Eb’ laj k’amol re li choxahil saqen

Wan naq li yajel sa’ musiq’ej nachal xb’aan li maak malaj li musiq’ejil xk’ob’olal li qach’ool. Wan naq li lajk sa’ musiq’ej nachal chi timil timil, jo’kan naq ink’a’ naqak’e reetal k’a’ru yoo chi uxmank. Jo’ lix tasalil li ch’och’ ut pek rub’el ch’och’, li musiq’ejil rahilal ut xrahil ch’oolej naru te’tub’laaq rik’in xnumik li hoonal, raalob’resinkileb’ li qamusiq’ toj reetal naq jwal ch’a’aj riiqankil. Qayehaq, a’in naru nak’ulman naq li qateneb’ahom sa’ trab’aaj, sa’ ochoch, ut sa’ iglees neke’k’ihan chi numtajenaq, jo’kan naq ink’a’ chik naqil li sahil ch’oolejil re li evangelio. Maare noko’ok chireek’ankil naq maak’a’ chik naru taqak’e malaj naq jwal wi’chik ch’a’aj chiqu chixpaab’ankileb’ lix chaq’rab’ li Dios.

A’b’anan, yal xb’aan naq wankeb’ li ch’a’ajkilal sa’ musiq’ej, ink’a’ naraj naxye naq moko te’ruuq ta chi k’irtesiik.

Laa’o naru took’iraaq sa’ musiq’ej.

Us ta li musiq’ejil k’ob’olal q’axal raheb’—hehe’, a’aneb’ ajwi’ li chanchan naq ink’a’ neke’ru chi k’irtesiik—a’aneb’ te’ruuq chi k’irtesiiq.

Ex inraarookil amiiw, li wankilal chi k’irtesink re li Jesukristo toj wan sa’ li qakutan.

Li uq’ej aj k’irtesinel re li Kolonel naru tixjal li qayu’am sa’ li qakutankil jo’ chanru kixb’aanu sa’ xkutankil a’an. Wi yal ta taawanq qapaab’aal, a’an naru tixchap li quq’, tixnujob’resi li qaam rik’in choxahil saqen ut k’irtesink, ut tixye qe li osob’tesinb’il aatin, “Waklin, xok laa ch’ina ch’aat ut b’een.”¹

Yalaq k’a’ru naxk’e chi uxmank li qach’a’ajkilal sa’ musiq’ej, chixjunileb’ juntaq’eet sa’ a’in: lix maak’a’il li choxahil saqen.

Li aak’ab’ naxch’ina li qawankil chi ilok chi saqen ru. Naxmutz’ob’resi li qilob’aal chirix li k’a’ru saqen ru junxil. Naq wanko sa’ li aak’ab’, wanko raj chik chixsik’b’al li ink’a’ us, xb’aan naq ink’a’ naru taqil li xiwxiw sa’ li qab’e. Naq wanko sa’ li aak’ab’, q’axal wi’chik nasach qayo’onihom, xb’aan naq ink’a’ naru naqil li tuqtuukilal ut sahil ch’oolejil li nokohe’royb’eni wi yal ta taqatiikisi qib’ chi uub’ej.

A’b’anan, li saqen naxk’e qawankil chirilb’al li k’a’aq re ru jo’ chanru tz’aqal wankeb’. Naxk’e qawankil chixtz’ilb’al rix li yaal ut li majelal malaj li k’a’ru aajel ru ut li maak’a’ x’aajelil ru. Naq wanko sa’ li saqen, naru taqasik’ li k’a’ru tiik kab’lanb’il sa’ xb’een li yaalil na’leb’. Naq wanko sa’ li saqen, wan “tz’aqal xlemtz’unkil li yo’onink,”² xb’aan naq naru naqil li qaruchich’och’il ch’a’ajkilal rik’in xk’oxlankil li junelik q’e kutan.

Taqataw li k’iraak sa’ musiq’ej naq naqanajtob’resi qib’ rik’in lix muhel li ruchich’och’ ut noko’ok sa’ lix junelikil Saqen li Kristo.

Naq naniman li qanawom chirix li tzol’leb’ chirix li saqen ut naqoksi, naniman ajwi’ qawankil chixtz’eqtaanankileb’ li yajel sa’ musiq’ej li nokohe’xrahob’tesi malaj nokohe’xch’i’ch’i’i chi qaka’pak’al, ut naniman ajwi’ qaseeb’al chi k’anjelak rik’in metz’ew, xkawilal qach’ool, ut tuulanil jo’ aj k’amol re li loq’laj tijonelil—jo’ tz’aqal moos ut tzolom chiru li qaraarookil ut junelikil Rey.

Li Jesukristo kixye, “Laa’in lix saqenk li ruchich’och’. Li taataaqenq we, ink’a’ taab’eeq sa’ li aak’ab’, wanq b’an xsaqenk li yu’am rik’in.”³

K’a’ru naraj naxye a’in?

Yal a’in: Li ani natenq’an re li Jesukristo chi tuulan xch’ool tixk’ul ut toxto’ni lix saqen. Ut li saqen a’an taanimanq toj reetal naq naxsach xwankil li aak’ab’, us ta q’axal aak’ab’ ru.

Naraj naxye naq wan jun wankilal, jun kawil metz’ew, li nachal chalen chaq li Kolonel. “Na’el chaq chiru li Dios re xnujob’resinkil xnimal ru li heelam.”⁴ Rik’in naq li wankilal a’in naxkutanob’resi, naxtaqsi, ut naxk’e xsaqen li qayu’am, saqen nayehe’ re sa’eb’ li loq’laj hu, a’ut musiq’ej ut yaal yeeb’il ajwi’ re.

Sa’ li Tzol’leb’ ut Sumwank naqil, “Li raatin li Qaawa’ a’an li yaal, ut yalaq k’a’ru yaal, a’an saqen, ut yalaq k’a’ru saqen, a’an Musiq’ej, a’ lix Musiq’ li Jesukristo.”⁵

Li chamal ru na’leb’ a’in—naq li saqen a’an musiq’ej ut a’an yaal ut naq li saqen a’an naxkutanob’resi chixjunileb’ li aamej li neke’chal sa’ ruchich’och’—aajel ru jo’ ajwi’ naxk’e yo’onihom. Lix Saqen li Kristo naxkutanob’resi ut naxnujob’resi li raam chixjunileb’ li neke’ab’in re lix yaab’ xkux li Musiq’ej.⁶

Lix Saqen li Kristo naxnujob’resi li heelam.

Naxnujob’resi li ruchich’och’.

Ut naru tixnujob’resi li junjunq chi aamej.

Li Dios maawa’ aj tihoneleb’ ru li winq.⁷ Lix saqen wan choq’ re chixjunileb’—li ninq jo’eb’ li kok’, eb’ li b’ihom jo’eb’ li neb’a’, li osob’tesinb’ileb’ jo’ li ch’a’ajkilanb’ileb’.

Wi taate aak’a’uxl ut aach’ool re xk’ulb’al lix Saqen li Kristo ut taataaqe chi tuulan aach’ool li Kolonel, taak’ul xkomon chik li saqen. Chi junjunqil li raqal, b’ab’ay arin ut b’ab’ay aran, taach’utub’ xkomon chik li saqen ut yaal sa’ laa waam, toj reetal naq isinb’ilaq chik li aak’ab’ sa’ laa yu’am.⁸

Li Dios tixte xnaq’ aawu.

Li Dios tixk’e aawe jun ak’ ch’oolej.

Lix rahom, lix saqen, ut lix yaal li Dios tixk’e chi atz’umank li moko wan ta chik chi k’anjelak sa’ laa yu’am, ut tatyo’laaq wi’chik sa’ ak’ yu’am rik’in li Kristo Jesus.⁹

Li Qaawa’ kixyeechi’i, “Ut wi junaj ru lix sa’ eeru sa’ inloq’al, chixjunil lee xaqalil nujenaqaq chi saqen, ut maak’a’aq q’ojyin eerik’in; ut li jun xaqalil li nujenaq chi saqen naxtaw xyaalal chixjunil li k’a’aq re ru.”¹⁰

A’an a’in li b’an q’axal chaab’il choq’ re li yajel sa’ musiq’ej. Na’oso’ li aak’ab’ naq wan li saqen.

A’b’anan, li Dios ink’a’ tixmin qu chixk’ulb’al lix saqen.

Wi nokok’ay rik’in li aak’ab’, ch’a’aj wi’chik naq taajalmanq li qach’ool.

Re naq taa’uxmanq jun jalok, tento naq taqakanab’ chi ok li saqen.

Naq yookin chaq chixch’e’b’al li so’sol ch’iich’ chiru li ruchich’och’, rajlal sachso kinkana xb’aan lix chaq’alil ru ut lix tz’aqalil re ru lix yo’ob’tesihom li Dios. Jwal kiwulak chiwu chanru neke’k’anjelak sa’ komonil li ruchich’och’ ut li saq’e. Nink’oxla naq a’an jun chamal ru tzolok chirix chanru neke’wan li aak’ab’ ut li saqen.

Jo’ ak naqanaw chiqajunil, chiru rajlal 24 hoonal naraqe’ li q’ojyin ut natikla li kutan ut naraqe’ li kutan ut natikla li q’ojyin.

Jo’kan ut, k’a’ru li q’ojyin?

Li q’ojyin a’an yal jun mu.

Us ta chiruheb’ li q’ojyin q’axal aak’ab’eb’ ru, li saq’e ink’a’ naxkanab’ xlemtz’unkil lix saqen. Toj nalemtz’un chi kaw. A’ut aak’ab’ ru lix yijach li ruchich’och’.

Naq maak’a’ li saqen wan li aak’ab’.

Naq na’ok li aak’ab’ re li q’ojyin, ink’a’ nasach li qayo’onihom ut naqak’oxla naq chupchu li saq’e chi junajwa. Ink’a’ naqaye naq maak’a’ li saq’e malaj naq kamenaq. Naqataw ru naq wanko sa’ jun li mu, naq li ruchich’och’ tixsuti rib’, ut naq timil timil eb’ li raq’ xam re li saq’e tooxkutanob’resi wi’chik.

Li aak’ab’ ink’a’ naraj naxye naq maak’a’ li saqen. Chi kok’ aj xsa’, yal naraj naxye naq maawa’o sa’ li tz’aqal na’ajej re xk’ulb’al li saqen. Chiru lix nimla moyb’al ru li saq’e li toje’ xk’ulman, naab’aleb’ xe’b’eek chi najt re wulak sa’eb’ li na’ajej b’ar wi’ li po tixmoy raj ru li saq’e chi tz’aqal us ta wanko sa’ xyi li kutan.

Juntaq’eet rik’in a’an, li musiq’ejil saqen junelik naxkutanob’resi chixjunil lix yo’ob’tesihom li Dios. Laj Satanas tixyal xq’e chiqak’eeb’al sa’ jun li mu li yo’ob’tesinb’il xb’aan a’an malaj qab’aan laa’o qajunes. A’an tixmin qu chixyo’ob’tesinkil li moyok; a’an tooxtiikisi toj sa’ li raak’ab’ li rochochpek.

Li musiq’ejil aak’ab’ naru tixb’ati jun tz’apleb’ t’ikr re li sachk sa’ ch’oolej chirixeb’ ajwi’ li ani li junxil ke’b’eek sa’ li saqen ut ke’saho’ xch’ool rik’in li Qaawa’. A’b’anan, us ta sa’ li hoonal re li aak’ab’ jwal numtajenaq, li Dios narab’i li qatuulanil tz’aam, naq naqtz’aama, “Ninpaab’. Tenq’ahin sa’ lix majelal inpaab’aal.”¹¹

Sa’ xkutankil laj Alma ke’wan naab’aleb’ li ke’ch’a’ajko’ rik’in xk’ulub’ankil li k’a’ru re li musiq’ej, ut “xb’aan xmaak’a’il lix paab’aaleb’,” lix saqen ut yaal li Dios ink’a’ kiru chi ok sa’ raameb’; “ut ke’kawu li raameb’.”¹²

Ex was wiitz’in, teneb’anb’il sa’ qab’een naq toowanq sa’ li tz’aqal na’ajej re rilb’al li choxahil saqen ut yaal re lix evangelio li Jesukristo. Us ta naq ak xq’ojyino’ ru li kutan ut aak’ab’ ru li ruchich’och’, naru taqasik’ b’eek sa’ lix saqen li Kristo, xpaab’ankileb’ lix chaq’rab’, ut xch’olob’ankil xyaalal rik’in xkawilal qach’ool li Kristo ut lix chaab’ilal.

Jo’ aj k’amol re lix tijonelil li Dios ut jo’ xtzolom li Jesukristo, laa’ex aj k’amol re li saqen. Meekanab’ chixb’aanunkil li k’a’ru tixch’olani lix choxahil saqen. “Taqsihomaq lee saqen”¹³ ut “chilemtz’unq [a’an] chiruheb’ li tenamit”—ink’a’ re naq te’ril ut te’oxloq’inq eere, a’ut “re naq te’ril lee chaab’il b’aanuhom ut te’xnima xloq’al lee Choxahil Yuwa’.”¹⁴

Ex raarookil was wiitz’in, k’anjeleb’aalex sa’ ruq’ li Qaawa’ re xk’amb’al li saqen ut li k’iraak reheb’ li raameb’ li ralaj xk’ajol li qaChoxahil Yuwa’. Maare ink’e’ nekereek’a naq k’ulub’ex chixk’irtesinkil li ani yajeb’ sa’ musiq’ej—jo’ chanchan naq junaq li natrab’ajik sa’ li oficina postal maak’a’ xk’ulub’ chi tenq’ank rik’in li artritis. Maare wankeb’ laa ch’a’ajkilal sa’ musiq’ej. A’b’anan, li Qaawa’ xexxb’oq. A’an xk’e eere li wankilal ut li teneb’ahom chixye’b’al lee ruq’ reheb’ li ani wan sa’ aajel ru. A’an xk’e eere lix loq’laj wankilal re li tijonelil re naq teek’am chaq li saqen sa’ li aak’ab’ ut teetaqsi ut teerosob’tesi li ralal xk’ajol li Dios. Li Dios kixk’ojob’ wi’chik lix Iglees ut lix evanelio chaq’al ru, “li nak’irtesink re li aamej toch’enaq.”¹⁵ A’an kixkawresi lix b’ehil li kawilal sa’ musiq’ej, re xtawb’al li k’iraak chiru li lajk ut b’eek sa’ xb’ehil li chaq’al ru kawilal sa’ musiq’ej.

Rajlal sut naq nekesutq’isi eech’ool chiru li Dios sa’ li tuulanil tij, nekek’ul lix saqen. Rajlal sut naq nekesik’ li raatin ut li rajom a’an sa’eb’ li loq’laj hu, li saqen nanima xlemtz’unkil. Rajlal sut nekek’e reetal li ani wan sa’ aajel ru ut nekemayeja lee hoonal re xye’b’al lee ruq’ rik’in rahok, li saqen nanima. Rajlal sut neketz’eqtaana li aaleek ut nekesik’ li k’a’ru saq ru, rajlal sut nekesik’ xkuyb’al eemaak malaj nekekuy xmaak jalan, rajlal sut nekech’olob’ xyaalal li yaal rik’in xkawilal eech’ool, li saqen naxtiikisi li aak’ab’ ut naxb’oqeb’ li jun ch’ol chik li nekesik’ li saqen ut li yaal.

K’oxlahomaq li eek’ulum sa’ lee yu’am, li hoonal re k’anjelak chiru li Dios ut chiruheb’ lee ras eeriitz’in naq li choxahil saqen kilemtz’un sa’ lee yu’am—sa’ li santil ochoch, chiru lix meex li loq’laj wa’ak, sa’ jun ch’anch’ookil hoonal re tz’ilok-ix sa’ k’a’uxlej, sa’eb’ lee junkab’al, malaj naq yookex chi k’anjelak sa’ li tijonelil. Wotzomaqeb’ li hoonal a’in rik’in lee junkab’al, lee ramiiw, ut jwal wi’chik rik’in li qasaaj li yookeb’ chixsik’b’al li saqen. Neke’raj ru rab’inkil sa’ xtz’uumal eere naq rik’in li saqen a’in, nachal ajwi’ li yo’onink ut li k’iraak, us ta aak’ab’ ru li ruchich’och’.

Lix saqen li Kristo naxk’am chaq li yo’onink, li sahil ch’oolejil, ut li k’iraak chiru yalaq musiq’ejil k’ob’olal malaj yajel.¹⁶ Eb’ li ani neke’xk’ul li wankilal aj saqob’resinel a’in neke’ok choq’ k’anjeleb’aal sa’ ruq’ lix Saqen li Ruchich’och’ re xk’eeb’al li saqen reheb’ jalaneb’.¹⁷ Te’reek’a li kireek’a li Rey aj Lamoni: “Li saqen a’in k’a’jo’ naq kiroksi sahil ch’oolejil sa’ li raam, ut oso’jenaq li choql re q’ojyin, ut … lochb’il sa’ raam lix saqenil li yu’am li junelik nakana.”¹⁸

Ex raarookil was wiitz’in, ex wamiiw, li qak’anjel a’an xsik’b’al li Qaawa’ toj reetal naq lix saqenkil li yu’am li junelik nakana naxamamnak chi kaw chiqasa’ ut lix nawom qach’ool nakawu ut nanima xmetz’ew us ta sa’ xyi li aak’ab’.

Nintz’aama ut nekexwosob’tesi naq texruuq chixtz’aqob’resinkil lee teneb’ahom jo’ aj k’amol re li tijonelil chiru li Nimajwal Dios ut junelik jo’ aj k’amol re lix choxahil saqen. Sa’ lix loq’laj k’ab’a’ li Jesukristo li Qaawa’, amen.