Wiahda Mehkoaros me Eh pahn mahsanihong kumwail

Soundoaro kasalehda Sapwellime manaman keiu ni wasahn kamadipw en kopwopwoud iou Cana nan Galilee. Mary, Ah nohno; oh Sapwellime soun padank ko mih mwo. Mary kehnda me e anahne wia mehkot pwe kamadipwo en pweida mwahu. Erein kamadipwo, kahpwal iou pwarada—nekla wain. Mary ahpw pwunodada ih patohle rehn Sises. Ira lokaia pene, eri Mary soupeilahng liduhko oh inda:

“Wiahda mehkoaros me Eh pahn mahsanihong kumwial.

“Eri, sah takai laud weneu mie wasao … [Sah pwukat sohte kin audaudki pihl me aramas kin nim ahpw e wia mehn tiahk en kamwakel pahn kosonned en Moses.]

“Sises ahpw mahsaniheng [ladu ko], Kumwail audehkihla pihl sah ko. Ladu ko eri audehda lao dir.

“E ahpw ketin mahsaniheng irail, Kumwail koadiahdi oh wahla rehn kaunen kamadipwet. Irail eri wahla.

“[A]hpw kaunen kamadipwo … song pihl me wialahr wain,” oh inda, “ah komwi neknekidte wain mwahu lao lel ahnsou wet.¹

Kitail kin kilelehdi kemwekid wet pwehki kaweklahn pihl ohng wain wia kansansal en manaman en Koht—kepwuriamwei pwoat. E wia padahk kesempwal iou, ahpw mie pilehu padahk kesempwal nan soai wet nan rongmwahu en Sohn. Mary rasehng “sah kesemwpwal oh pilipil wet,” ² malipilip sang rehn Koht pwehn kaipwihdi oh apwaliada Sapwellimen Koht Ieroso. E mwahngi ihs Sises laudsang aramas koaros nan sampah. E mwahngi kopwuriamwei pen Ah ipwidio. E mwahngih me sohte dipe oh Ah “mahsen sohte duwehte en mehteikan, oh sohte me kak padahkehng; pwe e sohte anahne emen en padahkehng.”³ Mary mwahngi Ah koahiek en kamwahuiala kahpwal laud kan, oh me tikitik rasehng wiahda wain en kamadipw. E inenen kamehlele Ih oh Sapwellime manaman. Sang ni ah pwoson e kaweidkiheng ladu ko en wiahdahte dahme e pahn mahsahniheng irail ni pisetik. “Wiahda mehkoaros me Eh pahn mahsanihong kumwail.”

Mary pwulopwul ansou me tohnleng Kapriel pwarehngo. Nin tapio e “salohkihda” pwehki eh malipeihki nda “emen wadawad” oh “kapai … sang lih koaros … e ahpw mengmengiloalki ia pahn wehwehn mahsen pwukat.” Kapriel mahsaniheng me sohte mehkot e pahn perki—pakair me e wahdohu mwahu. E pahn “liseiankihda … Sapwellimen Koht Wasa Lapalahpie … oh “naitikihada pwutak emen … [e] pahn nanmwarkien kadaudok en Seikop kan kohkohlahte.”

Mary idek, “Ia pahn mwomwen met, I wia meipwon men?”

Tohnlengo mahsani, ahpw ansou kiste, kasalehieng me “rehn Koht sohte [mehkot] apwal.”

Mary sapeng ni aktikitik inda me e pahn wia dahme Koht kupwurki, ni ah sohte nohn men ese pisetikpeh kan oh soupeikasalki mendahte peidek tohto me pid duwen wiewia kan en ah mour. E wiahda inou mendahte eh sohte nohn wehwehki dahme kahreda E kupwurki dahme en wia de dahme pahn pwarada. E alehda Sapwellimpen Koht mahsen ni ngoang oh ⁴ doadoahngki, mendahte ah sohte nohn wehwehki dahme pahn wiawi mwuhr. Ni ah likih Koht, Mary inda, “Eri, iet Sapwellimen Kaun-o lidu ngehi; en wiawihong ie duwen me komwi mahsanih.”⁵

Ansou me kitail kin pilada wia dahme “Koht kin mahsanihong” kitail, kitail kin inengieng mweidehng kainene atail wiewia rahn koaros ohng kupwuren Koht. Kemwekid mengei en pwoson sang ni onopki pwuhk sarawi rahn koaros, kaisihsol, oh kapakap ni ineng mehlel kin kalaudehla atail kin pehmada ngehno nan atail mour. Pak tohto, mwekid tikitik kan en kamehle kin wahdo kansalsal kei. Re kin kawekalahng atail pwoson sang ni weren tuhke pwoat ohng manaman mwahu ohng atail mour kan. Eri, ansou me kitail kin lelehng songsong kan, kalawatail kan rehn Krais kin kakehlailih ngenitail kan. Koht kin kasalehda atail luwet kan, kalaudehla atail popohl kan, oh kahrehieng soahng koaros [en] doadoahk pene pwehn wia kamwahupatail.”⁶

Pahr kei samalahro, I koasoaieng pisop pwulopwul men me kin mihmihki awahkei wihk koaros kin kawkaweid tohn nan ah ward o. E kasalehda ire kesempwal pwoat. Kahpwal kan me tohn ah ward o kin sohpai, e inda, me irail me kin ahnki kahpwal nin duwen toweh kan en Mwomwohdiso wasa koaros—mwohmw kei me rasehng ia mwomwen arail pahn kalaudehla popohl nan ehu pwopwoud; kahpwal kan en kapahreki pene doadoahk, peneinei, oh pwukoah nan Mwomwohdiso kan; songsongen kapwaiada Mahsen en Eripit, tohn doadoahk, de kahpwal en pornography; de ahneki meleilei me pid duwen kosonned en Mwomwohdiso de peidek poadoapoad me irail sohte wehwehki.

Ah kaweid ohng tohn ah ward o iei en kin pilehu song arail pwoson, me rasehng onopki Pwuk en Mormon—me sang pahnangin koasoandien President Thomas S. Monson pwehn kin—pwain meiroang, oh papah nan Mwomwohdiso ni ngoang. Pak tohto arail pasapengehng iei: “I sohte kamehleleiuk, Pisop. Kitail koaros ese me mie soahng mwahu kei me kitail anahne wia. Kitail kin kosoia soahng kan ansou koaros nan Mwomwohdiso. Ahpw I sohte ese ma kumwail wewehki. Ia mwomwen wiewia pwukatah pahn kak sewese dahme I sohsohpai?”

Peidek pahrek iou met. Pak tohto, I kin tehkada me irail me kin kediropwkihte wia dahme “tikikit oh mengei kan”⁷—pepeikieng ni mwohmw tikitik kan—kin kapaikihda pwoson oh kehlail me kin laudsang peikieng pein irail, oh ni mehlel, e mwomwen sohte sansal mwahu ohng irail. Mwein e pahn mwomwen apwal en kihpene nan pwungen mwekmwekid en pwoson mengei oh pasapengpen me laud, kahpwal kasahliel me kitail kin sohpai. Ahpw ni duwepene. Dahmei lelehng, alehdi mwekid tikitik rahn koaros ni pwung iei mwohng keiu mwahu en kakehlailih pein kitail ohng atail kahpwal kan nan mour, sohte lipilip soangen dah. Mwekid tikitik en pwoson, mendahte e sohte mwomwen kesempwal de sohte kin nohn pahrekieng kahpwal kan me kitail sohte pwungki, e kapai kitailda sang ni soahng koaros me kitail kin wia.

Medewe Nahman, “kaun en karis kan en nanmwarkien …Syria, … iei ohl wadawad emen pahn kupwur en nanmwarkio,” oh me tokutoko. Lih ladu men mahsaniong soukohp men nan Isreal isime kak kamwahuiala Nahman, oh e seiloakla iangahki nah soun roprop kan, sounpei kan, oh kisakis ohng Isreal, e ahpw lelehr nan imwen Elisa. Elisa oh nah lidu, mahsaniheng Nahmen en Kauno mahsani en “kohla oh kaduhdi nan [Pillap] en Sordan pak isuh.” Ele mehn kamwahula wet mwomwen sohte katepe, nohn mengei, de nin duwen e wia lapalap men e wia mehkot laumwoahmw. Ansouohte, Nahman sohte wehwehki dahme Elisa padahkihengo, “eri e oudahte pwuralahsang wasahu.”

Ahpw nein Nahman ladu ko keieng impe oh patohwanohng me eh pahn wiahda wia “mehkot apwal” ma Elisa kupwurki en wia. Irail kairehki me pwehki eh pahn wiahte doadoahk mengei, e sou mwahu en wia, mendahte ma e sohte wehwehki kahrepe? Nahman medmedewe dahme pahn wiawi oh seirenieng, ahpw peikieng, “ kohdihla, oh duhdu pak isuh nan Pillap en Sordan” oh e ahpw mwakelekella mehlel.⁸

Ekei kapaipen peik kin mwadang; ekei kin kohdohte mwurin atail kin lelehng kasongsong. Nan Pearl of Great Price, kitail wadekehr duwen Adam ah ngoangki kapwaiada kosonned en meiroang kan. Ansou me tohnlengo idek reh dahme e kin wiahki ah meirong kan, e sapeng, “I sehse, Kauno me mahsanihongie.” Tohnlengo kawehweda me sapwellime meirong kan “rasehng meiroang en Sapwellime Iehros en Sahmo.” Ahpw kawehwehu kodohng Adam mwurin ah kasalehda ah ngoangki peikieng Kauno “rahn tohto kei” ni sohte wehwehki kahrepen ah wiwia meiroang kan. ⁹

Koht pahn ansou koaros kapaikitailda sang ni atail ngoangki peikieng Sapwellime rongamwahu oh loaloapwoat ong Sapwellime Mwomwohdiso, ahpw E sohte kalapw kasalehieng kitail Sapwellime ansou ni ah kin ketkihdo. E sohte kin kasalehieng kitail sapwellime kosondi pwon. Ih wasa me pwoson, koapwoaroapwoar, oh liki Kauno, Kauno kin kohdo sangie.

Koht kin kupwurki kitail en kin uhdiahl Ih—likih Ih oh idawehnla Ih. Eh peki ni ngidingid kitail en “dehr sapwungki pwe kitail sohte kilang.” He keperkin kitail en dehr kasik pasapeng mengei kan de mwadangete alehdi pasapeng sang nanleng. Soahng koaros kin wiawi ni ansou me kitail kin kehlail erein “kahpwal en atail pwoson,” sohte lipilipil en kasongsong dah me konehng pwehn sohpai de pasapeng kan ah kin pwandedo.¹⁰ I sohte koskosoia sawehwehpen peik ”¹¹ ahpw duwen wehwehki mwahu duwen limpoak unsek oh en Kauno ansou.

Songsongpen atail pwoson pahn ansou koaros kin doke momourki ni pwung, kakehlailih pwoson rahn koaros. Mwuri, eri ansouohte, E inouki me kitail pahn alehdi pasapeng sarawi me kitail kin awiawih pwehn: maiaudahsang kahpwal, kehl en doudoulahte, pasapengpen peidek, kamarain, eripit ohmahk. Ihte ansou me kitail kasalehda atail inengieng wia dahme E kupwurki ahpw kaidehn soangen esehda iahd, kahrepe, oh ia mwomwen atail pahn dolung wahn [atail] pwoson, oh [atail] pwerisek, oh kanengamah, oh loaloapwoat.”¹² Peik ni unsek kin alehda Sapwellimen Koht kosonned kan ni unsek oh kalaudehla.¹³

mehnda ma kitial wehwehki de soh, kitail koaros kin pilada “isime [kitail] pahn papah” rahn koaros. ¹⁴ Kitail kin kasalehda atail ngoangki en papah Kauno sang ni loaloapwoatehng patpatehng kemwekid en podidih kan rahn koaros. Kauno inouki en kainenehla atail ahl kan, ¹⁵ ahpw nin duwen Ah pahn wia met, kitail anahne alu, liklikih me E ketin mwahngi ahlo pwe iei Ih me “ahlo. .”¹⁶ Ni ansou me kitail kin likih oh idawehn Ih, rasehng pihl ohng wain, atail mour kin mwahula. Kitail kin mwahusang dahme kitail kak wiahla. Likih Kauno, oh “wiahda mehkoaros me Eh pahn mahsanihong kumwail.” Ni mwaren Sises Krais, amen.