2010–2019
Chon uwei ewe Saramen Nang
October 2017


Chon Uwei Saramen Nang

Non wisach ne uwei ewe pristut an Kot me chon kunon Jises Kraist, en emon chon uwei ewe saram.

Emon mwan chinnap a ukkuta ren ewe counter non ew nain ren ewe posto an epwe kamo stamp. Emon fopun a apareni pwe a weires ne fetan me a pwar ngeni I ifa usun an epwe kamo stamp seni ew mwesin pwe esap witiwit. Ewe mwan chinnap a apasa, “Kinisou, nge uwa sani ai upwe witiwit. Ewe mwesin esap eisiniei usun metekin nechui.”

Fan ekkoch mi och sipwe kapas ngeni emon ekieki usun ach osukosuk.

Metek, netipengaw, me semwen ekkei mettoch kich meinisin kich mi mefi—ekkewe fansoun mwan , riaffou, me feiengaw ra tongeni ounusa watten ach ekiek.

Ren nonnomun inisich, kich mi etiwa pwe ach chinnapeno me semwen ir kinikinin ach sai non ei manau. Sia kutta an ekkewe ir mi sinenap aurour ekkewe ra weweiti pekin inis. Nupwen sia riaffou ren netipengaw ika semwenin ekiek, sia kutta aninis seni ekkewe mi sinenap ra kan angang won ekkei sokkun semwen.

Usun chok ach etiwa sossotun inis me memef non ei manau, sia pwan etiwa sossotun ngun. Napengeni kich sia fen mefi fansoun non manauach nupwen ach kapasen pwarata a fokkun pochokun. Eni sipwe pwan mefi fansoun nupwen Semach won Nang epwe towaweno. Mi wor fansoun nupwen sipwe aucheani mettochun ewe Ngun ren unusen netipach. Epwe pwan wor fansoun nupwen resap kon auchea ika epwe kisikis auchear.

Ikenai uwa mochen kapas usun pochokunen ngun—ifa usun sia tongeni kuna chikar seni ach sise fefeita me fetan won ew aanen pochokunen ngun.

Semwenin Ngun

Fan ekkoch semwenin ngun a fis pokiten tipis ika feiengawen memef. Fan ekkoch feiengawen semwenin ngun a fis ekis me ekis sise tongeni esinna met a fis. Usun ekkewe kinikinin foun fau ra fis seni puun ar chufengen me pochokununo, metekin ngun me netipeta ra tongeni kauta non fansoun nangatam, ra achouatiw ngunuch tori an chouno ach sipwe mwarei. Ren awewe, ei mi tongeni fis nupwen wisach non angang, imw, me mwichefen ra kon nap sise chiwen ekieki pwapwan ewe kapas allim. Eni sipwe mefi usun ita ese chiwen wor met sipwe fori ika ach manaueni ekkewe annukun Kot mi nap seni ach pochokun.

Nge pokiten sossotun ngun mi ennet esap wewen pwe sise tongeni apwakir.

Sia tongeni chikar non pekin ngun.

Pwan mwo ewe feiengawen ngun mi anonnon—ewer, pwan ekkewe mi nikinikin resap pwak—repwe tongeni chikar.

Chienei achengicheng, ewe manamanen echikara an Jises Kraist ese poutuno non ach fansoun.

An ewe Chon Amanau echikar a tongeni siwini manau non ach ei fansoun non ewe chok pwan napanap a fis non an we fansoun. Ika sipwe chok nuku, I epwe tongeni angei pouch, ourano ngunuch ren saramen nang me echikar, me apasa ngenikich ekkewe kapas feioch, “Kopwe pwaata, angei kiom na o kopwe fetan.”1

Rochopwak me Saram

Met chok a efisi semwenin ngunuch, ir meinisin mi wor rer ew mettoch: ewe poutunon saram seni Kot.

Rochopwak a akukunano ach tufichin kunaochu. A ettinengawa ach kuna met akkom mi fatoch. Nupwen sia nom non rochopwak, eni sipwe finata mi ngaw pokiten sise tongeni kuna feiengaw won aanach. Nupwen sia nom non rochopwak, eni sipwe epinukunukungaw pokiten sise tongeni kuna ewe kinamwe me pwapwa ra awitiwiti kich ika pwe sipwe chok nikitu ne feino.

Nge saram, a mut ngeni kich ach sipwe kuna mettoch non ennetir. A mut ngeni kich ach sipwe esinna nefinen ennet me mwan, nefinen ewe mi auchea me ewe ese kon auchea. Nupwen sia nom non ewe saram, sia tongeni finata met mi pung anongonong won ekkewe nongonong mi ennet. Nupwen sia nom non ewe saram, a wor ach “unusochun saramen apinukunuk”2 pokiten sia tongeni kuna ach sossot seni ach weweiti usun met esemuch.

Sipwe kuna chikaren ngun nupwen sia suseni ekkewe nurun fonufan me tonong non ewe Saramen Kraist feinfeino.

Naponon ach weweiti me aea ewe nongonongen ekiekin saram, epwe napeno ach tongeni masa ewe semwenin ngun minne a aosukosuka kich seni sokopaten mettoch; epwe murino ach winiti chon amwochu ewe pristut mi pin non pochokun, pwaracho, tong, me tipetekison—ennetin chon angang me chon kunon ach we King mi tong me esemuch.

Ewe Saramen Fonufan

Jises Kraist a apasa, “ Ngang ewe saramen ewe fonufan: Ion epwe tapweto muri epwe kuna ewe saramen manau, iwe esap tongeni fetan non kiroch.”3

Met wewen ei?

Iei chok: I ewe a tapweno mwirin Jises Kraist non tekison epwe mefi me aea An Saram. Me ena saram epwe marino tori an epwe amorano watten rochopwak.

Wewen pwe mi wor manaman, ew pochokunen mwokutukut, a feito seni ewe Chon Amanau. A feito “seni fan mesen Kot an epwe aurano ewe watten nefin.”4 Pokiten ei manaman a emiriti, seikata, me asarama manauach, ekkewe pukefel ra eita ngeni saram, nge a pwan iteni ngun me ennet.

Non ewe Doctrine and Covenants sia anneani pwe, “Ewe kapasen ewe Samon mi ennet, me met mi ennet mi saram, me met mi saram ewe Ngun, pwan mwo ewe Ngunun Jises Kraist.”5

Ei watten mirit—pwe saram mi ngun, me ena ngun mi ennet, me ei saram a sarameno won meinisin aramas ra feito ngeni ewe fonufan—mi auchea usun mi epinukunuk. Ewe Saramen Kraist a asarama me ourano ngunun meinisin ekkewe ra ausening ngeni mongungun ewe Ngun.6

Ewe Saramen Kraist a ourano unusen fonufan.

A ourano ewe fonufan.

Me a tongeni ourano netip meinisin.

“Kot a chok anonno fengeni aramas meinisin.”7 An saram mi fich ngeni meinisin—tekia ika kisikis, pisekisek ika woungaw, tufich ika rese tufich.

Ika oupwe suki ami ekiek me netipemi ne angei ewe Saramen Kraist me tapweno mwirin ewe Chon Amanau non tipetekison, oupwe angei watten saram. Efou me efou mesen mak, ew me ew tettenin kapas, oupwe ionfengeni watten saram me ennet non ngunumi tori rochopwak epwe unusen moreno seni manauemi. 8

Kot epwe suki mesemi.

Kot epwe ngeni kemi ew netip mi fo.

An Kot tong, saram, me ennet epwe efisi mettoch ese manau ngeni ar repwe manau, iwe oupwe upusefan ngeni ew manau minafo non Jises Kraits.9

Ewe Samon a pwonei, “Pwe ika mesach epwe wenengeni An ning, unusen inisich epwe ureno ren saram, iwe esap wor rochopwak non kich; me ew inis minne mi ureno ren saram epwe weweiti mettoch meinisin.”10

Iei ewe safeian semwenin ngun mi nap. Rochopwak a moreno me ne mesen saram.

Ew Esisinen Rochopwaken Ngun

Nge inamo, Kot esap echimwa kich ach sipwe etiwa An saram.

Ika sia kinamwe ren rochopwak, iwe eni esap fich an netipach epwe siwin.

Ren an siwin epwe fis, mi auchea sipwe wesen mutanong ewe saram.

Fansoun ai kewe sai fetan won ei fonufan atun ai we emon kaptin, uwa kan soun ingeno ren ningen me unusochun ren ekkewe mettoch Kot a fori. Uwa kuna pwe uwa kon ingeno ren nefinen ewe fonufan me ewe akkar. Uwa ekieki pwe ew anonnonun esisinen nesen ifa usun rochopwak me saram ra fis.

Usun kich meinisin mi sinei, iteiten non 24 nepwin a winiti ran me ran a winiti pwin.

Iwe, mwirin, met pwin?

Pwin esap och mettoch nge a chok ew chumon.

Pwan mwo non ewe rochopwaken pwin, ewe akkar ese kouno ne asarama saraman. A sopweno ne saram usun mi soun tinemwong. Nge esop ewe fonufan mi nom non rochopwak.

An ese wor saram a efisi rochopwak.

Nupwen a rochono ewe pwin , sise tipemwaramar me aureki pwe ewe akkar a kouno. Sise ekieki pwe ewe akkar ese chiwen nom ika ese tano. Sia weweiti pwe sia nom non chumwon, pwe ewe fonufan epwe soposopono ne kun, iwe saramen ewe akkar epwe pwan torikich sefan.

Rochopwak esap ew esisinen pwe ese wor saram. Napengeni, a chok wewen pwe sise nom non ewe neni mi och om kopwe angei ewe saram. Non ewe chok fansoun an ewe maram eppeti ewe akkar, chommong ra achocho ne tonong non ewe aukukunun chimwon a fis me ren ewe maram nukapapen ew ran mi tin akkar.

Non ena chok napanap, saramen ngun a soposopono ne saram won forien Kot meinisin. Setan epwe achocho ne fori ew chumwon ika uweikichenong non ew chimwon sia fori. Epwe echimwa kich ne fori pwisin ach sisap kuna saram; i epwe pusei kichenong non ewe rochopwaken tipis.

Rochopwaken ngun a tongeni fori ach sipwe monnuki ewe saram pwan mwo ekkewe ra fen fetan non ewe saram me pwapwa non ewe Samon. Nge inamo, non fansoun rochopwak, Kot mi rongorong ach tingor nupwen sia iotek, “Samon, Ua nuku; anisi ai use nuku.”11

Non ekkewe ranin Alma mi chommong ekkewe ra weires ar repwe etiwa mettochun ngun, me “pokiten ar rese nuku rese,” An Kot saram me ennet rese tongeni tonong non ngunur “iwe netiper a pochokununo.”12

Kich Chon Uwei ewe Saram

Pwii kana, a pwisin nonnom rech ach sipwe nom non ewe neni mi pung ne kuna saram seni nang me ennetin ewe kapas allimen Jises Kraist. Nupwen a tori fansoun pwin me ewe fonufan a rochono, sia tongeni finata ne fetan non saramen Kraist, aneasochisi an kewe annuk, me pwaracho ne pwarata usun Ennetin me An nap.

Non wisach ne uwei ewe pristut an Kot me chon kunon Jises Kraist, en emon chon uwei ewe saram. Sopweno ne fori ekkewe mettoch epwe anisi An saram seni nang. “Chunata ami saram”13 “epwe fakkun sarameno mwen mesen aramas” — esap ren ar repwe kuna me ingeituk, nge “repwe kuna ami kewe foffor me murino o repwe mwareiti Sememi we non nang .”14

Pwii achengicheng, ami pisekin angang me ne poun ewe Samon ren ami oupwe uwei saram me echikar ngeni ngunun noun Semach won Nang kewe. Eni ousap mefi pwe ami mi fich ngeni ami oupwe echikara ekkewe ir mi semwen ren pekin ngun—ennetin esap nap seni an emon chon angangen posto mi fich ngeni an epwe anisi metekin chu. Eni oupwe weri pusin osukosuken ngun. Nge inamo, ewe Samon a kokkorikemi. A ngeni kemi mumuta me wis ne anisi ekkewe mi osupwang. A efeiochu kemi ren An manamanen pristut mi pin ne uwei saram ngeni non rochopwak me seikata me efeiochu noun Kot. Kot a aniwinsefanieto An Mwichefen me An kapas allim mi auchea, “minne a echikara ewe ngun mi feiengaw.”15 A fen amonata ewe aanen pochokunen ngun: ne kutta echikar seni ach sise fefeita me nikitu ngeni pochokunen ngun.

Fansoun meinisin ka akunu netipom ngeni Kot non om tipetekisonun iotek, kopwe mefi An saram. Iteitan kopwe kutta An kapas me mochen non ekkewe pukefel, ewe saram epwe fokkun saramaram. Iteitan kopwe kuna emon mi osupwang nge ka anisi ren unusen om tong, ewe saram epwe fokkun watteno me amarar. Iteitan om nikitano ekkewe sosot me fori mi pung, iteitan kopwe kutta are omusano ekkoch, iteitan om pochokun ne pwarata ennet, saram epwe amorano rochopwak me asarama ekkewe ra kukutta ewe saram me ennet.

Ekieki pwisin met ouwa weri, fansoun angang ngeni Kot me aramas nupwen saram seni nang a sarameno non manauemi���non ewe tempel mi pin, nupwen einetin ewe sacrament, non ew fansoun fanafaneno ne iotek, non ami chufengenin famini, ika fansoun fofforun angangen pristut. Aporousa ekkei fansoun ngeni ami famini, chiechiemi, me akkaewin ngeni nouch serafo, ekkewe ra kutta saram. Mi auchea repwe rong seni kemi pwe ren ei saram a awora apinukunuk me chikar, pwan mwo non ew fonufan mi uren rochopwak.

An Kraist saram a wato apinukunuk, pwapwa, me chikaren feiengawen ngun ika semwen.16 Ekkewe ra fen mefi ei mwokutukutun enimenim ra winiti pisekin aninis me ne poun ewe Saramen ewe Fonufan me ra tongeni awora saram ngeni ekkoch.17 Repwe mefi met King Lamoni a mefi: “Ei saram a awora sokkun pwapwa non ngunun, ewe kuchun rochopwak a katuruno, iwe … ewe saramen manau esemuch a sarameno non ngunun.”18

Pwii achengicheng, chiechiei achengicheng, ina ach sai ne kutta ewe Samon tori An saramen manau esemuch epwe tinemwong non kich me ach kapasen pwarata repwe fokkun ennet me pochokun pwan mwo non rochopwak.

Iei ai iotek me efeioch pwe oupwe fetanoch non ami apwonueta nonnomun wisemi non pristut noun ewe Kot mi Napanap me chon pwapwa fansoun meinisin ne uwei An saramen nang . Non iten Jises Kraist mi pin, ach Masta, amen.