Rikabwijer Meram in Lan̄ ro
Āinwōt rikabwijer priesthood ro an Anij im āinwōt juon rikaļooraņ Jisōs Kraist, kom̧ij juon rikabwijer meram.
Juon em̧m̧aan erūtto ekar jutak ilo ļain eo ilo post office n̄an wia jitaam̧ ilo kauntōr eo. Juon leddik eaar loe bwe eapan̄ an etetal im kar kōņaan kwaļo̧k kilen an wia jitaam̧ ilo mijjiin eo n̄an kōjparok iien. Em̧m̧aan in eaar ba, “Kom̧m̧ool, ak ij kōttar. Mijjiin eo eban kajjitōk ippa kōn aō kūrro.”
Jet iien ejipan̄ n̄an kōnono n̄an ro jet kōn apan̄ ko ad.
Metak, būrom̧ōj, ak nan̄inmej ko rej en̄jake ko jej aolep kwaļo̧ki—ilo iien ko relikjab, rekabūrom̧ōjm̧ōj, im jerata ej ioktok kōļmenļo̧kjeņ ko ad.
N̄e ej itok n̄an mour ko ad makmake, jej rūttoļo̧k im nan̄inmej āinwōt m̧ōttanļo̧k mour wabanban in. Jej pukot kapilōk ko retijem̧ļo̧k jān ro remeļeļe kōn ānbwiin. N̄e jej en̄taan kōn metak ak nan̄inmej in kōmālij, jej pukot jipan̄ jān ro retijem̧ļo̧k ro rej jerbale kain nan̄inmej rot kein.
Baj ilo ad jelm̧ae apan̄ ko ilo ānbwin im en̄jake ko ilo mour in, jej barāinwōt jelm̧ae idajon̄jon̄ ko an mour in jetōb. Elōn̄ iaad em̧ōj an en̄jake elōn̄ alen ilo mour ko ad n̄e naan in kam̧ool ko ad rej lukkuun kajoor. Jej barāinwōt maron̄ kar en̄jake elōn̄ alen n̄e Jemedwōj Ilan̄ ettoļo̧k. Elōn̄ alen n̄e jej kaorōk men ko an Jetōb ilo aolepān būruwōd. Elōn̄ alen barāinwōt n̄e reddikļo̧k aer aorōk ak dik tokjāer.
Rainin ikōņaan kōnono kōn mour in jetōb eo ewāmourur—elmen ad maron̄ lo kōmour jān aepādpād im etetal ilo juon iaļ in peran, an ājmour ilo jetōb.
Mōjņo̧ ilo Jetōb
Jet iien m̧ōjņo̧ ilo jetōb ej itok āinwōt tōprak in jerawiwi ak kinej in en̄jake ko. Jorrāān ko ilo jetōb rej itok jidik kōn jidik bwe jen maron̄ jeļā ta eo ej waļo̧k. Āinļo̧k wōt dōkā ko, metak ilo mour in jetōb im būrom̧ōj emaron̄ ejaak ioon jen iien n̄an iien, kadoik jetōb ko ad m̧ae iien eddo n̄an ineeke. N̄an waanjon̄ok, menin emaron̄ waļo̧k n̄e eddo ko ad ilo jikin jerbal, kapijuknen, im kabun̄ jino edodo n̄e jej luuji m̧ōņōņō eo ilo gospel in. Jej maron̄ en̄jake em̧ool āinwōt n̄e emaat ad maron̄ leļo̧k ak mour kake kein ko an Anij jen ad maron̄.
Ak kōn wōt apan̄ ko an mour in jetōb rej bōk jikier ejjab meļeļe bwe reban jako.
Jej maron̄ bōk kōmour ilo mour in jetōb.
Men̄e jon̄an kinjen mour in jetōb eo em̧wilaļ tata—aaet, men̄e ko watōki bwe reban jako—remaron̄ in mour.
Ro m̧ōtta rejitōn bōro, kajoor in kōmour eo ilo Jisōs Kraist ejjab jako ilo raan kein.
Pein kōmour an Rilo̧mo̧o̧r emaron̄ ukōt mour ko ad ilo kiiō āinwōt An kar kōm̧m̧ane. Eļan̄n̄e enaaj wōr ad tōmak, Emaron̄ bōk pā ko peiid, kobrak ad kōn meram l kōn kōmour an lan̄, im kōnono n̄an kōj kōn naan in kōjeraam̧m̧an, “Jerkak, bōk kineem̧, im ilo̧k.”1
Marok im Meram
Jekdo̧o̧n ta eo ekōm̧ōjņo̧ik mour in jetōb eo ad, ewōr wōt juon men jej juon wōt kake: an jako meram eo ekwojarjar.
Marok ej kadikļo̧k ad maron̄ lukkuun loļo̧kjeņ. Ej kōmarokļo̧k mejād eo me eaar juon tōre em̧m̧an im alikkar ad loļo̧kjeņ. N̄e jej pād ilo marokļep, eļapļo̧k ad kōm̧m̧ani kālet ko renana kōnke jejjab maron̄ lo kauwōtata ko ilo iaļ in ad. N̄e jej pād ilo marokļep, eļapļo̧k ad jerwaane kōjatdikdik kōnke jejjab maron̄ lo aenōm̧m̧an im m̧ōņōņō eo ej kōttar kōj eļan̄n̄e jenaaj wōnm̧aanļo̧k wōt.
Meram, ilo bar juon wāween, ekōm̧m̧an bwe jen lukkuun lo men ko. Ekōm̧m̧an bwe ļōmņak kōtaan m̧ool im bōd, kōtaan aorōk im jab aorōk. N̄e jej pād ilo meram, jej maron̄ kōm̧m̧ani kālet ko rejim̧we pedped ioon katak ko rem̧ool. N̄e jej pād ilo meram, ewōr ippād “juon kōjatdikdik eo eweppān”2 kōnke jej maron̄ lo apan̄ ko ad make kōn juon errem̧aanļo̧k eo ejjeļo̧k jem̧ļo̧kin.
Jej lo kōmour kōn mour in jetōb ilo ad jenliktak jen anjiwiwi ko an laļ in n̄an meram eo an Kraist ejjeļo̧k jem̧ļo̧kier.
Toon wōt ad meļeļe im būki unin katak eo kōn meram, toon wōt ad jutak kajoor ņae mour in jetōb eo ej kaen̄taan ak kainepataik kōj ilo jabdewōt wāween; men eo em̧m̧an tata jemaron̄ jerbale ilo kajoor, peran, kōjparok, im rikabwijer ro rettā an priesthood eo ekkwojarjar—rikarejer ro rem̧ool im rijilōk ro an Kiin̄ eo ad ejitōn bōro Indeeo.
Meram in Laļ
Jisōs Kraist ekar ba, “N̄a, meram in laļ; eo ej ļoor Eō e jāmin etal ilo marok, a enaaj an meram in mour.”3
Ta meļeļein menin?
En̄in bwe: E eo ej ļoor Jisōs Kraist enaaj en̄jake im kwaļo̧k An meram. Im bwe meram enaaj meramlo̧k m̧ae iien ejako marokļep.
Ej meļeļe bwe ewōr juon kajoor, juon kajoor eim̧we jān Rilo̧mo̧o̧r. Meram eo ej erromaakļo̧k jān “im̧aan mejān Anij n̄an kobrak ļap in lan̄.”4 Kōnke kajoor in ej kōmeramļo̧k, kōketak, im kōmeram̧ļo̧k mour ko ad, ekkā an jeje ko rekwojarjar ņa etan meram, ak ej barāinwōt etan in jetōb im m̧ool.
Ilo Katak im Bujen ko jej riit, “Bwe naan eo an Irooj ej m̧ool, im jabdewōt men eo ej m̧ool ej meram, im jabdewōt men eo ej meram ej Jetōb, em̧ool Jitōbōn Jisōs Kraist.”5
Kōļmenļo̧kjeņ in—bwe meram ej jetōb, eo ej m̧ool, im bwe meram in ej romaak ioon aolep jetōb ko rej itok n̄an laļ in—im eaorōkļo̧k āinwōt juon kōjatdikdik. Meram eo an Kraist ej kōmeram ļo̧k im kobrak aolep ro otemjej rej ron̄ ainikein Jetōb eo.6
Meram in Kraist ekobrak aolepān laļ in.
Ej kobrak laļ in.
Im emaron̄ kobrak aolep bōro.
“Anij e jab ļōmņak kōn okōtan armej.”7 An meram ej n̄an aolep—ļap im dik, m̧weie ak jeram̧ōļ, m̧ōņōņō ak jab m̧ōņōņō.
Eļan̄n̄e kom̧ naaj kōpeļļo̧k ami kōļmenļo̧kjeņ im būruwōmi n̄an bōk Meram eo an Kraist im ļoor Rilo̧mo̧o̧r, kwonaaj bōk eļapļo̧k meram. Ļain im bar ļain, jidik ijin im jidik ijuweeo, kwonaaj bōk eļapļo̧k meram im m̧ool n̄an jetōb eo am̧ m̧ae iien marokļep enaaj jako jen mour eo am̧.8
Anij enaaj kōpeļļo̧k māj ko mājemi.
Anij enaaj lewaj n̄an eok juon bōro ekāāl.
Iakwe eo an Anij, meram, im m̧ool naaj kōm̧m̧an bwe men ko rem̧m̧an ren itok n̄an mour eo am̧, im kwonaaj bar lo̧tak n̄an juon mour ekāāl ilo Kraist Jisōs.9
Im Irooj eaar kallim̧ur, “bwe eļan̄n̄e mājāmi rej reim̧aanļo̧k wōt n̄an aiboojoj eo Aō, aolepān ānbwinnōmi renaaj obrak kōn meram, im enaaj ejjeļo̧k marok ilo kom̧; im ānbwin eo eobrak kōn meram emeļeļe aolep men otemjeļo̧k.”10
En̄in ej uno eo eļaptata n̄an nan̄inmej in jetōb. Marok e jakoļo̧ n̄e meram epād.
Juon Meļeļe kōn Marok ilo Jetōb
Ijoke, Anij eban kipel kōj n̄an dāpij meram eo An.
Eļan̄n̄e em̧m̧an ippād marok, būruwōd ej āinwōt n̄e eban oktak.
Bwe oktak en bōk jikin, jej aikuj kōtļo̧k bwe meram en deļo̧n̄.
Ilo iien ekāke ko aō āinwōt juon kapen in baļuun ilo aolepen laļ in, iaar aolep iien bwilōn̄ kōn aiboojoj im kōm̧anm̧an eo an Anij eweppān. Iaar lukkuun lo oktak eo kōtaan laļ in im aļ. Iaar ļōmņak ej juon menin ekkatak kōn elmen an marokļep im meram waļo̧k.
Ilo adwōj jeļā, ilowaan wōt kajjojo 24 awa ko ilo bon̄ ej oktak n̄an raan im bar raan im oktak n̄an bon̄.
Kōn menin, innām, ta in bon̄?
Bon̄ ejjeļo̧k oktak jen elleor.
Men̄e ilo bon̄on marok, aļ ejjab bōjrak an kōmerame. Ej kōmeram im meramļo̧k jen kar m̧okta. Bōtaab jimettan in laļ in ej marok.
An jako meram ekōm̧m̧an bwe en marok.
N̄e bon̄on marok ej waļo̧k, jejjab mijak ak inepata bwe aļ enaaj romaak. Jen jab ļōmņak bwe aļ eo ejako ak emej. Jej meļeļe bwe jej pād ilo juon ellor, bwe laļ in enaaj jānij wōt, im bwe aelorlor ko an aļ renaaj bar jepooļ kōj.
Marok ejjab juon kōkkalle eo eban wōr meram. Men eo in, meļeļein bwe jejjab pād ilo jikin eo ejejjet n̄an bōk meram. Ilo iien kar nijōk in marok jilōn̄lōn̄ eo elōn̄ raar kōm̧m̧ani eļap kijejeto ko n̄an en̄jake marok eo kar waļo̧k jen allōn̄, im lukon ļo̧k rālepen raan eo.
Ilo juon wāween eo alikar, jetōb in meram ej romaak ioon aolep menin kōm̧anm̧an an Anij. Setan enaaj kajjieon̄ kijejeto in kinōōrļo̧k kōj n̄an aelorlor eo ad make. Enaaj kōm̧m̧an bwe jen meļo̧kļo̧k meram; enaaj iuunļo̧k kōj n̄an marok ijo meram eban pād.
Maroklep ilo jetōb enaaj kōm̧m̧an bwe jen meļo̧kļo̧k meram men̄e jaar etetal ilo meram im m̧ōņōņō ippān Irooj. Mekarta, men̄e ilo iien marokļep, Anij ej ron̄ kajjitōk ko ad, ilo ad jar, “Irooj, Ij tōmak, kwon jipan̄ eō kōn aō jab tōmak.”11
Ilo raan ko an Alma eaar kanooj lōn̄ ro raar m̧akoko in bōk men ko an jetōb, im “kōn jab tōmak eo aer,” meram an Anij im m̧ool eaar jab delo̧n̄e ilo er “im raar kapen burueer.”12
Jej Rikabwijer ro an Meram
Em̧m̧aan ro jitōn bōro, ej ad pepe n̄an pād ilo jikin eo ejjejet n̄an lo meram eo ekwojarjar im m̧ool eo an gospel eo an Jisōs Kraist Men̄e eitok marok im n̄e laļ in emarok, jemaron̄ kālet n̄an etetal ilo meram eo an Kraist, kōjparok kien ko An, im wōnm̧aanļo̧k wōt im kam̧ool kōn lukkuun E im em̧m̧an eo An.
Āinwōt rikabwijer priesthood ro an Anij im āinwōt juon rikaļooraņ Jisōs Kraist, kom̧ij juon rikabwijer meram. Kōm̧m̧ani wōt men ko me renaaj kōļapļo̧k meram eo An ekwojarjar. “Kotak ami meram”13 im “āindein [en] romaak ami meram im̧aan mejen armej”—ejjab bwe ren lo im nōbar eok, ak “bwe ren lo ami jerbal ko reṃṃan, im nōbar Jememi i lañ.”14
Em̧m̧aan ro rejitōn bōro, kom̧ij kein jerbal ko ilo pein Irooj kōn juon jibadbad n̄an bōktok meram im kōmour n̄an jetōb ko an ro nejin Jemed Ilan̄. Bōlen kwojjab kile ke kokkar n̄an kōmour ro rej nan̄inmej ilo jetōb—ilo m̧ool ejjeļo̧k juon rijerbal in post office ekkar n̄an jipan̄ eo eake. Bōlen kwoj ioon apan̄ ko am̧ ilo jetōb. Mekarta, Irooj ej kūr eok. Eaar lewaj n̄an eok mālim im eddo n̄an pukotļo̧k ro rej pād ilo aikuj. Eaar kapelpel eok kōn priesthood eo An ekwojarjar n̄an bōktok meram n̄an marok im kotak im kōjeraam̧m̧an ro nejin Anij. Anij eaar kōjepļaaktok Kabun̄ in An im gospel in An, “eo ej kōmour jetōb ekinejnej.”15 Eaar kōpooj iaļ eo n̄an jetōb eo ewāmourur, n̄an pukot kōmour jān anjiwiwi im etal kōn peran jetōb ājmour.
Kajjojo iien n̄e kwoj ukōt būruwōm n̄an Anij ilo jar, kwoj en̄jake meram eo An. Kajjojo iien n̄e kwoj pukot An naan im Ankilaan ilo jeje ko rekwojarjar, meram ej romaakļo̧k. Kajjojo iien n̄e kwoj kile ro jet rej pād ilo aikuj ilo am̧ kaarmejete eok make n̄an jipan̄ ilo iakwe, meram ej ļapļo̧k im romaakļo̧k. Kajjojo iien n̄e kwoj anjo̧ jen kapo im kālet erreeo, kajjojo iien n̄e kwoj kappukot ak leļo̧k jeo̧rļo̧k bōd, kajjojo iien n̄e kwoj kam̧ool kōn m̧ool eo, meram ej kinōōrļo̧k marok im jipan̄ ro jet rej pukot meram im m̧ool.
Ļōmņak kōn en̄jake ko am̧ make, iien jerbal n̄an Anij im armej ro n̄e meram ekwojarjar eaar rome mour eo am̧ ilo tampel eo ekwojarjar, ilo tabōļ in kwojkwoj eo, ilo juon iien elur ilo jar im kōļmenļo̧kjeņ, ilo iien an baam̧le eo am̧ kuk ippān doon, ak ilo iien m̧akūtkūt in jerbal an priesthood. Kwaļo̧k men kein ippān baam̧le eo, ro m̧ōttam̧, im eļaptata ippān jodikdik ro nejid, ro rej pukot meram. Rej aikuj ron̄ jen kwe bwe kōn meram in ej itok kōjatdikdik im kōmour, aaet ilo juon laļ eo eobrak kōn marok.
Meram in Kraist ej bōktok kōjatdikdik, m̧ōņōņō, im kemour an aolep jetōb kinejnej ak nan̄inmej.16 Ro rej en̄jake menin renaaj erom̧ kein jerbal ilo pein Meram in Laļ n̄an leļo̧k meram n̄an ro jet.17 Renaaj en̄jake ta eo Kiin̄ Lamonai eaar en̄jake: “Meram in eaar bōktok lan̄lōn̄ in ilo e, kōdo̧ in marok ālkin aer kar jako, im … bwe meram in mour indeeo kar kōmerame jetōb eo an.”18
Em̧m̧aan raņ rejiten bōro, ro m̧ōtta, ej ad jibadbad n̄an pukot Irooj m̧ae iien An meram in mour indeeo erome kōj im naan in kam̧ool eo ad ejino pen im kajoor men̄e ilubwiljin marok.
Ej aō jar im kōjeraam̧m̧an bwe kwonaaj kobrak mejen kajjik eo am āinwōt rikabwijer priesthood ro an Anij Ekajoor Pōtata im iien otemjeļo̧k lan̄lōn̄ kōn meran eo An ilan̄. Ilo āt eo ekwojarjar etan Jisōs Kraist, ad Maajta, amen.