Tru long Tabu Plan blong God
Han blong Lod i stap gaedem yu. Tru “long tabu Plan blong God,” Hem i stap long ol smol ditel blong laef blong yumi mo tu long bigfala samting.
Ol brat mo sista. Taem mi stanap long wol jeneral konfrens ia we i fulap long insperesen mo filim paoa blong yufala mo spirit blong yufala, mi no save stop be blong tingting long olgeta toktok blong Aposol Pita: “[Lod], hem i gud blong mifala i stap long ples ia.”1
Hemia i no wanem Alma i talem afta we hem i prij long ol pipol blong Amonaeha. Alma i go aot long bigtaon from ol fasin nogud blong ol pipol. Afta wan enjel i kamaot long Alma mo askem hem blong gobak long bigtaon blong Amonaeha mo prij long ol pipol blong bigtaon ia.”2
Alma i bin gobak “kwiktaem” i pas “long wan narafala rod.”3
“Mo taem hem i go insaed long bigtaon, hem i bin hanggri, mo hem i talem long wan man se: ?Bae yu save givim long wan wokman blong God, we tingting blong hem i stap daon, wan samting blong kakae?”
“Mo man ia i bin talem long hem: Mi mi wan Man blong Nifae, mo mi save se yu yu wan tabu profet blong God, from yu nao man ia we wan enjel i bin talem long wan visen: ‘Bae yu akseptem hem.’”4
Man, ia i Amulek.
?I bin wan janis blong Alma i mitim Amulek? No, hemia i no wan aksiden, se hem i bin go insaed long bigtaon, i pas tru long wan narafala rod we bae i lidim hem i go long fetful man ia we i bae i kam olsem misinari kompanion blong hem.
Elda Neal A. Maxwell i bin eksplenem wan taem: “I nogat wan long yumi i stap yusum fulwan ol janis blong kasem lav, tijing mo givim seves tru long ol fren blong yumi we oli raonem yumi. Yu mo mi i save singaotem ol rilesensip ia olsem wan ‘aksiden.’ Toktok ol man blong wol ia oli yusum be aksiden i no wan stret toktok blong tokbaot ol wok blong wan God we i save evri samting. Hem i no mekem ol samting folem ‘aksiden’, o olsem nomo, be i folem ‘tabu plan blong God.’”5
Laef blong yumi oli olsem wan gem blong jes mo Lod i stap muvum yumi long wan ples i go long wan nara ples— sapos yumi ansa gud long smol voes blong spirit. Sapos yumi lukluk i gobak, yumi save luk han blong Hem long laef blong yumi.
Yumi luk ol kaen help we i kam long heven taem Nifae i go blong karem ol plet blong bras long Laban. “Mo Spirit i bin lidim hem, hem i no save yet wanem ol samting we [bae hem] i mekem.”6 Laban i bin foldaon long fored blong hem from hem i bin drong long waen mo Nifae i kilim hem i ded, i karem ol plet blong bras, mo i gobak long ol brata blong hem. ?Hem i bin janis blong hem blong mitim Laban? ?O i bin folem “tabu plan blong God?”
Plante impoten samting i stap hapen long gospel mo long Jos we i stap mekem kingdom blong God i kam moa bigwan long wol ia. Oli no happen folem wan aksiden be folem plan blong God. Hem we i mekem wol ia i naes i save mekem ol solwota oli kwaet wetem ol toktok blong hem, mo Hem i save lidim tugeta Alma mo Amulek, mo Nifae mo Laban blong stap long stret ples long wan stret taem
Semmak, ol samting mo ol rilesensip we oli stap happen long laef blong yumi we i mekem Kingdom blong God i gro moa long wol ia.
Elda Joseph B. Wirthlin i tokbaot wan taem, taem Presiden Thomas S. Monson i talem long hem: “I wan han we i stap gaed long evri samting. Samtaem taem ol samting oli happen, i no wan aksiden. Wan dei, taem yumi lukluk i gobak long wanem we yumi ting se i wan aksiden long laef blong yumi, bae yumi luk save se ating ol samting oli happen i no from wan aksiden.”7
Plante taem, ol gudfala wok blong yumi, sam man nomo oli save. Nomata long hemia, i gat rekod long heven. Wan dei, bae yumi stanap ol wan witnes blong ful sol blong yumi long ol wok blong stret fasin. No traol o disasta bae i stopem plan blong God blong stap. I tru, folem tabu plan blong God.” Glad i kam long moning blong laef bakegen.”8 “Mi kam daon long wol ia blong mekem tingting blong Papa blong mi,”9 Jisas i tijim. Ol brata mo sista yumi tu i nidim blong mekem tingting blong Papa.”
Tru long eksperiens blong laef blong miwan, mi save se Lod bae i muvum yumi olsem jes gem blong mekem wok blong Hem. Wanem bae i luk olsem wan janis nomo i, long reality, i gat wan Papa long Heven we i gat lav i stap luk daon long yumi, Hem we i save namba blong hea blong evri hed.10 Bae i nogat wan samting we bae i foldaon long graon we Papa blong yumi i no luk save.11 Lod i stap long ol smol ditel blong laef blong yumi, mo olgeta samting mo janis oli stap blong mekem yumi rere blong leftemap ol famli blong yumi mo ol narawan taem yumi help blong bildimap kingdom blong God long wol ia. Tingbaot, olsem Lod i talem long Abraham, “Mi save en long stat, from hemia ol han blong mi bae i protektem yu.”12
Lod i putum mi long wan hom wetem ol stret papa mo mama we i gat lav. Folem standet blong wol, i gat ol nomol pipol; hadwok papa blong mi i wan trak draeva; enjel mam blong mi, wan mama blong haos. Lod i helpem mi faenem naesfala waef blong mi, Milani; Hem talem long wan bisnisman, we i kam wan fren, blong givim mi wan janis blong wok. Lod i kolem blong wok long misin fil, tugeta taem mi yang mo olsem wan misin presiden; Hem i kolem mi long Kworom blong olgeta Seventy, mo naoia hem i kolem mi olsem wan Aposol. Lukluk bak, mi luk save se mi no bin mekem eni long ol muv ia; Lod nao i mekem, semmak olsem hem i stap mekem ol impotent muv blong yu mo blong olgeta we yu lavem.
?Wanem nao yu sut lukaotem long laef blong yuwan? ?Wanem nao i ol merikel blong God we i rimaenem yumi se Hem i stap kolosap, “Mi stap kolosap ia? Tingting long ol taem ia, sam long dei taem God i ak long laef blong yu—mo afta ak bakegen. Tingting long olgeta olsem ol taem we Lod i soem tras long yu mo long ol joes blong yu. Be letem Hem blong mekem moa long yu bitim hemia we yu save mekem blong yuwan yuwan. Tingting long hamas Hem i kam pat long laef blong yu. Sam taem yu tingting se ol jenis long ol plan blong yumi olsem ol nogud step long rod blong yumi. Tingting long olgeta olsem ol fas step blong stap long wok blong Lod.”13
Sam manis i pas, apugel blong mitufala i joenem wan yut grup blong oli visitim sam ples blong histri blong Jos. Tikit i se bae hem i pas tru long stret eria we misinari brata blong hem, apu boe blong mitufala i stap wok long hem. Apu gel blong mitufala i no bin gat tingting blong luk brata blong hem long misin blong hem. Be, taem bas i go insaed long taon we brata blong hem i stap wok long hem, tu misinari oli save luk tufala blong longwe mo tufala i stap wokbaot i kamdaon long rod. Wan long tufala misinari i brata blong apu gel blong mitufala.
Glad i fulumap bas taem ol yut oli askem draeva blong bas blong stop blong mekem se hem i save talem halo long brata blong hem. I no longtaem bitim wan minit, afta ol wota blong ae mo ol naes toktok, brata blong hem i gobak long rod blong hem blong mekem misin wok bong hem. Mifala i lanem afta se brata blong hem i bin stap wokbaot long rod i no longtaem bitim 5 minit, oli finis long wan apoenmen mo stap wokbaot i gobak long trak blong hem.
Papa long Heven i save putum yumi long ol situesen wetem stret stamba tingting long maen blong yumi. Hem i mekem plante olsem long laef blong mi, mo Hem i stap olsem long laef blong yu olsem hem i mekem long laef blong apu gel blong mitufala.
Wanwan long yumi i impoten mo Lod we i lavem yumi i kea, i toktok sloslo mo i lukluk daon long yumi long ol wei we oli spesel long wanwan long yumi. Hem i waes tumas mo gat moa paoa bitim ol man mo woman blong wol ia. Hem i save ol jalenj blong yumi, ol win blong yumi, mo ol stret tingting blong hat blong yumi.
Ova wan yia i pas, taem mi stap wokbaot tru long Tempol Skwea, wan long ol sista misinari i kam kolosap long mi mo askem, “?Yu tingbaot mi? Mi blong Florida.” Hem i talem long mi nem blong hem, Sista Aida Chilan. Yes, mi tingbaot klia se mi bin mitim hem finis mo famli blong hem. Stek presiden blong hem i talem blong mitufala i visitim famli blong olgeta. Mi tingbaot se mitufala i bin go from gel blong olgeta, Aida, we i no kasem baptaes yet. Afta long visit blong mitufala, mo moa bitim wan yia blong tijing mo visit, Aida i bin kasem baptaes.
Afta mitufala i visitim Tempol Skwea, Aida i bin raetem wan leta long mi. Hem i talem: “Mi save wetem ful hat blong mi se Papa long Heven i save wanwan long yumi mo se Hem i gohed blong putum yumi long rod blong ol narawan from wan risen. Tangkyu blong stap olsem wan long misinari blong mi. Blong kam lukaotem mi mo faenem mi faef yia i pas.”14 Aida i sendem long mi stori blong hem olsem wanem hem i joenem Jos mo tokbaot ol “tabu aksiden” we oli bin hapen long laef blong hem, we i bin lidim hem blong kasem baptaes mo Tabu Spirit, go long wan misin long Tempol Swea mo tempol mared blong hem we i hapen i no longtaem i pas.15
?I bin wan smol aksiden, o i hapen olsem nomo we stek presiden i bin lidim mifala long hom blong Chilan famli,? o ?i hapen olsem nomo se hem mo mi bae i mit afta long Tempol Skwea? Testemoni blong Aida i witnes se hemia i bin pat blong “Tabu Plan” blong God.
Lav blong Lod i stap wetem yumi. I no wan aksiden se taem yu stap filim Spirit blong Hem mo tekem aksen folem fas woning we yumi filim Hem olsem we Hem i promesem: “From we bambae mi go long fored blong yufala. Bambae mi stap long raet han blong yufala, mo long lef blong yufala, mo Spirit blong mi bambae i stap insaed long hat blong yufala, mo ol enjel blong mi oli stap raonem yufala, blong sapotem yufala.”16
Yumi evriwan i gat ol semmak samting long laef blong yumi. Yumi save mitim wan man we i luk olsem yumi save hem, mekem i kam niu ol rilesensip blong yumi, o faenem ol semmak samting wetem ol niu man. Taem ol samting ia oli happen, ating Lod i stap rimaenem yumi se yumi evriwan ol brata mo sista.” Yumi evriwan i stap long semmak wok ia—long wanem Josef Smit i singaotem “wok blong Kraes.”17
?Wea nao ol joes blong yumi oli kam insaed long “tabu plan blong God”? Yumi gat ol joes blong folem o no blong folem Sevya blong yumi mo ol lida blong Hem we Hem i bin jusum. Paten ia i klia long Buk blong Momon taem Ol Man blong Nifae oli tanem olgeta oli gowe long Lod. Momon i talem:
“Mo taem we oli luk…mo we Spirit blong Lod i nomo bin sevem olgeta; yes i bin kamaot long olgeta from Spirit blong Lod i no stap long ol tempol we oli no tabu.
“From hemia, Lod i bin stop blong sevem olgeta wetem paoa blong hem we i gat merikel mo i bitim eni paoa; from oli bin foldaon long wan ples we oli no biliv mo oli nogud tumas.”18
I no evri samting we Lod i askem long yumi i wan ansa long hamas yumi strong, olsem wanem yumi fetful, o wanem yumi save. Tingting long Sol, hem we Lod i stopem long rod blong go long Damaskes. Hem i stap go long rong wei long laef blong hem, mo i no abaot Not o Saot. Sol, oli bin putum hem nomo long stret rod bakegen. Afta oli save hem olsem Pol, wok blong hem olsem wan aposol i soem wanem Lod i save finis long hamas hem i save mekem mo wanem kaen man hem bae i kam olsem, be i no wanem hem i bin mekem olsem Sol. Long semmak fasin, Lod i save wanem hamas wanwan long yumi i save mekem o wanem kaen man bae yumi kam olsem. ?Wanem nao Aposol Pol i tijim? “Yumi save finis, se God i stap wok long olgeta samting we oli stap kamtru long laef bong yumi blong mekem i gud long yumi ya we yumi lavem hem, yumi ya we hem i singaot yumi finis stret long rod we hem i makemaot.”19
Taem yumi stret mo gud, taem yumi wantem, mo taem yumi save mekem, taem yumi traehad blong stap klin inaf mo kwalifae, yumi progres i go long ol ples we yumi neva tingting long hem mo kam pat long “tabu plan” blong Papa long Heven. Wanwan long yumi i gat tabu paoa ia insaed long yumi. Taem yumi luk God i wok tru long yumi mo wetem yumi, bae yumi leftemap tingting blong yumi, mo glad long gaed ia. Taem Papa long Heven i talem, “Hemia i wok mo glori blong mi— blong karem i kam fasin blong nomo save ded mo laef we i no save finis blong ol man,”20Hem i stap tokabaot evri pikinini blong Hem—yu speseli.
Han blong Lod i stap gaedem yu. “Tru long tabu plan blong God” Hem i stap long ol smol ditel blong laef blong yumi mo tu long bigfala samting. Olsem we Proveb i talem, “Yu mas trastem Hae God long olgeta tingting blong yu. … sapos yu stap mekem olsem, hem bambae i soemaot stret rod long yu, blong yu yu folem.”21 Mi testifae se bae Hem i blesem yu, sastenem yu mo karem pis i kam long yu. Long tabu nem blong Jisas Kraes, amen.