Men eo Jabdewōt Ej ba n̄an Kom̧, Kom̧win Kōm̧m̧ane.

Rilo̧mo̧o̧r eo ekar kōm̧m̧ane kabwilōn̄lōn̄ eo An kein kajuon im kar ļooke ilo juon kōjota in m̧are ilo Cana Galilee. Meri, jinen, im rikaļoor ro An rekar pād ijo. Meri ekar en̄jake jet eddo ko n̄an kōm̧m̧ani n̄an kōttōbar kōjota eo. Ilo iien eo, juon jorrāān ekar jarjar—armej ro rej lolorjake m̧are eo ekar maat wain ippāer. Meri ekar inepata im kar jibadōkļo̧k Jisōs. Rekar kōnono jidik; innām Meri ekar oktakļo̧k n̄an rikarejar ro im ba:

“Men eo jabdewōt Ej ba n̄an kom̧, kom̧win kōm̧m̧ane.

“Im jiljino jāpe dekā in dān rej pād ijo. … [Jāpe in dekā in dān kein rekar jab kōjerbali n̄an idaak dān ak rekar kōjerbali n̄an m̧anit in karreo ium̧win kien Moses.]

“Jisōs e ba n̄an [rikarejar ro], Kom̧win tein̄ jāpe in dān ko kōn dān. Innām rekar tein̄i im lōn̄.

“Im Ej ba n̄an er, Kom̧win kōto̧o̧rļo̧k kiiō, im bōkļo̧k n̄an irooj in kwōkwōj. Im rej bōkļo̧k.

“[Innām] irooj in kwōjkwōj eo … ej edjon̄ dān erom wain” im ekar kwaļo̧k an bwilōn̄ bwe wain eo em̧m̧an kar kōjparok n̄an iien in.¹

Ekkā ad keememej m̧akūtkūt in kōnke ukōt dān n̄an wain ekar juon kōmeļeļe in kajoor eo an Anij—juon kabwilōn̄lōn̄. En̄in ej juon ennaan eaorōk, ak ebar wōr juon ennaan eaorōk ilo bok in Jon. Meri ekar “juon jāpe e aorōk im kar kāālete,”² kar kūr jān Anij n̄an keotak, naajdik, im karuttoļo̧k em̧ool Nejin Anij. Ekar ļapļo̧k an jeļā kōn E jān jabdewōt armej ioon laļ in. Ekar jeļā m̧ool eo kōn ļo̧tak eo An ekabwilōn̄lōn̄. Ekar jeļā bwe Ekar ejjeļo̧k An jerawiwi im bwe E “ekar kōnono ejjab āinwōt armej ro jet, barāinwōt an katakin E; bwe Eaar jab aikuj bwe jabdewōt armej en katakin E.”³ Meri ekar jeļā jon̄an ko reļļap Ippān n̄an ņamejļan jorrāān ko, ekoba juon eo me E make ekar leļo̧k wain n̄an juon kōjota in m̧are. Ekar ejaake lōke eo ejjeļo̧k pere ie ilo E im kajoor eo An ekwojarjar. Kōmeļeļe eo An reļam waan, im ekkaju n̄an rikarejar ro An me ejjeļo̧k aer meļeļe, ejjeļo̧k aer kapāāl, ro me rem̧m̧an: “Jabdewōt men eo Ekar ba n̄an kom̧, kom̧win kōm̧m̧ane.”

Meri ekar juon jiron̄ ke enjeļ Gebriel ekar waļo̧k tok n̄an e. Ilo jinoin ekar “inepata” jān aer naaj kūri “eļap am̧ iakwe” im “jeraam̧m̧an … ilubwilijin kōrā ro … a ej ļo̧kjenaan kōn an in naan, im ej kōļmānļo̧kjeņ ewi wāween in.” Gebriel ekar bar kōketak e bwe ejjab aikuj in mijak—nuuj eo ej bōktok ekar nuuj em̧m̧an. Enaaj “bōro̧ro … Nejin Eo E utiejtata” im “kōmmour nejin m̧aan … [eo] Enaaj Irooj ioon im̧ōn Jekob indeeo.”

Meri ekar ba, “Enaaj kōjkan men in, bwe I jab jeļā m̧aan?”

Enjeļ eo ekar kōmeļeļeiki bōtaab jidik wōt, kapene n̄an e bwe “ejjeļo̧k naan jān Anij [ej] m̧ōjņo̧.”

Meri ekar uwaak ilo ettā bwe enaaj kōm̧m̧ane jabdewōt men Anij ej kajjitōk, ijjelo̧kin akweļap ilo kajjitōk n̄an jeļā kajjojo men im jab pere ilo kōņaan kajjitōk elōn̄ kajjitōk ko kōn jekjek ko kōn mour eo an. Ekar kallim̧ur e make ilo an kar jab lukkuun meļeļe etke E (Irooj) ekar kajjitōk menin ippān ak ekōjkan an menin maron̄ tōprak. E (Meri) ekar uwaake naan ko an Anij ilo ejjeļo̧k kōmtālik im ilo m̧okta,⁴ kōn jidik wōt an jeļā ta eo epād im̧aan. Kōn lōke ilo Anij, Meri ekar ba, “Lo n̄a ri karijeran Irooj; en pād ippa āinwōt am̧ in naan.”⁵

N̄e jej errā n̄an kōm̧m̧ane “jabdewōt men [Anij] ej ba n̄an” kōj, jej ellowetak im kallim̧ur n̄an kajejjet kōm̧m̧an ko ad raan otemjej n̄an ankilaan Anij. Kain m̧akūtkūt in tōmak kein reddik āinwōt katak jeje ko rekwojarjar iien otemjej, jitlo̧k aolep iien, im jar kōn m̧wilaļ in bōro em̧ool ej kam̧wilaļļo̧k jon̄an jetōb eo ad n̄an ad tōpar aikuj ko remennin aikuj an mour in. Iien n̄an iien, kain imminene in tōmak kein rej tōlļo̧k n̄an kabwilōn̄lōn̄ ko. Rej ukōt tōmak eo ad jān juon men eo edik n̄an juon men eo ekajoor n̄an em̧m̧an eo ilo mour ko ad. Innām, n̄e apan̄ ko rej itok im̧aan iaļ ko ad, ad okar etōt im dim ilo Kraist ej letok dim n̄an jetōb ko ad. Anij ej kōkajoorļo̧k m̧ōjņo̧ ko ad, kōļapļo̧k ad lan̄lōn̄, im kōm̧m̧an bwe “men otemjej rej [n̄an] jim̧or jerbale em̧m̧an eo [ad].”⁶

Jet iiō remootļo̧k, ikar kōnono ippān juon bisop edik eo ekar joļo̧k elōn̄ awa ko kajjojo wiik leļo̧k kapilōk n̄an membōr ro ilo ward eo an. Ekar kōm̧m̧ane juon etale. Jorrāān eo me membōr ro ilo ward eo an rej jelm̧ai, ekar ba, membōr ro iloKabun̄ in ijoko jabdewōt rej barāinwōt jelm̧ai—un kein āinwōt ewi wāween ejaake juon m̧are ele m̧ōņōņō; pen bōļane jerbal, baam̧le, im eddo ko an Kabun̄ in; apan̄ ko rejelet pokake Naan in Māletlet, jerbal, ak pija ko renana; ak bōk aenōm̧m̧an kōn juon kien an Kabun̄ in ak kajjitōk ko rekar jab meļeļe.

Naan in kapilōk eo an n̄an membōr ro an ward eo ekkā an pedped wōt ioon imminene kein reļam̧ waan āinwōt tōmak, āinwōt ekkatak jān Bok in Mormon eo—āinwōt an Būreejtōn Thomas S. Monson kōkakpilōklōk kōj n̄an kōm̧m̧ane—kōļļa juon m̧ōttan jon̄oul, im jerbal ilo Kabun̄ in kōn wūjlepļo̧k. Uwaak eo aer emakikij, ijoke, uwaak eo aer ekar juon iaan uwaak in kōraat: “Ijjab errā ippam̧, Bisop. Kōj aolep jeļā bwe men kein rem̧m̧an n̄an kōm̧m̧ani. Jekar kōnono kōn men kein iien otemjej ilo Kabun̄ in. Ak ijjab lukkuun jeļā n̄e kwōj meļeļe n̄a. Kōm̧m̧ani jabdewōt iaan men kein ta eo an tok ippān unin kōnono kein me ijjelm̧ai?

Ekar juon kajjitōk em̧m̧an. Iien n̄an iien, ikar ekkatak jāne bwe ro elōn̄ unin aer kōm̧m̧ani men kein “reddik im ļam waan”⁷—rej pokake ilo m̧ōņōņō wāween ko reddik—rej jeraam̧m̧an kōn tōmak im kajoor eo me eļļap jān jon̄an pokake eo aer make im, ilo m̧ool, remaron̄ jab iookļo̧k ta ko rej pokaki. Emaron̄ pen n̄an kōkkeitaake juon men ikōtaan m̧akūtkūt in pokake ko reddik im jibadbad ko n̄an men ko reļļap, jorrāān ko reppen jej jelm̧ai. Ak er rej juon wōt. Ilo en̄jake eo aō, mour kōn imminene ko reddik iien otemjej kōn tōmak ej wāween eo emake iaan im ejejjet n̄an kōkajoorļo̧k kōj make jān jorrāān ko an mour in, jabdewōt men ko remaron̄ repād ippād. Makūtkut in tōmak ko reddik, men̄e remaron̄ jab ekkar ak lukkuun jab ekkejeļo̧k ippān kajjojo jorrāān ko me rej kaliaajļaļ kōj, rej kōjeraam̧m̧an kōj ilo men otemjej jej kōm̧m̧ani.

Ļōmņak kōn Naaman, juon “kapen an jar in tariņae an kiin̄ in … Siria, … juon em̧m̧aan kajoor im peran,” im juon leper. Juon leddik rikarejar ekar kwaļo̧k juon rikanaan ilo Israel eo emaron̄ kōmour Naaman, innām ekar diwōjļo̧k ilo jar ko, ritariņae ro, im mennin letok ko n̄an Israel, āliktata itaaktok ilo m̧weo im̧ōn Iliaja. Rikarejar eo an Iliaja, jab Iliaja make, ekar karon̄ Naaman bwe kakien eo an Irooj ekar n̄an “ilen tutu ilo Jordan [reba] Jordan jiljilimjuon alen.” Juon Men Epidodo. Bōlen kōmeļeļein ekar kalel ritariņae in ekajoor ekar juon men ejjab jim̧we, ejjab pidodo, ak jān kautiej eo an ekar lo bwe ļōmņak eo ekar lel kake. Āliktata, kōmeļeļe eo an Ilaija ekar jab jejjet n̄an Naaman, “innām ekar illu, im ear ilo̧k.”

Ak rikarejar eo an Naaman ekar ruwaakļo̧k n̄an e im ba bwe en kar kōm̧m̧ane “jabdewōt men eo eļap” Ilaija ekar jiron̄ e. Rekar kile bwe kōnke ekar kajjitōk wōt n̄an kōm̧m̧ane jidikin wōt jerbal eo, ej aikuj ke kōm̧m̧ane, men̄e ekar jab meļeļe etke? Naaman ekar bar ļōmņak im bōlen kōraat, ak ekar pokake, “wanlaļļo̧k, im tulo̧k jiljilimjuon alen ilo river Jordan” im kar lukkuun in erreo.⁸

Jet nōbar jān pokake em̧ōkaj aer itok; ko jet rej itok ālkin mālijjon̄ e kōj. Ilo Bōōr eo Eļap Wōņāān, jej riit kōn niknik eo an Adam ilo kōjparok kien eo n̄an katok n̄an Irooj. Ke enjeļ eo ekar kajjitōk ippān etke ekar katok n̄an Irooj, ekar ba, “Ij jab jeļā, ijello̧kun ke Irooj eaar jiron̄ eō. Enjeļ eo ekar kōmeļeļeiki bwe katok ko an rekar “kakōļļeen katok eo an eo Nejin Eaar Make Keotak in Jemān.” Bōtaab kōmeļeļein ekar itok ālkin an Adam kōmeļeļeik kallim̧ur eo an n̄an pokake Irooj ium̧win “elōn̄ raan ko” jab jeļā etke ekar aikuj in ajiļo̧k katok ko n̄an Irooj.⁹

Anij enaaj kōjeraam̧m̧an kōj kōn dim in pokake eo ad n̄an gospel eo An im m̧ool n̄an Kabun̄ eo An, ak Ekar jab lukkuun kwaļo̧k n̄an kōj timetable eo An n̄an kōm̧m̧ane. Ejjab kwaļo̧k n̄an kōj likio in pija eo jān jinoin. En̄in unin etke tōmak, kōjatdikdik, im lōke ilo Anij ej itok.

Anij ej kajjitōk ippād n̄an kijenmej Ippān—n̄an lōke E im n̄an ļoor E. Ej akweļap ippād n̄an “jab jum̧ae kōnke kom̧ij jab lo.” Ej kakkōl kōj bwe jen jab kōtmāne jet uwaak ko repidodo ak rem̧ōkaj naaj ņamejļāer jān lan̄. Men otemjej rej jejjet kiteer n̄e jej jutak dim ilo iien “mālijjon̄ an tōmak eo [ad],” ijoke pen in teej eo emaron̄ n̄an kijenmej im niknik ak rum̧wij in an uwaak maron̄ itok wōt.¹⁰ Ijjab kōnono kōn “pokake kōn ke kwōj kipel n̄an kōm̧m̧ane”¹¹ ak kōn ļōmņak in lōke ilo iakwe ewāppen im iien eo an Irooj.

Mālijjon̄ in tōmak eo ad enaaj iien otemjej pād ilo ad m̧ool wōt n̄an imminene ko reļam waan an tōmak iien otemjej. Innām, im menin wōt, ej Ke kallim̧ur bwe jenaaj bōk uwaake eo ekwojarjar eto ad kōttar e. Juon wōt kōttan ad maron̄ kwaļo̧k ad m̧ōņōņō in kōm̧m̧ane ta eo Ej kajjitōk ilo ad jab kajjitōk n̄an jeļā n̄āāt, etke, im ewi wāween ad “m̧adm̧ōd jinōkjej ko an tōmak eo [ad], im [ad] niknik, im kijejeto, lōjokmen.”¹² Lukkuun pokake ej bōk kien ko an Anij ilo iakwe im m̧okta.¹³

Errā ak jab, kōj aolep jej kālet “wōn eo [jenaaj] jerbal n̄ane” raan otemjej.¹⁴ Jej kwaļo̧k kijejeto eo ad n̄an jerbal n̄an Irooj jān tiljek in boub iien otemjej ilo jerbal in wūjlepļo̧k ko ad. Irooj ej kallim̧ur n̄an tōl iaļ ko ad,¹⁵ ak n̄an An kōm̧m̧ane menin, jej aikuj in etetal, lōke bwe Ejeļā iaļ eo kōnke E ej Iiaļ Eo.”¹⁵ Jej aikuj kobrak jāpe in dān ko ad make lōn̄. N̄e jej lōke im ļoor E, mour ko ad, āinwōt dān n̄an wain, rej oktak. Jej erom juon men eo eļapļo̧k im em̧m̧anļo̧k jān ad maron̄ erom. Lōke ilo Irooj, im “men eo jabdewōt Ej ba n̄an kom̧, kom̧win kōm̧m̧ane.” Ilo etan Jisōs Kraist, amen.