Soo Se Mea Lava E Fai Mai Ai O Ia Ia Te Outou, Ia Outou Faia

Na faataunuuina e le Faaola Lana uluai vavega faamaumauina i le tausamaaga o se faaipoipoga i Kana i Kalilaia. Sa i ai foi iina Lona tina, o Maria ma Ona soo. Na lagona moni lava e Maria se tiutetauave mo le manuia o le tausamaaga. I le taimi o le tausamaaga, sa tulai ae se faaletonu—ua leai se uaina a e na talimalo. Sa popole Maria ma alu atu ia Iesu. Sa la talanoa pupuu; ona liliu atu lea o Maria i auauna ma faapea atu:

“[Soo] se mea lava e fai mai ai o Ia ia te outou, ia outou faia.

“Sa i ai vai maa tetele e ono. … [O nei vai maa e lei faaaogaina e teu ai ni vai inu ae mo le sauniga o le faamamaina i lalo o le tulafono a Mose.]

“Ua fetalai atu Iesu i [auauna], Ina faatutumu ia o vai i suavai. Ona latou faatutumuina lea, ua oo i le lau.

“Ua fetalai atu ia ia te i latou, Ina asu ane ia, ina ave i le pule i le tausamaaga. Ona latou avatua lea.

“Ua tofo foi le pule i le tausamaaga i le vai ua liu uaina” ma faaalia le ofo ona ua tuai tele ona avatu le uaina sili ona lelei i le tausamaaga.¹

E masani ona tatou manatuaina lenei mea ona o le liuaina o le vai i le uaina o se faailoaga o le mana o le Atua—o se vavega. O se savali taua lena, ae e i ai se isi savali taua i le tala a Ioane. Na avea Maria ma “se ipu pele ma filifilia,”² na valaauina e le Atua e fanau mai ai, faafailele, ma tausia le Alo o le Atua. E sili atu lona silafia o Ia nai lo se isi lava tagata i luga o le fogaeleele. Na te silafia le mea moni o Lona soifua mai faavavega. Sa ia silafia e leai Sana agasala ma sa “lē tautala o ia e pei o isi tagata, sa lē mafai foi ona aoaoina o ia; aua sa lē manaomia e ia soo se tagata e aoaoina o ia.”³ Sa silafia e ia Lona gafatia tulagaese e foia ai ni faafitauli, e aofia ai se tasi patino e pei o le sauniaina o le uaina mo se tausamaaga o le faaipoipoga. Sa ia atiinaeina se talitonuga maumaututu ia te Ia ma i Lona mana paia. O lana faatonuga faigofie ma tuusao i auauna sa leai ni tulaga manaomia, leai ni agavaa, leai ni tapulaa: “[Soo] se mea lava e fai mai ai o Ia ia te outou, ia outou faia.”

Na avea Maria ma se tamaitai talavou i le taimi na faaali atu ai le agelu o Kaperielu ia te ia. I le taimi muamua sa ia “atuatuvale” i le ta’uina o [ia] o “le ua alofaina” ma “amuia … i fafine uma … ua taumanatunatu foi o ia, pe se a le uiga o lenei alofa.” Na faamautinoa atu e Kaperielu ia te ia e leai se mea e fefe ai—o tala sa ia aumai e lelei. O le a “to [o ia ma tauave] … le Alo o le Silisili ese” ma “fanauina se tama tane … [o le o le a fai] ma tupu i le aiga o Iakopo e faavavau.”

Na mafaufau leotele Maria, “A faapefea le mea nei, auā ou te lei iloa se tane?”

Na faamalamalama atu e le agelu, ae sa puupuu, e faamautu atu ia te ia “e leai lava se mea e tasi e le mafaia e le Atua.”

Na tali faamaualalo atu Maria o le a ia faia soo se mea e finagalo ai le Atua, e aunoa ma le fia iloa o mea patino ma le le masalosalo e ui i le tele o fesili le mafaitauina e uiga i taunuuga mo lona olaga. Na tuuto atu o ia lava e aunoa ma le malamalama tonu i le mafuaaga ua Ia poloaiina ai o ia ae pe faapefea foi ona faia. Na ia talia vave le afioga a le Atua e aunoa ma ni tuutuuga,⁴ atoa ma sina iloa o mea o i luma atu. Faatasi ai ma se faalagolago faigofie i le Atua, sa fai atu ai Maria, “Faauta o a’u nei o le auauna a le Alii; ia faia ia te au e tusa ma lau fetalaiga.”⁵

A tatou filifili e fai “mea uma ua fetalaia mai e le Atua ia i” tatou, ua tatou tautino atu efaaogatusa a tatou amioga o aso uma ma le finagalo o le Atua. O ia faatinoga faigofie o le faatuatua e pei o le suesueina o tusitusiga paia, anapogi, ma le faalauteleina o o tatou valaauga e taitai atu ai i le faalolotoina o le gafatia faaleagaga e fetaiai ai ma manaoga o le olaga faaletino. I le aluga o taimi, o mausa faigofie o talitonuga e taitai atu ai i taunuuga ofoofogia. Latou te suia lo tatou faatuatua mai se fatulaau i se mana malosi mo le lelei i o tatou olaga. Ma pe a oo mai ia luitau i o tatou ala, o lo tatou mauaa ia Keriso e maua ai le tumau mausali i o tatou agaga. E faapuupuu e le Atua o tatou vaivaiga, ae faateleina lo tatou olioli, ma faia ina “[ia] galulue faatasi mea uma mo lo [tatou] lelei.”⁶

I nai tausaga ua mavae, sa ou talanoa ai i se epikopo talavou o le sa faaaluina ni itula i vaiaso taitasi e fefautuaai ai ma tagata o lana uarota. Sa ia faia se matauga faagaeetia. O faafitauli o feagai ma tagata o lana uarota, na ia fai mai ai, o [faafitauli] ia o loo feagai ma tagata o le Ekalesia i soo se nofoaga—o faafitauli e pei o le auala e faavaeina ai se faaipoipoga fiafia; tauiviga ma le faapaleniina o galuega, ma tiute o le Ekalesia; luitau i le usitaia o le Upu o le Poto, i galuega, po o le i ponokalafi; po o le faafitauli i le mauaina o le filemu e uiga i se aiaiga faavae o le Ekalesia po o se fesili i le talafaasolopito [o le Ekalesia] latou te le malamalama i ai.

O lana fautuaga masani lava i tagata o le uarota e aofia ai le toe foi i faatinoga faigofie o le faatuatua, e pei o le suesueina o le Tusi a Mamona—e pei ona fautuaina ai i tatou e Peresitene Thomas S. Monson ina ia faia—totogiina o le sefuluai, ma le auauna atu i le Ekalesia ma le tuuto. Ae peitai, o le latou tali masani lava ia te ia o se tali le mautonu: “Ou te le ioe ia te oe, Epikopo. Tatou te iloa uma lava o ni mea lelei na e fai. Tatou te talanoa e uiga i na mea i taimi uma i le Ekalesia. Ae ou te le mautinoa po o e malamalama ia te a’u. O le a se mea e faatatau i le faia o na mea ma faafitauli o loo oufeagai ai?”

O se fesili talafeagai. I le aluga o taimi, sa ma matauina ma lena epikopo o i latou o e na faia ma le iloa ia “mea laiti ma faatauvaa”⁷—usiusitai i ni auala e foliga laiti—ua faamanuiaina i le faatuatua ma le malosi e sili atu nai lo faatinoga moni o le usiusitai lava ia ma, o le mea moni, e ono foliga e matua le fesootai lava i ai. Atonu e foliga faigata le iloaina o se fesootaiga i le va o faatinoga i aso taitasi o le usiusitai ma vaifofo i faafitauli faigata tetele tatou te feagai. Peitai latou te fesootai. I lo’u aafiaga, o le faasa’oina o mausa laiti o le faatuatua i aso taitasi, o se auala lea e tasi e sili ona lelei e faamalosia ai i tatou e faasaga atu i faafitauli o le olaga, po o a lava.O faatinoga laiti o le faatuatua, e tusa lava pe foliga mai e faaletaua pe ua motusia atoa mai faafitauli patino ia e faapopoleina ai i tatou, e faamanuiaina lava i tatou i mea uma tatou te faia.

Mafaufau ia Naamanu, o se “alii e pule i ‘au a … Suria” ma “o le toa malosi,” ae o ia o se lepela. Sa tau atu e se teine itiiti pologa e uiga i se perofeta i Isaraelu o le e mafai ona faamaloloina Naamanu, ma o lea sa ia malaga ai ma se aumalaga o ni auauna, fitafita, ma meaalofa i Isaraelu, ma mulimuli ane taunuu i le fale o Elisaia. O le auauna a Elisaia, ae le o Elisaia, na tauina atu ia Naamanu o le faatonuga a le Alii ia “alu ia, ina taele faafitu i [le Vaitafe o] Ioritana.” O se mea e faigofie. Atonu o lenei faatonuga faigofie na taia ai le toa malosi o se mea matua le talafeagai, faigofie tele, pe ua faatoilaloina lona taua po o tulaga ma sa ia mauaina le fautuaga o se mea faatiga. I se tulaga faatauvaa lava, sa leai ma se uiga o le faatonuga a Elisaia ia Naamanu, “ona liliu ai lea o ia, ua alu ma le ita tele.”

Peitai na faalatalata lemu atu auauna a Naamanu ia te ia ma fai atu ia te ia pe faamata na te faia “se mea tele” pe afai e fai atu ai Elisaia ia te ia e fai. Sa latou matauina talu ai sa faatonuina o ia e faia na o sina galuega itiiti, pe le tatau ea ona ia faia, e tusa lava pe na te le o malamalama i le mafuaaga? Na toe mafaufau Naamanu i lana tali ma masalo ma le le talitonu, ae sa usiusitai ma, “alu ifo …, ma fufui faafitu i Ioritana” ma sa faamaloloina faavavega ai o ia.⁸

O nisi taui o le usiusitai e vave ona oo mai; o nisi e oo mai pe a uma ona tofotofoina i tatou. I le Penina Tau Tele, ua tatou faitau ai e uiga i le filiga lē faavaivai o Atamu i le tausiga o le poloaiga e osi atu ni taulaga. Ina ua fesili atu le agelu ia Atamu pe aisea ua ia osi atu ai taulaga, sa ia tali atu, “Ou te lē iloa, ae na poloaiina ai aʼu e le Alii.” Na faamalamalama atu e le Agelu o ana taulaga o “se faatusa lea o le taulaga a le Toatasi na Fanaua e le Tama.” Ae o lena faamalamalamaga na faatoa oo mai ina ua uma ona faaali atu e Atamu lona tuuto e usiusitai i le Alii mo “aso e tele” e aunoa ma le iloaina o le mafuaaga sa tatau ai ona ia osi atu ai na taulaga.⁹

O le a faamanuiaina pea i tatou e le Atua mo lo tatou usiusitai tumau i Lana talalelei ma faamaoni i Lana Ekalesia, ae e seasea lava ona Ia vave faaali mai ia i tatou Lana taimi faatulagaina mo le faia o ia mea. Na te le faaalia maia ia i tatou le ata atoa mai le amataga. O le mea lena e manaomia ai le faatuatua, faamoemoe, ma le faalagolago i le Alii.

Ua talosagaina i tatou e le Atua ia onosai atu ia te Ia—ia faalagolago atu ia te Ia ma mulimuli atu ia te Ia. Ua Ia aioi mai ia i tatou ina ia “aua tou te masalosalo ona ua outou le vaaia.” Ua lapataia i tatou e le tatau ona tatou faamoemoe i ni tali faigofie po o ni faaleleiga vavave mai le lagi. O le a lelei mea uma pe a tatou tutu mausali i le taimi o le “tofotofoina o lo [tatou] faatuatua,” po o le a lava le faigata o lena tofotofoga e onosaia ai po o le tuai ona oo mai o le tali.¹⁰ Ou te le o tautala atu i le “usiusitai tauaso,”¹¹ ae o le mafaufau mautinoa i le alofa atoatoa ma le taimi atoatoa a le Alii.

O le tofotofoga o lo tatou faatuatua o le a aofia ai pea le tumau faamaoni i faatinoga faigofie o le faatuatua i aso taitasi. Ma, o le taimi lava lena, e Na te folafola mai ai o le a tatou mauaina le tali paia lea e tatou te mananao i ai. E na o le faatasi lava le taimi na tatou faamaonia atu ai lo tatou naunautaiga ia faia le mea ua Ia finagalo i ai e aunoa ma le fiamanao ia iloa po o afea, o le aisea, ae pe faapefea foi ona tatou “selesele ai taui o lo [tatou] faatuatua, ma lo [tatou] filiga, ma le onosai, ma le tali-tiga.”¹² O le usiusitai moni e taliaina atoatoa poloaiga a le Atua ma e muai faia.¹³

O le iloaina po o le lei iloaina, tatou te filifili uma lava “po o ai [tatou] te auauna i ai” i aso uma.¹⁴ Tatou te faaalia lo tatou naunautai e auauna atu i le Alii e ala i le gauai atu ma le mausali ma le faamaoni i faatinoga o le tuuto i aso taitasi. Ua folafola mai e le Alii e taitai i o tatou ala,¹⁵ ae mo Ia ina ia faia lena mea, e ao ona tatou savavali, ma le faatuatuaina o loo Ia silafia le ala aua o Ia o le “ala.”¹⁶ E tatau ona tatou faatumuina a tatou lava vai maa ia oo i le lau. A tatou faalagolago ma mulimuli ia te Ia, e suia o tatou olaga, e pei o le vai i le uaina. O le a avea i tatou ma se mea e sili atu nai lo se isi mea e ono avea ai i tatou. Faalagolago i le Alii, ma “soo se mea lava e fai mai ai o Ia ia te outou, ia outou faia.” I le suafa, o Iesu Keriso, amene.