, I otinako i tinanikun te umwantabu imwain ae waaki te taromauri ao I tataro ni bubuti bwa e na buokai te Atua. Te kaeka e roko. I namakinna bwa te Uea e mena irarikiu.

E manga riki naba ngke I bitiobi. I karekea te tareboon mairoun te aine are e karaoa te kaairua ae moan te bubura ao ngkai N na rinanon te babaire ae kaangaanga. Ngke I kawaria, I namakina kaekaan ana kaangaanga, ma I namakina korakorana naba bwan na aki anganna te kaeka anne—e na bon karaoia irouna. Au taeka nakoina aikai “I kakoaua bwa te Atua e na tuangko tera ae ko na karaoia ngkana ko Bubutia.” Imwiina e ribotinna bwa e Bubutiia, ao E tuangnga.

N te tai teuana, te tareboon e roko ngke I bitiobi—n te tai aei mairouia bureitiman. I tuangaki bwa te turaiwa ae manging e kuratina ana kaa rinanon te kiraati inanon ruun te bangke mai moa. Ngke te turaiwa e a nanououa bwa tera ae e na taekinna e noora te tikuritii ma ana katii ni kaainetia, e tang, “Tai katii! Ngai te Moomon!”

Te turaiwa ae e manging e kuneaki bwa kain au uoote, e tibwa bwabetitoaki n te tai ae aki maan. Ngke I tataninga n taetae ma ngaia n ana aobiti te bitiobi, I baireia bwa tera ae N na taekina nanokawakiu n te bwai ae a tia ni karaoia n urua ana berita aika tabu ao ni kamaemaea te ekaretia. Ma ngke I tekateka n taraia, I ongo te bwanaa n au iango n taku, n ae kanga iai temanna te aomata ae taetae nakoiu, “N na anganiko bwa ko na tarataraia ngkai I taraia.” Ao ngkanne, n te tai ae kimototo, e bitaki taraana irou. I aki noora te rorobuaka ae akea kanoan ana iango ma ai natin te Atua ae e itiaki, e ootanako, n rine. I waekoa n namakina ana tangira te Uea ibukina. Te mii anne e bita ara maroro. E bitai naba.

I reiakin reirei aika kakawaki man taneiai aikai n nakonako ma te Uea ni karaoa Ana mwakuri. N na tibwauai tenua mai buakoia. Te moan bwai te Atua e ataia ao ni boutokaa riki riikan aika a boou ao aika kabanea ni uarereke. Ko na aki iangoia bwa ko uarereke ke ko aki kakawaki Ibukina bwa e na nooriko ao te mwakuri are ko anga n Arana.

Te kauoua n reirei bwa ana mwakuri te Uea e bon aki ti katokii kaangaanga; e na kanakoraoia aomata. Ngaia are ko na nakonako ma Ngaia n ana mwakuri te nakoanibonga, ko na kunea bwa n tabetai ko na kunea te kaeka ae tawe tiaki ae e tangira kaekaana te Uea bukina e aki kariaia aomata n rikirake. Ngkana ko ongora, E na reireiniko Ana kawai. Uringa bwa ana mwakuri te Atua ao mimitong kanga e aki ti kabuta te bootaki ae nakoraoi; e na karekea te aki mamate ao te maiu ae akea tokina nakon te aomata (taraaMoses 1:39). Aio, bukina ngkaiE anga Ana kariaia n te nakoanibonga nakoia apmata aika buakaka n arom ao ngai ao ni kaoira n irii Ana mwakuri. Rikirakerabon Ana mwakuri!

Ngkai te katenua n reirei: Te nakonako ma te Tia Kamaiu inanon ana mwakuri te nakoanibonga e na bita te kawai n aron am taratara nakoia tabeman. E na reireiniko n taratara n rinanon Matana, are e nanonaki n tarakin tinanikuia ao inanoia (taraa1 Tamuera 16:7). Aio aron te Tia Kamaiu ni kona n tara Timon tiaki te tia akawa ae e aki kona iango ma ai aron Betero, te bwaa-matoa te tia kairiiri n Ana Ekaretia (taraa Ruka 5:1–11). Aio arona ni kona n noora Takaio tiaki tii te tia ikoiti mane ae babakanikawai n nooraki irouia tabeman ma e kokoaua, bon natin Aberaam (taraa Ruka 19:1–9). Ngkana ko nakonako ma te Tia Kamaiu n te abwaki ae tau, ko na reiakinna n nooria ni kabane aomata bwa bon natin te Atua ma aia konabwai aika akea tiaia, n aki tabe bwa aekakira aron maiun teuanne ke neienne n taai ake a nako. Ao ngkana ko reitinako n nakonako ma te Tia Kamaiu, ao ko na karikirakea te bwaintangira riki teuana ae iai Irouna—te konaa ni buokiia aomata bwa ana noora te konabwai anne irouia ao n raira nanoia.

Tariu aika kam tangiraki n te nakoanibonga, ni kawai aika mwaiti, ngaira bon ti te arona ma Ana reirei ake uoman n nakonako n te kawai nako Emauti n te moan Tabati n tain te Itita. Bon moaningabongin te Mangauti, ma e tuai ataaki raoi bwa iai te Mangauti ke tera te Mangauti are e nanonaki. A “onimaki bwa [Iesu te I-Natareta] e riai n tia ni kabooa Iteraera,” ma a bon “waeremwe nanoia ni kakoauai” bwaai ni kabane ake a taekinaki ni booki aika tabu n taekan te Mangauti. Ngke a uaia n nakonako ao a kataia ni uaia ni kakaea raoi bukina, “Iesu bon ngaia e kaniia, ao e airi ma ngaiia. Ao a tauaki mataia bwa ana aki kina” (TaraaRuka 24:13–32).

I kakoaua bwa ngkana ti nakonako ni kawain ana mwakuri te nakoanibonga, te Tia Kamaiu Iesu Kristo e airi ma ngaira, bwa bon kawaina, Ana kawai. Ootana e rimoara, ao Ana anera a katobibiira. Ti kona n aki rangin n ota bwa tera te nakoanibonga ke ti na kanga ni kamwakuria n aron are E karaoia. Ma ngkana ti kabanei raoi nanora nakon taai aikanne ngkana nanora “a bue i nanora” (Ruka 24:32), ana kaukaki matara ao ti na noori Ana kairoro ni maiura ao n ara mwakuri. I kakoaua bwa ti karekea te koaua Ibukina man te mwakuri ma Ngaia ao ni beku Ibukina n te mwakuri ae kakawaki ni uota te mwakuri ni kamaiu nakoia natin te Atua. “Bwa e na kangaa te aomata ni kinaa te toka are e tuai ma ni beku irouna, ae e iruwa nakoina, ao e raroa nako man ana iango ma ana kaantaninga?” (Motiaea 5:13). Iesu Kristo bon te Mataniwi. Aio Ana Ekaretia. Bon Ana nakoanibonga are ti taua. Ti bia rineia n nakonako ma Ngaia ao ni kinaa bwa E kanga n nakonako ma ngaira.

I anganingkami au kakoaua bwa Iesu bon te Kristo, ara Uea ae e a tia ni Mangauti. I kakoaua nakoim au koaua bwa te nakoanibonga E a tia n onimakiniira ma ngaia bon te mwaaka n taetae ao ni mwakuri inanon Arana. Ngaira bon natin Tamara are i Karawa ae tangira, are e kaekai ara tataro ao ni kanakoa te Tamnei ae Raoiroi bwa e na kakorakoraira n te mwakuri n te nakoanibonga are ti kakabwaiaaki ni karekea. Iotebwa Timiti e noora te Tama ao te Nati. E karekei kiingin te nakoanibonga are e a tia ni bwaatinaki nakon Beretitenti Thomas S. Monson, are e kamwakuri n te bong aei. I kakoaua n aran Iesu Kristo, amen.