Los ntawm lub Ntuj Ceeb Tsheej tus Txheej Txheem
Tus Tswv txhais tes tab tom coj nej kev. Los ntawm “lub ntuj ceeb tsheej tus txheej txheem,” Nws yeej nyob hauv tej yam me me thiab tej xwm tseem ceeb hauv nej lub neej.
Cov kwv tij thiab cov muam, hnub no thaum kuv sawv rau ntawm lub tuam rooj sab laj uas raug tshaj tawm thoob ntiaj teb no thiab hnov nej lub zog thiab nej tus ntsuj plig, kuv xav txog tus Thwj Tim Povlauj cov lus uas hais tias: “[Tus Tswv es], peb tuaj nyob ntawm no zoo kawg li.”1
Amas tsis tau hais tib cov lus ntawd tom qab nws mus qhia cov neeg hauv lub nroog Amonaihas. Amas khiav ntawm lub nroog ntawd vim cov neeg ua siab phem. Tsis ntev ces ib tug tim tswv tshwm los rau Amas pom thiab tau hais kom nws yuav “rov qab mus rau lub nroog Amonaihas, thiab rov qhuab qhia dua rau cov neeg ntawm lub nroog.”2
Amas txawm mus “nrawm nroos,” mus “lwm txoj kev nkag mus rau hauv lub nroog.”3
“Thiab thaum uas nws tau nkag mus rau hauv lub nroog nws tau tshaib plab heev, thiab nws tau hais rau ib tug txiv neej tias: Koj puas kam muab ib yam dab tsi rau Vajtswv tus tub qhe uas txo hwj chim noj?
“Thiab tus txiv neej tau hais rau nws tias: Kuv yog ib tug Neeg Nifais, thiab kuv paub tias koj yog Vajtswv ib tug yaj saub dawb huv, vim koj yog tus neeg uas tus tim tswv tau hais nyob hauv ib txoj kev ua yog toog pom tias: Koj yuav tau txais.”4
Tus txiv neej ntawd yog Amulej.
Amas puas lam tau lam tuaj ntsib Amulej? Tsis yog, hais tias nws lam taug txoj kev ntawd hauv lub nroog thiaj tau ntsib ib tug txiv neej uas rau siab ntseeg uas yuav los ua nws tus khub tawm mus ua tub txib ntag.
Txwj Laug Neal A. Maxwell piav ib zaug hais tias: “Peb leej twg los tsis siv tag nrho cov phooj ywg uas nyob ntawm peb ib ncig. Tej zaum koj thiab kuv yuav hais tias ‘lam tau lam muaj’ qhov ntawd xwb. Lo lus no yog ib lo lus uas tib neeg ntiaj teb hais, tiam sis lam tau lam muaj tsis yog ib lo lus zoo siv thaum hais txog tej hauj lwm zoo kawg nkaus uas Vajtswv ua. Nws tsis yog vim ‘lam tau lam muaj’ tiam sis … los ntawm ‘lub ntuj ceeb tsheej tus txheej txheem.’”5
Peb lub neej mas zoo nkaus li ib yam khoom ua si thiab tus Tswv muab peb txav mus txav los ib qho dhau ib qho—yog hais tias peb kam ua raws li tej kev tshoov siab ntawm peb sab ntsuj plig. Thaum saib yav nram qab, peb pom tau Nws txhais tes hauv peb lub neej.
Peb pom lub ntuj ceeb tsheej txoj kev coj qhia thaum Nifais rov qab mus nqa cov phiaj ntawm Lanpas. Nws “raug tus Ntsuj Plig coj nws kev, paub tsis tau ua ntej rau tej uas [nws yuav] tsum ua.”6 Tsiv ntev ces Lanpas sawv rau ntawm nws xub ntiag qaug cawv thiab Nifais muab nws tua, tau mus nqa cov phiaj, thiab khiav mus ntsib nws cov tij laug. Puas yog nws muaj hmoov lam tuaj ntsib Lanpas xwb? Los sis puas yog vim rau qhov “lub ntuj ceeb tsheej tus txheej txheem”?
Tej xwm uas kawj los hauv txoj moo zoo thiab hauv lub Koom Txoos uas pab Vajtswv lub nceeg vaj hauv ntiaj teb loj hlob tuaj. Tej no tsis yog lam tau lam muaj xwb tiam sis yog raws li Vajtswv lub txoj hau kev. Nws yog tus uas tau tsim lub ntiaj teb no uas yeej muaj cuab kav ua rau cov hiav txwv tu tu thaum Nws hais lus thiab coj tau Amas thiab Amulej thiab Nifais thiab Lanpas los nyob hauv tib qhov chaw thaum tib lub sij hawm.
Ib yam li ntawd, tej xwm thiab txoj kev nrog lwm tus neeg sib raug zoo kawj hauv peb lub neej kom pab khiav Vajtswv txoj hauj lwm hauv ntiaj teb no.
Txwj Laug Joseph B. Wirthlin tau hais txog ib zaug uas Thawj Tswj Hwm Thomas S. Monson hais rau nws hais tias: “Muaj ib txhais tes nyob saum ntug uas coj kav txhua yam. Feem ntau thaum peb pom tej yam kawj los, tsis yog lam tau lam ua xwb. Yuav muaj ib hnub twg, thaum peb saib tej yam hauv peb lub neej uas peb xav tias lam tau lam muaj, es peb yuav pom hais tias tsis yog lam tau lam muaj xwb.”7
Feem ntau mas, tsuas muaj ob peb tug neeg uas paub txog peb tej hauj lwm zoo. Tiam sis, yeej muab tej ntawd sau tseg saum ntuj ceeb tsheej. Yeej yuav muaj ib hnub, uas peb yuav sawv ua ib tug neeg tim khawv txog tej hauj lwm ncaj ncees uas peb tau ua tag siab tag ntsws. Tsis muaj ib txoj kev sim siab los sis teeb meem dab tsi uas rhuav tau Vajtswv txoj kev zoo siab. Muaj tseeb tiag, los ntawm “lub ntuj ceeb tsheej tus txheej txheem,” “thaum kaj ntug yuav muaj kev zoo siab.”8 Yexus qhia hais tias, “Kuv tau los rau hauv lub ntiaj teb los ua li Leej Txiv lub siab nyiam.”9 Cov kwv tij thiab cov muam es, peb tau ua li ntawd thiab.
Vim kuv pom tej yam hauv kuv lub neej mas, kuv thiaj paub hais tias tus Tswv yuav muab peb txav mus txav los kom ua tau Nws tej hauj lwm. Tej yam uas yus xav tias lam tau lam muaj xwb, yeej yog vim ib Leej Txiv Saum Ntuj Ceeb Tsheej uas hlub peb coj peb kev, nws yog tus uas suav tau txhua txoj plaub ntawm tib neeg tej taub hau.10 Txawm muaj ib tug noog twg uas poob pem teb los Leej Txiv yeej pom.11 Tus Tswv nyob hauv tej yam me me hauv peb lub neej, thiab tej lub sij hawm thiab tej cib fim ntawd yuav pab peb npaj los tsa peb tsev neeg thiab lwm tus neeg thaum peb sim txhim tsa Vajtswv lub nceeg vaj hauv ntiaj teb no. Nco qab ib yam li tus Tswv hais rau Anplaham hais tias, “Kuv paub qhov kawg ntawm qhov pib; yog li ntawd kuv txhais tes yuav coj kav koj.”12
Tus Tswv tso kuv hauv ib lub tsev uas muaj niam txiv uas hlub peb. Hais txog lub ntiaj teb tej kev cai, nkawd zoo xws luag xwb; kuv txiv uas rau siab ntseeg yog ib tug neeg tsav tsheb thauj khoom; kuv niam uas yog ib tug tim tswv, nyob hauv tsev ua niam tsev xwb. Tus Tswv tau pab kuv nrhiav kuv tus me poj niam, Melanie; Nws txhiv ib tug neeg uas ua lag ua luam, uas tau los ua kuv ib tug phooj ywg, kom muab ib txoj hauj lwm rau kuv ua. Tus Tswv tau hu kuv mus ua tub txib, thaum ua ib tug tub hluas thiab ua ib tug thawj tswj hwm rau qhov chaw tshaj tawm txoj moo zoo; Nws hu kuv los rau Pawg Xya Caum, thiab nim no Nws tau hu kuv los ua ib tug Thwj Tim. Thaum saib nram qab, kuv pom tau hais tias tsis yog kuv xaiv ua tej no; tus Tswv yog tus coj kav, ib yam li nws tab tom ua tej yam tseem ceeb hauv nej thiab cov uas nej hlub lub neej thiab.
Nej yuav tsum nrhiav tej yam dab tsi hauv nej lub neej? Muaj Vajtswv tej txuj ci dab tsi uas ua rau nej paub tias Nws nyob ze nej, es tab tom hais tias, “Kuv yeej nyob ntawm no”? Cia li xav txog tej lub sij hawm ntawd, ib txhia yus pom txhua txhua hnub, thaum uas tus Tswv coj nej lub neej—ces txawm ua ib yam ntxiv rau nej. Khaws tej ntawd ua tej lub sij hawm uas tus Tswv tau tso siab rau nej thiab nej tej kev xaiv. Tiam sis cia Nws kho nej lub neej kom zoo dua nej ua tau nej tus kheej xwb. Cia li muaj kev zoo siab rau Nws txoj kev pab. Tej thaum peb yuav xav tias txoj kev hloov peb txoj hau kev yog ib yam kev dawm ko taw hauv lub neej no. Cia li xav hais tias tej ntawd tsuas yog thawj ob peb ruam taw mus “khiav tus Tswv tej hauj lwm.”13
Ob peb hlis tas los lawm peb ib tug ntxhais xeeb ntxwv mus koom ib pawg tub ntxhais hluas mus xyuas tej qhov chaw ntawm lub Koom Txoos zaj keeb kwm. Lawv npaj yuav mus dhau plaws qhov chaw uas nws tus nus, peb tus tub xeeb ntxwv, tab tom ua tub txib. Peb tus ntxhais xeeb ntxwv yeej tsis tau npaj siab yuav ntsib nws tus nus thaum nws mus ua tub txib. Tab sis mas, thaum lub npav nkag mus hauv lub nroog uas nws tus nus nyob hauv, txawm muaj ob tug tub txib taug txoj kev ntawd. Ib tug tub txib ntawd yog nws tus nus ntag.
Sawv daws hauv lub npav zoo siab thaum cov tub ntxhais luas thov tus neeg tsav tsheb nres kom nws muaj sij hawm ntsib nws tus nus. Lawv nres ntawd ib nyuag pliag, los kua muag thiab sib tham ob peb los, ces nws tus nus txawm rov qab taug kev mus tub txib. Yav tom ntej peb thiaj kawm tau hais tias nws tus nus tsuas nyob ntawm txoj kev ntawd li tsib na this, nyuam qhuav mus qhia ib yim neeg es tab tom taug kev mus rau nkawd lub tsheb xwb.
Leej Txiv Saum Ntuj Ceeb Tsheej muaj hwj chim tso peb hauv tej qhov chaw kom ua ib yam uas nws xav kom ua. Nws twb ua li ntawd hauv kuv lub neej, thiab Nws tab tom ua li ntawd hauv nej lub thiab, ib yam li Nws tau ua rau wb cov me nyuam xeeb ntxwv.
Tus Tswv yeej saib peb txhua tus rau nqi thiab hlub peb heev, nws tu, nws ntxhi lus, thiab nws tsom kwm saib xyuas peb sawv daws li peb xav tau. Nws yeej muaj tswv yim thiab hwj chim ntau tshaj cov txiv neej thiab poj niam hauv ntiaj teb no. Nws paub peb tej kev cov nyom, peb tej kev kov yeej, thiab tej kev xav ncaj ncees hauv peb nruab siab.
Ntau tshaj ib xyoos tas los lawm, kuv tab tom taug kev ntawm Tshav Tuam Tsev, muaj ib tug ntxhais txib uas los hais kuv hais tias, “Koj puas nco qab kuv? Kuv tuaj Florida tuaj.” Nws qhia kuv hais tias nws lub npe yog, Muam Aida Chilan. Aws, kuv yeej nco qab thaum kuv ntsib nws thiab nws tsev neeg. Nws tus thawj tswj hwm rau ceg txheem ntseeg tau hais kom wb yauv mus ntsib nws yim neeg. Thaum mus txog ntawd kuv txawm paub hais tias wb mus xyuas ntawd vim yog lawv tus ntxhais Aida, tseem tsis tau ua kev cai raus dej. Tom qab wb mus xyuas tas thiab tom qab mus qhia thiab pab saib xyuas yim neeg ntawd rau ib xyoos, Aida tau ua kev cai raus dej.
Tom qab wb sib ntsib hauv Tshav Tuam Tsev, nws sau ib tsab ntawv rau kuv. Nws hais tias: “Kuv paub tag siab tag ntsws hais tias Leej Txiv Saum Ntuj Ceeb Tsheej yeej paub peb txhua leej txhia tus thiab tias Nws pheej tso peb hauv tej qhov chaw uas lwm tus neeg yuav pab tau peb. Ua tsaug koj yog ib tug tub txib rau kuv, vim koj tau los pab thiab nrhiav tau kuv tsib xyoos tas los lawm.”14 Aida kuj sau ntawv txog nws txoj kev hloov siab los ntseeg txog tej yam “lam tau lam muaj los saum ntuj ceeb tsheej los” uas tau kawj hauv nws lub neej kom pab nws ua kev cai raus dej thiab txais kev pom zoo, mus ua tub txib hauv Tshav Tuam Tsev, thiab tsis ntev tas los no tau sib yuav hauv lub tuam tsev.15
Puas yog vim lam tau lam ua tus thawj tswj hwm rau ceg txheem ntseeg ntawd tau coj wb mus rau yim neeg Chilan lub tsev los sis tias yav tom ntej wb yuav los sib ntsib ntawm Tshav Tuam Tsev? Aida zaj lus tim khawv qhia hais tias txhua yam no tsuas yog ib qho ntawm Vajtswv lub tswv yim los ntawm “lub ntuj ceeb tsheej tus txheej txheem.”
Tus Tswv nyiam nrog peb nyob. Tsis yog hais tias yus lam tau lam hnov Nws tus Ntsuj Plig thiab ua raws li Nws tej kev tshoov siab yus thiaj hnov tau Nws ib yam li Nws tau cog lus tseg hais tias: “Kuv yuav ua nej ntej. Kuv yuav nyob ntawm nej sab xis thiab nyob ntawm nej sab laug, thiab kuv Leej Ntsuj Plig yuav nyob hauv nej tej siab, thiab kuv cov tim tswv nyob ib puag ncig nej, los txhawb nqa nej.”16
Peb sawv daws raug tej yam xwm zoo sib xws hauv peb lub neej. Tej zaum peb yuav ntsib ib tug neeg uas zoo nkaus li peb paub, rov qab ntsib ib tug qub phooj ywg, los sis nrog ib tug neeg qhua sib raug zoo. Thaum muaj li ntawd, tej zaum tus Tswv tab tom qhia peb hais tias peb sawv daws yeej yog kwv tij thiab nus muam. Peb yeej sib koom rau hauv tib txoj hauj lwm; uas yog qhov uas Yauxej Xamiv hu ua “Khetos txoj hauj lwm.”17
Nim no, peb txoj kev ywj siab xaiv nyob qhov twg hauv “lub ntuj ceeb tsheej tus txheej txheem”? Peb muaj kev xaiv seb peb puas yuav ua los sis tsis ua raws li peb tus Cawm Seej thiab Nws cov thawj coj hais. Tus qauv yeej meej kawg hauv Phau Ntawv Maumoos thaum cov Neeg Nifais tig lawv tej siab tawm ntawm tus Tswv mus. Maumoos hais tias:
“Thiab lawv tau pom … tias tus Tswv tus Ntsuj Plig tsis tsom kwm lawv ntxiv lawm; muaj tseeb tiag, nws tau ncaim ntawm lawv mus vim tus Tswv tus Ntsuj Plig tsis nyob hauv tej tuam tsev uas tsis dawb huv—
“Yog li ntawd tus Tswv tau tsum tsis tsom kwm lawv los ntawm nws lub hwj chim tseem ceeb thiab piv tsis tau, vim lawv tau poob mus rau hauv ib qhov uas tsis ntseeg thiab phem heev kawg nkaus.”18
Nim no tus Tswv tsuas thov kom peb qhia seb peb muaj zog npaum li cas, peb rau siab ntseeg ntau npaum li cas, los sis seb peb paub tej yam twg. Xav txog Xaulus, uas tus Tswv nres thaum nws taug kev mus rau lub nroog Damaxes. Nws tab tom mus yuam kev hauv nws lub neej, tsis yog hais tias nws mus peb qaum teb los sis nram qab teb. Xaulus raug lub ntuj ceeb tsheej rov qab coj nws kev. Yav tom qab ntawd lawv hu nws ua Povlauj, ib tug thwj tim uas tab tom ua tej ua Tswv yeej paub tias nws ua tau thiab tau rais los ua tus neeg uas tus Tswv paub tias nws yog, tsis yog tej yam uas Xaulus yuav ua. Tib yam li ntawd, tus Tswv yeej paub hais tias peb sawv daws muaj cuab kav ua thiab peem los ua neeg zoo li cas. Tus Thwj Tim Povlauj tau qhia li cas? “Peb paub hais tias peb cov uas hlub Vajtswv, txawm yog peb tau zoo thiab txom nyem los Vajtswv yuav ua kom tej ntawd muaj nqis rau peb cov uas Vajtswv pom zoo hu los raws li Vajtswv npaj tseg lawm.”19
Thaum peb ua ncaj ncees, kam ua, thiab muaj cuab kav, thaum peb sim ua neeg tsim nyog, peb loj hlob ntau tshaj peb xav tau thiab rais los mus ua ib tug hauv Leej Txiv Saum Ntuj Ceeb Txheej qhov ntawm “lub ntuj ceeb tsheej tus txheej txheem.” Peb txhua tus yeej los saum ntuj ceeb tsheej los. Thaum peb pom Vajtswv ua hauj lwm dhau ntawm peb thiab nrog peb ua, thov kom qhov ntawd yuav txhawb nqa peb, thiab muaj kev ris txiaj rau kev coj qhia ntawd. Thaum peb Leej Txiv Saum Ntuj Ceeb Tsheej hais tias, “Nov yog kuv txoj hauj lwm thiab kuv lub yeeb koob—ua kom tib neeg tsis txawj tuag thiab tau txoj sia nyob mus ib txhis,”20 Nws tab tom hais txog tag nrho Nws cov me nyuam—nws hais txog koj ntag.
Tus Tswv txhais tes tab tom coj nej kev. Los ntawm “lub ntuj ceeb tsheej tus txheej txheem,” Nws yeej nyob hauv tej yam me me thiab tej xwm tseem ceeb hauv nej lub neej. Li hais hauv Paj Lug tias, “Tso siab rau tus Tswv kom kawg nej lub siab lub ntsws; … nws thiaj yuav coj koj taug txoj kev uas yog txoj tseeb.”21 Kuv hais lus tim khawv tias Nws yuav foom koob hmoov rau nej, thiab yuav coj kev thaj yeeb los rau nej. Los ntawm Yexus Khetos lub npe, amees.