“Makipagnakayo Kaniak”

Patpatgek a kakabsatko ti priesthood, panggepko ita a patalgedan ken papigsaenkayo, iti panagserbiyo iti priesthood. Iti sumagmamano a wagas, maipada iti panggep ti Mannubbot idi masabatna ti nabaknang a barito a nagdamag, “Ania ti naimbag nga aramidek tapno maaddaan iti biag nga agnanayon?”(Mateo 19:16). Nalabit nga immaykayo ditoy a komperensia, kas itoy barito a napan iti Mannubbot, nga agpampanunot no maawat met laeng ti serbisioyo. Ket kasta met a mariknayo nga adu pay ti aramiden—nalabit nga ad-adu pay! Sapay ta maidanonko ti naayat a pananganamong ti Apo para iti nalpasyon nga inaramid, bayat ti panangtedko iti makaparegta a lagip ti magun-odyo, babaen ti tulongna, kas addaan iti nasantuan a priesthoodna.

Nakiddaw iti nabaknang a barito nga ilakona ti amin a kukuana ket ited iti marigrigat tapno sumurot iti Mangisalakan; mabalin a di kasapulan dayta iti masakbayan a panagdur-asyo, ngem nalabit nga agkasapulanto iti sakripisio. Sapay koma ta ti mensahek saan a “mamagliday iti ipapanawyo” kas iti barito. (Kitaen iti Mateo 19:20–22.) Ketdi, agtalekak a “pumanawkayto a siraragsak” (DkK 84:105) gapu ta kayatyo ti dumur-as ken panagkunayo a kabaelanyo.

Nupay kasta, gagangay a mariknatayo ti pagkurangan no ibilangtayo ti impaaramid ti Apo kadatayo. Kinapudnona, no ibagayo kaniak a naan-anay a kabaelanyo nga ipatungpal dagiti pagrebbenganyo iti priesthood, madanaganak amangan no diyo maawatan ida. No ibagayo a kasla sumukokayon gapu ta diyo kabaelan ti aramid, ngarud kayatko nga ipaawat kadakayo no kasano a pinaregta ken pinapigsa ti Apo dagiti addaan iti priesthoodna nga agaramid iti bambanag a dida koma naaramid no is-isuda laeng.

Pumudno daytoy kaniak iti awagko, kasta met kadakayo. Ditayo makaipatungpal a naimbag iti aramid ti priesthood, no agpannuray laeng iti sirib ken talentotayo. Gapu ta ditayo aramid—aramid ti Apo daytoy. Ti laeng wagas tapno agballigi ket agpannuray Kenkuana, kaaw-awagka man a deacon a napagtalkan iti aramid a mangyeg iti bassit a kita ti naespirituan a bileg iti ordinansa ti sakramento; wenno agtutubo a home teacher a tinudingan ti Apo nga agayat ken agserbi iti pamilia a diyo am-ammo ken kasla dina tarigagayan ti ayatyo wenno tulongyo; wenno ama a makaam-ammo kadakayo tapno mangimaton iti pagtaenganyo iti kinalinteg, ngem nalabit a dikayo sigurado no kasano nga aramiden daytoy, ket kasla bassiten ti panawen, gapu ta alisto a dumakkel dagita nga ubbing ken kasla naulpit ken natangsit ti lubong.

No mariknayo a kasla natalipuposkayo, ibilang dayta a maysa a napintas a tanda. Ipakitana a mariknayo ti kadakkel ti talek ti Dios kadakayo. Kaipapananna a maawatanyo bassit no ania a talaga ti priesthood.

Manmano dagiti tao iti lubong ti addaan iti kasta a pannakaawat. Mabalin a saan a pudno a maawatan uray dagiti makaisao iti napintas ti pannakailawlawagna. Adda dagiti nasantuan a kasuratan a babaen ti bileg ti Espiritu nga ikutda, mangpauneg iti pannakaawattayo maipanggep iti nasantuan a priesthood. Dagitoy ti sumagmamano kadagita a nasantuan a kasuratan:

“Ti bileg ken turay ti … Melchizedek Priesthood, agiggem kadagiti tulbek ti amin a naespirituan a bendision ti simbaan—

“Tapno maaddaan iti gundaway nga umawat iti kinadatdatlag ti pagarian ti langit, tapno maluktan ti langit kadakuada, tapno makikaysa iti sapasap a panagtitipon ken ti simbaan ti Inauna, ken tapno sagrapenna ti pannakikaysa ken ti kaadda ti Dios Ama, ken ni Jesus a mangibabaet iti baro a katulagan.

“Ti bileg ken turay ti … Aaronic Priesthood agiggem kadagiti tulbek dagiti agserserbi nga anghel” (DkK 107:18–20).

“Kadagiti ordinansa [ti priesthood], naipakita ti bileg ti kinadios. …

“Ta no awan daytoy awan ti tao a makakita iti rupa ti Dios, nga isu ti Ama, ken sibibiag” (DkK 84:20, 22).

“Daytoy nangato a priesthood kas mainugot iti urnos ti Anak ti [Dios], a dayta nga urnos nagtaud iti pamuon ti lubong wenno iti sabali a pannao, dagiti awanan iti punganay nga aldaw wenno ngudo dagiti tawen, kas naisagana manipud iti agnanayon agingga iti agnanayon, maibatay iti pasakbay a pannakaammona iti amin a banag” (Alma 13:7).

“Tunggal maysa a maordenan babaen daytoy nga urnos ken akem a maaddaan iti bileg, babaen ti pammati a mangrebba kadagiti bantay, mangabbat iti danum, a mamagsubli kadagitoy iti ayoda;

“A mangkarit kadagiti buyot ti pagilian, mangbingay iti daga, manglettat iti tunggal tanikala, tumakder iti sango ti Dios, mangaramid iti amin a banag a maibatay iti pagayatanna, maibatay iti bilinna, parmeken dagiti pagturayan ken bileg; ket daytoy babaen ti pagayatan ti Dios a nangrugi pay laeng idi punganay ti lubong” (Patarus ni Joseph Smith, Genesis 14:30–31 [iti Bible appendix]).

Maysa a wagas a pakasungbatan dagiti kasta a makaparegta a panangiladawan ti bileg ti priesthood ket panangipapan a dida mausar kadatayo. Maysa pay a pakasungbatan dagiti saludsod iti panagsapsapul iti kararua, damagen iti pusotayo dagitoy: Nariknak kadin a naluktan ti langit kaniak? Adda kadi mangusar iti balikas a “panagserserbi dagiti anghel” a mangiladawan iti serbisiok iti priesthood? Mayegko kadi ti “bileg ti kinadios” iti biag dagiti pagserbiak? Narebbak kadin ti bantay, naparmek ti buyot, nalettat ti kawar ti tao, wenno naparmek dagiti nailubongan a bileg—tapno matungpal ti pagayatan ti Dios?

Ti kasta a panangamiris iti bagi ket kanayon a mangiparikna a makaaramidtayo iti ad-adu pay iti serbisio ti Apo. Sapay ta mangiparikna met kadakayo akayatyoti agaramid iti ad-adu pay—panaggagar a makiraman a naan-anay iti datdatlag nga aramid ti Apo. Dagita a rikna ti umuna nga addang iti panagbalin a kita ti tao a paaddaen ti serbisio iti priesthood.

Nailadawan ti sumaruno nga addang iti panagsango da Jehova ken Enoc. Ammotayo a nabileg a propeta ni Enoc a nagipasdek iti Zion iti baet ti nakaro a kinadangkes. Sakbay a nagbalin a nabileg a propeta, nakita ni Enoc ti bagina nga “agtutubo. … a nabuntog nga agsao,” ken kagura ti amin a tao (Moises 6:31). Denggen ti balikas nga inusar ti Apo ken Enoc. Dagitoy pay ti balikasna kadakayo a naawagan nga agserbi iti dadduma kas priesthood holder.

“Ket kinuna ti Apo ken Enoc: Mapanka ket aramidem ti kas iti imbilinko kenka, ket awan ti asino man a mangdangran kenka. Luktam dayta ngiwatmo, ket mapnonto, ket pagbaliksenkanto, ta adda kadagiti imak ti amin a nabiag, ket aramidek ti namnamaek a nasayaat. …

Adtoy adda kadakayo ti Espirituk, gapuna aramidek a nainkalintegan amin a balikasyo, ket umadayo dagiti bantay kadakayo, ken agbaliw ti ayus dagiti karayan; ket agtungpalkayo kaniak, ken siak kadakayo; ngarud surotendak” (Moises 6:32, 34).

Kakabsat, ti ordinasiontayo iti priesthood ti awis ti Apo a makipagna Kenkuana. Ania ti kayat a sawen ti makipagna iti Apo? Kayatna a sawen nga aramiden ti aramidenna, agserbi kas panagserbina. Insakripisiona ti pagnam-ayanna tapno mangbendision iti agkasapulan, ket dayta ti aramidentayo. Ipangrunana a kitaen dagiti tao a naliwayan ken binaybay-an ti gimong, isu nga aramidentayo met dayta. Pinaneknekanna ti pudno a doktrina nga inawatna iti Amana, ket nasken nga aramidentayo met dayta. Kinunana iti amin, “Umaykayo kaniak” (Mateo 11:28), ket kunatayo iti amin, “Umaykayo Kenkuana.” Kas priesthood holder, datayo ti mangibagi Kenkuana. Agtignaytayo a saan a para iti bagitayo ngem para Kenkuana. Isaotayo saan a ti balikastayo ngem ti balikasna. Ad-adda a maam-ammo Isuna dagiti tao a pagserbiantayo gapu iti serbisiotayo.

No maawattayo ti awis ti Apo a “Makipagna kaniak,” agbaliw ti kita ti serbisiotayo iti priesthood. Aggiddan nga agbalin a nangatngato ken nangayngayed ngem ad-adda a maragpat, gapu ta ammotayo a ditayo agmaymaysa. Nariknak a nabileg unay idi impatay ni Presidente Thomas S. Monson dagiti imana iti ulok siam a tawenen ti naglabas ket binendisionannak bayat ti panangrugik iti serbisiok iti agdama nga awagko. Iti dayta a pammendision, insaona dagitoy a balikas ti Mangisalakan: “Asino man a mangawat kadakayo, addaakto met sadiay, ta addaakto iti sangoyo. Addaakto iti makannawanyo ken makannigidyo, ket addanto ti Espirituk iti puspusoyo, ket likmutendakayto dagiti anghelko a mangtarabay kadakayo” (DkK 84:88).

Namin-adu a nagpannurayak iti dayta a kari, ket nakitak a natungpal iti adu a wagas iti 72 a tawenko iti serbisio iti priesthood. Napasamak idi kabarbaroak nga Aaronic Priesthood holder a natudingan nga agpasa iti sakramento. Nagamakak amangan ta agbiddutak, rimmuarak iti chapel sakbay ti rugi ti miting ket nagkararagak a tulongannak koma ti Dios. Dimteng ti sungbat. Nariknak a kaduanak ti Apo. Nariknak ti panagtalekna kaniak, ket nariknak ti panagtalekko iti aramidna.

Napasamak manen idi agserserbiak a maysa a bishop. Nakaawatak iti awag iti telepono ti babai a nagbasol iti nadagsen ket naipasango iti narigat ken makapagbalbaliw-biag a desision. Idi bisitaek, nariknak nga ammok ti sungbat ti problemana, ngem nariknak unay a nasken a diak ited ti sungbat—masapul a gun-odenna para iti bagina. Kinunak kenkuana “Patiek nga ibaganto ti Dios ti aramidem no agsaludsodka Kenkuana.” Imbagana kaniak idi agangay a nagsaludsod Kenkuana, ket imbagana kenkuana.

Iti sabali a gundaway, dimteng ti awag iti telepono, idi maysaak a bishop —itoy a gundaway manipud iti pulis. Naibaga nga indungpar ti nabartek a drayber ti luganna iti sarming iti lobby ti bangko. Idi makita ti drayber ti security guard a nakatudo ti paltogna, impukkawna, “Dinak paltogan! Maysaak a Mormon!”

Naammuak a miembro ti wardko ti nabartek a drayber, kabumbuniag laeng. Idi urayek a kasarita iti bishop’s office, naplanokon ti isaok tapno ipariknak ti panagbabawina ta naglabsing iti katulaganna ken nangibabain iti Simbaan. Ngem iti panangkitak kenkuana, nangngegko ti timek iti panunotko, a kas kalawag ti timek ti maysa a tao a makisasao kaniak a kunana, “Ipalubosko a kitaem kas iti panagkitak kenkuana.” Kalpasanna, iti apagbiit, nagbaliw ti langana kaniak. Saan a nagulo a barito ti nakitak ngem maysa a nalaing, natakneng nga anak ti Dios. Dagus a nariknak ti ayat ti Apo kenkuana. Binaliwan dayta a pannirigan ti panagsaritami. Daytoy met ti namagbalbaliw kaniak.

Naadalko dagiti napapateg a leksion kadagitoy a padas a nakipagpagna iti Apo iti panangaramid iti trabahona. Ibinglayko ti tallo kadagitoy. Ti umuna ket makita ken tulongan ti Dios uray ti kabumbuniag ken kaubingan a deacon. Diyo pulos marikna a bassitkayo unay wenno awan unay pategyo Kenkuana tapno makitanakayo ken ti serbisio nga it-itedyo iti naganna.

Maikadua a leksion a ti aramid ti Apo ket saan a mangrisut laeng iti problema; daytoy ti mangpadur-as iti tao. No makipagnakayo Kenkuana iti serbisio iti priesthood, maammuanyo a ti kapintasan a pangrisut ket saan a ti naitudo a pangrisut ti Apo gapu ta saan a mangpadur-as iti tao. No denggenyo, suruannakayo iti wagasna. Lagipen a ti aramid ken gloria ti Dios ket saan a mangimaton iti nasamay nga organisasion; daytoy ti “mangipatungpal iti saan nga ipapatay ken agnanayon a biag ti tao” (Moises 1:39). Daytoy ti gapu no apay nga itedna ti turay ti priesthoodna kadagiti nagbiddut a tao kas kadatayo ket awisennatayo a makiraman iti aramidna. Ti panagdur-astayo ket aramidna!

Maikatlo a leksion: Ti pannakipagna iti Mangisalakan iti serbisio ti priesthood ti mangbalbaliw iti panangkitayo iti dadduma. Suruannakayto a mangkita kadakuada babaen ti matana, a kayatna a sawen panangkita iti akinruar a langa ken iti puso (kitaen iti 1 Samuel 16:7). Daytoy ti panangkita ti Mangisalakant ken Simon a saan a nadursok a mangngalap no di ket kas maysa a Pedro, ti natibker a masakbayan a lider ti Simbaanna (kitaen iti Lucas 5:1–11). Daytoy ti panangkitana ken Zaccheo a saan a dakes nga agsingsingir iti buis no di ket maysa a mapagtalkan, nalinteg nga anak ni Abraham (kitaen iti Lucas 19:1–9). No makipagnakayo iti Mangisalakan iti napaut, maadalyo ti agkikinnita kas anak ti Dios nga addaan iti potensial, ania man ti napalabasna. Ket no ituloyyo ti makipagna iti Mangisalakan, mapadur-asyo ti maysa pay a sagut nga adda Kenkuana—ti kabaelan a tumulong iti tao a mangkita iti potensial iti bagida ket agbabawi.

Patpatgek a kakabsatko iti priesthood, iti adu a wagas, maipadatayo iti dua a disipulo a nakipagna iti dalan iti Emaus iti dayta a Domingo ti umuna a Paskua ti Panagungar. Bigat ti Panagungar idi, ngem dida sigurado nga adda panagungar wenno ania ti kaipapanan ti panagungar. “Nagtalekda a subboten ni [Jesus a Nazareno] ti Israel,” ngem “nabuntog ti pusoda a mamati” iti amin nga insuro ti nasantuan a kasuratan maipapan ti panagungar. Bayat ti pannagnada ken panagsisinnaludsodda, “immasideg ti Jesus ket nakikuyog kadakuada. Ngem nakullaapan dagiti matada tapno dida mailasin.” (Kitaen iti Lucas 24:13–32.)

Paneknekak a no magnatayo iti dalan ti serbisio iti priesthood, makipagna kadatayo ni Jesucristo gapu ta dalanna daytoy. Silawanna ti sangotayo, ket likmutandatayo dagiti anghelna. Mabalin a ditayo maawatan no ania ti priesthood ken no kasano ti mangusar kas iti panangusarna. Ngem no ikasotayo dagita a kanito no ti pusotayo ket “rumayray iti unegtayo” (Lucas 24:32), agmulagattayo, ket makitatayo ti imana iti biag ken serbisiotayo. Paneknekak a maam-ammotayo a naimbag iti pannakipagtrabaho ken panagserbi Kenkuana iti naindaklan nga aramid a mangyeg iti pannakaisalakan dagiti annak ti Dios. “Gapu ta kasano ti pannakaammo ti tao iti amo a saanna a nagpaayan ken isu a ganggannaet kenkuana ken adayo iti pampanunot ken panggep ti pusona?” (Mosiah 5:13). Ni Jesucristo ti Apotayo. Daytoy ti Simbaanna. Iggemtayo ti priesthoodna. Pilientayo koma ti makipagna Kenkuana ken bigbigen no kasano a makipagna Isuna kadatayo.

Paneknekak kadakayo a ni Jesus ti Cristo, ti nagungar nga Apotayo. Paneknekak a ti priesthood nga intalekna kadatayo ket ti bileg nga agsarita ken agtignay iti naganna. Annaknatayo ti naayat a Nailangitan nga Ama, a mangsungbat iti kararagtayo ken mangibaon iti Espiritu Santo a mangpapigsa kadatayo iti tunggal pagrebbengan iti priesthood nga awatentayo. Nakita ni Joseph Smith ti Ama ken ti Anak. Inawatna dagiti tulbek ti priesthood a naipasa ken ni Presidente Thomas S. Monson, a mangus-usar kadagitoy iti agdama. Paneknekak daytoy iti nagan ni Jesucristo, amen.