Imwu fesen, nge Ew Chok Netip

Non June 1994, ua kan muttir niwin ngeni imwei we seni ai nenien angang pwe upwe tongeni katon won TV ai we teamen soccer ra fiti ewe World Cup. Ekkis fansoun mwurin wa poputa ai wawa ngeni imwei we, wa kuna emon ese tongeni fetan a wawa wan wheelchair o a uwei ewe flag an Brazil. Ua sinei pwe a pwan niwin ngeni imwan we pwe epwe katon ewe urumot!

Nupwen am mi kan fengen, aiwa kukunafengeni kem; me non ekkis fansoun, uwa mefi pwe am me ewe mwan am ew chok non ew popun! Uwa feino ewe epek nge ewe mwan a feino ngeni ewe epek, aiuse mwo sinefengeni kem, me napanapem kewe mi sokono non pekin inis, nge am tongei soccer me fonuwem we mi nonnofengen o aiwa mefi ew chok non ena fansoun! Ikenai, chommong ier mwurin ena fansoun, uwa chiwen mefi pechekunen am ew chok me ena mwan. Mwurin ekena meinisin aiwa wineni ewe urumot pwan ewe World Cup non ena ier!

Non ewe Mwichefen, ika mwo a sokefesen napanapach kewe, nge ewe Samon a mochen pwe sipwe ew chok! A apasa non ewe Doctrine and Covenants, “pwe sipwe ew chok o ika sise ew chok iwe esap kich noun.”¹

Nupwen sia tonong ne chufengen non ew imwen fen are non ewe tempel, sipwe nikitano ach ekiekin sokofesen non nonnomuch kewe, usun ia sia feito me ia, ika sia osupwang are pisekisek, ion sia fini non ewe utut, ika sia sochungio me sukun, o sipwe ekieki usun met mi nonno ren emon me emon kich non pekin ngun. Sia kon fengen, ekieki usun ach kewe pwon mi pin nupwen sia ani ewe sakramen, sia apasa fengeni “amen” mwurin an emon afanafan are iotek—wewen pwe sia tipew ngeni met sia ani poraus won.

Ekkei meinisin sia fori pwe epwe anisi kich ne kan fengen pwe sipwe tongeni ew chok non netip.

Nge, met epwe anisi are ataieno ach winiti ew chok non netip epwe ach kewe foffor nupwen sia towaw seni ekkewe ekkoch chon Mwichefen. Usun kich meinsin sia fen sinei, epwe fis pwe sipwe fos usun emon me emon kich.

Anongonong won met sia fini ne ani poraus usun emon me emon kich, pwe ach kapas epwe anisi kich pwe “netipach epwe ririfengen non ew chok,”² usun Alma a aiti ekewe ekoch a papataisinir non ewe Konikin Mormon, ika repwe ataieno ewe tong, nuku, me mi namwot epwe wor nefinach.”

A wor ekkoch kapas epwe ataieno ach tufich ne winiti ew chok usun ika sia apasa “Ewer, a kan emon pisop mi angoch; nge neanuonun amen nukumach!”

Meni esap eriaffou netipan ika sia apasa non ei sokkun napanap “Ewe pisop a kan angoch, an angoch mi mamarita me napanapan a echuno seni nom.”

Fan chommong sia apungu aramas ren ach apasa ei sokkun “Nouch we presetenin Fin Anisi mi nusmwan; a men namanam tekia!” Nge, meni sipwe tongeni apasa, “Ewe presetenin Fin Anisi a ekkis siwini napanapan; meni a wor an osukosuk non manauan. Sipwe achocho ne anisi I me epechekuna!”

Pwi me fefinei kana, sisap fosengau usun ekkoch, akkom usun chon ewe Mwichefen, ita pwe ir rese tongeni marita o siwini napanaper! Nge, meni ach kapas usun aramas epwe anongonong won ach nuku non Jises Kraist me An Achasefan o pwan, non I me pokiten I, sia tongeni ekesiwini napanapach!

Ekkoch ra aninifengen o ra aimu seni ekkewe nouwisin Mwichefen fan iten mettoch mi namwotongaw.

Ina met a fis ngeni emon mwan itan Simonds Ryder, I a choni ewe Mwichefen non 1831[Engerow wanipwuku inik me ew ier]. Mwurin an anneani kapas pwarata usun pwusin i, a mairu pwe a kuna pwe itechikin itan ewe a mwanino me a itechiki ren Rider, nge esap ren i pwe epwe y. Mwirimwirin ei mettoch a emwen ngeni an a tipemwaremwar usun ewe soufos me a esita Joseph me a apwangapwangeno seni ewe Mwichefen.³

Epwe fis ngeni emon me emon kich pwe ekkewe nouwis non ewe Mwichefen repwe apungano kich, o epwe ew tes usun ika kich mi ew chok ngenir.

Nupwen uwa 11,[engon me ew] nge uwa chemeni 44 [faik me ruanu] ier ano, ewe imwan fan ikewe ian am me chon ai we famini aiwa fan ie epwe for sefan. Me mwen ewe forsefanin ewe imwen fan, a wor ew mwich ren ekkewe souemwen non ewe neni me souemwenin ewe area ra aporausa ifa usun ekkewe chon ewe mwichefen repwe tongeni aninis non ewe angang. Semei we, a nemeni ei wart me nom, a apasa pwe ei sokkun angang mi namwot emon contractor epwe fori, nge esap am.

Ekkewe souemwen rese tipew ngeni an kapas, o aiwa pwan rong pwe ra pwan ungeni mwen mesen ewe pwin aramas. Ennet, ei mwan a kan emon mi nuku non ewe Mwichefen o pwan emon sounfiu non ewe maun itan World War II non Europe me nom, o a fiu fan iten met a nukunuk non! Meni emon mi ekieki usun met a fori non ewe fansoun mwurin. Epwe sopweno ne ungeni met ekewe nouwis rafen apwungano?

Am mi fen kuna ekkoch famini non am we wart ra apwangapwangeno non ewe kapas allim o ra kouno ne fiti fan pokiten rese tongeni ew chok me ekkewe souemwen. Uwa pwan kuna chommong chienei kewe seni Kinter rese chiwen nukuchar nupwen ra serafo pokiten semer me iner kewe ra esita ekkewe souemwenin non ewe Mwichefen.

Nge, semei we a fini pwe epwe ew chok ngeni chon ewe Mwichefen. Me ekkoch ran mwurin, nupwen chon am we wart ra chufengen ne aninis ren forutan ewe imwan fan, a “tingorei” chon am we famine pwe aipwe tapweno mwurin ngeni ewe imwan fan pwe aipwe pwan aninis.

Uwa mefi netipengaw. Ua kapas eis ngeni, “Papa, pwata sipwe feino aninis ren for sefanin ewe imwan fan ika kese tipew ngeni chon ewe mwichefen ar repwe fori?” Nge wowon won mesan a epitano ai ekieki usun ena. Uwa mochen upwe manau me pochokun ren forsefannin, iwe, ua fini pwe upwe chok mosonoson me feino ne aninis!

Semei we ese kuna wesinon ewe imwen fan, I a mano me mwen an epwe wesino ei angang. Nge chon am we famine, ena fansoun aiwa emwen ren inem we, aiwa sopweno ne fori met ukukun am tongeni tori an wesino, ren ena a anisi kem ren am aipwe tongeni ew chok ngeni semei we, chon ewe mwichefen, souemwen, me akkaewin, ngeni ewe Samon!

Ekkis fansoun me mwen An fansoun weires non Gethsemane, nupwen Jises a iotek ngeni ewe Sam fan iten Noun kewe Aposel me kich meinisin, chon ewe Mwichefen, A apasa, “Amo repwe ew chok non kich, usun chok en non ngang o ngang non en.”⁴

Pwi me fefinei kana, Ua pwarata pwe nupwen sia fini ach sipwe tipew fengen ren ekkewe nouwis me chon ewe Mwichefen—nupwen sia chufengen, o pwan nupwen sia imwu fesen—sipwe pwan tipew fengen non unusoch ren Semach won Nang me ewe Chon Amanau. Non itan Jises Kraist, amen.