“Etetal Ippa”

Em̧m̧aan ro rejintōn bōro ilo priesthood, jibadbad eo aō rainin ej jim̧or n̄an kakeememej kom̧ im n̄an kapilōk kom̧ ilo jerbal eo ami ilo priesthood. Ilo wāween ko jet, ejja āinwōt ilo jibadbad eo ij antoone ke Rilo̧mo̧o̧r eaar Ioon eo em̧weie eo eaar kajjitōk, “Ewi men eo em̧m̧an Inaaj kōm̧m̧ane, bwe en aō mour indeeo?” (Matu 7:12). Bōlen komaron̄ kar itok n̄an kweilo̧k in, āinwōt likao in eaar ilo̧k n̄an Rilo̧mo̧o̧r, ļōmņak bōlen jerbal ko am̧ rem̧m̧an. Ilo ejja iien in wōt, komaron̄ jeļā bwe ej wōr wōt men n̄an kōm̧m̧ane—Bōlen elōn̄ ļo̧k! Ij jar bwe jen maron bok iakwe in an Irooj em̧ōj letok n̄an kōj kajjojo kōn ta eo em̧ōj ad kōm̧m̧ane, n̄an barāinwōt leļo̧k naan in rōjan̄ ta eo jemaron̄, kōn jipan̄ eo An, aaet tōpare āinwōt juon rikabwijer priesthood eo An ekwojarjar.

Likao in em̧weie kar ba bwe en wia kake men ko an innām ļoor Rilo̧mo̧o̧r eo; eddōkļo̧k eo am tokālik emaron̄ in jab tōprak, ak enaaj tōprak kōn jon̄an am wūjlepļo̧k. Ak jabdewōt, ij kōjatdikdik bwe ennaan eo aō eban kōm̧m̧an bwe kwōn “[ilo̧k] ilo būrum̧ōj,” āinwōt kar likao in. (Lale Matu 19:16–22.) Ijoke, Ij erra bwe kwonaj“ilōk ilo m̧ōņōņō” (K&B 84:105) kōnke kwōj kōņaan em̧m̧anļo̧k.

Kōn menin, ekkā ad en̄jake inepata n̄e jej ļōmņak ta eo Irooj eaar kūr kōj n̄an kōm̧m̧ane. Ilo m̧ool, n̄e kwōj ba n̄an eō ke kwolukkuun karbab n̄an kakūm̧ool eddo ko am ilo priesthood, ij inepata bwe kwojjab meļeļe kaki. Ilo bar juon wāween, eļan̄n̄e kwōj ba n̄an eō ke kwoj tin ebbeer kōnke jerbal in epen kōm̧m̧ane, ij kōņaan jipan̄ eok bwe kwōn meļeļe elmen an Irooj kōm̧m̧an im kōkajoorļo̧k rikabwijer priesthood ro An n̄an kōm̧m̧ane men ko reban kōm̧m̧ani lļo̧k iaer.

En̄in ej m̧ool eo ilo kūr eo aō āinwōt bar eo am. Ejjeļo̧k en emaron̄ kōm̧m̧ane jerbal in an anij, im em̧m̧anļo̧k ilo an kōm̧m̧ane, kōn jeļā ko ad make. Bwe kōnke ejjab ad jerbal in—ej an Irooj. Wāween eo dein n̄an em̧m̧anļo̧k ej pedped ilo E, men̄e kwe tikōn eo ekāāl tata eleke kōn jerbal eo ej bōktok jon̄an kajoor eo ilo jetōb ilo kain̄i eo ilo kwojkwojak; juon rikaki in loļo̧k m̧oko ro kar jitōn̄e jān Irooj n̄an iakwe im kwaļo̧k n̄an baam̧le eo kwojjab jeļā kajjier im ro rejjab kōņaan bwe kwōn iakwe ak katakin er; ak juon baba eo ejeļā kajjiem̧ eo ej tōl ilo m̧weo im̧ōm̧ ilo jim̧we, ak bōlen kwojjab jeļā kilen kōm̧m̧ane, im ejjeļo̧k iien, kōnke ajri ro em̧ōj aer rūtto im bōlen raankeke im penļo̧k.

Im ne kwōj en̄jake am̧ eddodo, bōke āinwōt juon kōkkaļļe. Ej kwaļo̧k bwe komaron̄ jeļā bwe kōjatdikdik eo an Irooj kar likūt ioom̧. Ej meļeļein bwe ewōr am jidik meļeļe kōn ta eo priesthood.

Ewōr jejjo̧ armej ioon laļ in remeļeļe. Jekdo̧o̧n ro remaron̄ pukot juon meļeļe eaorōkļo̧k ak reban meļeļe. Ewōr jet eoon ko me, kōn kajoor in an Jetōb remaron̄ en̄jake, emaron̄ kapenļo̧k ad meļeļe ekkar n̄an priesthood eo ekwojarjar. Erkein ej jet iaer:

“Kajoor im mālim eo an … Melkisedek Priesthood, ej n̄an kabwijer kii ko an aolep kōjeraam̧m̧an ko an jetōb ilo Kabun̄ eo—

“N̄an an wōr ippān utiej in n̄an bōki mennin ittino ko an aelōn̄ in lan̄, n̄an an wōr maron̄ in kōpeļļo̧k lan̄ ko n̄an er, n̄an em̧m̧ao ippān jarlepju ko im kabun̄ eo an M̧aanje eo, im n̄an ioon jemdoon eo im baaktok eo an Anij Jemān, im Jisōs rijojomar eo an bujen eo ekāāl.

“Kajoor im mālim eo an… Priesthood eo an Aron, ej n̄an kabwijer kiko an jipan̄ ko an enjeļ raņ” (K&B 107:18–20).

“Ilo kain̄i eo an [priesthood], kajoor in āinwōt anij ej waļo̧k. …

“Bwe ijello̧kun men in ejjeļo̧k armej emaron̄ lo turin mejān Anij, em̧ool Jemān, im mour”(K&B 84:20, 22).

“Priesthood utiej in [ej] ālikin laajrak eo an [Nejin], laajrak eo me eaar jān pedped an laļ; a ilo bar jet naan, ejjeļo̧k jinoin raan ko ak jem̧ļo̧kin iiō ko an, kar kōpooje jān indeeo n̄an indeeo, ekkar n̄an jeļā eo m̧okta An kōn men otemjeļo̧k” (Alma 13:7).

“Bwe aolep ro rej ekkapit elikin laajrak in im kūr in en wōr an kajoor, jān tōmak, n̄an rupi toļ ko, n̄an kajebbel lojet eo, n̄an karoji dān ko, n̄an ukōte er jān to̧o̧rļo̧k ko aer

“N̄an anjo̧ ioon jarin tariņae ko an laļ ko, n̄an ajeje laļ, n̄an rupe jar otemjeļo̧k, n̄an jutak ilo im̧aan mejān Anij; n̄an kōm̧m̧an men otemjeļo̧k ekkar n̄an Ankilaan, ekkar n̄an naan in jiron̄ eo An, jujuri ilaļ irooj ro im kajoor ko; im men in jān ankilaan eo Nejin Anij eo me e kar m̧okta jān pedped ko an laļ” (Joseph Smith Translation, Genesis 14: 30-31 [in the Bible appendix]).

Juon wāween n̄an uwaake kain kōmeļeļe ko reim̧we an kajoor eo an priesthood ej n̄e jej ļōmņak bwe ejjab jerbal n̄an kōj. Bar juon wāween n̄an uwaak ej jān uwaak in kajjitōk ko jej pukoti, kar kajjitōk ilo būruwōd, kain kajjitōk kein: Em̧ōj ke aō kar en̄jake bwe lan̄ em̧ōj an kar peļļo̧k n̄an eō? Ewōr ke emaron̄ kōjerbal eoon in “jipan̄ an enjeļ raņ” n̄an kōmeļeļeiki jerbal eo an ilo priesthood? Ij ke bōktok “kajoor āinwōt anij” n̄an mour ko an ro ij jipan̄ er? Ikar ke rupe toļ ko, ikar ke jumae kumi in tarinae, rupe korak an juon, ak anjo ioon kajoor ko an laļ in—men̄e ej n̄an bajōk—n̄an maron̄ kadedeļo̧k jerbal in an Irooj?

Mōņōņō rot in ekkā an bōk tok juon en̄jake me ekōm̧m̧an bwe en lapļo̧k ad kōm̧m̧ane jerbal in an Irooj. Ij kōtmāne ebarāinwōt bōktok n̄an eok jet en̄jake ko bwe kwōn kōņaan kōm̧m̧ane—juon iien eaitok n̄an jerbal in ekabwilōn̄lōn̄ an Irooj. Jabdewōt en̄jake eo jinointata ej bōktok n̄an em̧m̧aan eo kain jerbal eo priesthood eo ej kōm̧m̧ane.

Bun̄tōn eo juon n̄an kōmeļeļeik m̧akūtkūt ko kōtaan Irooj im Inōk. Jejeļā Inōk āinwōt juon rikanaan eļap ekar ejaake Zaion ilubwilijin rijerawiwi ro. Ak m̧okta jān an kar juon rikanaan ekajoor, Inōk make eaar lo e make āinwōt “n̄aij juon ļaddik wōt, … rum̧wij ilo kōnono,” im aolep armij rej dike eō (Moses 6:31). Ronjaki naan ko an Irooj kar kōjerbali n̄an rōjan̄ Inok. Rej barāinwōt naan ko An n̄an kom̧ ro kar kūr er n̄an kwaļo̧k naan n̄an ro jet āinwōt rikabwijer priesthood eo.

“Im Irooj eaar ba n̄an Inok: Kwōn ilo̧k im kōm̧m̧an āinwōt Iaar jiron̄ eok, im ejjeļo̧k armej enaaj wākare eok. Kwōn kōpeļļo̧k lo̧n̄iūm, im enaaj obrak, im Inaaj lewōj n̄an eok ekkōnono, bwe aolep kanniōk ej ilo Peiū, im Inaaj kōm̧m̧an āinwōt an em̧m̧an n̄an Eō. …

“Bwe lo aō Jetōb ej pād ioom, kōn menin aolep naan ko am Inaaj kajejjeti; im toļ ko renaaj ko im̧aam, im reba ko renaaj oktak jān aer to̧o̧rļo̧k; im kwo naaj jokwe ilo N̄a, im N̄a ilo kwe; kōn menin etetal Ippa” (Moses 6:32, 34).

Em̧m̧aan ro, ekkapit eo ad n̄an priesthood eo ej juon kūr jān Irooj n̄an etetal Ippān. Ta meļeļe n̄an etetal ippān Irooj? Ej meļeļein kōm̧m̧an ta ko Ej kōm̧m̧ane, jerbal āinwōt An kar jerbal. Eaar wujlepļo̧k An ineem̧m̧an n̄an kōjeraam̧m̧an ro rej aikuj, bwe en āindein ad kōm̧m̧ane. Ej kile armej ro enana kōm̧m̧an n̄an er im barāinwōt ilo jukjukinpād, āindein jej aikuj kajjieon̄ bar kōm̧m̧ane. Eaar lukkuun kam̧ool ilo iakwe kōn pen kōn katak em̧ool Eaar bōk jen Jemān, men̄e ejjab bun̄bun̄, im āindein barāinwōt kōj. Ekar ba n̄an aolep, “Itok n̄an Ippa”(Matu 11:28), im jemaron̄ ba n̄an aoelp: “Itok n̄an Ippān.” Āinwōt kōj rikabwijer priesthood ro, kōj ro rej rijilōk ro An. Jejjab jerbal n̄an kōj make ak n̄an E. Jejjab kōnono naan ko ad ak An. Armej ro jej jerbal ippāer eļapļo̧k aer jeļā kōn E kōn jerbal eo ad.

Ilo tōre eo jej bōk kūr eo an Irooj “Etetal ippa,” jerbal in piktok eo ad ilo priesthood ej oktak. Eaar erom juon wot ilo utiej im aiboojoj ak elap tōprak, kōnke jej jeļā bwe jejjab make iaad. Ij en̄jake eļap kajoor ke Būreejtōn Thomas S. Monson ej likūt pein ioon bōra ratimjuon iiō remootļo̧k im kar kōjeraam̧m̧an eō ke ij jino jerbal in aō kiiō. Ilo kōjeraam̧m̧an in, eaar litok naan kein an Rilo̧mo̧o̧r: “Im jabdewōt eo ej bōk kom̧, Inaaj pād ijo barāinwōt, bwe Inaaj etal im̧aanļo̧k in mājāmi. Inaaj pād ianbwijmaron̄imi im ianmiin̄imi, im Aō Jetōb enaaj pād ibūruōmi, im enjeļ ro Aō ipeļaakimi, n̄an kotak kom̧” (K&B 84:88).

Ekar lap wōt aō pedped wōt ilo kallim̧ur ko elōn̄ kōttan, im ikar lo an kūrm̧ool ilo elōn̄ wāween ko ilo aolepān 72 iiō in aō jerbal ilo priesthood in. Eaar bar waļo̧k ke iar juon rikabwijer Priesthood eo an Aaron ekāāl n̄an leto-letak kwojkwoj eo. Ikar kor n̄e inej kōm̧m̧an jidik bod, ikar diwōjļo̧k n̄an namōj in m̧ōnjar eo m̧okta jān an jino kweilo̧k eo im kar jino aō jar n̄an Irooj bwe en jipan̄ eō. Juon uwaak ekar itok. Im ikar en̄jake an Irooj pād ippa. Ikar en̄jake lōke eo An ilo n̄a, im ikar barāinwōt en̄jake lōke eo an kōn ijo kunaaō ilo jerbal in An.

Ekar bar waļo̧k ke ikar jerbal āinwōt juon bisop. Ikar uwaake juon call jān juon kōrā eo ekar kōm̧m̧ane juon bōd eļap im kiiō ej lo kālet ko reppen, jokālet n̄an ukōt wāween mour. Ke ikar loļo̧k kōrā in, ikar jeļā juon uwaak n̄an būraabļōm̧ eo an, ak ikar lukkuun ļap aō en̄jake bwe ij jab leļo̧k uwaak in n̄an e—Ej aikuj in bōke n̄an e make. Naan ko aō n̄an e rekar “Ij tōmak Irooj enaaj ba n̄an eok ta eo kwōn kōm̧m̧ane eļan̄n̄e kwonaaj kajjitōk Ippān.” Liin eaar ba bwe eaar kajjitōk Ippān im Eaar jiron̄ e.

Bar juon iien, ekar itok juon call ke ikar juon bisop—iien in ekar jān police. Rekar ba n̄an n̄a bwe juon rikadōk ekar dibōjļo̧k ilowaan lobby eo an juon bāān̄ dupe kūlaaj eo. Ke rikattōr eo ekar lo riwaj eo ewōr an bu, ekar jan̄, “Jab bu! Ij juon Mornon!”

Rikattōr in ikar jeļā bwe ekar juon iaan membōr in ward eo aō, juon eo ej kab peptaij. Ke ikar kōttar e ilo opiij eo an bisop, ikar peek ta eo inaaj ba bwe en jab inepata kōn wāween an kar rubi bujen ko an im kajook Kabun̄ in. Ak ke ij jijet im kalimjeke, ikar ron̄ juon ainikien ilo ļōmņak eo aō, “Inej kōm̧m̧an bwe kwōn kalimjeke āinwōt aō kalemjeke.” Innām, ium̧win jidik iien, aolepān paaktokin ekar oktak. Ikar jab loe an illu ak juon likao eo erreo, emeram, jitōn bōro nejin Anij. Ekar m̧ōkaj aō en̄jake iakwe eo an Irooj n̄an e. Visōn eo eaar ukōt bwebwenato eo. Ekar barāinwōt ukōt n̄a.

Ikar ekatak katak eo eaorōk ilo aō kar en̄jake ilo aō kar etetal ippān Irooj ilo aō kōm̧m̧ane jerbal ko An. Ikōņaan kwaļo̧k n̄an kom̧ jilu men ko. Kein kajuon ej ba Anij ej kile im jiban rikaal im ladik jidik ro ilo doullul eo an deacon. Kojab aikuj ba ibam bwe kodikak ejelok tokjam nan E ilo boke kile in jerbal eo an koj bok ilo etan E.

Katak in kein karuo ej kon jerbal eo an Iroj ejab nan jolok inepata ko; ej nan kaddoklok armij ro. Im eļan̄n̄e kom̧wij etetal Ippān ilo jerbal in priesthood eo, kom̧ maron̄ loe bwe jet iien ta eo me rej āinwōt uwaak ko rem̧m̧antata rejjab jān ta ko Irooj ekar karōki tok kōnke ejjab kōtļo̧k an armej eo eddōkļo̧k. N̄e kwōj ron̄jake, Enaaj katakin eok wāween ko An. Keememej bwe jerbal eo an Anij im aiboojoj eo An ejjab n̄an kattōre doulul ko an Kabun̄ in ilo wājapdik; ej “kakūrm̧ool jab wabanban im mour indeeo an armej” (Moses 1:39). Ennin ej, alikin aolep men, eteke ear letok maron eo an priesthood nan emman enwot kwe im na nan kariwainene koj nan jerbal in an. Ad eddōkļo̧k ej jerbal in An!

Kiō katak in kein kajilu: Etetal ippān Rilo̧mo̧o̧r ilo jerbal in priesthood in enaaj ukōt wāween am kalimjek ro jet. Enaaj katakin eok bwe kwōn lo er kōn māj ko Mejān, eo meļeļein jab ilo tulikin ak ilo tulowaan bōro (lale 1 Samuel 16:7). Eniin ej wāween an kar Rilo̧mo̧o̧r kar lo Simon jab kar juon rieo̧nwōd ak āinwōt Piter, juon ejm̧aan in ritōl an Kabun̄ in ilju im jekļaj (lale Luk 5:1–11). En̄in ej wāween an kar Rilo̧mo̧o̧r kar lo Zacchaeus jab kar juon ritōltōl owōj ak āinwōt juon armej em̧ool, eo bwijin Ebream (Lale Luke 19:1-9). Eļan̄n̄e eto am etetal ippān Rilo̧mo̧o̧r eo, kwonaaj loe aolep ro nejin Anij ilo ejjeļo̧k kalijekļo̧k, jekdo̧o̧n ta eo eaar kōm̧m̧ane. Im eļan̄n̄e kwōnaaj wōnm̧aanļo̧k wōt im etetal ippān Rilmo̧o̧r, kwōnaaj ejaake bar juon menin letok eo ewōr Ippān—maron̄ eo n̄an jipan̄ armej ro lo aorōk eo ippāer make n̄an ukwelok.

Em̧m̧aan ro rejitōn bōro ilo priesthood, ilo wāween ko rellōn̄, jej āinwōt rijilōk ro ruo raar etetal ilo iaļ eo ļo̧k n̄an Emmaus ilo Jabōt eo jinoin tata ilo Ijtō. Ekar Jerkakpeje ilo jibbon̄, ak rekar jab lukkuun jeļā ke ewōr jerkakpeje ak lukkuun jab meļeļe ta in jerkakpeje. Rej “kojatdikdik bwe [Jisos RiNazret] enaaj pinmuur i RiIsrael ro,” ak rekar lukkuun “e rum̧win būrueer kōn tōmak” aolep eoon ko raar katakin kōn jerkakbeje eo an. Im ke rej etetal im bwebwenato n̄an doon, “Jisōs ej make kepaak, im etal ippāer. A dāpij mejeir bwe ren jab kile E. (Lale Luk 24:13–34.)

Ij kam̧m̧oolol bwe n̄e jenaaj etetal ilo iaļ in jerbal in priesthood eo, Rilo̧mo̧o̧r Jisōs Kraist enaaj etetal ippād, bwe ej iaļ eo An, wāween eo An. Meram eo An ej etal im̧aad, im enjeļ ro An rej jeboole kōj. Emaron̄ jab lukkuun ļap ad meļeļe ta eo priesthood ak ewi wāween kōjerbal āinwōt Ej kōjerbale. Ak eļan̄n̄e jenej ron̄jake aolep m̧akūtkūt ko n̄e būruwōd “bwil ilo kōj” (Luk 24:32), mejād enaaj peļļo̧k, im jenej loe pein Irooj ilo mour ko ad im ilo jerbal ko ad. Ij kam̧ool bwe jej itok n̄an E n̄an jeļā E jān jerbal Ippān im jerbal n̄an E ilo jerbal in eļap an bōktok lo̧mo̧o̧r n̄an ajri ro nejin Anij. “Bwe ekōjkan an juon armej jeļā m̧aajta eo eaar jab jerbal n̄an e, ak eo ej juon ruwamāejet n̄an e, im ej ettoļo̧k jān ļōmņak ko im jibadbad ko an būruōn?” (Mosaia 5:13). Jisōs ej ad Maajta. En̄in ej Kabun̄ eo An. En̄in ej Priesthood eo An jej kabwijere. Jen kālet n̄an etetal Ippān im n̄an kile wāween An etetal Ippād.

Ij lewaj n̄an kom̧ aō kam̧ool bwe Jisōs ej RiKraist eo, ad Irooj ekar jerkakpeje. Ij kwaļo̧k naan in kam̧ool eo aō bwe priesthood eo Ej lōke ippād ej kajoor eo n̄an kōnono im n̄an m̧akūtkūt ilo Etan. Jej ajri ro nejin juon Jemedwōj Ilan̄ eo ej iakwe er Eo ej uwaake jar ko ad im ej jilkintok Jetōb Kwojarjar eo n̄an kōkajoorļo̧k kōj ilo aolep eddo ko an priesthood eo jej jeraam̧m̧an ilo ad bōke. Josep Smith eaar lo Jemān im Nejin. Eaar būk kii ko an priesthood, ko em̧ōj liļo̧k n̄an Būreejtōn Thomas S. Monson, eo ej kōjerbali rainin. Ij kamool ilo etan Jisōs Kraist, amen.