Mena Inanon te Atua ao Kanua Tamneim
Ti ataia ae Kristo iai mwaakana ni karika ara reitaki n iraorao ma te Tama ao bon imarenara.
Ti kainnanoia n reitinako ni kakorakorai rabakaura ao n ongotaeka iroun te Tama are i Karawa. Ara reitaki ma Ngaia bon akea tokina. Natina Ngaira ae tangiriira, ao anne e aki bitaki. Ti na kanga riki ni mwakuria Ana kakao ma nanora ni kaniira ma Ngaia ao n anne ni kakukureira ni kakabwaia ake E kantaningai anganakira n te maiu aei ao te maiu are e na roko?
E taku te Uea nakoia Iteraera are ngkoa, ao E taku nakoira, “Eng, I bon tangiriko n te tangira ae akea tokina: ma ngaia ae I burimauniko n te atataiaomata.”1 N taetae n aron te Tama, E taetae naba nakoira, “Ko na mena irou, ao Ngai iroum; ngaia are nakonako ma ngai.”2 Ti onimakinna n ae tau ni mena Irouna ao n nakonako ma Ngaia?
Ti mena ikai iaon te aba bwa ti na reiakinaki, ao n reireinaki, ao te kabanea ni kakawaki n rikirake ao n reireinaki e na roko man ara reitaki n ara berita aika tabu ma te Tama are i Karawa ao Iesu Kristo. Man ara reitaki ae kakaonimaki ma Ngaiia e kaoti rabakaun te Atua, te tangira, ao te konabwai ae korakora ni beku ibukiia tabeman.
“Ti mwiokoaki n reiakin bwaai ni kabane ake e na kaota iai arona n Atua.”3 Ti riai n ataia bwa te Atua te Tama e kaira Natina, Iesu Kristo, ni karika aonaaba ibukin rikirakera, bwa te Tama are i Karawa e anga Natina bwa kabooan mwiin te motiraoi ibukin kamaiuakira, ao bwa mwaakan ana nakoanibonga te Tama ao ana Ekaretia Natina ae koaua ma otenanti aika kainnanoaki a kaokaki ibukin kabwaiara. Ko kona n namakina te tangira ae korakora rinanon Aia katauraoi ibukin kimwareireim ao rikirakem? Ti riai n ataia bwa ana babaire ni kamaiu te Tama are i Karawa bwa ti ongotaeka n tuan ao ana otenanti te euangkerio ao ni karekea te maiu ae akea tokina ao n riki n ai aron te Atua.4 Aio te kukurei ae koaua ao ae reitinako are e anganiira te Tama are i Karawa. Akea riki te kukurei teuana ae koaua ao n reitinako.
A kona kakaewenakoara ni katikiira nako man te kukurei aei. Ti kona ni kabua ara reitaki ma te Atua ngkana ti katabetabeaki n taian kaangaanga n oneamwiin are ti na kananorinanoira ni katorobubua n tataro.
Te kibu n taeka ae bebete aei e butiira bwa ti na tuoi baike ti moanbwai ni karaoi:
Tabeua bwaai a kakawaki; tabeua bwaai a aki.
Tabeua bwaai a teimaan, ma angin bwaai a aki.5
Taari, tera ae kakawaki iroumi? Tera ae teimaan iroumi Te bwai ae teimaan kakawakina iroun te Tama bwa ti na reireinaki Mairouna, ti na karinanoira, ao n rikirake n ongotaeka Irouna rinanon ara taneiai iaon te aonaaba. E tangiriira bwa ti na bitii arora n tiorobeke nakon te ibuobuoki ao maakura nakon te onimaki. Bwaai aika teimaan aikai a kona n riki bwa kataakira aika kaangaanga.
Ngkai, ma tianakira n te maiu n rabwata, e butiira te Tama bwa ti na bwaina te tangira ngkana e a rang kaangaanga karaoana, bwa ti na beku ngkana e aki angaraoi te beku, ni kabwarai buure ngkana te kabwarabure e a riaon ara konabwai. Ni kanga? Ti na kanga ni karaoia? Ti kakorakoraira ni bubuti ana ibuobuoki te Tama are i Karawa, n aran Natina, ao ni karaoi bwaai n Ana kawai n oneamwiin ara kainikatonga ni karaoi n oin nanora.
I noora au kainikatonga ngke e taetae Beretitenti Ezra Taft Benson iaon kaitiakan nanora.6 I iangoai bwa angkoa te katiibu n ran. N na kanga ni kanakoa te kainikatonga man maiu? Ni kairoroira ni karekea te nanorinano ao ni kataia ni karaoira bwa ti na tangiriia tabeman e bon aki koaua, akea nanona, ao e aki kona ni mwakuri. Ara bure ma ara kainikatonga a karekea te uruaki—ke te marena—imarenara ma moan rikin tangira ni kabane, Tamara are i Karawa.
Tii ana Mwakuri ni Kamaiu te Tia Kamaiu ae kona ni kaitiakiira man ara bure ao ni kaina te marena anne.
Ti tangiria n ramwaneaki n ana tangira Tamara are i Karawa ao ana kakawakin, ao ngaia ae ti moanibwaia Ana kantaninga ma te nano ae uruaki ti bubuti bwa Kristo e na kabwaroa te ran ae itiaki nako nanora.N te moan e bae n roko ni karaurau, ma ngkai ti ukeuke, ao n ongotaeka, e na roko ni korakora. Te ran ni kamaiu aei e moanna ni kaona nanora, ao n taonako bwarobwarona ma Ana tangira, ti kona n ibuobuoki ma nanora ao n tibwaua kanoana ma tabeman ake a bwarua te kamaiuaki, kantaninga, ao ni bwainaki. Ngkai a itiaki nanora, ara reitaki iaon te aba a moanna ni maiu.
Ara anga karea n nanora aika onoti a riai ni mwaawa ibukin ana babaire te Atua ae akea tokina. Te Tia Kamaiu, are e taetae ibukin te Tama, e bubutiira “Kaaniai ao N na kaniingkami.”7 Kaaniara ma te Atua nanona reiakinan Ana koaua rinanon booki aika tabu, n irii reirei mairouia burabeti, ao ni kataia ni karaoa Ana kantaninga n ae bwanin.
Ti ataia ae Kristo iai mwaakana ni karika ara reitaki n iraorao ma te Tama ao bon imarenara? Ngaia, man mwaakan te Tamnei ae Raoiroi, a kona n anganiira te wanawana are ti kainnaoia inanon te reitaki.
Te tia reirei n te Reirei n Tabati e kaongoai te taneiai are e riki ma kaain ana kiraati ae kaaina ataeinimwaane ae 11 aia ririki. Temanna mai buakoia I aranna bwa Jimmy e aki kan rereitaki ao ni kan titiku n tii ngaia n te kiraati. Te Tabati teuana, e anaaki nanon te tia reirei bwa e na aki anga te reirei are e katauraoia ao n taekinna bwa bukin tera e tangira Jimmy. E taekina ana kakaitau ao ana kakoaua iroun te ataeinimwaane aei. Ngkanne e tuangiia kaain te kiraati bwa a na taekina te bwai are a kakaitau iai irouna. Ngkai kaain te kiraati, temanna imwiin temanna, a tuanga Jimmy bukin tera e rang kakawaki irouia, e kabwaraka atuuna te ataeinimwaane ao a tiinako rannin matana iaon ubuna. Te tia reirei aei ao kaain te kiraati a katoka maroaana ma te mamaakin. Te tangira ae bebete, ae kaotaki ma te koaua, e anga te kantaninga ao kakawakiia tabeman. I arana aio “kanua tamneim ke te marena.”
Tao maiura n te aonaaba n tamnei tao aei mwiin nanora ae koaua, te tangira ae teimaan ikai iaon te aba. Ti barongaaki n anga ara tangira ao n tangiraki, ao te tangira ae moan te korakora e roko ngkana ti katiteuanaira ma ma te Atua. Ana Boki Moomon e kaoira bwa ti na “raoiakinaki nakon te [Atua] rinanon te mwakuri ni kamaiu iroun Kristo.”8
Itaia e taekiniia naake a maiuakina tuan te aki mamatam ao n aron anne a riki bwa taan kanuai tamneia aia kariki. Boni ngaiia ake, e berita Itaia nakoia, a na “manga karaoi tabo nikawai aika kamaroa.”10 N aron naba te kawai anne, te Tia Kamaiu e na karaoi tabo---ke te raroa---imarenara ao te Tama are i Karawa. Ngaia, rinanon Ana anga karea ni kamaiu, e kauka kawaira bwa ti na karekea mwaakan te Atua ae tangiraki, ao ngkanne ti a kona ni “karaoi tabo nikawai aika kamaroa” inanon maiura. Kamarurungan ara namakin ae raroa imarenara e kainnanoa butimwaeara n ana tangira te Tama are i Karawa, n raonaki ma ara anga karea n arora n tiorobeke ao nanora ni maaku.
Te tairiki teuana ae kauringaaba, I kauntaeka Ngai ma au koraki iaon te kaangaanga ni kaeti ma te tautaeka . E waekoa n tiriburea au marooro, ni kaotia nakoiu bwa e kairua ongou mai keeraroa irouia au utu. I namakina te tei ni baba ao n aki kaongoaki—ao tao bon eng. N te tairiki anne ngke I katorobubua n tataro, I waekoa ni kabwarabwara nakon te Tama are i Karawa bwa kaangaangara au koraki ae! I retinako n taetae. Tao I toki ni ngurengure, ao e reke ana tai te Tamnei ae Raoiroi n anaa nanou ibukiina, ni miimiu, I ongo au taetae ni bon nakoiu, “Ko bae n tangirai bwa N na tangira neienne.” Tangira neienne? I reitinako n tataro, n taekina te bwai ae kangai, “N na kanga n tangira neienne? I taku bwa I bon aki kan tangiria. E matoa nanou, e uruaki nanou. I aki kona ni karaoia.”
Ngkanne, ni koauana ma ana ibuobuoki te Tamnei, e reke au iango ae boou ngkai I taku, “Ma Ko tangira neienne, te Tama are i Karawa. Ko kona n anganai mwakoron Am tangira ibukina—bwa I aonga n tangiria naba?” E a kamarauaki nanou, e moanna ni bitaki nanou, ao I a moanna n noora te aomata aei n ae kaokoro. I a moanna n namakina kakawakina are e nooria te Tama are i Karawa. E koreia Itaia, “E bauta ikoakin ana botanaomata iai Iehova, ma ni kamaoi mwini makoroia.”11
N rakan te tai ara marena e kakukurei tokina. Ma e ngae ngke e aki butimwaea bitakin nanou, I reiakinaki bwa te Tama are i Karawa e na anganiira te kona n tangiriia naake ti taku bwa a aki tangiraki, ngkana ti butiia Ana ibuobuoki. Ana Mwakuri ni Kamaiu te Tia Kamaiu bon te kawai bwa e na reitinako n raanga te tangira ae kororaoi mairoun te Tama are i Karawa. Ti riai n rineia ni butimwaea ao ni mena inanon te tangira aei bwa ti aonga ni karekea te tangira ae kororaoi nakoia ni kabane.
Ngkana ti anga nanora nakon te Tama ao te Nati, ti bitii ara aonaaba—e ngae ngkana bwaai ake irarikira a aki bitaki. Ti kaniira riki ma te Tama are i Karawa ao n namakin butimwaean ara konabwai n riki bwa ana reirei aika koaua. Ara kanamakin, onimakinara, ao ara onimaki a na rikirake.
E tuangiira Moomon bwa ti na tataro ma nanora ni kabane ibukin te tangira aei bwa ti na anganaki mairoun are moan riki mairouna—te Tama are i Karawa.12 Ngkanne ti kona n riki bwa taan kanuai tamnei n ara reitaki n te aonaaba.
Ana tangira Tamara ae akea tiana e roko iroura, bwa e na kaokiira nakon mimitongina ao kimwareireina. E anga Natina ae te Rikitemanna, Iesu Kristo, bwa e na kanuai tamneira imarenara ma Ngaia. Te reitaki ma te Tama are i Karawa bon te bwai ae kakawaki n te tangira ae reitinako ao te kantaniga ae akea tokina. Ti riai ni karaoa te reitaki ma Ngaia ngkai n reiakinna tera baika a kakawaki riki, n tangira ngkai E tangira ao n rikirake n Ai arona. I kakoaua bwa ara reitaki ae kakaonimaki ma te Tama are i Karawa ao te Tia Kamaiu e kakawaki n aki toki Nakoia ao nakoira. N aran Iesu Kristo, amen.