Seni Kokkot mi Pin
Poun ewe Samon mi emwenikemi. Ren “kokkot mi pin,” I mi nom non tichikin manauemi pwan non ekkewe mettoch mi auchea non manauemi.
Pwi me fefinei kana, nupwen ai uta ikei non ei mwichenapen mwichefen mi tori unusen fonufan me mefi ami pochokun me ngunumi, ese tufich ren ai usap ekieki ekkewe kapas an ewe Aposel Peter: “[Samon], mi och ach nonnom ikei.”1
Esap nenengeni met Alma a apasa mwirin an afanafan ngeni ekkewe aramas non Ammonaia. Alma a suseni ewe neni pokiten ekkewe aramas mi ngaw. Mwurin chok emon chon nang a pwa ngeni Alma me kokkori pwe epwe “niwin ngeni ewe teninimwen Ammonaia, me afanafan sefan ngeni ekkewe aramasen ewe teninimw.”2
Iwe Alma a fori ne “mwitir,” tonong non “ewe teninimw me ren pwan ew aan.”3
“Nupwen a tonong non ewe teninimw i a emon echik, iwe a apasa ngeni emon mwan: Kose mochen ngeni emon noun Kot chon angang mi tipetekison och mettoch pwe epwe mwongo?
“Iwe ewe mwan a apasa ngeni: “Ngang emon chon Nifai, iwe ua sinei pwe en emon soufosun Kot mi fel, pun en ewe mwan ewe chon nang a apasa usun me non ew nemwaswpwi: Kopwe etiwa.”4
Iei ewe mwan Amulek.
Met Alma a sereni ochu ne churi Amulek? Apw, esap chok ren an seroch an feino non ewe teninimw me ren ewe aan minne a emweni i ngeni ei mwan mi tupwon ewe epwe winiti chienan non angangen misineri.
Elter Neal A. Maxwell a awewei: “Ese wor emon neich a unusen aea ekkewe tufich mi kawor ngeni kich seni chiechiach. En me ngang sipwe eita ngenir ‘serochun’ chufengen. Ei kapas mi weweoch ngeni aramas ar repwe aea, ngeseroch esap ew kapas mi pung ach sipwe awewei ekkewe angang an emon Kot mi sinenap. Ese fori mettoch ren ‘seroch’ nge … seni ‘kokkot mi pin.’”5
Manauach a usun ew papen sikang me ewe Samon a amwokutu kich seni ew neni ngeni pwan ew—ika sia ponuweni memefin ngun. Ach ekieki usun akkom, kich mi tongnei kuna An mwokutukut non manauach.
Sia kuna ei sokkun eppetin nefin nupwen Nifai a niwin an epwe angei ekkewe peleich seni Laban. A “emmwen me ren ewe Ngun, [ese] sinei met me mwen ekkewe mettoch minne [i epwe] fori.”6 Laban a akomw ne nom mwan non an sakaweno iwe Nifai a nieno, angei ekkewe peleich, me su sefan ngeni pwin kewe. A seroch ren an churi Laban? Ika a fis ren “kokkot mi pin”?
Mettoch mi auchea a fis non ewe kapas allim me non ewe Mwichefen minne a awatteno ewe muun Kot won fonufan. Rese fis ren pekin chok seroch nge seni an Kot kokkot. I ewe a fori ei fonufan a tongeni fori ewe sat epwe nua ren An kapas me a tongeni emweni Alma me Amulek me Nifai me Leipan pwe repwe nom non ewe neni mi pung non ewe e fansoun mi affateno.
Ina usun, mettoch a fis me mwicheich ra fis non manauach pwe repwe awatteno an Kot angang won fonufan.
Elter Joseph B. Wirthlin a kapas usun ew fansoun nupwen Preseten Thomas S. Monson a apasa ngeni: “Mi wor ew poun emwen mi nap seni mettoch meinisin. Napengeni nupwen mettoch a fis, esap ren seroch. Fan ew, sipwe nenesefan ngeni met sia ekieki pwe mettochun seroch non manauach, sipwe sinei pwe eni resap mettoch seroch.”7
Napengeni, ekkoch chok ra sinei usun ach angang mi och. Nge ir mak me non nang. Fan ew, sipwe chon pwarata usun ach unusen tupwon ngeni angangen wenechar. Esap wor sossot ika osukosuk repwe tongeni atano an Kot kokkoten pwapwa. Ennetin, seni “kokkot mi pin,” “epwe pwapwa nesossor.”8 “Jises a aitikich “Ua wareto ngeni ewe fonufan pwe upwe fori mochenin Semei,”9me fefinei, sipwe pwan fori.
Seni pwisin mettoch a fis non manauei, ngang mi sinei pwe ewe Samon epwe amwokutu kich me won ena usun papen sikang ne fori An angang. Met epwe nikinikin pwe ew chok mettochun seroch, mi fen ennetin, etetten me ren emon Sam won Nang mi tong, ewe a tongeni aneani iteiten mokur meinisin.10Esap mwo emon nichok mi turutiw nepwun nge Semach we esap afani.11An ewe Samon mi nom non kukkkunun tichikin manauach, me ekkena mettoch ra fis me tufich repwe anisikich ne anisata ach famini me ekkoch nupwen sia anisi ne aueta ewe muun Kot won fonufan. Chemeni, usun met ewe Samon a apasa ngeni Abraham pwe I mi sinei amuchunon seni nepoputan; ina minne Poun epwe nom woch.”12
Ewe Samon a tinieito non eu imw ren emon sam me in mi tong. Ren met ewe fonufan a ekieki, ir rese kon auchea; semei, emon mwan mi tupwen, i emon chon wawa taraku; inei mi ning, a wisen tumunu ekkewe semirit. Ewe Samon a anisiei ai upwe kuta punuei, Melanie; A pese emon chon emwen an epwe ngeniei ai angang. Ewe samon a kokoriei ai upwe feino fori misin nekukuni me pwan nupwen ngang emon presetenin misin; A kokoriei ai upwe emon chon ewe Mwichen Fiik; me iei A kokkoriei ai upwe emon Apostel. Non ai ekikei usun met a fis, ua weweiti pwe use efisata ekkewe mettoch a fis; ewe Samon a efisata, usun chok A efisata ekkewe mettoch mi auchea fan itemi me fan iten ekkewe sia tongei.
Met oupwe kutta me non pwisin manauemi? Met kewe an Kot manaman a achema ngenikemi pwe I mi arapeto, a apasa, “Ngang iei”? Ekieki usun ekkena fansoun, ekkoch iteitan ran, nupwen ewe Samon a fen angang non manauemi—me angang sefan. Aucheanir pwe ir fansoun ewe Samon a fen pwarano an apinukunuk non ami me met oua finata. Nge mut ngeni I epwe fori pwe oupwe napanap ren ami tapweno mwirin I nap seni om kopwe pwisin sotuni. Aucheani An aninis. Fan ekkoch sia ekieki pwe ekkewe ekkesiwin non ach kokkot ir mettoch mi mwan non ach sai. Ekieki pwe ir eipweipwen ach nom won an ewe Samon sai.”13
Ekkoch maram a no noun neum emon nengin a fiti ew mwichen serafo ne katon ekkoch uruon nenien ewe Mwichefen. Ewe amuchunon neni mi makketiw non ewe kokkoten sai pwe epwe pasini ewe neni ikewe mwongean we misineri, noun noum emon at, a angang ie. Noun neum we nengin ese kokkoten an epwe kuna mwongean we won an misin. Nge, nupwen ewe pas a tori ewe teninimw ikewe mwongean a angang ie, ruemon misineri ra fetan won ewe an. Emon me neir mwongean we.
Meseik a ureno non ewe pas nupwen ewe serafo a tingorei ewe chon wunteng epwe kouno pwe neminewe epwe kapong ngeni mwongean we. Ese pwan tori ew minich, mwirin kechiw me kapas kirekiroch, mwongean we a niwin no ne apwonueta wisan misineri. Aua sinei mwirin pwe ese mwo tori nimu minich an mwongean we a keran chok nom won ewe aan, a fetan seni an appointment ngeni wan we.
Semach won Nang a tongeni wakichenong non neni ren ekkoch popun mi fateno. A fen fori usun ei non manauei, me I mi fori me non manauom, usun A fori me non manauen noun neum kewe
Emon me emon kich mi auchea me tong me ren ewe Samon, ewe a aureki, ewe a mengunungun, me ewe a tumunu kich non napanap mi sokono ngeni emon me emon kich. I mi unusen mirit me unusen manaman nap seni aramas mwan me fefin. Mi sinei usun ach osukosuk, ach win, me ochun mochenin netipach.
A nap seni ew ier a no, nupwen ua fetan won Temple Square, emon nein ekkewe sister misineri a feito me eis, “En mi chemeniei? Ngang seni Florida.” A ureniei itan, Sister Aida Chilan. Ewer, a fatoch ai chemeni ai churi i me an famini. Noun we presetenin steik a urenikem aupwe churi ewe Chilan famini. A fat pwe aua nom ikewe fan iten nour we nengin, Aida, ewe esamo papatais. Mwirin am we churir, me nap seni ew ierin am asukuna me chiechi ngeni, Aida a papatais.
Mwirin am we chufengen won Temple Square, Aida a makke ngeniei echo toropwe. A apasa: “Nang mi sinei ren unusen netipei pwe Semach won nang mi sinei emon me emon kich me a sopweno ne wakichenong non aanen emon me emon ren ew popun. Kinisou pwe en emon nein nei misineri. Ren om angeiu me kuttaei nimu ier a no.”14Aida a pwan tinato porousen an siwin a awewei ekkewe “seroch mi pin” minne a fis non manauan minne a esenipato an epwe papatais me apinano ngeni ewe Ngun mi Fel, an angangen misin won Temple Square, me an keran pupunu non tempel.15
Met a chok ew seroch pwe ewe presetenin steik a emwenikem ngeni imwen ekkewe Chilan we me neminewe me ngang aupwe chusefan won Temple Square? An Aida kapasen pwarata a pwarano pwe ei unusen kinikinin an Kot “kokkot mi pin.”
Ewe Samon a sani an epwe nom rech. Esap ew pekin seroch pwe nupwen oua mefi Ngunun we me fori ekkewe aewin memef pwe oua mefi I usun A pwonei: pwe I epwe feino mwen mesach, pwe I epwe nom won peniemwanich me won peniefefinich, me Ngunun epwe nonnom non netipach, me noun chon nang repwe pwennikicheno, ne chunakicheta.”16
Kich meinisin a nonno mettoch a fis non manauach. Meni sipwe churi emon mi nikinikin pwe kich mi sisinei, asofosefani ew chiechifengen, ika kuna mettoch mi nonno fengen ngeni emon chon ekis. Nupwen ekkena a fis, eni ewe Samon a achema kich pwe kich meinisin “mwomwongean me pwipwi” Kich sia ennetin fori ewe chok angang; Joseph Smith a eita ngeni “ewe angangen Kraist.”17
Iwe, ian ach pungun finata a kuch me non ew “kokkot mi pin”? Mi wor ew finata ach sipwe tapweno mwirin ika sisap tapweno mwirin ach Chon Amanau me noun sou emwen. Ei tetten mi fat me non ewe Puken Mormon nupwen ekkewe Chon Nifai ra kununo seni ewe Samon. Mormon a kechiw:
“Iwe ra kuna … pwe ewe Ngunun ewe Samon ese chiwen tumunur; ewer, a fen su seni ir pokiten Ngunun ewe Samon ese nonnom non tempel ese pin—
“Iei minne ewe Samon a kouno ne tumunur me ren an manaman mi amwarar me mi nap seni meinisin, pun ra fen turunong non ew nikinikin nukunukumang me anoninen.”18
Met meinisin ewe Samon a tingorei kich esap pungun ifa usun pochokunach, ifa usun wenecharach, ika met kich mi sinei. Ekieki usun Saul i ewe Samon a akounoi me won ewe aan ngeni Damascus. A feino non ewe aan mi mwan non manauan; esap ren pekin ennefen ika eor. Saul a emwen sefan seni nang. Mwirin a iteni Paul, an angangen aposel a pwarano usun met ewe Samon a fen sinei pwe mi tufichin fori me winiti, nge esap met i a akkokota epwe fori nupwen i Saul. Non ena napanap, ewe Samon mi sinei met kich mi tufichin fori me winiti. Met ewe Aposel Paul a aitikich? “Kich mi sinei pwe non mettoch meinisin God a fori fanasengisin mi murinno ren ir ekkewe mi tongei i, ir ekkewe God a fen korir pwe repwe fori pwisin netipan.”19
Nupwen sia tupwon, mocheni, me tongeni, nupwen sia achocho ne nimenimoch me tufich ngeni, sia fetanoch ngeni neni sise tongeni aneanei me winiti kinikinin an Samach won Nang we “kokkot mi pin.” Emon me emon kich mi wor mettoch mi pin non kich. Nupwen sia kuna Kot a anagng non kich me rech, sipwe pesepes, me kinisou ren ena emwen. Nupwen Semach won Nang a apasa pwe An angang me ning ina epwe apwonueta ach sisap tongeni mano me manau esemuch an aramas,”20A kapas usun Noun meinisin—akkaewin en.
Poun ewe Samon mi emweni kemi. Ren “kokkot mi pin,” I mi nom non tichikin manauemi pwan non ekkewe mettoch mi auchea non manauemi. Usun mi mak non Proverbs, “Kopwe epinukunuku ewe Samol ren unusen netipom, … iwe epwe pwar ngonuk ewe aan mi pung.”21Ua pwarata pwe I epwe efeiochu kemi, me ngeni kemi kinamwe. Non itan mi pin Jises Kraist, amen.