អ្នកកាន់ពន្លឺស្ថានសួគ៌
ក្នុងនាមជាអ្នកកាន់បព្វជិតភាពរបស់ព្រះ និងជាសិស្សម្នាក់របស់ព្រះយេស៊ូវគ្រីស្ទ អ្នកគឺជាអ្នកកាន់ពន្លឺ ។
បុរសវ័យចំណាស់ម្នាក់ឈរនៅជួរបញ្ឈរចាំទិញតែមនៅឯការិយាល័យប្រៃសណីយ៍មួយ ។ យុវនារីម្នាក់បានសង្កេតឃើញថា បុរសនោះលំបាកដើរ ហើយក៏ស្ម័គ្រចិត្តជួយប្រាប់គាត់ពីរបៀបទិញតែមពីម៉ាស៊ីន ដើម្បីចំណេញពេល ។ បុរសចំណាស់នោះមានប្រសាសន៍ថា « អរគុណ ប៉ុន្តែខ្ញុំចង់រង់ចាំវិញ ។ ពីព្រោះម៉ាស៊ីននឹងមិនសួរខ្ញុំពីជំងឺរលាកសន្លាក់ខ្ញុំទេ » ។
ពេលខ្លះវាល្អដែលបាននិយាយនឹងនរណាម្នាក់ដែលខ្វល់ខ្វាយអំពីបញ្ហារបស់យើង ។
ការឈឺចាប់ ការសោកសៅ និងជំងឺ គឺជាបទពិសោធន៍ដែលយើងទាំងអស់គ្នាចែកចាយ—គ្រានៃការឆ្គាំឆ្គង ទុក្ខសោក និងភាពអកុសល អាចបន្ថែមនៅក្នុងការចងចាំរបស់យើង ។
នៅពេលគិតពីសុខុមាលភាពខាងរូបកាយរបស់យើង យើងទទួលយកវ័យជរា និងជំងឺជាចំណែកនៃការធ្វើដំណើរក្នុងជីវិតរមែងស្លាប់របស់យើង ។ យើងស្វែងរកការប្រឹក្សាខាងវិជ្ជាជីវៈ ដែលយល់ដឹងអំពីរូបកាយ ។ នៅពេលយើងរងការឈឺចាប់សតិអារម្មណ៍ ឬជំងឺផ្លូវចិត្ត យើងស្វែងរកជំនួយពីអ្នកជំនាញដែលព្យាបាលជំងឺប្រភេទនេះ ។
យើងប្រឈមមុខនឹងការសាកល្បងខាងរូបកាយ និងខាងសតិអារម្មណ៍នៅក្នុងជីវិតរមែងស្លាប់នេះ ក៏ដូចជា យើងប្រឈមមុខនឹងបញ្ហាខាងវិញ្ញាណផងដែរ ។ យើងភាគច្រើនមានបទពិសោធន៍ក្នុងជីវិតពេលដែលទីបន្ទាល់របស់យើងភ្លឺចិញ្ចាំងចិញ្ចាច ។ យើងក៏មានបទពិសោធន៍ផងដែរ ពេលព្រះវរបិតាសួគ៌របស់យើងហាក់ដូចជានៅឆ្ងាយ ។ មានពេលជាច្រើនដែលយើងរក្សាទុករឿងខាងវិញ្ញាណនៅក្នុងដួងចិត្តរបស់យើង ។ ក៏មានពេលខ្លះ ជាពេលដែលវាមិនសូវមានតម្លៃ ឬមិនសូវសំខាន់ ។
ថ្ងៃនេះ ខ្ញុំចង់និយាយអំពីសុខុមាលភាពខាងវិញ្ញាណ—ជារបៀបដែលយើងអាចស្វែងរកការព្យាបាលពីការខ្វះខាតក្នុងការរីកចម្រើន ហើយដើរនៅលើផ្លូវដ៏ក្លៀវក្លា និងមានសុខភាពខាងវិញ្ញាណ ។
ជំងឺខាងវិញ្ញាណ
ពេលខ្លះជំងឺខាងវិញ្ញាណកើតមកពីលទ្ធផលនៃអំពើបាប ឬរបួសខាងសតិអារម្មណ៍ ។ ពេលខ្លះជំងឺខាងវិញ្ញាណកើតមានដោយសន្សឹមៗដែលយើងពិបាកនឹងប្រាប់ថាវាកំពុងតែកើតឡើង ។ ដូចជាស្រទាប់នៃថ្មសេឌីម៉ង់ទែរ ការឈឺចាប់ និងទុក្ខព្រួយខាងវិញ្ញាណ អាចកើតមានបន្ដិចម្ដងៗ មានទម្ងន់មកលើវិញ្ញាណរបស់យើង រហូតដល់វាធ្ងន់ស្ទើរតែមិនអាចរែកបាន ។ ឧទាហរណ៍ រឿងនេះអាចកើតឡើង នៅពេលការទទួលខុសត្រូវរបស់យើងនៅកន្លែងការងារ នៅគេហដ្ឋាន និងនៅព្រះវិហារមានកាន់តែលើសលប់ ដែលយើងភ្លេចពីអំណរនៃដំណឹងល្អ ។ យើងអាចទាំងមានអារម្មណ៍ថាយើងពុំអាចផ្ដល់អ្វីទៀតទេឬថាការរស់នៅតាមបទបញ្ញត្តិទាំងឡាយរបស់ព្រះ គឺហួសពីកម្លាំងរបស់យើង ។
ប៉ុន្តែទោះការសាកល្បងខាងវិញ្ញាណមានពិតក្ដី ក៏ពុំមែនមានន័យថាវាពុំអាចព្យាបាលបាននោះដែរ ។
យើងអាចព្យាបាលខាងវិញ្ញាណបាន ។
ទោះជារបួសខាងវិញ្ញាណមានជម្រៅជ្រៅបំផុតក្ដី—មែនហើយទោះជាវាមើលទៅពុំអាចព្យាបាលបានក្ដី—គឺវាអាចព្យាបាលបាន ។
មិត្តជាទីស្រឡាញ់អំណាចនៃការព្យាបាលរបស់ព្រះយេស៊ូវគ្រីស្ទ គឺពុំអវត្តមានក្នុងជំនាន់របស់យើងទេ ។
ការពាល់ព្យាបាលរបស់របស់ព្រះអង្គសង្គ្រោះ អាចផ្លាស់ប្រែជីវិតក្នុងជំនាន់របស់យើងដូចជានៅជំនាន់ទ្រង់ដែរ ។ ប្រសិនបើយើងគ្រាន់តែមានជំនឿ នោះទ្រង់អាចដឹកដៃយើង បំពេញក្នុងព្រលឹងរបស់យើងដោយពន្លឺសួគ៌ា ហើយព្យាបាលយើង ព្រមទាំងមានបន្ទូលប្រទានពរយើងថា « ចូរក្រោកឡើង យកគ្រែអ្នកដើរទៅ » ។១
ភាពងងឹត និងពន្លឺ
អ្វីដែលបណ្ដាលឲ្យយើងឈឺចាប់ខាងវិញ្ញាណ នោះវានឹងមានរឿងដូចគ្នាមួយគឺ ៖ អវត្តមានពីពន្លឺដ៏ទេវភាព ។
សេចក្ដីងងឹតកាត់បន្ថយសមត្ថភាពមើលឃើញច្បាស់របស់យើង ។ វាធ្វើឲ្យភ្នែកយើងព្រិល ដែលកាលពីមុនមើលឃើញច្បាស់ ។ នៅពេលយើងស្ថិតនៅក្នុងភាពងងឹត ភាគច្រើនយើងធ្វើការសម្រេចចិត្តមិនត្រឹមត្រូវ ដោយសារយើងពុំអាចមើលឃើញគ្រោះថ្នាក់នៅលើផ្លូវរបស់យើង ។ នៅពេលយើងស្ថិតនៅក្នុងភាពងងឹត នោះភាគច្រើនយើងបាត់បង់ក្តីសង្ឃឹម ដោយសារយើងពុំអាចមើលឃើញភាពសុខសាន្ដ និងអំណរដែលរង់ចាំយើង ប្រសិនបើយើងគ្រាន់តែបន្ដដើរទៅមុខ ។
ម្យ៉ាងទៀត ពន្លឺអនុញ្ញាតឲ្យយើងមើលឃើញរឿងពិត ។ វាជួយឲ្យយើងយល់រវាងសេចក្ដីពិត និងកំហុស រវាងអ្វីដែលសំខាន់ និងមិនសំខាន់ ។ នៅពេលយើងនៅក្នុងពន្លឺ យើងអាចធ្វើការជ្រើសរើសសុចរិត ផ្អែកទៅលើគោលការណ៍ពិត ។ នៅពេលយើងស្ថិតនៅក្នុងពន្លឺ យើងមាន « សេចក្ដីសង្ឃឹមដ៏ឥតខ្ចោះ »២ ដោយសារយើងអាចមើលឃើញការសាកល្បងក្នុងជីវិតរមែងស្លាប់ចេញពីទស្សនៈវិស័យដ៏អស់កល្បជានិច្ច ។
យើងនឹងរកឃើញការព្យាបាលខាងវិញ្ញាណ នៅពេលយើងបោះជំហានពីស្រមោលនៃលោកិយ ហើយចូលមកក្នុងពន្លឺដ៏អស់កល្បរបស់ព្រះគ្រីស្ទ ។
កាលណាយើងកាន់តែយល់ ហើយអនុវត្តគោលគំនិតអំពីពន្លឺខាងគោលលទ្ធិ នោះយើងកាន់តែចាំយាមទាស់នឹងជំងឺខាងវិញ្ញាណដែលធ្វើឲ្យយើងរងទុក្ខ ឬឈឺចាប់មកពីគ្រប់ទិសដៅបាន ហើយយើងកាន់តែអាចបម្រើជាអ្នកកាន់បព្វជិតភាពដ៏បរិសុទ្ធដោយថាមពល ក្លាហាន ដោយយកចិត្តទុកដាក់ និងរាបសា—ជាអ្នកបម្រើ និងសិស្សពិតរបស់ស្ដេចដ៏អស់កល្ប និងជាទីស្រឡាញ់របស់យើង ។
ពន្លឺនៃលោកិយ
ព្រះយេស៊ូវគ្រីស្ទបានមានព្រះបន្ទូលថា៖ « ខ្ញុំជាពន្លឺលោកីយ៍អ្នកណាដែលតាមខ្ញុំ នោះមិនដែលដើរក្នុងសេចក្តីងងឹតឡើយ គឺនឹងមានពន្លឺនៃជីវិតវិញ »។៣
តើវាមានន័យដូចម្ដេចទៅ ?
វាសាមញ្ញថា ៖ អ្នកដែលដើរតាមព្រះយេស៊ូវគ្រីស្ទ ដោយរាបសា នឹងទទួលបទពិសោធន៍ ហើយចែកចាយពន្លឺរបស់ទ្រង់ ។ ហើយពន្លឺនោះ នឹងភ្លឺឡើងៗ រហូតដល់វាបណ្ដេញភាពងងឹតអាប់អួរដ៏ខ្លាំងចេញនៅទីបំផុត ។
វាមានន័យថា មានអំណាចមួយ ជាឥទ្ធិពលដ៏ខ្លាំងមួយ ដែលសាយភាយចេញមកពីព្រះអង្គសង្គ្រោះ ។ វា « ចេញមកពីវត្តមាននៃព្រះ ដើម្បីបំពេញភាពល្ហល្ហេវនៃមេឃ » ។៤ ដោយសារអំណាចនេះបំភ្លឺ លើកតម្កើង ហើយបំភ្លឺជីវិតរបស់យើង ដែលជាញឹកញាប់ព្រះគម្ពីរត្រូវបានហៅថា ពន្លឺ ប៉ុន្តែវាក៏សំដៅថាជាវិញ្ញាណ និងសេចក្ដីពិតផងដែរ ។
នៅក្នុងគោលលទ្ធិ និងសេចក្ដីសញ្ញា យើងអានថា « ព្រះបន្ទូលនៃព្រះអម្ចាស់គឺជាសេចក្ដីពិត ហើយអ្វីៗក៏ដោយដែលជាសេចក្ដីពិតគឺជាពន្លឺ និងអ្វីៗក៏ដោយដែលជាពន្លឺគឺជាព្រះវិញ្ញាណ គឺជាព្រះវិញ្ញាណនៃព្រះយេស៊ូវគ្រីស្ទ » ។៥
គំនិតដ៏អស្ចារ្យនេះ —ប្រាប់ថា ពន្លឺគឺជាព្រះវិញ្ញាណ ដែលជាសេចក្ដីពិត ហើយថាពន្លឺនេះបំភ្លឺគ្រប់ព្រលឹងដែលមកក្នុងពិភពលោកនេះ—វាសំខាន់ដូចដែលវាសង្ឃឹមទុក ។ ពន្លឺនៃព្រះគ្រីស្ទបំភ្លឺ ហើយបំពេញព្រលឹងទាំងអស់ដែលស្ដាប់តាមសំឡេងនៃព្រះវិញ្ញាណ ។៦
ពន្លឺនៃព្រះគ្រីស្ទ បំភ្លឺពេញសាកលលោកទាំងមូល ។
វាបំពេញលើផែនដី ។
ហើយវាអាចបំពេញគ្រប់ដួងចិត្ត ។
« ព្រះមិនរើសមុខអ្នកណាទេ » ។៧ ពន្លឺរបស់ទ្រង់គឺមានសម្រាប់មនុស្សគ្រប់រូប—ទាំងធំ ទាំងតូច ទាំងមាន ទាំងក្រ ទាំងអ្នកមានឯកសិទ្ធិ ទាំងអ្នកខ្វះខាត ។
ប្រសិនបើអ្នកបើកគំនិត និងដួងចិត្តដើម្បីទទួលពន្លឺនៃព្រះគ្រីស្ទ ហើយដើរតាមព្រះអង្គសង្គ្រោះដោយរាបសា នោះអ្នកនឹងទទួលបានពន្លឺកាន់តែច្រើន ។ មួយបន្ទាត់ម្ដងៗ ឯណេះបន្ដិចឯណោះបន្ដិច អ្នកនឹងប្រមូលពន្លឺ និងសេចក្ដីពិតមកក្នុងព្រលឹងអ្នកកាន់តែច្រើន រហូតដល់ភាពងងឹតត្រូវបានវិនាសបាត់ពីជីវិតរបស់អ្នក ។៨
ព្រះនឹងបើកភ្នែករបស់អ្នក ។
ព្រះនឹងផ្ដល់ដួងចិត្តថ្មីដល់អ្នក ។
សេចក្ដីស្រឡាញ់របស់ព្រះ ពន្លឺ និងសេចក្ដីពិត នឹងបណ្ដាលឲ្យរឿងអកម្មទៅជាមានជីវិត ហើយអ្នកនឹងកើតជាជីវិតថ្មីនៅក្នុងព្រះគ្រីស្ទយេស៊ូវ ។៩
ព្រះអម្ចាស់បានសន្យាថា « បើសិនជាភ្នែករបស់អ្នកស្មោះស្ម័គ្រទាំងស្រុងទៅចំពោះសិរីល្អរបស់យើង នោះរូបកាយអ្នកទាំងមូលនឹងបានពោរពេញទៅដោយពន្លឺ ហើយនឹងពុំមានសេចក្ដីងងឹតនៅក្នុងអ្នកឡើយ ហើយរូបកាយនោះដែលបានពោរពេញទៅដោយពន្លឺ យល់គ្រប់ទាំងអស់ » ។១០
នេះជាឱសថសម្រាប់ជំងឺខាងវិញ្ញាណ ។ សេចក្ដីងងឹតនឹងបាត់ទៅពេលមានវត្តមាននៃពន្លឺ ។
រឿងប្រៀបធៀបអំពីសេចក្ដីងងឹតខាងវិញ្ញាណ
ទោះជាយ៉ាងណាក៏ដោយ ព្រះនឹងពុំបង្ខំយើងឲ្យទទួលយកពន្លឺទ្រង់ទេ ។
ប្រសិនបើយើងចូលចិត្តនៅក្នុងភាពងងឹត នោះដួងចិត្តរបស់យើងនឹងមិនងាយផ្លាស់ប្ដូរទេ ។
ដើម្បីមានការផ្លាស់ប្ដូរបាន នោះយើងចាំបាច់ត្រូវអនុញ្ញាតឲ្យពន្លឺចូលមកយ៉ាងសកម្ម ។
អំឡុងពេលបើកបរក្នុងនាមជាអ្នកបើកយន្ដហោះនៅជុំវិញភពផែនដីរបស់យើង ខ្ញុំតែងតែស្ងើចអស្ចារ្យចំពោះសម្រស់ និងភាពឥតខ្ចោះនៃការបង្កបង្កើតរបស់ព្រះ ។ ជាពិសេសខ្ញុំរកឃើញភាពទាក់ទាញនៃទំនាក់ទំនងរវាងផែនដី និងព្រះអាទិត្យ ។ ខ្ញុំគិតថាវាគឺជាកម្មវត្ថុមេរៀនដ៏ល្អមួយអំពីវត្តមាននៃភាពងងឹត និងពន្លឺ ។
ដូចយើងទាំងអស់គ្នាបានដឹងហើយ ក្នុងរយៈពេល ២៤ ម៉ោង យប់ទៅជាថ្ងៃ ហើយថ្ងៃទៅជាយប់ ។
ដូច្នេះតើអ្វីជាយប់ ?
យប់គ្មានអ្វីសោះក្រៅពីស្រមោល ។
ទោះជានៅក្នុងយប់ដ៏ងងឹតបំផុតក្ដី ក៏ព្រះអាទិត្យពុំអាចបញ្ឈប់បំភាយពន្លឺវាដែរ ។ វាបន្ដបំភ្លឺពន្លឺដ៏ភ្លឺដូចសព្វដង ។ ប៉ុន្តែពាក់កណ្ដាលផែនដីស្ថិតក្នុងភាពងងឹត ។
អវត្តមាននៃពន្លឺបណ្ដាលឲ្យងងឹត ។
នៅពេលភាពងងឹតនៃពេលយប់ចូលមកដល់ យើងពុំអស់សង្ឃឹម ហើយបារម្ភថាព្រះអាទិត្យរលត់នោះទេ ។ យើងពុំសន្មត់ថាព្រះអាទិត្យលែងមានទៀតនោះទេ ។ យើងយល់ដឹងថា យើងស្ថិតនៅក្នុងស្រមោលមួយ ដែលផែនដីនឹងបន្ដវិល ដែលនៅទីបំផុត កាំពន្លឺនៃព្រះអាទិត្យនឹងបំភ្លឺមកដល់យើងទៀត ។
ភាពងងឹតគឺពុំចង្អុលបង្ហាញថា គ្មានពន្លឺនោះទេ ។ ជាញឹកញាប់បំផុត វាមានន័យដោយសាមញ្ញថា យើងពុំស្ថិតនៅក្នុងកន្លែងត្រឹមត្រូវដើម្បីទទួលពន្លឺ ។ អំឡុងពេលសូរ្យគ្រាសក្នុងពេលថ្មីៗនេះ មានមនុស្សជាច្រើនបានខិតខំយ៉ាងខ្លាំងដើម្បីចូលទៅក្នុងខ្សែស្រមោលដ៏តូចចង្អៀតដែលបានបង្កើតឡើងដោយព្រះចន្ទនៅកណ្ដាលថ្ងៃរះដ៏ភ្លឺថ្លា ។
តាមរបៀបមួយស្រដៀងគ្នានេះដែរគឺថា ពន្លឺខាងវិញ្ញាណបន្ដបំភ្លឺមកលើគ្រប់ការបង្កបង្កើតរបស់ព្រះ ។ សាតាំងនឹងខំគ្រប់យ៉ាងដើម្បីបង្កើតជាម្លប់ ឬនាំយើងចូលទៅក្នុងស្រមោលនៃការបង្កបង្កើតរបស់យើងផ្ទាល់ ។ វានឹងបង្ខំយើងឲ្យបង្កើតសូរ្យគ្រាសរបស់យើងផ្ទាល់ វានឹងជម្រុញយើងឲ្យចូលក្នុងភាពងងឹតនៃកន្លែងទុច្ចរិតរបស់វា ។
ភាពងងឹតខាងវិញ្ញាណ អាចធ្វើឲ្យភ្លេចអំពីពន្លឺ ទោះជាអស់អ្នកដែលធ្លាប់ដើរក្នុងពន្លឺ ហើយរីករាយនៅក្នុងព្រះអម្ចាស់ក្ដី ។ ទោះជា នៅក្នុងគ្រាដែលមានសេចក្ដីងងឹតដ៏ធំក៏ដោយ នោះព្រះបានព្រះសណ្ដាប់ការទទូចអង្វរដ៏រាបសារបស់យើង « ព្រះអម្ចាស់អើយ សូមជួយចំពោះសេចក្ដីណាដែលខ្ញុំមិនជឿផង » ។១១
នៅជំនាន់របស់អាលម៉ា មានមនុស្សជាច្រើនដែលពិបាកទទួលយករឿងខាងវិញ្ញាណ ហើយ « ដោយសារតែការឥតជំនឿរបស់ពួកគេ » ពន្លឺ និងសេចក្ដីពិតរបស់ព្រះ ពុំអាចចូលទៅក្នុងព្រលឹងរបស់ពួកគេ « ហើយចិត្តរបស់ពួកគេរឹងរូស » ។១២
យើងគឺជាអ្នកកាន់ពន្លឺ
បងប្អូនប្រុស វាអាស្រ័យទៅលើយើងដើម្បីនៅក្នុងកន្លែងត្រឹមត្រូវដើម្បីមើលឃើញពន្លឺ និងសេចក្ដីពិតដ៏ទេវភាពនៃដំណឹងល្អរបស់ព្រះយេស៊ូវគ្រីស្ទ ។ ទោះជាពេលយប់មកដល់ ហើយពិភពលោកហាក់ដូចជាងងឹតក្ដី ក៏យើងអាចជ្រើសរើសដើរនៅក្នុងពន្លឺរបស់ព្រះគ្រីស្ទ រក្សាបទបញ្ញត្តិរបស់ទ្រង់ ហើយថ្លែងទីបន្ទាល់ដោយក្លាហានអំពីភាពពិត និងភាពមហិមារបស់ទ្រង់ដែរ ។
ក្នុងនាមជាអ្នកកាន់បព្វជិតភាពរបស់ព្រះ និងជាសិស្សម្នាក់របស់ព្រះយេស៊ូវគ្រីស្ទ អ្នកគឺជាអ្នកកាន់ពន្លឺ ។ សូមបន្ដធ្វើនូវអ្វីៗដែលនឹងបីបាច់ដល់ពន្លឺដ៏ទេវភាពរបស់ទ្រង់ ។ « លើកពន្លឺអ្នកឡើង »១៣ ហើយ « ឲ្យពន្លឺបានភ្លឺនៅមុខមនុស្សលោក »—ពុំមែនដើម្បីឲ្យពួកគមើលឃើញ ហើយសរសើររដល់អ្នកទេ ប៉ុន្តែ « ដើម្បីឲ្យគេឃើញការល្អដែលអ្នករាល់គ្នាប្រព្រឹត្ត រួចសរសើរតម្កើងដល់ព្រះវរបិតានៃអ្នករាល់គ្នាដែលគង់នៅស្ថានសួគ៌ » ។១៤
បងប្អូនប្រុសជាទីស្រឡាញ់របស់ខ្ញុំអើយ អ្នកគឺជាឧបករណ៍នៅក្នុងព្រះហស្តរបស់ព្រះអម្ចាស់ដែលមានគោលបំណងដើម្បីនាំពន្លឺ និងព្យាបាលដល់ព្រលឹងនៃកូនចៅរបស់ព្រះវរបិតាសួគ៌ ។ ប្រហែលជាអ្នកពុំមានអារម្មណ៍ថាសក្ដិសមដើម្បីព្យាបាលអស់អ្នកដែលមានជំងឺខាងវិញ្ញាណ—ប្រាកដណាស់ក៏គ្មានបុគ្គលិកណានៅប្រៃសណីយ៍មានភាពសក្តិសមដើម្បីជួយដល់បុរសដែលមានជំងឺរលាកសន្លាក់នោះដែរ ។ ប្រហែលជាអ្នកជួបនឹងបញ្ហាខាងវិញ្ញាណផ្ទាល់ខ្លួន ។ ទោះយ៉ាងណាក៏ដោយ ព្រះអម្ចាស់បានហៅអ្នក ។ ទ្រង់បានប្រទានសិទ្ធិអំណាច និងការទទួលខុសត្រូវដល់អ្នកដើម្បីឈោងទៅជួយដល់ជនក្រីក្រ ។ ទ្រង់បានប្រទានដល់អ្នកនូវអំណាចបព្វជិតភាពដ៏ពសិដ្ឋរបស់ទ្រង់ដើម្បីនាំពន្លឺមកក្នុងទីងងឹត ហើយលើក និងប្រទានពរដល់កូនចៅរបស់ព្រះ ។ ព្រះបានស្ដារសាសនាចក្ររបស់ទ្រង់ និងដំណឹងល្អដ៏មានតម្លៃរបស់ទ្រង់ « ធ្វើឲ្យជាស្បើយព្រលឹង ដែលមានរបួសឈឺចាប់ » ។១៥ ទ្រង់បានរៀបចំផ្លូវដើម្បីមានសុខុមាលភាពខាងវិញ្ញាណ ដើម្បីស្វែងរកការព្យាបាលពីភាពអសកម្ម មកជាមានសុខភាពខាងវិញ្ញាណ ហើយក្លៀវក្លា ។
រាល់ពេលដែលអ្នកបង្វែរដួងចិត្តរបស់អ្នកទៅរកព្រះក្នុងការអធិស្ឋានដោយរាបសា នោះអ្នកទទួលបទពិសោធន៍នូវពន្លឺរបស់ទ្រង់ ។ រាល់ពេលដែលអ្នកស្វែងរកព្រះបន្ទូល និងព្រះទ័យរបស់ទ្រង់នៅក្នុងបទគម្ពីរ នោះពន្លឺនឹងបំភ្លឺឡើងកាន់តែចែងចាំង ។ រាល់ពេលដែលអ្នកសង្កេតឃើញនរណាម្នាក់ខ្វះខាត ហើយលះបង់ភាពសុខស្រួលរបស់អ្នកដើម្បីឈោងទៅជួយដោយក្ដីស្រឡាញ់ នោះពន្លឺនឹងរីកធំខ្លាំងឡើងៗ ។ រាល់ពេលដែលអ្នកបដិសេធការល្បួង ហើយជ្រើសរើសភាពបរិសុទ្ធ រាល់ពេលដែលអ្នកស្វែងរក ឬផ្ដល់ការអភ័យទោស រាល់ពេលដែលអ្នកថ្លែងទីបន្ទាល់អំពីសេចក្ដីពិតដោយក្លាហាន នោះពន្លឺបណ្ដេញភាពងងឹត ហើយទាក់ទាញដល់អ្នកដទៃដែលកំពុងស្វែងរកពន្លឺ និងសេចក្តីពិតផងដែរ ។
ចូរគិតអំពីបទពិសោធន៍ផ្ទាល់ខ្លួនរបស់អ្នក គ្រាដែលការបម្រើព្រះ និងពួកបងប្អូន នៅពេលពន្លឺដ៏ទេវភាពបំភ្លឺនៅក្នុងជីវិតរបស់អ្នក នៅក្នុងព្រះវិហារបរិសុទ្ធដ៏ពិសិដ្ឋ នៅឯតុសាក្រាម៉ង់ នៅកន្លែងស្ងប់ស្ងាត់ដើម្បីពិចារណាប្រកបដោយការអធិស្ឋាន នៅក្នុងការជួបជុំគ្រួសាររបស់អ្នក ឬអំឡុងពេលធ្វើការបម្រើបព្វជិតភាព ។ សូមចែកចាយគ្រាទាំងនោះជាមួយនឹងគ្រួសារ មិត្តភក្ដិ ជាពិសេសជាមួយនឹងយុវវ័យរបស់យើងដែលកំពុងស្វែងរកពន្លឺ ។ ពួកគេចាំបាច់ត្រូវស្ដាប់ឮពីអ្នកថា សេចក្ដីសង្ឃឹម និងការព្យាបាលទោះបីនៅក្នុងពិភពលោកដែលពោរពេញដោយភាពអន្ធកាលកើតចេញមកពីពន្លឺនោះ ។
ពន្លឺរបស់ព្រះគ្រីស្ទ នាំមកនូវក្ដីសង្ឃឹម សុភមង្គល និងការព្យាបាលរបួស ឬជំងឺខាងវិញ្ញាណគ្រប់ប្រភេទ ។ អស់អ្នកដែលមានបទពិសោធន៍នៃឥទ្ធិពលលាងសម្អាតនេះ បានក្លាយជាឧបករណ៍នៅក្នុងព្រះហស្ដនៃពន្លឺនៃលោកិយ ដើម្បីផ្ដល់ពន្លឺដល់អ្នកដទៃ ។១៧ ពួកគេនឹងទទួលអារម្មណ៍អ្វីមួយដែលស្ដេច ឡាម៉ូណៃ បានទទួល ៖ « ពន្លឺនេះបានធ្វើឲ្យសេចក្ដីអំណរជ្រួតជ្រាបទៅក្នុងព្រលឹងរបស់ទ្រង់ ឯពពកនៃភាពងងឹតក៏បានផាត់ចេញ ហើយ…ពន្លឺដែលជាជីវិតដ៏អស់កល្បជានិច្ច ត្រូវបានអុជឡើងនៅក្នុងព្រលឹងទ្រង់ » ។១៨
បងប្អូនប្រុស មិត្តភក្តិជាទីស្រឡាញ់ វាគឺជាកាតព្វកិច្ចរបស់យើងដើម្បីស្វែងរកព្រះអម្ចាស់រហូតដល់ពន្លឺដែលជាជីវិតដ៏អស់កល្បជានិច្ច ឆេះយ៉ាងសន្ធោរសន្ធៅនៅក្នុងខ្លួនយើង ហើយទីបន្ទាល់របស់យើងក្លាយទៅជាទំនុកចិត្ត ហើយរឹងមាំទោះនៅកណ្ដាលស្បៃអន្ធកាលក្តី ។
វាគឺជាការអធិស្ឋាន និងប្រសិទ្ធពរពីខ្ញុំសូមឲ្យអ្នកទទួលជោគជ័យនៅក្នុងការបំពេញជោគវាសនារបស់អ្នកក្នុងនាមជាអ្នកកាន់បព្វជិតភាពរបស់ព្រះដ៏មានមហិទ្ធិឫទ្ធិ ហើយធ្វើជាអ្នកកាន់ពន្លឺសួគ៌ារបស់ទ្រង់ដោយអំណរជានិច្ច ។ នៅក្នុងព្រះនាមនៃព្រះយេស៊ូវគ្រីស្ទ ជាលោកគ្រូរបស់យើង អាម៉ែន ។