Cov uas Hwj Vajtswv txoj Kev Kaj
Vim nej yog cov uas tuav Vajtswv lub pov thawj hwj thiab yog Yexus Khetos cov thwj tim, nej yog cov uas tuav txoj kev kaj.
Ib tug txiv neej laus tos hauv lub tsev xa ntawv yuav tej daim nqi xa ntawv ntawm qhov chaw pab neeg. Ib tug ntxhais hluas pom hais tias nyuaj rau nws taug kev thiab xav qhia nws paub siv tej daim nqi xa ntawv los ntawm ib lub tshuab kom tsis tas tos ntev. Tus txiv neej laus hais tias, “Ua tsaug, tiam sis kuv xav tos xwb. Lub tshuab ntawd yeej tsis nug kuv txog kuv txoj kev mob qij txha.”
Tej lub sij hawm kev sib tham nrog ib tug uas xav mloog txog peb tej teeb meem yeej pab peb.
Kev nyuaj siab thiab kev mob kev nkees yog tej yam uas peb txhua tus raug—tej lub sij hawm thaum raug teeb meem, kev tu siab, thiab kev txom nyem yog tej yam uas peb sab ntsuj plig nco ntsoov tas li.
Thaum hais txog peb sab cev nqaij daim tawv, peb lees hais tias nyob hauv lub ntiaj teb peb yuav laus zuj zus thiab raug kev mob. Peb xav tau cov lus ntuas los ntawm cov kws paub txuj ci txog lub cev nqaij daim tawv. Thaum peb raug kev ntxhov siab los yog kev mob hlwb, peb nrhiav cov kws paub txuj ci uas kho tau tej kev mob zoo li no.
Ib yam li peb lub cev nqaij daim tawv thiab lub siab raug tej kev sim siab hauv lub neej no, peb kuj muaj teeb meem ntawm sab ntsuj plig. Peb feem coob twb muaj tej lub sij hawm nyob hauv peb lub neej thaum peb zaj lus tim khawv muaj zog heev. Tiam sis peb kuj muaj tej lub sij hawm thaum peb xav tias Leej Txiv Saum Ntuj Ceeb Tsheej nyob deb heev. Tej lub sij hawm thaum peb muab siab npuab rau tej yam ntawm tus Ntsuj Plig kawg siab kawg ntsws. Tej lub sij hawm peb xav tias tej ntawd tsis tshua muaj nuj nqis los yog tsis tshua tseem ceeb rau peb.
Hnub no kuv xav hais txog kev nyob zoo ntawm sab ntsuj plig—peb yuav ua li cas kom txais kev kho mob thiab taug kev kom noj qab nyob zoo ntawm sab ntsuj plig.
Kev Mob ntawm Sab Ntsuj Plig
Tej lub sij hawm peb mob ntawm sab ntsuj plig vim peb ua txhaum los yog peb raug kev nyuaj siab heev. Tej lub sij hawm peb sab ntsuj plig mob zuj zus peb thiaj li tsis tshua paub tias peb mob. Tej lub sij hawm kev mob thiab kev nyuaj siab ntawm sab ntsuj plig hnyav zuj zus, ua hnyav rau peb sab ntsuj plig mus txog thaum peb ris tsis taus. Yuav muaj li no thaum peb tej kev lav ris ntawm hauj lwm, hauv tsev, thiab lub koom txoos ua rau peb ntxhov siab peb thiaj tsis nco txog kev xyiv fab ntawm txoj moo zoo. Tej zaum ua rau peb xav tias peb tsis muaj dab tsi ntxiv uas peb pub tau los yog peb tsis muaj zog ua raws li cov lus txib ntxiv.
Tiam sis txawm yog muaj tej kev sim siab no tiag tiag tsis txhais hais tias peb kho tsis tau tej ntawd.
Peb txais tau kev kho mob ntawm sab ntsuj plig.
Txawm yog kev mob sab heev—muaj tseeb tiag, txawm yog kev mob uas xav tias kho tsis tau los—yeej kho tau tej ntawd.
Kuv cov phooj ywg zoo, Yexus Khetos lub hwj chim kho mob los yeej muaj niaj hnub nim no.
Tus Cawm Seej txoj kev kho mob yeej hloov tau peb lub neej ib yam li Nws tau ua thaum Nws ua neej nyob. Yog peb yuav muaj kev ntseeg xwb, Nws yuav tuav peb tes, ua rau peb sab ntsuj plig muaj txoj kev kaj thiab kev kho mob puv npo, thiab hais tej lus zoo kawg no hais tias, “Koj cia li sawv thiab nqa koj daim pam mus tsev.”1
Kev Tsaus Ntuj thiab txoj Kev Kaj
Txhua yam uas ua rau peb mob ntawm sab ntsuj plig, muaj ib yam uas zoo sib xws: qhov uas tsis muaj Vajtswv txoj kev kaj.
Kev tsaus ntuj ua rau peb tsis txawj pom meej. Tej yam uas peb twb pom meej ua ntej los peb pom tsis tshua zoo lawm. Thaum peb nyob hauv kev tsaus ntuj, peb haj yam xaiv tej yam tsis zoo vim peb tsis pom tej xwm txheej nyob ntawm txoj kev. Thaum peb nyob hauv kev tsaus ntuj nti, peb haj yam poob kev cia siab vim peb tsis pom kev kaj siab lug thiab kev xyiv fab uas peb txais tau yog peb thawb mus lawm tom hauv ntej xwb.
Tiam sis txoj kev kaj ua rau peb pom tej yam tiag tiag. Ua rau peb pom tias qhov tseeb thiab qhov txhaum txawv li cas, tej yam tseem ceeb thiab tej tsis tseem ceeb txawv li cas. Thaum peb nyob hauv txoj kev kaj, peb xaiv tau tej yam ncaj ncees raws li ntsiab cai tseeb. Thaum peb nyob hauv txoj kev kaj, ua rau peb “muaj ib txoj kev cia siab uas ci kawg nkaus”2 vim peb pom peb tej kev sim siab hauv lub ntiaj teb no nrog lub zeem muag uas nyob mus ib txhis.
Peb yuav nrhiav kev kho mob ntawm sab ntsuj plig yog tias peb khiav ntawm cov duab ntxoo ntawm lub ntiaj teb thiab nkag mus rau hauv Khetos txoj Kev Kaj uas kav ib txhis.
Peb yim to taub thiab ua raws li cov lus qhuab qhia txog qhov kaj, peb yim yuav txawj pov hwm kom txhob raug kev mob ntawm sab ntsuj plig uas meem txom peb nyob txhua qhov txhia chaw, peb yim ua tau hauj lwm ua cov uas tuav lub pov thawj hwj dawb huv uas siv zog, siab loj, muaj kev hlub thiab txo hwj chim—cov tub qhe tseeb thiab cov thwj tim ntawm peb tus Vaj Ntxwv uas nyob mus ib txhis.
Txoj Kev Kaj ntawm lub Ntiaj Teb
Yexus Khetos hais tias, “Kuv yog qhov kaj rau neeg ntiaj teb. Tus uas raws kuv qab yuav tsis taug txoj kev uas tsaus ntuj nti, tiam sis nws yuav tau lub neej tshav ntuj nrig.”3
Qhov no txhais li cas?
Qhov no txhais li no tias: Tus uas txo hwj chim coj raws li Yexus Khetos yuav paub thiab muaj Nws txoj kev kaj. Thiab txoj kev kaj yuav loj zuj zus mus txog thaum txoj kev kaj ntawd ua rau kev tsaus ntuj nti ploj mus huv tib si.
Qhov no txhais hais tias muaj ib lub hwj chim, ib lub hwj huam loj heev, uas los ntawm tus Cawm Seej los. Lub hwj chim no “ci ntawm Vajtswv xub ntiag tuaj mus puv nkaus lub qab ntuj dav dav.”4 Vim lub hwj chim no ua rau peb to taub, txhawb nqa peb, thiab ua rau peb pom kev, cov vaj lug kub hu lub hwj chim ua qhov kaj, tiam sis kuj hu ua ntsuj plig thiab qhov tseeb.
Nyob hauv phau Lus Qhuab Qhia thiab Kev Khi Lus peb nyeem hais tias, “Tus Tswv txoj lus yog qhov tseeb, thiab txhua yam uas yog qhov tseeb yog qhov kaj, thiab txhua yam uas yog qhov kaj yog Ntsuj Plig, uas twb yog Yexus Khetos tus Ntsuj Plig.”5
Lub tswv yim tseem ceeb no—hais tias qhov kaj yog ntsuj plig, uas yog qhov tseeb, thiab qhov uas qhov kaj ci rau txhua tus neeg uas los rau hauv lub ntiaj teb no—yeej tseem ceeb thiab muaj kev cia siab. Khetos txoj Kev Kaj ci ntsa iab thiab puv txhua tus uas mloog tus Ntsuj Plig lub suab.6
Khetos txoj Kev Kaj puv lub ntuj thoob plaws.
Txoj kev kaj no puv lub ntiaj teb.
Thiab puv tau txhua lub siab.
“Vajtswv tsis xaiv leej twg ntsej muag.”7 Txhua tus txais tau Nws txoj kev kaj—tsis hais cov loj cov me, cov muaj los yog cov pluag, cov muaj npe, los yog cov uas tsis muaj.
Yog tias nej qhib nej lub siab lub ntsws kom txais Khetos txoj kev Kaj thiab txo hwj chim coj raws li tus Cawm Seej, nej yuav txais qhov kaj ntxiv. Ib nqe lus ntxiv rau ib nqe lus, muab me ntsis nim no thiab muab me ntsis lwm hnub, nej yuav txais qhov kaj thiab qhov tseeb ntxiv rau hauv nej sab ntsuj plig mus txog thaum kev tsaus ntuj nti twb ploj lawm hauv nej lub neej.8
Vajtswv yuav qhib nej qhov muag.
Vajtswv yuav muab ib lub siab tshiab rau nej.
Vajtswv txoj kev hlub, txoj kev kaj, thiab qhov tseeb yuav ua rau tej yam ntsiag to tsim los muaj txoj sia, thiab nej yuav yug los dua tshiab ua neej los ntawm Yexus Khetos.9
Tus Tswv tau cog lus tias, “Yog nej lub qhov muag tsuas ntsia ntsoov rau kuv lub yeeb koob xwb, tag nrho nej lub cev yuav kaj nrig, thiab yuav tsis muaj qhov tsaus ntuj nyob hauv nej; thiab lub cev uas kaj nrig ntawd thoob tsib to nrog txhua yam.”10
Nov yog qhov uas kho tau txhua qhov mob ntawm sab ntsuj plig. Kev tsaus ntuj yeej ploj mus thaum muaj txoj kev kaj.
Ua Piv Txwv txog Kev Tsaus Ntuj ntawm Sab Ntsuj Plig
Tiam sis, Vajtswv yuav tsis yuam peb kom txais yuav Nws txoj kev kaj.
Yog tias peb los txaus siab nyob hauv kev tsaus ntuj nti, ces ntshe peb lub siab yuav tsis hloov hlo li.
Yog peb xav kom peb tus kheej hloov, peb yuav tsum cia txoj kev kaj nkag los rau hauv peb.
Thaum kuv yog ib tug kws tsav nyab hoom uas ya mus thoob lub ntiaj teb no, ua rau kuv xav tsis thoob txog qhov uas tej uas Vajtswv tsim zoo nkauj ua luaj thiab zoo tag nrho. Qhov uas kuv nyiam zoo tshaj yog qhov uas lub ntiaj teb thiab lub hnub zoo li cas. Kuv xav tias yog ib zaj tseem ceeb uas qhia tias kev tsaus ntuj thiab txoj kev kaj ua li cas.
Peb txhua tus paub hais tias, txhua 24 teev nruab hnub hloov los ua hmo ntuj thiab hmo ntuj hloov los ua nruab hnub.
Yog li ntawd, hmo ntuj yog dab tsi?
Hmo ntuj yeej yog duab ntxoov ntxoo xwb.
Txawm yog tsaus ntuj nti los, lub hnub tsis tsum kom txhob ci ntsa iab. Lub hnub yeej ci ntsa iab zoo li qub. Tiam sis ib nrab ntawm lub ntiaj teb nyob hauv kev tsaus ntuj.
Qhov uas tsis muaj txoj kev kaj ua kom muaj kev tsaus ntuj.
Thaum txog hmo ntuj lawm, peb tsis poob siab thiab txhawj hais tias lub hnub tuag lawm. Peb tsis xav hais tias lub hnub tsis nyob lawm. Peb to taub hais tias peb nyob hauv duab ntxoov ntxoo, thiab lub ntiaj teb tseem yuav tig los, thiab tsis ntev kev tshav ntuj yuav rov los cuag peb dua.
Kev tsaus ntuj tsis qhia hais tias tsis muaj txoj kev kaj. Feem ntau, kev tsaus ntuj txhais hais tias peb tsis nyob hauv qhov chaw yog kom txais tau txoj kev kaj xwb. Tsis ntev tas los thaum lub hli ntis lub hnub, neeg coob xav nyob hauv tus duab ntxoov ntxoo uas lub hlis tau tsim, nyob thaum nruab hnub uas ci ntsa iab.
Zoo ib yam li ntawd, qhov kaj ntawm sab ntsuj plig yeej ci rau txhua tus uas Vajtswv tau tsim. Dab Ntxwg Nyoog yuav siv zog kom tsim duab ntxoov ntxoo los yog ua rau peb nyob hauv duab ntxoov ntxoo uas peb tau tsim rau peb tus kheej. Nws yuav ntxias peb kom peb ntis kev tshav ntuj; nws yuav thawb mus rau hauv qhov tsua uas tsaus nti.
Kev tsaus ntuj ntawm sab ntsuj plig yuav ua rau cov uas twb taug kev hauv qhov kaj thiab zoo siab rau tus Tswv tsis nco qab txog tej ntawd. Txawm yog li ntawd los, thaum twg tsaus ntuj nti tag nrho, Vajtswv hnov thaum peb txo hwj chim thov Nws hais tias, “Tus Tswv, kuv ntseeg tiam sis tsis txaus, thov koj pab kom kuv muaj kev ntseeg ntxiv.”11
Nyob hauv Amas lub caij nyoog muaj ntau tus uas nyuaj rau lawv txais yuav tej yam ntawm sab ntsuj plig thiab “vim lawv tsis ntseeg,” Vajtswv txoj kev kaj thiab qhov tseeb nkag tsis tau hauv lawv sab ntsuj plig “thiab lawv lub siab tawv qhawv.”12
Peb Yog cov uas Hwj txoj Kev Kaj
Cov kwv tij, yeej nyob ntawm peb kom nyob hauv qhov chaw yog peb thiaj pom tau qhov kaj thiab qhov tseeb ntawm Yexus Khetos txoj moo zoo. Txawm yog thaum hmo ntuj lawm thiab lub ntiaj teb tsaus ntuj nti, peb xaiv tau kom taug kev nyob hauv Khetos txoj kev kaj, ua raws li Nws cov lus txib, thiab ua siab loj ua tim khawv txog Nws txoj kev zoo kawg nkaus.
Vim nej yog cov uas tuav Vajtswv lub pov thawj hwj thiab yog Yexus Khetos cov thwj tim, nej yog cov uas tuav txoj kev kaj. Yeej meem ua tej yam uas yuav pab nej muaj Nws txoj kev kaj. “Tsa nej lub teeb”13 thiab “ci rau sawv daws pom”—tsis yog kom lawv yuav pom thiab qhuas nej, tiam sis “[lawv yuav] pom tej hauj lwm zoo uas nej ua, lawv thiaj yuav qhuas nej Leej Txiv tus uas nyob saum ntuj ceeb tsheej.”14
Kuv cov kwv tij, nej yog cov cuab yeej hauv tus Tswv txhais tes uas muaj lub hom phiaj kom coj txoj kev kaj thiab kev kho mob rau Leej Txiv Saum Ntuj Ceeb Tsheej cov me nyuam tej ntsuj plig. Tej zaum nej xav tias nej tsis tsim nyog kho cov uas mob ntawm sab ntsuj plig—tej zaum zoo ib yam li ib tug uas ua hauj lwm hauv lub tsev xav ntawv tsis tsim nyog pab ib tug uas mob qij txha. Tej zaum nej muaj teeb meem ntawm sab ntsuj plig nej tus kheej thiab. Tiam sis, tus Tswv tau hu nej. Nws tau muab txoj cai thiab kev lav ris rau nej kom ncav tes pab cov uas xav tau kev pab. Nws tau muab Nws lub hwj chim pov thawj hwj dawb ceev rau nej kom coj txoj kev kaj mus rau hauv kev tsaus ntuj nti thiab txhawb nqa thiab foom koob hmoov rau Vajtswv cov me nyuam. Vajtswv twb muab Nws lub Koom Txoos thiab Nws txoj moo zoo txum tim rov qab los,“uas kho tau tej ntsuj plig uas raug mob kom zoo.”15 Nws tau npaj ib txoj kev kom peb sab ntsuj plig yuav rov zoo, kom peb tsis txhob raug mob thiab kom peb sab ntsuj plig noj qab nyob zoo.
Txhua zaus uas yuav muab siab npuab Vajtswv thaum nej txo hwj chim thov Nws, nej txais tau Nws txoj kev kaj. Txhua zaus uas nej nrhiav Nws tej lus thiab Nws lub siab nyiam nyob hauv vaj lug kub, ua rau txoj kev kaj ci zuj zus tuaj. Txhua zaus uas nej pom ib tug uas xav tau kev pab thiab nej tsis xav txog nej tus kheej thiab nej hlub tus ntawd, txoj kev kaj ntawd loj tuaj ntxiv. Txhua zaus uas nej xyeej kev ntxias thiab xaiv coj dawb huv, txhua zaus uas nej nrhiav kev zam txim los yog zam txim pub rau lwm tus, txhua zaus uas nej ua siab loj ua tim khawv txog qhov tseeb, txoj kev kaj ua rau kev tsaus ntuj nti ploj mus thiab ua rau lwm tus uas nrhiav txoj kev kaj thiab qhov tseeb tuaj thiab.
Cia li xav txog nej lub neej, tej lub sij hawm thaum nej ua hauj lwm rau Vajtswv thiab pab nej cov neeg zej zog es Vajtswv txoj kev kaj twb ci ntsa iab hauv nej lub neej—nyob hauv lub tuam tsev, nyob ntawm lub rooj rau lub cim nco txog, thaum ntsiag to thov Vajtswv, thaum nej koom nrog nej tsev neeg, los yog siv nej lub pov thawj hwj pab lwm tus. Cia li qhia txog tej lub sij hawm no rau nej tsev neeg, phooj ywg, thiab qhov tseem ceeb rau peb cov cov tub hluas ntxhais hluas, uas nrhiav qhov kaj. Lawv xav hnov nej hais tias nrog txoj kev kaj no muaj kev cia siab thiab kev kho mob, txawm yog lub ntiaj teb no muaj kev tsaus ntuj nti puv nkaus.
Khetos txoj kev kaj ua rau yus muaj kev cia siab, kev zoo siab, thiab kho tau txhua txoj kev kho mob ntawm sab ntsuj plig.16 Lawv cov uas muaj lub hwj huam no hloov los ua cov cuab yeej hauv txoj Kev Kaj ntawm lub Ntiaj Teb txhais tes thiab pub lawv txoj kev kaj rau lwm tus.17 Lawv yuav hnov zoo li tus Vaj Ntxwv Lamaunais: “Qhov kaj no tau txhab kev xyiv fab heev rau hauv nws tus ntsuj plig, tom qab Vajtswv tau tshem cov huab ntawm kev tsaus ntuj, thiab tau muab qhov kaj ntawm txoj sia uas kav ib txhis zes rau nws tus ntsuj plig.”18
Kuv cov kwv tij, kuv cov phooj ywg zoo, yog peb lub luag hauj lwm kom nrhiav tus Tswv mus txog Nws txoj kev kaj ntawm txoj sia uas kav ib txhis ua rau peb lub siab kub lug thiab peb zaj lus tim khawv muaj zog txaus kom sawv hauv kev tsaus ntuj nti.
Kuv thov Vajtswv thiab foom koob hmoov rau nej kom nej yuav ua raws li nej lub luag hauj lwm vim nej yog cov uas tuav Vajtswv uas Muaj Hwj Chim Tag Nrho lub pov thawj hwj thiab ua neeg uas hwj Nws txoj kev kaj txhua lub sij hawm. Los ntawm Yexus Khetos, peb tus Xib Hwb, lub npe dawb ceev, amees.