Pād ilo Anij im Kalōk Men in Jorrāān ko

Jej aikuj wōnm̧aanļo̧k wōt im kapen jeļā eo ad im pokake Jemedwōj Ilan̄. Ad jem̧doon Ippān ej n̄an indeeo. Jej ajri ro Nejin rejitōn bōro, im menin ej jāmin oktak. Elmen ad lukkuun jerbale kūr in An n̄an epaakeļo̧k E im em̧ool m̧ōņōņō kake kōjeraam̧m̧an ko Ej kōņaan litok n̄an kōj ilo mour in im ilo laļ eo ej itok?

Irooj eaar ba n̄an RiIsrael ro etto, im Ej ba n̄an kōj, “Lo, Iar yokwe eok kōn juon yokwe indeeo: kōn men in Iar ipertok eok kōn yokwe eo e ṃool.”¹ Kōnono āinwōt Jemed, Eaar bar ba n̄an kōj, “Kwo naaj jokwe ilo N̄a, im N̄a ilo kwe; kōn menin etetal Ippa.”² Jej ke lukkuun lōke E im atartar Ippān im etetal Ippān?

Jej pād ioon laļ in n̄an eddōkļo̧k im ekkatak, im men eo eaorōktata n̄an eddōkļo̧k im ekkatak enaaj itok jān ad bujen ekkeitak ippān Jemedwōj Ilan̄ im Jisōs Kraist. Jān jem̧jerā eo ad etiljek Ippāer ewaļo̧k jeļāļo̧kjeņ, iakwe, kajoor, im juon kajoor eļap n̄an jerbal n̄an ro jet.

“Ewōr ad eddo n̄an ekkatak kōn aolep men ko ewōr ippān Anij me eaar kwaļo̧k kōn E make.”³ Jej aikuj meļeļe bwe Anij Jemed eaar kōjerbal Nejin, Jisōs Kraist, n̄an ejaake laļ in n̄an ad eddōkļo̧k, bwe Jemedwōj Ilan̄ eaar letok Nejin n̄an kōļļaik jim̧we ko an ekajet kōn ad lo̧mo̧o̧r, im bwe kajoor in priesthood eo an Jemed im Kabun̄ eo em̧ool an Nejin enaaj kain̄i ko rekkar kar kōjepļaaki tok n̄an kōjeraam̧m̧an ko ad. Kwoj maron̄ ke en̄jake iakwe eo em̧wilaļ kōn kōppopo eo Aer kōn m̧ōņōņō im eddōkļo̧k? Jej aikuj ij jeļā bwe karōk in lo̧mo̧o̧r eo an Jemedwōj Ilan̄ ilo ad pokake kien im kain̄i ko an gospel in n̄an bōk mour indeeo im em̧ool erom̧ āinwōt Anij ej.⁴ En̄in ej m̧ool eo im m̧ōņōņō eo ejjeļo̧k jem̧ļo̧kin Jemedwōj Ilan̄ ej letok n̄an kōj. Ejjeļo̧k bar m̧ool ak m̧ōņōņō eo ejjeļo̧k jem̧ļo̧kin.

Apan̄ ko ad rej bōk kōj jen iaļen m̧ōņōņō. Jej maron̄ luji lōke eo ej ekkeitak ippān Anij eļan̄n̄e idajon̄jon̄ ko rej bōkļo̧k kōj n̄an kapo ijeļo̧kin kakeememej kōj n̄an jar.

Naan jidik in ekōm̧m̧an bwe jen etale aorōk ko ad make:

Sister ro, ta eo eaorōk ilo kwe? Ta eo ejjeļo̧k jem̧ļo̧kin ilo kwe? Men eo eaorōktata ejjeļo̧k jem̧ļo̧kin n̄an Jemed ej bwe jen jeļā E, kōttāik kōj make, im eddōkļo̧k ilo pokake E kōn en̄jake ko ilo laļin. Ej kōņaan ukōt kūbboņ ko ad n̄an jerbal in jipan̄, mijak ko ad n̄an tōmak. Men kein raorōktata ejjeļo̧k jem̧ļo̧kin emaron̄ mālijon̄ ko reppen n̄an kōj.

Ej kiiō, ilo mour wabanban in ad, Jemed ej ba bwe jen iakwe men̄e iakwe epen, n̄e ejjab em̧man iien n̄an jerbal, n̄an jeo̧rļo̧k bōd n̄e jeo̧rļo̧k in bōd ej kōmetak ad. Ekōjkan? Ekōjkan ad naaj kōm̧m̧ane? Jen lukkuun pukot jipan̄ eo an Jemedwōj Ilan̄, ilo etan Nejin, im kōm̧m̧ani men ko ilo wāween eo An ijjeļo̧kin kōm̧m̧an n̄an ad kōņaan.

Pija

Dānin jāpe

Iaar kile aō utiej bōro ke Būreejtōn Ezra Taft Benson eaar kōnono kōn būruwōd eaikuj erreeo.⁶ Iaar kōļmenļo̧kjeņ kōn n̄a make āinwōt juon jāpe. Elmen aō naaj joļo̧k utiej bōro jen aō jāpe? Kipel eō make bwe en wōr ettā im kajjieon̄ n̄an kōm̧m̧an ad make iakwe ro jet ej em̧m̧an im enana, im eban jerbal. Jero̧wiwi im utiej bōro ko ad rej ejaake juon jorrāān—ak ettal—kōtaad im unjen aolep iakwe, ej Jemedwōj Ilan̄.

Pinmuur eo wōt an Rilo̧mo̧o̧r emaron̄ karreeoik kōj jen jero̧wiwi ko ad im kiil etta eo ak jorrāān eo.

Jej kōņaan jepooļ ilo pein iakwe eo an Jemedwōj Ilan̄ im tōl, im āindein jej likūt E im̧aantata kōn juon bōro erub ewūjlepļo̧k bwe Kraist en lutōktok dān erreeo n̄an jāpe in ad. Ilo jinoin emaron̄ jidik kōn jidik, ak ilo ad kappukot, kajjitōk, im pokake, enaaj lutōktok. Dānin mour in enaaj jino kobrak kōj, im obrak kōn An iakwe, jemaron̄ kōpeļļo̧k jāpe eo ad ilo ad im ajije kobban n̄an ro jet me rej maro n̄an kōmour, kōjatdikdik, im ajimakeke. Ilo an jāpe eo ad jino erreeo, jem̧jerā eo ad ioon laļ in ejino ājimourur.

Kaarmejete kōņaan ko ad make ekōm̧m̧an bwe en wōr jikin n̄an karōk ko an Anij indeeo. Rilo̧mo̧o̧r, eo eaar kōnono kōn Jemed, kar akweļap n̄an kōj, “Kom̧in kepaaktok Eō im Inaaj kepaakwaj kom̧.”⁷ Epaakeļo̧k Jemed emaron̄ meļeļein ekkatak kōn m̧ool eo An ilo jeje ko rekwojarjar, ļoor naan in kanaan ko, im kōm̧man eļapļo̧k Ankilaan.

Jej ke meļeļe bwe Kraist ewōr an kajoor n̄an bōktok kōj n̄an iakwe eo edipio n̄an Jemen im n̄an doon? E, jen kajoor eo an Jetōb Kwojarjar, maron̄ letok n̄an kōj loļo̧kjeņ eo kōn jem̧jerā.

Juon rikaki in eaar ba n̄an eō kōn juon en̄jake ekajoor ippān ļaddik eo 11 an iiō ilo kūlaaj eo an. Juon iaer, eo inaaj ņa etan Jimmy juon eo epen auiia ilo kūlaaj eo. Juon Jabōt rikaki eo eaar im̧we n̄an dood katak eo im ba n̄an Jimmy etke ej iakwe Jimmy. Eaar kōnono kōn an kam̧m̧oolol im an tōmak ilo ļaddik in. Innām rikaki eo eaar kajjitōk ippān ro uwaan kūlaaj eo n̄an kwaļo̧k n̄an Jimmy men ko rej nōbar e kake. Ke ro uwaan kūlaaj eo, juon ilo̧k juon, ba n̄an Jimmy etke em̧m̧an ippāer, ļaddik eo eaar jillo̧k im jino jan̄. Rikaki in im kūlaaj eo raar kalōk juon iaļ lo būruwōn Jimmy eo eburom̧ōj. Iakwe, m̧ool, eletok kōjatdikdik im jon̄ok n̄an ro jet. Ij ņa etan men in “kalōk men in jorrāān ak ettaļ ko.”

Mour eo ad ilo mour eo m̧okta ej jibadbad eo ad em̧ool, iakwe eo ejjeļo̧k jem̧ļo̧kin ijin ioon laļ in. Jaar ejaak ilo kwojarjar n̄an kwaļo̧k iakwe im jen iakwe, im iakwe eo em̧wilaļ ej itok n̄e jej juon wōt ilo Anij. Bok in Mormon ej kūr kōj n̄an “kōllaajrak kom̧ n̄an [Anij] kōn pinmuur eo an Kraist.”⁸

Aiseia eaar kōnono kōn ro rej mour tiljek kōn kien jitlo̧k im em̧ool jino aer jeraam̧m̧anļo̧k n̄an kalōk men in jorrāān. Er rej ro im, Aiseia eaar kallim̧ur kake, naaj “kalōk men in jorrāān.”¹⁰ Ilo bar juon wāween Rilo̧mo̧o̧r eaar kalōk ijo ejorrāān ikōtaad, im Jemedwōj Ilan̄. E, kōn en̄taan in pinmuur eo An, ekōpeļļo̧k iaļ in n̄an kōj n̄an bōk m̧ōttan iakwe eo ekajoor an Anij im kōn iakwe in n̄an kalōk “jikin ko rejorrāān” ko ilo mour ko ad make. Kōmour en̄jake ko rerub jen doon enaaj jelet iakwe eo an Jemed, n̄an kaamejete kōj make kōn mijak.

Juon jota n̄a im eo nuku kom̧ro eaar jab errā kōn juon unin kōnono. Eaar m̧ōkaj an jum̧aik naan ko aō, im kabōd eō kōn ro repaakļo̧k. Iaar en̄jake jajeļo̧kjeņ im jekkar—im bōlen ikar. Joteen eo iaar bukwelōlō im jar, iaar m̧ōkaj im kōmeļeļeik Jemedwōj Ilan̄ ewi jon̄an an pen auiia in nuku! Iaar kennaan im kennaan. Bōlen iaar bōjrak kōn aō elootaan, im Jetōb Kwojarjar eaar kōm̧m̧an bwe in bōk aō iien, kōn, aō bwilōn̄, iaar ron̄ aō make ba, “bōlen Kwoj kōņaan bwe in iakwe e.” Iakwe e? Iaar jar wōt, ba jet men āinwōt, “Elmen aō iakwe e? Ijjab ļōmņak inaaj iakwe e. Būruwō epen; en̄jake ko aō remetak. Ijjab maron̄.”

Innām, em̧ool kōn jipan̄ eo jān Jetōb, ekar wōr juon aō kōļmenļo̧kjeņ ekāāl ilo aō kar ba, “Ak kwōj iakwe e, Jemedwōj Ilan̄. Kwomaron̄ ke letok jidik n̄an eō iakwe eo Am̧ n̄an e—bwe in maron̄ bar iakwe e?” En̄jake ko aō raar em̧m̧anļo̧k, būruwōd eaar oktak, im iaar lo an armej in jino oktak. Iaar jino lo aorōk eo an me Jemed Ilan̄ ej lo e. Aiseia eaar je, “Irooj ej kūtimi kōnjan ro doon, im kāājmour kōnjaer.”¹⁰

Iien n̄an iien jād eo kōtaad ej kilōk. Eļan̄n̄e liin eban kar bōk oktak in bōro in aō, ikar jeļā bwe Jemedwōj Ilan̄ enaaj kōtļo̧k ad iakwe men̄e ro jej ļōmņak rejjab aorōk, eļan̄n̄e jej akweļap kōn An jipan̄. Pinmuur eo an Rilo̧mo̧o̧r eo ej juon likeppejn̄ak n̄an kwaļo̧k iakwe em̧ool jen Jemed ilo Ilan̄. Jej aikuj kālet n̄an bōke im pād ilo iakwe in n̄an maron̄ bōk iakwe em̧ool n̄an aolep.

N̄e jenaaj wūjlepļo̧k būruwōd n̄an Jemed im Nejin, jej ukōt laļ in ad—men̄e jekjek ko ipeļaadkid rejjōb oktak. Jej epaakeļo̧k Jemedwōj Ilan̄ im en̄jake tiriam̧okake eo An kōn ad kijejeto n̄an erom̧ rikaļoor ro rem̧ool an Kraist. Ad jeļā ta eo ejim̧we, leke, im tōmak naaj ļapļo̧k.

Mormon eaar ba bwe jen jar kōn aolepān būruwōd kōn iakwe in im naaj lutōleplep menin jeraam̧m̧an ko—jen Jemedwōj Ilan̄.¹¹ Innām jej maron̄ wōt jino kalōk men in jorrāān ko ilo laļ in.

Iakwe eo ejjeļok jem̧lok+ an Jemed indeeo ej itok n̄an kōj, n̄an kōro̧o̧l ļo̧k kōj n̄an aiboojoj eo An im m̧ōņōņō. Eaar letok Nejin eo ej Make Wōt, Jisōs Kraist, n̄an kalōk men in jorrāān ko me rej jād kileplep ikōtaad im E. Bar pād ippān Jemed Ilan̄ ej m̧ōņōņō in iakwe eo ejjeļo̧k jem̧ļo̧kin im jibadbad eo indeeo. Jej aikuj in ekkitak ilo E kiiō n̄an jeļā ta eo elukkuun aorōk, n̄an iakwe āinwōt E eaar iakwe, im jino eddōkļo̧k āinwōt E. Ij kam̧ool bwe jem̧jerā eo ad etiljek ippān Jemedwōj Ilan̄ im ad Rilo̧mo̧o̧r rej men eo eaorōk tata n̄an Er im n̄an kōj. Ilo etan Jisōs Kraist, amen.