Oruh Ma Nuh Kwewa Ma El Fahk Kowos in Oruh Kac

Mwenmwen se met ma sihmlac ma Mwet Lahngo El oruh pa ke kuhfa in macruht se ke acn Cana ke Galilee. Mary, ninac Kiyacl; ac mwet tuhma lutlut Lal ah wi pac oasr we. Mary el luhman puhla muh oasr kunohkohn lal nuh ke woiyacn kuhfa sac. Ke pacl in ahkfuhlwact uh, elyah se sikyak—lihsr wain luhn mwet karihngihn macruht sac. Mary el fosrngah ac som nuh yohrohl Jisus. Eltahl sramsram kihtin pacl; na Mary el foracng nuh sin mwet kuhlwacnsap ah ac fahk:

“Oru ma nukewa ma el fahk kowos in oruh kac.

“Oasr suhfa eot ohnkosr mwe neinyuck kof oan we. … [Suhfa eot inge tiacna orekmakihnyuck in neinyuck kof in nihm tuhsruhk ma orekmakihnyuck nuh ke akwuck in ahknwacsnwacs ke ma sap lal Moses.]

“Jesus el fahk nu sin mwet [kuhlwacnsap] uh, Nwacklah suhfah inge ke kof. Na elos nwacklah ne ke na nwacnwaclah.

“Na el fahk nuh selos, inge, utiyac kuhtuh kof an ac uslah nuh yurin mwet se ma liyacacng kuhfa uh. Elos uslah kof ah nuh yohrohl.

“[Na] mwet kol se ke kuhfah sac … ema kof sac tuh nuh eklac nu ke wain” ac fahkwack lut lal lah wain ma wo uh sruokyucki na ne pahtlac nuh ke kuhfa uh.¹

Kuht kwacna esam ma se inge ke srihpen eklac luhn kof nuh ke wain uh sie mwe ahkkahlwemye ke kuh luhn God—pa sie mwenmwen. Pa inge sie pweng yohk srihpac, tuhsruhk oasr siepac pweng yohk srihpac ke ma sihmlac sel John. Mary el “sie mwet sacohk ac sollac,”² pahngonyuck sin God in oswelah, karihngihn, ac tuhfahlah Wen nuhtin God. El etuh Kacl yohk liki kuhtwena mwet sahyac. El etuh ke pwacyeiyacn isuslac mwenmwen Lal. El etuh muh wacngihn ma koluk Lal ac lah el tiacna sramsram oacna mwet sahyac, ac el tiac pac kuh in lutiyuck; mweyen El tiac enenuh kuhtwena mwet in lotwel.³ Mary el etuh ke kuh yohk Lal in ahkwoyelah fohs, weacng pac ma lal sifacna oacna sang wain ke kuhfa in macruht. Oasr luhlahlfongi fokoko lal Kacl ac kuh wolacna Lal. Sap na fihsrwacsr, suwohs lal nuh sin mwet kuhlwacnsap ah tiac enenuh ma sahyac in orek met, tiac elyah ke ohiyac uh, ac wacngihn pac sahflahiyacn sap sac: “Oruh ma nukewa ma el fahk kowos in oru kac.”

Mary el tuh sie muhtwacn fuhsr ke lihpufacn Gabriel el sikyang nuh sel. Ma se met el “fohswack” ke pahng el ac “luhgseyuck yohk” ac “akinsewowoyeyuck inmahsrlon muhtwacn … ac el suk na lah mea kalmen ma el fahk uh.” Gabriel el ahkmihsyacl fahk muh wacngihn ma el enenuh in sahngweng kac—pweng ma el us tuhkuh ah wo. El ac fah “pihtuctucyak [ke] … Wen nutin God Fulatlana … ac oswelah sie wen … [suc] fah leum fin fwilin tuhlihk nahtuhl Jacob ne tok.”

Mary el motko fahk, “Ma inge ac sikyak fuhka, ke nga soenna etu mwet?”

Lihpufacn sac el ahkuhtweyac, tuhsruhk kuhtuh srihk na, nuh sel muh “wacngihn [ma] God El koflah in oruh.”

Mary el topuk ke insepuhsisacl fahk muh el ac oruh kuhtwena ma God El siyuck, ac fah tiac siyuck in etuh ma nuh kwewa finne kahlwem lah oasr kihsensiyuck puhs lal ke ma ac sikyak in moul lal. El sang kuhiyacl nohfohn sahyacn in siyuck lah efuh El siyuck sel kuh lah ac oreklac fuhkah. El eis kahs luhn God pacl nuh kwewa ac etuh na met, ke srihk etuh la ke ma ac fah sikyak.⁴ Ke luhlahlfongi fihsrwacsr ke God, Mary el fahk, “Nga mwet kuhlwacnsap luhn Leum God. Lwela ma inge in orek nuh sihk oacna ke kom fahk.”⁵

Ke kuht sulwaclah in oruh “ma nukewa ma God el fahk” kuht in oruh, kuht insacnweacng in ekuhllah ma kuht oruh lwen nuh kwewa uh nuh ke ma God El siyuck sesr in oruh kena luhn God. Kain mukwikwi fihsrwacsr ke luhlahlfongi oacna lutlutkihn ma suhmuhslah lwen nuh kwewa, lalo in fusus, ac pruhe ke inse pwacye uh ahkloalye kuhiyen nguhn lasr in fal nuh ke enenuh luhn moul uh. Ke kuhtuh pacl, ohiyac fihsrwacsr ke luhlahlfongi ac kol ma usrnguck sikyak uh. Ma inge ekuhllah luhlahlfongi lasr ke ma srihk nuh ke ma wo yohk in moul lasr uh. Na, ke ma upac uh tuhkuh, pwelucng se inge in Kraist sang oaru nuh ke nguhnasr in tu na kuh. God El ahkfokokoye muhnahs lasr, ahkyohkye engan lasr uh, ac oruh ma nuh kwewa in tuhkweni orekma nuh ke ma wo lasr.⁶

Kuhtuh yac somlah ah, nga tuh sramsram nuh sin pisap fuhsr se suc eis kais kuhtuh ao sie ke wik in pwacpwacni yurin mempucr ke ward lal ah. El akihlen ma yohk srihpac se. Elyah ma mempucr ke ward lal ah puhlakihn, el fahk, pa na ma mempucr ke Alu acn nuh kwewa uh puhlakihn—elyah ma oacna fuhkah atacn orwaclah sie pahyuck engan; upaciyacn ohiyac in sang pacl fal nuh ke orekma, sucu, ac kunohkohn ke Alu uh; ma upac ke Kahs in Lahlmwetmwet, orekma, kuh petsac koluk uh; kuh in puhla mihs ke sie akwuck ke Alu uh kuh sie kihsen siyuck ma elos tiac kahlwem kac uh.

Kahs in kahsruh lal nuh sin mempucr ah kwacna wi fohlohk nuh ke ma fihsrwacsr ke luhlahlfongi, ma oacna lutlut ke Puk luhn Mormon—oacna ke kahsrweyuck kuht sel Thomas S. Monson in oruh—moli sie tahfuh singucul, ac kuhlwacnsap ke Alu ke oaru. Kwacna, in ohinge, top lalos nuh sel ma ke tahfuh luo: “Nga tiac insese, Pisap. Kuht kwewa etuh lah ma inge ma wo in oruh. Kuht sramsramkihn ma inge pacl nuh kwewa ke Alu uh. Tuhsruhk nga tiac etuh lah kowos kahlwem sihk. Fuhkah tuh in oruh oacna sie ke ma ingacn ac fah oasr srihpac nuh ke elyah nga puhlakihn uh?”

Kihsen siyuck na fal se. Tukun pacl, nga nuh liye lah elos suc oaru in oruh “ma srihsrihk ac fihsrwacsr”⁷—ahkos ke atacn ohiyac srihk uh—elos ahkinsewowoyeyuck ke luhlahlfongi ac ahkkweyeyuck ke ma fal ma tiacna som yohk liki mukwikwi in ahkostwen lalos sifacna, pwacye na, sahp luhman wacngihn kuhpahsr kac. Sahp ac luhman upac in liye kuhpahsr inmahsrlon mukwikwi fihsrwacsr ke ahkostwen lwen nuh kwewa uh ac ma ahkwoye fohs yohk kuht sun uh. Tuhsruhk elos kuhpahsr. Ke liye luhk, in oruh wo ke mukwikwi fihsrwacsr ke luhlahlfongi lwen nuh kwewa uh pa ohiyac wo emet in ahkfokokoye kuht in lain ma upac in moul, finne meac sikyak kac. Mukwikwi srihk ke luhlahlfongi, finne atacn srihklac srihpac kuh wacngihn kuhpahsr nuh ke fohs se ma kuht elyah kac uh, ahkinsewowoye kuht ke ma nuh kwewa kuht oruh.

Petsacellah Naaman, sie “mwet kol fuhlwact luhn un mwet … Syria, … akfulatyeyuk ac akilenyuck yohk” ac mihsen lepa. Sie tuhlihk muhtwacn kuhlwacnsap el sruhmuhn ke mwet pahluh se ke acn Israel suc kuh in ahkkweyacllah Naaman, na oruh el som yurin un mwet kuhlwacnsap, mwet mweun, ac mwe sang nuh Israel, na sun lohm sel Elisha. Mwet kuhlwacnsap se lal Elisha, tiac Elisha sifacna, el fahk nuh sel Naaman lah sap luhn Leum pa na in “som nu Infacl Jordan ac yihla pacl itkosr.” Sahp sap na fihsrwacsr se inge luhman tiac suhmaht nuh sin mwet mweun kuh se ngwe, fihsrwacsrlaclac, kuh srihk na liki ohiyac fuhlwact lal uh oruh el liye muh mwe na ahksruhksruhk se. Ke ma na pwacye, kai lal Elisha tiac ma kahlwem sel Naaman, oruh el “foloyak fohlohklac.”

Tuhsruhk mwet kuhlwacnsap lal Naaman tuhkuh nuh yohrohl ac fahk lah el fah tuh oruh “sie ma na upa” fin Elisha el tuh siyuck sel. Elos akihlen lah ke srihpen siyuckyuck na sel in oruh sie ma srihk, yac el ac tiac oruh, finne el tiac kahlwem lah efuh? Naaman el sifil nuhnkuh ke ohiyac lal ac sahp ke ohiyacn tahfuh luo, tuhsruhk ke ahkostwen, el “oatui nu Infacl Jordan, lipatokla otyak pacl itkosr” ac na el kwelac.⁸

Kuhtuh ma sikyak wo ke srihpen ahkostwen uh pwacyena sa tuhkuh; kuhtuh sahyac tuhkuh na tukun srihkeyuck kuht. Ke Pearl of Great Price, kuht riti ke oaru na wowo luhn Adam in ahkostwen ma sap in oruh kihsac uh. Ke lihpufacn ah siyuck lah efuh el oruh kihsac an, el topuk, nga tiacna etuh, tuhsruhktuh Leum El sap nuh sihk. Lihpufacn sac el ahkuhtweyac lah kihsac se inge srihkasrak se nuh ke kihsac luhn Wen Sefanna nuhtin Pahpah. Tuhsruhk ahkuhtweyac sacn tuhfahna tuhkuh tukun Adam el ahkkahlwemye olwelah lal in ahkos Leum ke lwen puhs sahyacn in etuh efuh el enenuh in oruh kihsac ingacn.⁹

God El fah ahkinsewowoye kuht pacl nuh kwewa ke ahkostwen oaru lasr nuh ke wosasuc Lal ac insacnweacng nuh ke Alu Lal, tuhsruhk el suhkwac ahkkahlwemye nuh sesr met lah El ac oruh angwe. El tiac ahkkahlwemye nuh sesr nohfohn ke muhtwacwackiyac uh. Pa pacl se ma luhlahlfongi, finsrak, ac luhlahlfongi Leum uh enenuh in orekmakihnyuck.

God el siyuck sesr in soanwel—in luhlahlfongi ac fahsr tohkohl. El siyuck sesr in “nimet akuhkuhin ke srihpen kowos tiac liye.” El sensenkackihn kuht tuh kuht in tiac enenuh top fihsrwacsr kuh mwe ahkwoye sa inkuhsrao me. Ma uh fahsr wo ke kuht tu na kuh ke pacl ma “srihkeyuck luhlahlfongi [lasr],” finne fuhkah upaciyacn kampare ke srihkeyuck uh kuh suhmuhi tuhkuh luhn top uh.¹⁰ Nga tiac sramsram ke “ahkostwen ke wacngihn nuhnak”¹¹ tuhsruhk ke luhlahlfongi motkoeyuck ke luhngse suwohs ac ke pacl luhn Leum.

Mwe srihkasrak ke luhlahlfongi lasr fah kwacna wi fahsr pwacye nuh ke mukwikwi fihsrwacsr, lwen nuh kwewa luhn luhlahlfongi. Ke na pacl sacn, El olwelah muh kuht fah eis top muhtahl ma kuht kena yohk uh. Ke na pacl se kuht ahkkahlwemye kena lasr in oruh ma El siyuck ac tiac enenuh in etuh lah ngac, efuh, kuh lah kuht ac oruh fuhkah in “kosrwacni ma lwacne wo ke luhlahlfongi [lasr], ac oaru [lasr], ac muhtweng, ac mongfihsrwacsr.”¹² Ahkostwen pwacye uh ahkkuhnlah ma sap luhn God ke wacngihn ahlohloh ac met liki etweyuck kac.¹³

Finne etweyuck kuh tiac, kuht nuh kwewa sulwaclah “lah su [kuht] fah kuhlwacnsuhpuh” lwen nuh kwewa.¹⁴ Kuht ahkkahlwemye sulwaclah lasr in kuhlwacnsapuh Leum ke kuht oaru in orekmakihn mukwikwi lwen nuh kwewa in insacnweacng. Leum El olwelah in kol inkacnek lasr,¹⁵ tuhsruhk El fin kuh in oruh, kuht enenuh in fahsr, luhlahlfongi muh El etuh inkacnek mweyen El pa “inkacnek.”¹⁶ Kuht enenuh in sifacna nwacklah tuhp in kof lasr uh in us. Ke kuht luhlahlfongi ac ukwacl uh, oacna kof nuh ke wain, moul lasr uh eklac. Kuht eklac yohk liki kuh lasr fin ke ohiyac sahyac. Luhlahlfongi Leum, ac “oruh ma nuhkewa ma el fahk kowos in oruh.” Ke inen Jisus Kraist, amen.