Tangiran te Mweenga

E kaniia tebubua te ririki n nako, te utu mai Oregon a motirawa i Indiana ae riaon 2,000 te maaire (3,200 te kiromiita) raroana—ngke e bua aia kamea ae tangiraki, ae Bobbie. Te utu ae raraoma aei a ukoukoria n taabo nako ma e aki reke. E aki kona n reke Bobbie.

Ma uruakin nanoia, a okira mweengaia, ni katoa maaire e a kararoaia riki mairoun aia man ae a mamatennanoia.

Onoua te namwakaina imwiina, a kubanako te utu ngke a kunea Bobbie i matan aia mataroa i Oregon. “Waena aika bareka, aika kairariiriki aika oti riia—[e] taraa n ae e nakonako n te kawai ae ananau … n tii ngaia.”¹ Karakinan Bobbie e anai nanoia aomata ni kabuta te United States, ao e a kinaaki bwa Bobbie te Kamea ae Kamiimi.

Bobbie tiaki tii ngaia te man ae kananououaia taan rabakau ma te namakin ae kamiimi ni kawaina ao anuan rikina n ata mweengana. Tabeua utuun te bwebwe ae Monarch a mwaing 3,000 te maaire (4, 800 te kiromiita) ni katoa ririki n taabo aika raraoi ibukin kamanoaia. Taian on a mwananga rinanon Marawan te Betebeke mai Indonesia nakon mataniwiin California. Utu ni kua ae Humpback a uaua man raan aika mwaitorotoro n te Bora Meang ao Maiaki nakon te ekuetoa ao n oki. Tao ae kamiimi riki, mannikiba n te tabo ae mwaitorotoro a kiba man te Arctic Circle nako Antarctica ao ni manga oki ni katoa ririki, tabeua 60, 000 te maaire (97,000 te kiromiita).

Ngke taan rabakau a kamatebwaia te anua ae kamimi aei, a tabeki aia titiraki n aron “A kanga n ataa te tabo ae a na nako iai?” ao “E kanga aroia roro nako aika nakoraoi n reiakina te anua aei?”

Ngke I wareka anuan rikiia maan ae korakora aei, akea te bae I kona ni buokia ma tii te miimi, “A konaaomata n titebo aroia n tangira—aron kairaia mai inanoia, ngkana ko kariaia n arana anne—are e na kairiia nakon mweengaia are i karawa?”

I kakoaua bwa mwaane, aine, ao ataei a tangira mweengaia are i karawa n taai tabetai inanon maiun teuanne ke neienne. Mai kabin nanora ti tangiria ni karokoira n te rabuna ao n ramwaneia ara Karo ake i Karawa ake ti kinaia ngkoa ao n tangiriia.

Tabeman a bae ni kauarerekea tangiran aei bwa a na aki namakina korakorana inanoia. Ma naake aki kauarerekea tangiran aei inanoia a kona ni waaki iaon kawaia ae kamiimi—te mwananga ae kamiimi nakon mweengaia i karawa.

Ana rongorongo ae tamaroa Ana Ekaretia Iesu Kristo ibukiia aika Itiaki ni Boong aika Kaitira bwa te Atua bon Tamara, bwa E tabeakiniira, ao iai te kawai n okiria.

E Weteiko te Atua.

Te Atua e atai nako am iango, rawawatam, ao am kantaninga ae korakora. Te Atua e atai mwaitin taai ake ko ukoukoria iai. Mwaitin taai ake ko namakinna bwa e karako iai kimwareireim. Mwaitin taai ake ko tang ni maroaa iai. Mwaitin taai ake ko namakina ae akea buokam, ko raraoma, ke ko un.

Ma, e aki kakawaki bwaai ake ko rinanona—ngkana ko a tia ni kairua, ni bwaka, n namakina te uruaki n nano, aki kukurei, kamwaneaki, ke ni batiboaki—ko riai n ataia bwa ko aki maroa. Te Atua e Teimatoa ni Weteiko.

E arora Baina te Tia Kamaiu nakoim. Ao, n aron are E karaoia nakoia taan akawa akanne ake a tei n taai ake ngkoa n rabeen Naman Kariraia, ma te tangira ae akea tiana E taetae nakoimi: “Mai, ri mwiu.”²

Ngkana ko ongo Irouna, E taetae nakoim n te bong naba aei.

Ngkana ko nakonako ni kawaia ana reirei—ngke ko waaki nakon te Tama are i Karawa—iai te bwai inanom are e na kamatoa bwa ko ongo ana wewete te Tia Kamaiu ao ni katokaa nanom nakon te oota. N na tuangko bwa ko mena n te kawai ae eti ao ko a okira mweengam.

Man te moan tai, a tia ana burabeti te Atua ni kaumakiia aomata ni boong akanne bwa a na “ongo b’anan Iehova ae Atuam, … ni kawakin ana taeka ma ana tua … , [ao] rairaki [Nakoina] n nanom ni kabanea, ao n tamneim ni kabanea.”³

Ti reireinaki ni booki aika tabu teuana tengaa bukina bwa e aera ti riai ni karaoa aei.

N te bong aei, N na anga bukina aika uoua ae ti riai iai n rairaki nakon te Uea.

Te moan, Maium e na tamaroa riki.

Te Kauoua, E na kamanenako te Atua ni kanakoraoi riki maiuia tabeman.

I kakoaua bwa ngkana ti toka iaona ke n reitanako mwanangara ae kamiimi are e kairiira nakon te Atua, e na tamaroa riki maiura.

Aio tiaki nanona bwa ti na aki rinanon te rawawata inanon maiura. Ti bane n ataiia taan iriira Kristo aika kakaonimaki ake a korakai ma te kaangaanga ao te aki motiraoi—Iesu Kristo n tii Ngaia e korakai riki nakon temanna. N aron te Atua ngkai e kaota “ana taai i aoia akana buakaka ma akana raoroi,” E kariaia naba te kaaitara ni kataia aika raoiroi ao aika buakaka.⁴ Ni koauana, n tabetai e taraa n ae maiura a kaangaanga riki ibukina bwa ti kataia ni maiuakina ara onimaki.

Tiaki, iriiran te Tia Kamaiu e na aki katoki ni kabane ara kaangaanga. Ma, e na katoki baika a tukiko imarenam ma ana buoka te Tama are i Karawa are e na anganiko. E na mena irarikim. E na kaira kawaim. E na nakonako irarikim ao ni uouotiko naba ngkana e korakora kainnanom.

Ko na rinanon uaan te Tamnei ae tabu: “te tangira, te kimwareirei, te rau, te taotaonaki n nano, te atataiaomata, te raoiroi, [ao] te onimaki.”⁵

Uaan tamnei aikai tiaki te kabwaia ibukin te maiu n rabwata, te tokanikai, ke te kanangaraoi. A roko man iriiran te Tia Kamaiu, ao a kona n riki bwa buokara ribuakon kataakira aika korakora.

Ain ao kamangaongaon te maiu ae mamate a na bae n aki karauiira ao ni kakamaakuira, ma naake a rairi nanoia nakon te Atua a ramwaneaki n Ana rau. Kimwareireia e na aki toki. A na aki kaakaki taekaia ke ni mwanuokinaki.

“Ko na onimakina te Uea n nanom ni kabanea,” e taku booki aika tabu, “ao tai mwiokoa oin am ataibwai. Ko na ataia n nakonakom ni kabane, ao e na kaeti kawaim.”⁶

Naake a kakauongo n te wewete inanoia ao n ukoukora te Atua, naake a tataro, a kakoaua, ao n nakonako n te kawai are e katauraoia te Tia Kamaiu—e ngae ngkana a tia ni bwaka inanon kawai n tabetai—a karekea te kakoaua ae kaunganano bwa “bwaai ni kabane a na mwakuri ibukin tamaroa[ia].”⁷

Bwa te Atua “e angangania akana nimamate te kona; ao E kabatiai korakoraia akana aki konamaki.”⁸

“Ba itiua bwakan te aomata ae raoiroi, ma e a manga tei rake.”⁹

Ao te Uea inanon tamaroana e titiraki:

Ko tangiria n namakina te kimwareirei ae teimatoa?

Ko tangiria n namakina te rau inanom are e karekea te atatai?¹⁰

Ngkanne raira nanom nakon te oota.

Moana mwanangam ae kamiimi nakon mweengam.

Ngkana ko karaoia, maium e na nakoraoi, kakukurei, ao n uaana riki.

Ni mwanangam n okira te Tama are i Karawa ko na ataia n te tai ae waekoa bwa te mwananga aei tiaki tii ibukin kabanean am tai iaon maium. Tiaki, te kawai aei e na kairiko n riki bwa te kakabwaia ni maiuia natin te Atua ake tabeman—tarim ao mwaanem. Ao te bwai ae kakukurei ibukin te mwananga bwa ngkai ko beku ibukin te Atua, ao ngkai ko tabeakiniia ao ni buokiia raoraom, ko na noora te rikirake inanon maium, ni kawai ake ko aki kantaningai.

Tao ko aki iangoiko ae iai bonganam; tao ko aki iangoiko ae te kakabwaia ngkoe ni maiuia tabeman. Angin te tai, ngkana ti taraira, ti bon tii noori kabwakara ao aki taura. Ti bae n iangoia bwa ti riai “ni bongana riki ibukin kamanenaakira iroun te Atua—n rabakau riki, ni kaubwai riki, n anainano riki, n taarena riki, ni kororaoi riki. Kakabwaia aki roko n ae mwaiti ibukin am konabwai ma ibukin am rinerine. Ao Atuan te aonaaba e na mwakuri inanon ao rinanom, ni kakorakora am konabwai ae nanorinano ibukin Ana kantaninga.

Ana mwakuri e rikirake n taainako iaon te reirei ae kakawaki aei: “Man bwaai aika uarereke e kaotinakoa te bwai ae korakora.”¹¹

Ngke e koroboki nakoia aika Itiaki i Korinto, e taraia te Abotoro ae Bauro bwa aki mwaiti kaain te aro ikekei ae aranaki bwa a wanawana man ana kainibaire te aonaaba. Ma e aki kakawaki anne, ibukina “Te Atua E rinei baika atongaki irouia aomata ba a baba ba E na kamamaia aomata aika rabakau; ao E rinei b’ain aon te aba aika mamara te Atua ba E na kamamai baika korakora.”¹²

Rongorongon ana mwakuri te Atua e kaonaki ma aomata ake a araniia bwa aki tau. Ma a beku ma te nanorinano, a onimakina ana akoi te Atua, ao a karekea Ana berita: “Baia a na riki bwa baiu, ao N na riki bwa aia otanga … , ao a na un n aroia mwaane ibukiu; ao … N [na] kawakiniia iai.”¹³

N te tiamwa ae nako aei e reke aia tai au utu ni kawari tabeua ana tabo te Ekaretia n rongorongona ngkoa i maeaon te United States. N te kawai ae onoti, ti a manga kamaiua te rongorongo n te tai anne. Aomata ake I wareki rongorongoia ae mwaiti—aomata n aroia Martin Harris, Oliver Cowdery, ao Thomas B. Marsh—a bon koaua irou ngkai ti nakonako n te tabo are a nakonako iai ao n iangoi anga karea ake a karaoi ni katea uean te Atua.

A mwaiti kateia aika korakora ake a kariaia aia anganano ni Kaokan ana Ekaretia Iesu Kristo. Ma bon aomata naba, a aki konamaki, a aki kororaoi—n ai Arou ao ngkoe. Tabeman a kuneia bwa aki booraraoi ma te Burabeti Iotebwa Timiti ao ni bwaka man te Ekaretia. Imwiina, angina aomata naba akanne a bitaki nanoia, a kananorinanoia, ao ni manga moan ukeuke ao ni kunea aia iraorao ma Aomata aika Itiaki.

Ti kakatai ni motikitaekaia taari aikai ao tabeman riki n ai aroia. Ti na bae ni kangai, “N na bae n aki kaaka taekan te Burabeti ae Iotebwa.”

Ngkai e bae ni koaua anne, ti aki ataia raoi bwa aekakira aron te maiu n te tai anne, inanon kaangaanga akanne. Tiaki, a bon aki tau, ma ai kaungananora ataakina bwa te Atua e konaa ni kamanenaia n aanga nako. E atai korakoraia ao mamaaraia, ao E anganiia aia atai ae kamiimi n anga te mwakoro ae uarereke ke te bwanaa ae kakukurei ibukin Kaokan te Euangkerio.

Ai kaungananora n ataia, e ngae ngke ti aki tau, ngkana nanora a rairaki nakon te Atua, E na rang tituaraoi ao n akoi ao ni kamanenaira ibukin Ana kantaninga.

Naake a tangira ao ni beku ibukin te Atua ao aomata, ao n nanorinano ao ni marurung n ira waakin Ana mwakuri a na noori bwaai aika kamiimi n riki inanon maiuia ao inanon maiuia naake a tangiriia.

Taai ake a taraa ni kaangaanga rekeia a na reke.

Anera a na rimoaia ao ni katauraoa te kawai.

E aki kakawaki nnem n am kaawa ke inanon te Ekaretia, te Atua e na kamanenako ngkana ko tauraoi. E na kakorakora nanom ae raoiroi ao ni biti am mwakuri n nanoanga ake ko ribanai n taia marin te raoiroi.

Ngaira, n tatabemaniira nako, “iruwa ao aika nang aki kamaniia”¹⁴ n te aonaaba aio. N aanga aika mwaiti ti raroa nako man mweengara. Ma anne ti aki nanona bwa ti a namakina te bua ke te maroa.

Tamara are i Karawa ae tangiraki e a tia n anganiira Ootan Kristo. Ao inanora ngaira n tatabemaniira nako, ti kaumakaki n te wirikiriki mai karawa n rairi matara ao nanora Nakoina ngkai ti karaoi mwanangara n oki nakon mweengara ae te teretio.

Aio e kainnanoa te mwakuri. Ko aki kona n roko ikekei ngkana ko aki reirei Irouna, n atai Ana kaetieti, ni maiuakin, ao n toui mwaneka teuana imwiin teuana.

Tiaki, te maiu tiaki aron te kaa are e maiu i bon irouna. Tiaki te wanikiba ae maiu i bon irouna.

Ko aki tii kona ni beibeti n te ran ni kamaiuko ao n onimakina te nao bwa e na uotiko nakon te tabo are ko kantaningaia n te bong teuana bwa ko na mena iai. N riki bwa ana reirei e kainnanoa ara anganano ni uaua rake ngkana e kainnanoaki.

Akea temanna ae e na bukintaeka ibukin mwanangam. E na buokiko te Tia Kamaiu ao ni katauraoa te kawai imwaaim, ma te motinnano ni Iriiria ao ni kawakin Ana tua a riai n roko mairoum. Anne oin mwiokoam, oin am tai.

Aio mwanangam ae korakora.

Taiaoka kakauongo n ana wewete am Tia Kamaiu.

Mai Iriiria.

Te Uea e katea Ana Ekaretia Iesu Kristo ibukiia aika Itiaki ni Boong aika Kaitira ni buokiko n te motinnano aei ni beku ibukin te Atua ao aomata. Oin te kantaninga iai e na kaungako, n reireiniko, ni boutokaiko, ao n anaa nanom. Te Ekaretia aei e katauraoi taai ibukim ni kamwakura te nanoanga, ni karoko irouia tabeman, ao ni manga kabooua ao ni kawakin berita aika tabu. E baireaki bwa e na kakabwaia maium ao ni kanakoraoa mweengam, am kaawa, ao abam.

Nakomai, raoniira, ao onimakina te Uea. Anga am taarena nakon Ana mwakuri ae kamiimi. Buokiia, kaungaiia, kamarurungiia, ao boutokaiia ni kabane ake iai nanoia ni kakauongo ibukin tangiran mweengara are i karawa. Ti na uaaia n reitiira n te mwananga ae kamiimi aei nakon ara tabo i karawa.

Te euangkerio bon te rongorongo ae kamiimi n te kantaninga ao te kimwareirei. Bon te kawai are e kairiira nakon mweengara.

Ngkai ti mwanea te euangkerio inanon te onimaki ao te mwakuri, ni katoa bong ao ni katoa aoa, ti na kaniira riki nakon Atuara. A na nakoraoi maiura, ao te Uea e na kamanenaira ni kawai aika kamiimi ni kakabwaiaia naake irarikira ao ni kakoroa bukin Ana kantaninga ae akea tokina. N aei ao I kakoaua ao I katikui iroumi au kakabwaia n aran Iesu Kristo ae tabu, amen.