Yumi Seperet, Be Yumi Stap Wan Yet

Long Jun 1994, mi stap glad tumas blong gobak hom afta wok, blong go luk nasonal soka tim blong mifala long TV i plei long Wol Kap. Taem mi stap ron i go, longwe, mi luk long saed blong rod wan handikap man we i muv kwik long wiljea blong hem, mo mi luk se oli flasem wiljea ia wetem flag blong Brasil. !Mi bin save se hem tu i stap go hom blong luk gem ia!

Taem mitufala i mit, mo ae blong mitufala i fas; !kwiktaem nomo, mi bin filim se mitufala i wan! Mitufala i stap tekem defren rod, mo no save mitufala, situesen blong mitufala i defren, be from mitufala i laekem soka mo lavem kantri blong mitufala, i mekem mitufala i filim se mitufala i stap wan long taem ia. Mi no bin luk man ia stat long taem ia i kam, be tedei, plante yia afta, mi save luk yet ol ae ia mo filim strong rilesen we mi gat wetem man ia. !Ei, mifala i winim gem mo Wol Kap long yia ia!

Long Jos, nomata yumi defren long plante samting, Lod i wantem yumi blong stap wan! Hem i talem long Doktrin mo Ol Kavenan, “Stap wan; sapos yufala i no wan yufala i no blong mi.”¹

Taem yumi evriwan i go insaed long wan japel blong wosip olsem wan grup, yumi mas lego biaen evri samting we i defren long yumi, olsem kala blong skin, sosol taetol, politik, skul mo wok we yu mekem gud, mo afta, traem blong tingting strong long ol stamba tingting we yumi gat we oli semmak. Tugeta yumi singsing ol hym, tingting hevi long sem kavenan long taem blong sakramen, mo talem laod tugeta, “amen” afta ol toktok, ol lesen mo ol prea—we i minim se yumi agri tugeta long wanem we oli stap serem.

Ol samting ia we yumi mekem tugeta i helpem krietem wan strong filing blong yuniti wetem ol memba.

Be, wanem we i soem, we i mekem i strong, o i smasem yuniti, hem i hao yumi mekem samting taem yumi stap longwe long nara memba blong yumi long Jos. Olsem we yumi save, hem i nomol mo i mas hapen se bambae yumi tokbaot wanwan long yumi.

I dipen long wanem yumi jusum blong talem abaot wan narawan, ol toktok blong yumi bae i save “mekem ol hat blong yumi i kam wan”² olsem Alma i bin tijim long olgeta we oli bin baptaes insaed long Ol Wota blong Momon, sapos no bae i karemaot lav, tras, mo gud tingting we i mas stap long medel blong yumi.

I gat ol toktok we sloslo i stap spolem yuniti olsem “Yes, hem i wan gud bisop; o, !be sapos yu luk hem nomo taem we hem i wan yangfala man!”

Wan moa gud wei blong talem hem i “Bisop i gud tumas, mo hem i kam antap plante long saed blong save mo waes ova ol yia.

Plante taem yumi lukluk long ol man wetem ol toktok olsem “Rilif Sosaeti presiden blong mifala ia i no jenis nating, !hem i ston wantaem! Be long narasaed, yumi save talem, “Rilif Sosaeti presiden i traehad smol; ating hem i stap gotru sam hadtaem. !Bae yumi helpem mo sapotem hem!”

Ol brata mo sista. !Yumi no gat raet blong spolem wan man, wetem olgeta insaed long Jos, olsem se oli wan samting nogud! Be, ol toktok blong yumi abaot ol nara man i mas soem bilif blong yumi long Jisas Kraes mo long Atonmen blong Hem, mo we long Hem, mo tru long Hem, yumi save oltaem jenis mo kam moa gud!

Sam oli stat blong poenem fingga, mekem se oli seperetem olgeta long ol lida blong Jos mo ol memba from ol samting we oli smol nomo.

I bin hapen olsem long wan man we nem blong hem Simons Raeda, we i bin kam wan memba blong Jos long 1831. Afta we hem i bin ridim wan revelesen abaot hem, hem i no bin glad blong luk se oli bin raetem nogud nem blong hem, Rider, wetem leta i be i no y. From samting ia, i bin mekem se hem i gat kwestin agensem profet mo i mekem se hem i mekem nogud long Josef, mo hem i aot long Jos.³

I olsem ia nao, bae yumi evriwan i gat sam mistek we ol prishud lida blong yumi bae oli stretem yumi long hem, we bae i kam olsem wan tes long, olsem wanem nao, yumi save stap wan wetem olgeta.

Mi gat 11 yia nomo, be mi bin tingbaot se 44 yia i pas, japel we famli blong mi i stap go long hem i nidim blong oli fiksim bakegen. Bifo oli statem wok long hem, i bin gat wan miting we ol lokol lida mo ol lida long eria oli stap toktok raon long wei we ol memba bae i save tekpat blong mekem wok ia. Papa blong mi we i bin prisaed bifo long yunit ia blong sam yia, i givimaot strong tingting blong hem se wok ia bae wan kontrakta nomo i sapos blong mekem be i no ol man we oli no save wok.

Oli no bin akseptem tingting blong hem nomo, be mifala i bin harem se oli bin tok strong long hem iven long pablik. Nao, !hemia wan man we i bin givim taem blong hem long Jos, mo tu, hem i wan Wol Wo 2 soldia long Yurop, we hem i save olsem wanem blong blokem mo faet from wanem hem i stap bilivim! Oli stap tingting nao se, naoia bae i olsem wanem nao, afta wanem we i hapen long hem. ?Bae hem i stanap strong long tingting blong hem mo gohed blong agensem desisen we i bin kamaot finis?

Mifala i bin luk finis ol famli long wod we oli no bin strong long gospel mo oli nomo kam long jos from oli no save stap wan wetem ol lida. Mi tu, mi witnesem se plante fren blong mi long Praemeri we oli no stap fetful taem oli kam yang i from papa mo mama blong olgeta oli stap lukluk long rong ol pipol insaed long Jos.

Be papa blong mi, i disaed blong stap wan wetem ol Sent. Mo sam dei afta, taem we ol wod memba oli kam tugeta blong helpem bildim jos, hem i “invaetem famli blong mifala blong folem hem i go long jos, blong mifala i save stap raon blong givhan long eni samting.

Mi kros tumas. Mi tingting blong askem se: “Papa, ?from wanem yumi go help bildim jos taem we yu no agri se ol memba bae oli mekem?” Be lukluk long fes blong hem i katemaot tingting blong mi blong mekem hemia. Mi wantem se bae mi stap gud long taem we bae oli dediketem jos bakegen. Mekem se, laki, mi disaed blong stap kwaet mo jes go mo help blong bildim jos!

Papa i no bin gat janis blong luk niufala japel, from hem i bin ded bifo wok ia i finis. Be insaed long famli, we mama blong mi nao i stap lidim, mifala i gohed blong mekem pat blong mifala kasem we wok i bin finis, mo !hemia i mekem mifala i wan wetem papa blong mifala, wetem ol memba blong Jos, wetem ol lida, mo moa impoten, wetem Lod!

Long ol taem ia bifo safaring eksperiens blong Hem long Getsemane, taem Jisas i stap prea long Papa from ol Aposol blong Hem mo evri Sent, Hem i talem se: “Mi mi prea blong laef blong olgeta ia i save joen gud long laef blong yumitufala, blong oli stap wan nomo.”⁴

Ol brata mo sista. Mi testifae se taem yumi disaed blong stap wan wetem ol memba mo ol lida blong Jos—tugeta taem yumi kam tugeta mo speseli taem yumi stap wanwan—bae yumi filim se yumi yunaet stret gud wetem Papa blong yumi long Heven mo Sevya. Long nem blong Jisas Kraes, amen.