O Se Faananau mo le Aiga

Toeitiiti atoa le seneturi talu ai, sa faimalologa atu ai se aiga mai Oregon i Initiana—e silia ma le 2,000 maila le mamao—ina ua leiloa le latou taifau pele, o Bobbie. Sa saili le aiga atuatuvale mo le taifau i mea uma ae sa lei faamanuiaina. Sa lei maua Bobbie.

I le lotonutimomoia, sa latou toefoi atu ai i le fale, o maila taitasi sa faateleina ai lo latou mamao mai le latou fagafao faapelepele.

Ono masina mulimuli ane, sa maofa ai le aiga i le tu ai o Bobbie i lo latou faitotoa i Oregon. “I le palapala, paee, maosiosia o vae e tau i ivi—sa foliga mai ai na [ia] savali i le mamao atoa lava … na o ia.”¹ O le tala ia Bobbie na taaina atu i ai mafaufauga o tagata i le Iunaite Setete atoa, ma oo ai ina lauiloa o ia o Bobbie le Taifau Ofoofogia.

O Bobbie e le na o le pau lea o se manu ua iso ai saienitisi i se lagona maofa o le taitaiga ma le faananau mo le aiga. O nisi o anoano o pepe Monaki e felelei ese atu i le 3,000 maila i tausaga taitasi i tau sili atu ona lelei e talafeagai mo lo latou ola. E malaga ese atu laumei patua pa’u i le salafa o le atu Vasa Pasefika mai Initonesia i talafatai o Kalefonia. E aau atu tafolā mai vai malulu i Pole i Matu ma Saute e agai atu i le ekueta ma toefoi mai. Masalo e sili atu ona ofoofogia, o le manulele o le tereni o le atika e lele mai le Li’o Atika i Anetatika ma toefoi mai i tausaga uma, pe tusa ma le 60,000 maila.

A suesueina e saienitisi lenei amioga mata’ina, latou te fesiligia lava fesili e pei o le “E faapefea ona latou iloaina le mea e o i ai?” ma le “E faapefea e tupulaga e sosoo ai ona aoaoina lenei amioga?”

A ou faitau i lenei uiga mamana i manu, e le matatalia lo’u tuufesili, “Mata e mafai ona i ai i tagata soifua lea lava faananau e tasi—se faatulagaga o le taiala mai le loto, afai e te mafaia—o lena mea e tosina atu ai i latou i lo latou aiga faalelagi?”

Ou te talitonu o alii uma, tamaitai, ma tamaiti ua lagonaina le valaau a le lagi i se taimi i lona olaga. I le taele o o tatou loto o loo i ai se faananau ia taunuu atu ma pasia le veli ma opomau i Matua Faalelagi sa tatou iloaina ma faapelepele i ai muamua.

O nisi e ono taotaomiaina lenei faananau ma mafua ai ona latou le lagonaina le malosi o lenei lagona. Ae o i latou e le taotaomiaina lenei lagona i totonu o i latou lava e mafai ona amataliaina se malaga maoae—o se masiiga ofoofogia e agai atu i nofoalii faalelagi.

O le savali musuia a Le Ekalesia a Iesu Keriso o le Au Paia o Aso e Gata Ai e faapea, o le Atua o lo tatou Tama, e popole o Ia ia i tatou, ma o loo i ai se ala e toefoi atu ai ia te Ia.

E valaau mai le Atua ia te oe.

E silafia e le Atua ou mafaufauga uma, ou faanoanoaga, ma ou faamoemoega silisili. E silafia e le Atua le tele o taimi e te saili atu ai ia te Ia. Le tele o taimi na e lagona ai le leai o se tapulaa o le fiafia. Le tele o taimi e te tagi ai i le tuuatoatasi. Le tele o taimi e te lagona ai le leai o se fesoasoani, fenumiai, po o le ita.

Ae, po o le a lava lou talafaasolopito—afai na e vaivai, toilalo, lagona le nutimomoia, ita, faalataina, po o le fasia—ia iloa e le o tuua nao oe. E valaau mai pea le Atua ia te oe.

O loo faaloaloa mai e le Faaola Lona aao ia te oe. Ma, e pei ona sa Ia faia i na aufaifaiva sa tutu i se taimi ua leva lava i auvai o le Sami o Kalilaia, ma se alofa lemafuatia e fetalai mai ai o Ia ia te oe: “Sau, mulimuli mai ia te a’u.”²

Afai o le a e lagonaina o Ia, o le a Ia fetalai atu ia te oe i lenei lava aso.

A amata ona e savali i le ala o le avea ma soo—a amata ona e agai atu i le Tama Faalelagi—o loo i ai se mea i totonu ia te oe o le a faamautu atu ua e faalogo i le valaau a le Faaola ma seti lou loto agai i le malamalama. O le a ou ta’u atu ia te oe o loo e i ai i luga o le ala sa’o, ma o loo e toefoi atu i le aiga.

Talu mai lava le amataga o taimi, ua uunaia ai lava e perofeta a le Atua tagata o o latou aso ia “faalogo i le siufofoga o le Ieova lou Atua, … tausi i ana poloaiga ma ana sauniga … , [ma] foi atu ia te [Ia] ma lou loto atoa, ma lou agaga atoa.”³

Ua aoao mai e tusitusiga paia ia i tatou le faitau afe o mafuaaga e tatau ai ona tatou faia lenei mea.

O le asō, se’i ou ofo atua ni mafuaaga se lua e tatau ai ona tatou foi atu i le Alii.

Muamua: O le a lelei atili ai lou olaga.

Lua: O le a faaaoga e le Atua oe e faaleleia atili ai olaga o isi.

Ou te molimau atu a tatou amataina pe faaauau pea le malaga maoae lea e tau atu i le Atua, o le a lelei atili o tatou olaga.

E le faapea la o le a saoloto ai o tatou olaga mai faanoanoaga. Ua tatou iloa uma soo faatuatua o Keriso na puapuaga i faalavelave matautia ma le amioletonu—sa mafatia Iesu Keriso lava Ia e sili atu i lo se isi lava. E pei lava ona faia e le Tama “na te faaoso i lona la i e ua amio leaga atoa ma e ua amio lelei,” Na te faatagaina foi faigata e tofotofo ai e ua amiotonu ma e ua amioletonu.⁴ O le mea moni, o nisi taimi e foliga mai ai ua faigata atili o tatou olaga ona o loo tatou taumafai e ola i lo tatou faatuatua.

Leai, o le mulimuli i le Faaola o le a le aveesea uma ai ou tofotofoga. Peitai, o le a aveesea ai papupuni i le va o oe ma le fesoasoaniga e finagalo lou Tama Faalelagi e avatu ia te oe. O le a faatasi le Atua ma oe. O le a Ia taialaina ou laasaga. O le a Ia savali i ou talaane ma e oo foi ina Ia tauave oe pe a matua tele ou mafatiaga.

O le a e lagonaina le fua musuia o le Agaga: “alofa, olioli, filemu, onosai, mataalofa, agalelei, [ma le] faatuatua.”⁵

O nei fua faaleagaga e le o se fua o se uluola faaletino, tulaga manuia, po o se laki lelei. E oo mai e ala i le mulimuli i le Faaola, ma e mafai ona avea ma a tatou fesoasoaniga faamaoni e oo lava i le lotolotoi o tofotofoga sili ona faigata.

O vevesi ma le vavao o le olaga faaletino e ono faamatau ma taufaafefe, ae o i latou e ua’i atu o latou loto i le Atua o le a siomiaina e Lona filemu. O le a le faaitiitia lo latou olioli. O le a le tuulafoaiina i latou pe faagaloina.

“Ia e faatuatua ia Ieova ma lou loto atoa;” ua aoao mai ai tusitusiga paia, “a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”⁶

O i latou e faalogo atu i le valaau mai totonu ma saili atu i le Atua, o i latou e tatalo, talitonu, ma savavali i le ala ua saunia e le Faaola—e tusa pe tautevateva foi i latou i luga o lena ala i nisi taimi—e mauaina le faamautinoaga faamafanafana e faapea “o le a galulue faatasi mea uma mo lo [latou] lelei.”⁷

Aua o le Atua e “avatua le malosi i e ua vaivai [ma faatuputele le malosi i] e ua leai se malosi.”⁸

“Aua [e ui] e atu fitu ona pa’u le amiotonu, a e toe tu o ia.”⁹

Ma na fetalai mai le Alii i Lona agalelei:

E te manao ia tofo i le olioli tumau?

E te fia faananau ea ia lagonaina i totonu o lou loto le filemu e le mafai ona malamalama i ai?¹⁰

Ia liliu atu la lou agaga agai i le malamalama.

Ia amata lau oe lava ia malaga matagofie i le aiga.

A e faia lea mea, o le a lelei atili lou olaga, fiafia atili, ma mausali atili.

I lou malaga e toefoi atu i le Tama Faalelagi o le a vave ona e iloaina o lenei malaga e le na o le tau na ona e ola i lou lava olaga. Leai, o lenei ala e mautinoa lava e taitai atua oe ina ia avea ma se faamanuiaga i olaga o isi fanau a le Atua—o ou uso ma tuafafine. Ma o le mea mata’ina e uiga i le malaga o lou auauna lea i le Atua, ma a o e popole ma fesoasoani atu e faamanuia olaga o ou uso a tagata, o le a e vaaia le alualu tele i luma o lou lava olaga, i ni auala e te lei mafaufauina.

Masalo e te le i mafaufau ia te oe lava ia e i ai sou aoga; masalo e te le i mafaufau ia te oe lava ia o se faamanuiaga i le olaga o se isi tagata. E masani lava, a tatou vaai ia i tatou lava, e na o o tatou tapulaa ma lē atoatoa tatou te vaaia. Atonu tatou te manatu e ao ona avea tatou ma se tagata “sili atu” mo le Atua ina ia faaaogaina ai i tatou—sili atu ona atamai, sili atu ona mauoa, sili atu ona mataalia, sili atu ona talenia, sili atu ona faaleagaga. O faamanuiaga o le a oo mai e le o le tele o ou tomai ae ona o au filifiliga. Ma o le a galue le Atua o le atulaulau i totonu o oe ma auala atu ia te oe, i le faalauteleina o au taumafaiga faatauvaa mo Ana faamoemoega.

O Lana galuega e agai lava i luma i taimi uma ona o lenei mataupu faavae taua: “O mea iti e tutupu mai ai mea tetele.”¹¹

Ina ua tusi atu i le Au Paia i Korinito, sa matauina e le Aposetolo o Paulo sa le i toatele ni tagata sa manatu i ai e atamamai e tusa ma tulaga faalelalolagi. Ae sa lei afaina lena, ona “ua filifilia e le Atua … mea vaivai a le lalolagi e faamaina ai mea malolosi.”¹²

O le talafaasolopito o galuega a le Atua ua faatumulia i tagata e manatu ia i latou lava e le agavaa. Ae sa latou auauna atu ma le lotomaualalo, ma le faalagolago i le alofa tunoa o le Atua, ma sa latou mauaina Lana folafolaga: “O lo latou lima o le a fai mo O’u lima, ma o le a avea a’u ma o latou talita … , ma o le a latou tau faatamatane mo a’u; ma… o le a Ou faasaoina i latou.”¹³

I le taumafanafana ua te’a atu nei sa maua ai e lo matou aiga se avanoa matagofie e asiasi atu ai i nisi o nofoaga anamua o talafaasolopito o le Ekalesia i le itu i sasae o le Iunaite Setete. I se ala faapitoa, sa matou toe ola ai i le talafasolopito o lena taimi. O tagata na ou faitau i ai—e pei o Matini Harisi, Oliva Kaotui, ma Thomas B. Marsh—sa oo ina moni ia te au a o matou savavali ai i mea na latou savavali ai ma mafaufau loloto i osigataulaga na latou faia e atiae le malo o le Atua.

Sa tele ni o latou uiga maoae na faatagaina ai i latou e faia ni saofaga iloga i le Toefuataiga o le Ekalesia a Iesu Keriso. Ae o i latou foi o ni tagata soifua, e vaivai, ma lē atoatoa—e pei lava o oe ma a’u. O nisi sa oo ina latou le fiafia i le Perofeta o Iosefa Samita ma pa’u’u ese atu ai mai le Ekalesia. Mulimuli ane, o le toatele o ia lava tagata e tasi sa suia loto, faalotomaualaloina i latou lava, ma toe saili atu ai le faaaumeaina ma le Au Paia.

Atonu tatou te ono maua se lagona e faamasino atu ai i nei uso ma isi e pei o i latou. Atonu tatou te faapea, “O le a ou le teenaina lava le Perofeta o Iosefa.”

E ui atonu e moni lena mea, ae tatou te le iloa moni lava pe na faape’i le ola ai i lena taimi, i na tulaga. Leai, sa lei atoatoa i latou, ae e maeu le faamalosiau o le iloaina sa mafai ona faaaogaina e le Atua i latou i soo se auala. Sa Ia silafiaina o latou malosiaga ma vaivaiga, ae sa Ia tuu atu ia i latou le avanoa tulagaese e saofagā atu ai se fuaiupu po o se fati i le vii mamalu o le Toefuataiga.

E maeu le faamalosiau o le iloaina, e ui tatou te le atoatoa, ae afai e ua’i atu o tatou loto i le Atua, o le a Ia agaalofa ma agalelei mai ma faaaoga i tatou mo Ana faamoemoega.

O i latou e alolofa ma auauna atu i le Atua ma uso a tagata, ma auai ma le faamaulalo ma le mataalia i Lana galuega, o le a vaaia mea ofoofogia e tutupu i o latou olaga ma i olaga o i latou, latou te alolofa i ai.

O faitotoa na foliga mai na tapunia o le a tatalaina.

O le a muamua atu agelu i o latou luma ma saunia le ala.

Po o le a lava lou tofiga i lou nuu po o le Ekalesia, o le a faaaoga oe e le Atua, pe afai e te loto i ai. O le a Ia faalauteleina ou manaoga amiotonu ma liua faatinoga o loo e luluina i se seleselega tele o le lelei.

O tatou, i tatou taitoatasi, o “tagata ese ma e aumau”¹⁴ i lenei lalolagi. I le tele o ala, o loo tatou mamao ai mai le aiga. Ae le faapea la e manaomia ai ona tatou lagonaina le leiloloa po o le tuuatoatasi.

Ua foai mai e lo tatou Tama i le Lagi pele ia i tatou le Malamalama o Keriso. Ma i le taele o i tatou taitoatasi, o loo uunaia ai i tatou e se uunaiga faalelagi ia liliu atu lo tatou vaai ma loto ia te Ia a o tatou faia le malaga e toefoi atu i lo tatou aiga selesitila.

E manaomia ai e lenei mea se taumafaiga. E le mafai ona e oo i ai iina e aunoa ma le tauivi e aoao e uiga ia te Ia, ia malamalama i Ana faatonuga, faaaoga, ma tuu le tasi vae i luma o le isi.

Leai, o le olaga e le o se taavale otometi. E le o se vaalele e alu i le pailate otometi.

E le mafai ona tau na ona e faaopeopea i vai o le olaga ma faalagolago i le āu o le a ave oe i soo se mea ua e faamoemoe e te oo i ai i se aso. O le avea ma soo e manaomia ai le ‘a’au atu i le tatafe pe a manaomia ai.

E leai lava ma se isi e nafa ma lau lava faigamalaga patino. O le a fesoasoani le Faaola ia te oe ma saunia le ala i ou luma, ae o le tautinoga e mulimuli ia te Ia ma tausi i Ana poloaiga e tatau ona sau mai ia te oe. O lau lava ia avega lena, ma lou lava avanoa.

O lau malaga sili lea.

Faamolemole faalogo i le valaau a lou Faaola.

Mulimuli ia te Ia.

Ua faatuina e le Alii le Ekalesia a Iesu Keriso o le Au Paia o Aso e Gata Ai e fesoasoani ia te oe i lenei tautinoga e auauna atu i le Atua ma uso a tagata. O lona faamoemoega o le faamalosiau, aoao atu, siitia, ma musuia. E saunia e lenei Ekalesia matagofie ni avanoa mo oe e faatino ai le agaalofa, aapa atu ai i isi, ma faafou ma tausi ai feagaiga paia. Ua mamanuina e faamanuiaina ai lou olaga ma faaleleia ai lou aiga, nuu, ma le malo.

Sau, auai ma i matou ma faalagolago i le Alii. Tuu atu au taleni i Lana galuega ofoofogia. Aapa atu, faamalosiau atu, faamalolo, ma lagolago tagata uma e mananao ia lagona ma gauai atu i le faananau mo lo tatou aiga faalelagi. Ia tatou auai faatasi i lenei malaga mamalu i maota faalelagi.

O le talalelei o se savali mamalu o le faamoemoe, fiafia, ma le olioli. O le ala lea e taitai atu ai i tatou i le aiga.

A tatou opomauina le talalelei i le faatuatua ma galuega, i aso taitasi ma itula uma, o le a tatou latalata atili atu i lo tatou Atua. O le a lelei atili o tatou olaga, ma o le a faaaoga e le Alii i tatou i ni auala ofoofogia e faamanuia ai i latou o siomiaina i tatou ma faataunuu ai Ona faamoemoega e faavavau. Ou te molimau atu ai i lenei mea ma tuu atu lau faamanuiaga ia te outou, i le suafa o Iesu Keriso, amene.