Chacheroid, eng di Di Ta Rengud

Sera June er a 1994 e ak ulerreched el mla ra urerek e omekall el mormei el momes ra rousekool el chad ra beluumam lou soccer el ngara World Cup. Ak di tilobed, e mesa er a cheroid ra bkul a rael a chad el sechudel lorreched el melitai er a wheelchair, er ngii el belsiochel ra banderang er kemam er a Brazil. Ak mle medengei el kmo ng dirrek el merael mormei el momes er tial klekool!

Tia ra kibom kabetech ra rael ea ki mle kasoues a medemam, el telkib el taem, a kulemelchesiu el ta rengmam! A ki mirrael el mora kakerous el basio, dimlak kim kaodengei, ka kakerous a deruchellam ma klisichel a bedengam, eng ding osisiu a somam el soccer ma beltkil a rengmam er a beluumam a rirelllemam el di motang er seikid el taem! Chelechal sils, el mla mo betok el rak, eng sebechek el dirk komes ra medal e melechesiu er a mesisiich el loldak er ngak el morngikel chad. Ng dirrek el kemam el mlo kats er sel klekool er a World Cup er sel rak!

Chelsel a Ikelesia, e kerdi kakerous, eng di a Rubak a mengerchir er kid el di mo tang! Ng dilii tiang el ngara Doctrine and Covenants, el kmo “Ng kired el mo tarengud; e a lak el ta rengud eng diak de chedal.”¹

Sel de siseb ra ikelesia malechub a templo el mo meluluuch el chelechad, eng kired el chemoit a klekakerous er kid, luldimukl a beluad, deruchelled, uldesued ra politiks, skuled ma duch er kid, e bai omes er sel osisiu el momktek er kid er a reng. Kede dmak el mengitakl, omdasu osisiu el telbiil sel temel chedaol belsoil, dmak el lou “amen” ra uriul ra cheldecheduch, suobel, ma nglunguuch—el belkul a kmo kede dmak el kongei a milkedmokl.

Aikal tekoi el de dak el meruul a ngosukid el melchesiu ra klou el keltalreng er a chelsel a ikelesia.

Engdi, sel kmal ochotii, e smisichii, malechub eng tomelii a keltalreng er kid a ikel doruul sel de cheroid er a rebebil er kid er a Ikelesia. Ke er di medengei el rokiu, ng diak lak el sebeched el mo diak dosaod er a ta ma tang.

Ng di mo iior er a ikel dolilt el mo mesaod el kirel a tang, a tekinged a sebechel uaitang “a rengud a dmak lungil,”² el uaikel lulsisechakl a Alma er a Ralm er a Mormon, malechub eng ngodech leng melemall a beltikelreng, klemerang, me a ungil deleuill el er a delongeled.

Ng ngarngii a bebil er a omelkinged el ngii a tomall a keltalreng el uai tiang “Choi, ng ungil bishop; eng di, omko me kemilsang er a le ngeasek!”

A ungil teletael a sebechel uaitiang “Ng kal bishop a kmal ungil, el mla mukeroul el mo ultebel e mellomes er a ikal merko er rak.”

Sel bebil ra taem a kede mla nguu meng teletelir tirka el chad me kede melekoi a kmeed el uaika el tekoi “A oungerachel er a Relief Society a chebuul; ng meral kedi dai a rengul!” Ng bai, sebeched el uase, “Aoungerachel er a Relief Society a kora kmes; altang ngarngii a chetituokel el le chelbangel. Me bode ngesouir e mesiou er ngii!”

Rodam ma rodos, ng diak a llemelted el mesaod er a ngii di el chad, tokuni a chedal a Ikelesia, el kmo ng diak el bo lungil chad! A bai, tekinged el mora rebebil er kid a kirel lochotii a klaumera er kid er a Jesus Kristo me a Tngakireng er Ngii meng, ngar Ngii e okiu Ngii, eng sebeched el mengodech el moungil!

A rebebil di melekoi a kengtil me te mla mo cheroid er a roungerachel me a rechedal a Ikelesia er a tekoi el ngii a kmal mengelekel.

Tiakid a mle teletael el dilubech el mora chad el ngklel a Simonds Ryder, el mlo chedal a Ikelesia er sera 1831. Uriur er a lechiuii a ocholt el kirel, eng ngilasech a rengul el mesang a ngklel el diak el mellemalt a omelchesel el Rider, a mle llechukl lousbech ra ie diak el y. Me tia el teletelel eng mlo omdednger er a profet el uchul a odelcheklel a profet ea Simonds Ryder a mlo diak el lebo er a Ikelesia.³

Ng dirrke el sebeched el rokui el soiseb er a choua tial lomesemechokl el mlara roungerachel er kid, el ngii a mo merritel er a keltalreng er kid lobengterir.

Ng mle teruich me a ta rekik, e ak dobedebekii er sera 44 el rak ra mla memong, el ikelesia el rechad ra blik uluikelesia er ngii a blo lomtechei a klekedekellel. Uchei er a bo lomuchel, eng mla er ngii a ongdibel el roungerachel er tial ikelesia ma roungerachel ra rokui el ikelesia er tial beluu a milsaod ra teletelel a rechedal a ikelesia bo lolengeseu er tial urreor. A demak, e mle tal taem eng nguluungerachel er tial ikelesia el mle betok el rak, a lulechotii e uldesuel el mesisiich el kmo tial ureor a kirel mekedmokl lokiu a redaiksang e diak el metitur el chad.

Tial uldesuel a dimlak el dil milechoit, a ki rirenges el kmo ng mlo meringel el mechokl er a delongelir a rechad er sel sils. Ng ka el chad a mle kot al blak a rengul er a Ikelesia e mle soldau er sera Ongeru el Mekemad er a Europe, e mle smau el omtok e oldechelakl el kirel a loumerang er ngii! Kede mo omdasu el kmo ng mo mekera er chelechang el kirel tial tekoi. Ng kang mo olsiseb ra uldesuel e melemolem lomtok er a mla metib el tekoi?

Kede mla mes el telungalek el ngara ikelesia er kid a mla mo mechitechut er a ebangkelio me te mla mo diak el bera ikelesia leng dikeal sebechir el mo tang tir ma roungerachel. Ke dirrek el mesang er a rebebil ra resechelid er a Primary el diak el blak a rengrir sel bol ngeasek el rechad ra blirir a mle blechoel el meleko kengterir a rechedal a Ikelesia.

A demak, a mle, tibir el ta rengul ngii me a rebebil er ngii er a re Santo. Meng sesei el klebesei ruriul, ma rechedal a ikelesia a mlo mengudel er tir el mo olngeseu er a ureor, ma demak a “uleker” er kemam el mo obengkel el mora ikelesia, meng mo sebecham el ngarngii lolengeseu ra ngii di el ngerang.

Ng mlo kesib a renguk. E mle soak loker ngii, “Chedam, ngera me ke de mo olengeseu er tial ureor alsekum meng dimlak el soam a rechedal a ikelesia loruul er ngii?” Ng dimlak el soak el mechokl me ak di liluk. Ng mle soak el mo ungil kirel tial lmuut loterkeklel. Me ak, mlo ungil, me ak di liluk e merael mong e olngeseu! Me ak milrael el mong me ak ulngeseu

A Demak a dimlak el bolesa tial ikelesia, ra bolmerek leng mlad ra uchei ra bolmerek a ureor. E ng di kemam el telungalek, el delamm a ulebengkemam, a millemolem el meruul, a kimoruul dil merko bol merek, meng ua lulemollem el loldak er kemam me a demak, me a rechedal a Ikelesia, roungerachel, me a, Rubak el ngii a kot el klou a ultutelel!

Mekesai el sikang ruchei er a lebo lechau a ringel el ngara Gethsemane, er a Jesus ra loluluuch el mora Chedam el kirir a re Apostol er Ngii, me a rokui el Santo, eng dilu el kmo, “Me bol ta rengrir; el uaikai, e Chedam, bo lobengked el di ua ikau, el obengkek me ngak a obengkem.”⁴

Rodam me a rodos, ak kuuchais el kmo sel de tibir el mo tang kid me a rechedal me a roungerachel er a Ikelesia—sel de dak el keldibel tokuni sel de chacheroid—ea rengud a dirrek el lungil dmak lobengkel a Demad me a Osobel. El ngara ngklel a Jesus Kristo, amen.