Nyias Ua Nyias, tiam sis Tseem Koom Ib Siab

Thaum lub Rau Hli Ntuj 1994, kuv tsav tsheb maj tsim tsawv los tsev vim xav saib peb lub teb chaws pawg neeg ncaws pob hauv TV lawv tab tom sib xeem qhov World Cup. Tsis ntev tom qab kuv sawv kev los, nyob tom ntug kev kuv pom ib tug txiv neej uas xiam hoob khab zaum hauv lub laub, kuv pom nws dai ib tug chij txog Brazil teb ntawm lub laub. Kuv paub hais tias nws tab tom mus tsev yuav saib lawv ncaws pob thiab!

Thaum wb ob txoj kev sib tshuam ntawd, wb sib ntsia ib me pliag; tib pliag ntawd, kuv txawm xav tias kuv nrog tus txiv neej ntawd sib koom siab! Wb ob leeg nyias mus nyias kev, yeej tsis sib paub li, ob leeg muaj nyiaj sib txawv thiab lub cev nyias txawv nyias li, tib si wb ob leeg nyiam kev ncaws pob thiab hlub peb lub teb lub chaws ces thiaj li ua rau wb sib koom siab lub sij hawm ntawd! Txij hnub ntawd los kuv tsis tau pom nws dua, tiam sis niaj hnub nim no, txawm ntau xyoo twb dhau los lawm, kuv tseem pom tau nws ob lub qhov muag thiab tseem nrog tus txiv neej ntawd sib raug zoo. Rau qhov, xyoo ntawd peb twb yeej thiab xyoo ntawd peb tau yeej qhov World Cup ntag!

Nyob hauv lub Koom Txoos, txawm peb sawv daws sib txawv los, tus Tswv xav kom peb yuav sib koom ib lub siab! Nws hais hauv phau Lus Qhuab Qhia thiab Kev Khi Lus, “Cia li ua ib lub siab; thiab yog nej tsis ua li lub siab ces nej tsis yog kuv li.”¹

Thaum peb mus hauv ib lub tsev teev ntuj yuav pe hawm ua ke, peb yuav tsum tso peb tej kev sib txawv tseg, nov hais txog tej haiv neeg, kev khwv nyiaj txiag, kev kas moos, kev kawm ntaub ntawv thiab tej hauj lwm, tiam sis peb xav txog peb tej kev sib koom ntawm sab ntsuj plig. Ua ke thaum peb hu nkauj, ntsuam xav txog tej kev sib khi lus ntawm txoj kev noj lub cim nco txog, hais lo lus “amees” ua ke tom qab ib tug neeg hais lus tag, qhia tej zaj lus qhia, thiab thov Vajtswv—txhua yam no puav leej qhia hais tias peb pom zoo rau tej lus uas tau hais lawm.

Tej yam uas peb sib koom ua no pab kom peb sib koom siab ua ib pawg neeg.

Tiam sis, yam uas ua kom peb sib koom siab tiag tiag, los sis ua rau peb txoj kev sib koom siab plam mus yog nyob ntawm seb peb coj li cas thaum peb tsis nrog lub Koom Txoos cov mej zeej nyob ua ke lawm. Ib yam li peb sawv daws paub, nyob nyob ces peb ib leeg yuav tham txog ib leeg.

Ces nyob ntawm tej lus uas peb hais txog lwm tus, ces peb tej lus yuav ua rau peb “lub siab lub ntsws raug khi ua ib ke,”² li Amas qhia rau ntawm cov Dej Maumoos, los sis tej lus ntawd yuav ua rau peb txoj kev hlub, kev rau siab ntseeg, thiab kev sib koom siab uas peb xav tau yuav ploj mus xwb.

Muaj tej lus uas maj mam ua rau txoj kev siab koom siab puas tsuaj mus, zoo li “Aws, nws yog ib tug npisov zoo; tab sis mas koj tsis tau pom hais tias nws zoo li cas thaum nws tseem hluas!”

$Yog yuav hais cov lus no ib nyuag zoo dua ces yuav tsum hais tias “Tus npis sov zoo kawg nkaus, tau ntau xyoo no nws twb loj hlob zoo thiab muaj tswv yim.”

Feem ntau mas peb tis tej npe rau lwm tus neeg thaum hais cov lus zoo li “Peb tus thawj tswj hwm rau lub Koom Haum Niam Tsev ua tsis zoo, nws tawv ncauj dhau!” Qhov fab ntxeev mas peb hais tau li no, “Tus thawj tswj hwm rau lub Koom Haum Niam Tsev tsis tshua txawj mloog lwm tus cov lus; tej zaum tau ib ntus no nws muaj kev nyuaj siab lawm poj. Cia peb pab nws thiab txhawb nqa nws!”

Cov kwv tij thiab cov muam es, peb tsis muaj cai hais lus phem txog ib tug neeg twg, peb haj yam yuav tsum tsis txhob ua li ntawd rau peb cov mej zeej hauv lub Koom Txoos! Tab sis mas, peb cov lus uas hais txog lwm tus neeg yuav tsum qhia txog peb txoj kev ntseeg Yexus Khetos thiab Nws txoj Kev Theej Txhoj thiab tias, hauv Nws thiab dhau ntawm Nws, peb tseem muaj cuab kav hloov los ua neeg zoo dua!

Ib txhia pib thuam thiab tsis nrog lub Koom Txoos cov thawj coj thiab mej zeej sib koom siab vim yog tej yam me me xwb.

Twb muaj li ntawd rau ib tug txiv neej hu ua Simonds Ryder, uas tau los ua ib tug mej zeej hauv lub Koom Txoos thaum xyoo 1831. Tom qab nyeem ib txoj kev tshwm sim uas qhia txog nws, nws xav tsis thoob vim nws pom tias lawv sau nws lub xeem yuam kev hu ua Rider es sau tus tsiaj ntawv i los pauv tus tsiaj ntawv y. Qhov ntawd ua rau nws nug seb tus yaj saub puas yog ib tug yaj saub tiag tiag ces nyob nyob nws pib thuam Yauxej thiab tau poob ntawm lub Koom Txoos mus.³

Tej zaum peb sawv daws yuav raug qhov uas peb cov thawj coj rau txoj kev teev ntuj yuav hais kom peb hloov siab txog ib yam dab tsi, qhov ntawd tab tom xeem peb siab seb peb puas nrog lawv sib koom siab tiag tiag.

Kuv tsuas muaj 11 xyoos xwb tiam sis kuv nco txog 44 xyoos tas los lawm, lawv tab tom kho lub tsev sib ntsib uas kuv tsev neeg mus teev ntuj hauv. Ua ntej pib ua li ntawd, txawm muaj ib txoj kev sib ntsib uas cov thawj coj hauv zos thiab cheeb tsam ntawd tab tom sab laj seb cov mej zeej yuav ua tej hauj lwm li cas pab kho lub tsev ntawd. Kuv txiv, uas thaum ub twb tswj xyuas ceg ntseeg ntawd, tau hais lus nchav me ntsis hais tias yuav tsum yog cov kws txawj kho tsev thiaj los ua hauj lwm tsis txhob cia rau cov neeg dog dig ua xwb.

Tsis yog lawv tsis kam ua li nws hais xwb, tiam sis peb hnov hais tias sawv daws tau luag thuam nws tab meej sawv daws. Nim no nej yuav tsum to taub hais tias nws yog ib tug txiv neej uas rau siab ntseeg lub Koom Txoos thiab twb ua tub rog hauv Kev Tsov Rog Thoob Ntiaj Teb Zaum Ob tim Europe teb, nws pab tiv thaiv thiab sib ntaus txog tej yam uas nws muab siab rau ntseeg! Ib txhia xav paub seb nws yuav ua li cas tom qab muaj qhov xwm no. Nws puas yuav mob siab ua li nws hais thiab puas tseem yuav tsis zoo siab txog txoj kev txiav txim ntawd?

Peb twb pom tej yim neeg hauv peb pawg ntseeg uas tau qaug zog hauv txoj moo zoo thiab tsum tsis tuaj koom tej kev sib ntsib vim lawv tsis sib koom siab nrog cov thawj coj lawm. Kuv kuj pom peb coob tug phooj ywg hauv lub Koom Haum Me Nyuam Yaus uas tsis rau siab ntseeg thaum tiav nkauj tiav nraug vim hais tias lawv niam txiv pheej nrhiav tej lub txim ntawm cov uas nyob hauv lub Koom Txoos.

Tiam sis, kuv txiv, tau txiav txim hais tias nws yuav nrog ib Tsoom Haiv Neeg Ntseeg koom ib lub siab. Ob peb hnub tom qab ntawd, thaum cov mej zeej hauv peb pawg ntseeg tau sib sau ua ke yuav pab kho lub tsev sib ntsib, nws thiaj “caw” peb tsev neeg nrog nws mus rau lub tsev sib ntsib kom peb yuav los pab khiav tej hauj lwm uas peb ua tau.

Kuv chim siab. Kuv tau xav noog nws hais tias, “Txiv es, vim li cas peb thiaj yuav mus pab kho tsev yog hais tias koj twb xav tias cov mej zeej yuav tsum tsis txhob ua tej hauj lwm no?” Tiam sis thaum kuv pom nws ntsej muag kuv tsis xav ua li ntawd. Kuv xav nyob zoo thaum mus muab lub tsev fij tseg. Ces, kuv muaj hmoov, kuv thiaj tau nyob ntsiag to thiab tau mus pab ua tsev!

Txiv twb tsis pom lawv ua lub tsev sib ntsib tshiab, vim nws twb tso lub neej no tseg ua ntej ua tiav tas. Tiam sis peb tsev neeg tau ua hauj lwm pab kom tiav, nim no niam coj peb kev, tseem khiav peb tej hauj lwm txog thaum ua tiav tas, ces ua li ntawd peb thiaj tau nrog leej txiv sib koom siab, nrog peb cov mej zeej thiab thawj coj sib koom siab, thiab qhov tseem ceeb tshaj tau nrog tus Tswv sib koom siab!

Tsis ntev ua ntej Nws los hauv lub Vaj Khexemanes, thaum Yexus tab tom thov Leej Txiv rau Nws cov Thwj Tim thiab tag nrho ib Tsoom Haiv Neeg Ntseeg, Nws hais tias, “Kom lawv koom ib lub siab, Txiv, thov cia lawv nyob hauv wb, ib yam li koj nyob hauv kuv thiab kuv nyob hauv koj.”⁴

Kuv cov kwv tij thiab cov muam es, kuv hais lus tim khawv tias thaum peb txiav txim siab koom siab nrog cov mej zeej thiab cov thawj coj hauv lub Koom Txoos—thaum uas peb los sib sau ua ke, thiab qhov tseem ceeb yog thaum peb nyias nyob nyias—peb yuav haj yam nrog peb Leej Txiv Saum Ntuj Ceeb Tsheej thiab tus Cawm Seej sib koom siab thiab. Los ntawm Yexus Khetos lub npe, amees.