Muab Siab Npuab Vajtswv thiab Kho Qhov Qiag

Peb yuav tsum rau siab kawm thiab mloog Leej Txiv Saum Ntuj Ceeb Tsheej lus. Nws yeej yog peb Txiv nyob mus ib txhis. Peb yog Nws cov me nyuam uas Nws hlub, thiab qhov ntawd yeej yuav tsis hloov. Peb yuav ua li cas kom ua raws li Nws hais kom peb txav los ze Nws peb thiaj yuav txais tau cov koob hmoov uas Nws xav pub rau peb hauv lub neej no thiab nyob hauv lub neej tom ntej?

Tus Tswv hais rau Ixayees puag thaum ub thiab Nws hais rau peb hais tias, “Kuv yeej ib txwm hlub nej, kuv yuav hlub nej mus ib txhis.”¹ Nws hais zoo ib yam li Leej Txiv yuav hais rau peb, hais tias, “Koj yuav ua neej nrog kuv, thiab kuv nrog koj; yog li ntawd taug kev nrog kuv mus.”² Peb puas tso siab rau Nws txaus kom muab siab npuab Nws thiab nrog Nws mus kev?

Peb nyob hauv lub ntiaj teb no kom loj hlob thiab kawm, thiab qhov tseem ceeb tshaj plaws ntawm kev loj hlob thiab kev kawm yog qhov uas khi lus nrog Leej Txiv Saum Ntuj Ceeb Tsheej thiab Yexus Khetos. Yog peb sib raug zoo nrog Nkawd ces peb txais tau kev txawj ntse, kev hlub, thiab kev xav pab lwm tus.

“Peb muaj kev lav ris kawm tag nrho tej uas Vajtswv tau tshwm sim txog Nws tus kheej.”³ Peb yuav tsum to taub hais tias Vajtswv Leej Txiv txib Nws Leej Tub, Yexus Khetos, tsim lub ntiaj teb kom peb loj hlob tau, Leej Txiv Saum Ntuj Ceeb Tsheej muab Nws Leej Tub kom them tus nqi ntawm kev txim lij kom peb txais kev cawm seej, thiab tau muab Leej Txiv lub hwj chim pov thawj hwj thiab Nws Leej Tub lub Koom Txoos tseeb txum tim rov qab los nrog rau cov kab ke uas yuav tsum muaj kom peb txais tau cov koob hmoov. Tej uas tau npaj rau peb txoj kev xyiv fab thiab kev vam meej puas qhia rau nej tias Nkawd hlub peb npaum li cas? Peb yuav tsum paub tias Leej Txiv Saum Ntuj Ceeb Tsheej txoj hau kev cawm seej qhia kom peb ua raws li txoj moo zoo cov kev cai thiab cov kab ke thiab txais tau txoj sia nyob mus ib txhis peb thiaj li yuav hloov los ua neeg zoo li Vajtswv.⁴ Nov yog kev zoo siab tseeb uas kav mus ib txhis uas Leej Txiv Saum Ntuj Ceeb Tsheej muab rau peb. Tsis muaj lwm txoj kev zoo siab tseeb uas kav mus ib txhis.

Peb tej teeb meem rub tau peb tawm ntawm txoj kev zoo siab no. Peb yuav tso peb txoj kev sib raug zoo nrog Vajtswv tseg yog tias tej kev sim siab ua rau peb hnov qab thiab peb tsis txhos caug thov Nws.

Txwm no hais kom peb xav txog tej uas tseem ceeb tshaj plaws:

Cov viv ncaus, yam twg muaj nqis rau nej? Yam twg yuav kav ntev rau nej? Qhov uas yeej muaj nqis rau Leej Txiv yog qhov uas peb yuav kawm txog nws, txo peb lub hwj chim, thiab kawm mloog Nws lus los ntawm tej yam uas peb raug hauv lub ntiaj teb no. Nws xav muab peb txoj kev qia dub hloov kom peb xav pab lwm tus thiab muab peb txoj kev ntshai hloov los ua kev ntseeg. Tej yam uas muaj nqis no muaj peev xwm sim peb lub siab.

Yeej yog lub sij hawm tam sim no, thaum peb nyob hauv lub neej no, uas Leej Txiv hais kom peb hlub thaum nyuaj rau peb hlub lwm tus, kom pab thaum tsis yooj yim pab, thiab zam txim thaum peb sab ntsuj plig tsis muaj zog zam txim. Yuav ua li cas? Peb yuav ua li cas? Peb rau siab thov kom tau Leej Txiv Saum Ntuj Ceeb Tsheej txoj kev pab, los ntawm Nws Leej Tub lub npe, thiab ua raws li Nws txoj kev tsis txhob muab hlob ua raws li peb lub siab nyiam.

Daim Duab

Lub taub hliv dej

Ua rau kuv paub txog kuv txoj kev muab hlob thaum Thawj Tswj Hwm Ezra Taft Benson hais txog kev ntxuav lub taub sab haud.⁶ Kuv xav tias kuv zoo li ib lub taub hliv dej. Kuv yuav ua li cas kom muab kev muab hlob hliv tawm ntawm kuv lub taub? Qhov uas peb yuam peb tus kheej kom txo hwj chim thiab yuam peb tus kheej kom hlub lwm tus yeej tsis ncaj, tsis muaj nqis, thiab yeej ua tsis taus li ntawd. Thaum peb ua txhaum los yog muab hlob ces peb tsim ib qho qiag dav dav uas ua rau peb nyob deb ntawm lub hauv paus ntawm txoj kev hlub tag nrho, peb Leej Txiv Saum Ntuj Ceeb Tsheej.

Tsuas yog tus Cawm Seej txoj Kev Theej Txhoj xwb yuav ntxuav peb kom huv thiab kho qhov qiag ntawd.

Peb xav muaj Leej Txiv Saum Ntuj Ceeb Tsheej ob txhais npab ntawm txoj kev hlub muab peb puag, peb thiaj li ua raws li Nws lub siab nyiam ua ntej thiab nrog ib lub siab mob thov kom Khetos yuav nchuav dej huv nyob rau hauv peb lub taub. Thaum xub thawj tej zaum yuav los ib tee dhau ib tee, tiam sis thaum peb nrhiav, thov, thiab mloog lus, yuav los ntau heev. Cov dej uas cawm txoj sia yuav pib ua rau peb puv npo, thiab thaum muaj Nws txoj kev hlub puv npo, peb thiaj li nchuav tau me ntsis pub rau lwm tus uas nrhiav kev kho mob, kev cia siab, thiab kev sib raug zoo. Thaum peb lub taub sab haud huv lawm, ces peb kho tau peb tej kev sib raug kom zoo.

Peb yuav tsum tso peb tus kheej lub hom phiaj tseg yog tias peb xav muaj chaw rau Vajtswv txoj hau kev uas nyob mus ib txhis. Tus Cawm Seej, tus uas sawv Leej Txiv cev hais lus, thov kom peb “Txav los nyob ze kuv thiab kuv yuav txav los nyob ze nej.”⁷ Kev txav los ze Leej Txiv txhais hais tias peb kawm txog Nws tej lus tseeb dhau los ntawm cov vaj lug kub, kev ua raws li cov yaj saub hais, thiab siv zog kom ua raws li Nws lub siab nyiam tag nrho.

Peb puas to taub tias Khetos muaj hwj chim kom coj peb nrog Leej Txiv sib raug zoo thiab ib leeg sib raug zoo nrog ib leeg? Los ntawm tus Vaj Ntsuj Plig Dawb Huv lub hwj chim, Nws yuav qhia peb paub peb sib raug zoo npaum li cas.

Ib tug kws qhia lub Koom Haum Me Nyuam Yaus qhia kuv txog ib lub sij hawm zoo thaum nws qhia ib hoob cov tub hluas uas muaj 11 xyoos. Ib tug uas kuv yuav hu ua Jimmy yog ib tug uas nyob nws ib leeg nyob hauv hoob kawm. Muaj ib Hnub Sunday tus kws qhia txais kev tshoov siab kom tso nws tej lus qhia tseg thiab qhia vim li cas nws hlub Jimmy. Nws hais txog qhov uas nws ris txiaj ntsim thiab nws tso siab rau tus tub hluas no. Ces tus kws qhia hais kom tag nrho cov hauv hoob kawm qhia Jimmy ib yam uas lawv nyiam txog nws. Thaum cov nyob hauv hoob kawm, ib tug dhau ib tug, qhia Jimmy vim li cas nws yog ib tug uas muaj nqis rau lawv, tus tub hluas no nyo hau thiab los kua muag. Tus kws qhia thiab cov hauv hoob kawm no twb ua ib tug choj mus txog Jimmy lub siab. Kev hlub, uas yus hais tiag tiag, ua rau lwm tus muaj kev cia siab thiab xav tias lawv muaj nqis. Kuv hu qhov no ua “kev kho qhov qiag.”

Tej zaum peb lub neej ua ntej peb yug los tau pab peb xav muaj kev hlub uas kav ib txhis nyob hauv lub ntiaj teb no. Vajtswv tau tsim peb kom muaj peev xwm hlub lwm tus thiab xav kom lwm tus hlub peb, thiab txoj kev hlub loj tshaj plaws yog thaum peb ua ib siab nrog Vajtswv. Phau Ntawv Maumoos caw peb kom peb “los sib raug zoo [Vajtswv] dhau los ntawm Khetos txoj kev theej txhoj.”⁸

Yaxayas hais txog cov neeg ua rau siab ntseeg ua raws li kev cai yoo mov lawv thiaj li ua cov neeg uas kho tau qhov qiag dav dav rau lawv cov xeeb leej xeeb ntxwv. Lawv yog cov uas Yaxayas cog lus hais tias yuav “txhim kho tej vaj tse uas thaum ub twb puas tsuaj tas lawm.”⁹ Zoo ib yam li ntawd, tus Cawm Seej tau kho qhov qiag nyob nruab nrab ntawm peb thiab Leej Txiv Saum Ntuj Ceeb Tsheej. Dhau los ntawm Nws txoj kev txi theej txhoj, Nws qhib kev rau peb txais tau Vajtswv txoj kev hlub, ces peb thiaj muaj hwj chim kho “tej uas twb puas tsuaj tas lawm” hauv peb lub neej. Peb yuav tsum muaj Vajtswv txoj kev hlub thiab tso peb txoj kev qia dub thiab kev ntshai tseg, yog peb xav kho qhov qiag uas ua rau peb ib leeg nyob deb ntawm ib leeg.

Muaj ib hmo kuv ib tug txheeb ze thiab kuv tsis sib pom zoo txog kev kav teb kav chaw ib qho teeb meem. Nws rhuav kuv tej lus txhua lo, qhia tias kuv hais tsis yog cia rau kuv tsev neeg hnov. Ua rau kuv xav tias kuv ruam thiab tsis paub—thiab nyaj kuv twb tsis paub tiag. Hmo ntawd thaum kuv txhos caug thov Vajtswv, kuv rawm piav rau Leej Txiv Saum Ntuj Ceeb Tsheej hais tias tus txheeb ze no heev npaum li cas! Kuv hais hais hais tas li. Tej zaum kuv nres ib me pliag thaum kuv yws yws, thiab tus Vaj Ntsuj Plig Dawb Huv thiaj muaj sij hawm kom kuv mloog, vim, ua ciav, kuv hnov kuv tus kheej hais tias, “Nyaj koj xav kom kuv hlub nws.” Hlub nws? Kuv twb thov ntxiv, hais zoo li no hais tias, “Kuv yuav ua li cas hlub nws? Kuv tsis xav tias kuv nyiam nws. Kuv lub siab tawv; ua rau kuv lub siab mob. Kuv ua tsis taus.”

Ces, nyaj tus Ntsuj Plig pab kuv, ua rau kuv tawm kev xav tshiab thaum kuv hais tias, “Tiam sis Koj hlub nws, Leej Txiv Saum Ntuj Ceeb Tsheej. Thov Koj muab ib feem ntawm Koj txoj kev hlub rau kuv—kuv thiaj yuav paub hlub nws thiab?” Ua rau kuv lub siab mos muag, kuv lub siab pib hloov, thiab ua rau kuv saib tus neeg no txawv. Kuv tab tom paub txog tus neeg txoj kev muaj nqis uas Leej Txiv Saum Ntuj Ceeb Tsheej pom. Yaxayas sau hais tias, “Tus Tswv yuav qhwv thiab kho nws haiv neeg tej qhov txhab.”¹⁰

Sij hawm dhau mus ces tsis muaj qhov qiag nyob nruab nrab wb ntxiv lawm. Tiam sis yog tias nws tsis tau txais yuav kuv lub siab uas twb hloov lawm, kuv twb kawm hais tias Leej Txiv Saum Ntuj Ceeb Tsheej yuav ua rau peb txawj hlub cov uas peb xav tias peb hlub tsis taus yog peb thov kom Nws pab. Tus Cawm Seej txoj Kev Theej Txhoj yog kev txais tau peb Leej Txiv Saum Ntuj Ceeb Tsheej txoj kev siab hlub tsis tu tsis tseg. Peb yuav tsum xaiv muab siab npuab rau txoj kev hlub no kom muaj siab hlub txhua leej txhua tus.

Thaum peb muab siab npuab Leej Txiv thiab Leej Tub, peb hloov lub ntiaj teb no—txawm yog tej xwm txheej nyob ib puag ncig peb tsis hloov. Peb txav los nyob ze Leej Txiv Saum Ntuj Ceeb Tsheej thiab paub tias Nws pom zoo peb txoj kev siv zog ua Khetos cov thwj tim tiag tiag. Ua rau peb txoj kev paub qhov zoo qhov phem, kev tso siab, thiab kev ntseeg loj tuaj.

Maumoos tau hais kom peb thov kawg siab kawg ntsws kom txais tau txoj kev hlub no thiab peb yuav txais tau los ntawm txoj kev hlub no lub hauv paus—uas yog Leej Txiv Saum Ntuj Ceeb Tsheej.¹¹ Tsuas yog thaum ntawd xwb peb thiaj kho tau qhov qiag uas ua rau peb tsis sib raug zoo nrog lwm tus hauv lub ntiaj teb no.

Peb Leej Txiv txoj kev hlub uas nyob mus ib txhis ncav cuag peb, xav kom peb rov qab los koom nrog Nws lub yeeb koob thiab kev xyiv fab. Nws twb txib Nws Tib Leeg Tub, Yexus Khetos, kom los kho qhov qiag dav dav nyob nruab nrab peb thiab Nws. Kev rov los cuag Leej Txiv Saum Ntuj Ceeb Tsheej yog lub ntsiab ntawm kev hlub uas kav mus ib txhis. Peb yuav tsum sib raug zoo nrog Nws tam sim no kom kawm txog tej yam uas muaj nqis tiag tiag, kom hlub li Nws hlub thiab hloov los ua neeg zoo li Nws. Kuv ua tim khawv tias peb txoj kev sib raug zoo nrog Leej Txiv Saum Ntuj Ceeb Tsheej thiab tus Cawm Seej muaj nqis rau Nkawd thiab rau peb. Los ntawm Yexus Khetos lub npe, amees.