Ke Plwacn Muhtahl
Poun Leum kol kom. Ke “plwacn muhtahl,” El oasr ke kais kuhtuh srihsrihk ke moul lom an oacna ke mwe sruhf luhlahp.
Tamuhlwel ac tahmtahel, ke nga tuh ke acn se inge ke toeni luhlahp wolacna fin facluh nohfohn se inge ac puhla kuh lowos ac nguhn lowos, nga nuhnkuh ke kahs lal Mwet Sap Peter: “[Leum], wo ke kut muta inge.”1
Tiac na ma Alma el fahk tukun el luti mwet Ammonihah. Alma el som liki siti sacn mweyen arulacna koluk mwet we ah. Tiac paht tohkoh lipufacn se sikyang nuh sel Alma ac sapkihn nuh sel in “fohlohk nuh ke siti lal Ammonihah, ac sifilpac luti nuh sin mwet ke siti sac.”2
Alma el “silahklahk”, ilyak nuh in “siti uh ke siena inkacnek.”3
“Ac ke el ilyak nuh in siti sac el tuh masrinsrwacl, ac el fahk nuh sin sie mwet: Yac kom fah sang nuh sin sie mwet kuhlwacnsap puhsisacl luhn God mongo elan kang?”
Ac mukul sac fahk nuh sel: “Nga sie mwet Nephi, ac nga etuh lah kom sie mwet pahluh muhtahl luhn God, tuh kom pa mwet se suc sie lipufacn el fahk ke sie aruhruhma: Kom fah eis.”4
Mukul sacn pa Amulek.
Kuh Alma el sifacna konwaclwack Amulek? Moh, tiac ma falyang se na lah el som nuh ke siti sac ke inkacnek se ma ac kohlohl nuh yurin mukul luhlahlfongi se inge ma ac fah weluhl ke misin se lal ah.
Elder Neal A. Maxwell el tuh ahkuhtweyac: “Wacngihn sesr nuh kuhlwacnsap na pwacye nuh sin mwet ma kuht kawuck nuh se tari uh. Kowos ac nga kuh in nuhnkuh muh kuhpahsr lasr uh ‘ma na falyang se.’ Kahs inge kahlwem sesr mwet facluh, tuh ma na falyang tiac kahs fal in ahkuhtweyac mukwikwi luhn God se suc etuh ma nuhkwewa uh. El tiacna orekma ke ‘ma na falyang’ tuh ke ‘plwacn muhtahl.’”5
Moul lasr oacna chessboard se ac Leum el kol kuht liki acn se nuh ke sie pac sahyac—kuht fin ukwe mwe kolyuck luhn nguhn. Kuht fin motko kac, kuht kuh in liye kolyuck Lal ke moul lasr.
Kuht akihlen kain kolyuck tuhkuh inkuhsrao se inge ke Nephi el fohlohk in eis puhlwet ah sel Laban. El: “tuh kolyuck sin Nguhn, tiac etuh met ma [ma el] enenuh in oruh.”6El sa na konwaclwack Laban sruhi na puhtatlac mutul ac Nephi el unilyac, eis puhlwet ah, ac kahinglac fohlohk nuh yurin mukul wiyacl. Kuh ma na falyang se lan konwaclwack Laban? Kuh ma ke “plwacn muhtahl”?
Ma yohk srihpac sikyak ke wosasuc ac ke Alu uh ma ahkfahsrye tohkohsrahi luhn God uh fin facluh. Tiac na ma falyang na tuh ma ke plwacn luhn God. El suc oraclah facluh se inge kuh in ahkmisyelah meoa uh ke kahs Lal, ac kuh in kohlohl kwewana Alma ac Amulek, ac Nephi ac Laban elos in muh som nuh ke acn pwacye se ke pacl pwacye se.
Ohinge, ma sikyak ac kawuck tuhkuh nuh ke kais sie sin moul lasr ma ahkfahsryelah orekma luhn God fin facluh.
Elder Joseph B. Wirthlin el sramsram ke sie pacl ma Prestuhn Thomas S. Monson el fahk nuh sel: “Oasr paho in kolyuck se ke ma nuh kwewa. Ke ma inge sikyak, tiac na ma na falyang se. Sie lwen, ke kuht motko ke ma nuhkwewa ma luhman falyang ke moul lasr, kuht ac akihlen ma inge sahp tiac na ma na falyang pa inge.”7
Inkaiyacn pacl, orekma wo lasr etweyuck sin mwet na ekahsr. Ma wo kuht oruh, tuhsruhk, sihmihsyucklac inkuhsrao. Sie lwen, kuht ac tu in ahkloh nuh ke oaru insacnweacng lasr nuh ke orekma luhn suwohswohs. Wacngihn ma koluk kuh ongaiyac kuh in kuhnaoslah plwacn in engn luhn God. Ke pwacye, ke “plwacn muhtahl,” “engan fah sikyak ke lotutang.”8 “Nga tuhkuh nuh facluh in oruh kena luhn Pahpah tuhmuhk,”9 Jisus El tuh luti. Tamuhlwel ac tahmtahel, kuht enenuh in oruh oacpacna.
Ke ma nga sifacna puhlakihnyuck ke fuhfahsryucsr luhn moul luhk, nga etuh lah Leum Elac kol kuht ke luhman chessboard sacn in oruh orekma Lal. Ma se ma luhman falyang na, ke pwacye, kolyuck sin Pahpah luhngse Inkuhsrao, suc kuh in oacklah aunsifowos nuh kwewa.10 A tiac sie fanna sin won sparrow kuh in puhtatlac nuh infohk uh Pahpah tuhmasr El fin tiac etuh kac.11 Leum El oasr ke ma srihksrihk ke moul lasr, ac pacl falyang ac wo oasr in muh ahkoekuhtlac in ahkkweye sucu lasr ac mwet sahyac ke kuht kahsruh muhsaheack tohkohsrahi luhn God fin facluh. Esam, oacna Leum El fahk nuh sel Abraham lah El etuh muhtwacwacackiyac nuh ke sahflahiyac; pwacnwacng Pahol fah liyekuhtyang.12
Leum el fihliyucwi ke lohm se ma oasr pahpah ninac luhngse we. Ke ohiyac luhn facluh, elos sahp luhman mwet na; pahpah oaru tuhmuhk el orekma ke mwet utuck stosah ah; ninac wolacna kiyuck, el orekma ke lohm ah. Leum El tuh kahsreyuc konwacack muhtwacn wowo kiyuck, Melanie; El kol mwet orekma ke business se, suc kawucklac luhk, in use nuh sihk orekma. Leum El pahngonyuc in kuhlwacnsap ke misin luhk, kwewana ke nga fuhsr ac ke mission prestuhn se; El pahngonyuc nuh ke U luhn Mwet Itngucul, ac ingena El pahngonyuc in Mwet Sap se. Ke nga motko kac, nga akihlen tuh tiac nga pa plwacni kuhtwena ma inge; Leum pa oruh uh, oacna ke El plwacni ma yohk srihpac nuh suwos ac mwet kowos luhngse.
Na meac kowos enenuh in suk ke moul lowos sifacna? Kuh meac mwe usrnguck luhn God ma ahkacsmakihnye kowos lah El fototo, ac fahk, “Nga pa inge”? Nuhnkuh ke pacl, kuhtuh lwen nuh kwewa, ke Leum el orekma in moul lowos—ac na sulpac orekma. Sacohkkihn pacl inge oacna pacl ma Leum el luhlahlfongi kowos ac sulaclah lowos. Tuh lwelah Elan kahsruh kowos in wo liki na kowos kuh in oruh sifacna an. Sacohkkihn kolyuck Lal. Kuhtuh pacl kuht nuhnkuh muh ma ma eklac ke plwacn lasr oacna tahfonglac ke fuhfahsryucsr lasr. Nuhnkuh ke ma inge oacna ip se met in “oruh orekma luhn Leum.”13
Kuhtuh mahlwem tari ac tuhlihk muhtwacn se nuhtin tuhlihk nahtuhsr wi u luhn mwet fuhsr se in som liye acn ma yohk srihpac nuh ke Alu uh. Acn sahflah elos ac som nuh we ahluhkwelah acn se ma mukul wiyacl, tuhlihk mukul se nuhtin tuhlihk se nahtuhsr, kuhlwacnsap ke misin lal. Tuhlihk muhtwacn se nuhtin tuhlihk nahtuhsr ah tiac nuhnkuh in liye mukul wiyacl ke misin lal. Tuhsruhk, ke bus soko ah som nuh ke mura ma mukul wiyacl kuhlwacnsap we, misinacri luo liyeyuck fahsr ke inkacnek ah. Sie selos pa mukul se wiyacl ah.
Tuhlihk lutlut lun bus soko ah rahrahlac ac siyuck sin mwet fuhsr sac in tui elan muh kuh in pain mukul wiyacl. Ke mihnit se na, tukun sronin muhta ac kahs kuhlwacng, mukul tuhmwacl fohlohk nuh ke kunohkohn in misin lal. Kuht etwaclah tohk lah tamuhlwel lal oasr ke inkacnek ah ke pacl na fototo se, fahsr nuh ke stosah okwacl tukun lutlut lal.
Pahpah Inkuhsrao El kuh in fihlikuhtlac ke acn in oruh ma yohk srihpac. El tuh oruh in moul luhk, ac El oruh in moul lowos, ac El oruh ke moul luhn tuhlihk nuhtin tuhlihk nahtuhsr ah.
Kais sie sesr sacohk ac luhngseyuck sin Leum, suc luhngse, suc mahmah, ac suc liyekuhtyang ke ohiyac sifacna nuh sesr. El lahlmwetmwet ac kuh ke luhpah na yohk na pwacye se liki mukul ac muhtwacn luhn facluh. El etuh ma upac lasr, kuhtanglah lasr, ac kena suwohs luhn insiyacsr.
Yac se tari ac, ke nga fahsr ke Temple Square ah, sie sin misinacri muhtwacn ah fahsruh nuh yuruk ac siyuck, “Kuh kom esamyuc? Nga mwet Florida se.” El fahk nuh sihk inel, Tahmtahel Aida Chilan. Ahok, nga esam ke nga ohsun nuh sel ac sucu lal. Stek prestuhn se lal fahk nuh sesr in som muhtwacta ke sucu lalos ah. Kahlwem lah kuht oasr we ke tuhlihk muhtwacn se nahtuhl, Aida, suc soenna pacptaislac. Tukun muhtwacta se lasr ah, ac loes liki yac se ke lutlut ac muhtwacta, Aida el pacptaislac.
Tukun kuht sramsram ke Temple Square, Aida el suhmuhslah lwacta se nuh sihk. El fahk: “Nga etuh ke insiyuck nohfohn lah Pahpah Inkuhsrao El etwekuht kais sie ac lah El nuh fihlikuhti ke inkacnek lasr ke srihpac se. Kuloh nuh sum lah kom sie sin misinacri luhk. In saplakme nuh sihk ac konweyucyak yac limekohsr tari ac.”14 Aida el oacyacpac suhpwacma nuh sihk sramsram se lal ke el wi Alu ma sramsram ke “ma falyang muhtahl” ma sikyak ke moul lal ma kohlohl nuh ke pacptais ac ahkkweyeyuck lal, in wi misin ke Temple Square, ac pahyuck lal ke tempuhl.15
Kuh ma falyang se na lah stek prestuhn se lal kol kuht nuh ke lohm luhn Chilan kuh lah nga ac el ohsun ke Temple Square? Luhlahlfongi lal Aida ahkpwacyei lah ma inge ip ke “plwacn muhtahl” luhn God.
Leum El luhngse in oasr yohrohsr. Tiacna ma falyang na lah ke kowos puhla Nguhn Lal ac mukwikwi fal nuhke pihrihkyuck se met lah kowos puhlakuhnuhl ke El olwelah lah Elac som met liki kuht. El ac oasr ke lacpo lacsac ac lacyot lasr, ac Nguhn Lal fah oasr insiyacsr, ac lipufacn Lal in raunikuhtlac, in sruhkkuhtyak.16
Oasr ma ke moul luhn kais sie sesr oacna ma inge. Kuht kuh in ohsun nuh sin mwet se suc kuht luhman etuh tari, ahksasucye kawuck lasr, kuh konwacack ma oacna sie nuh sin mwet kuht tiac etuh. Ke ma inge sikyak, sahp Leum El ahkacsmakihnye kuht lah kuht nuhkwewa “tamuhlwel ac tahmtahel.” Pwacye lah orekma lasr oacna sie—ma Joseph Smith el pahngon “orekma luhn Kraist.”17
Ingacna, ke sukohsohk in sulaclah lasr oasr yac ke “plwacn muhtahl” se? Oasr sesr sulaclah se in ukwe kuh tiac ukwe Mwet Lahngo lasr ac mwet kol suleyucklac Lal. Ohiyac se inge arlac kahlwem ke Puk luhn Mormon ke mwet Nephi ah forlah liki Leum. Mormon el tuhng kac:
“Ac elos liye … lah Nguhn luhn Leum tiac sifil karuhnguhnuhlos; ahok, ma inge som luhkwelos ke srihpen Nguhn luhn Leum tiacna muhta ke tempuhl semuhtahl—
“Ke ma inge Leum El tui in karuhnguhnuhlos ke kuh usrnguck ac wacngihn kuh oacna, tuh elos puhtatyang nuh ke sie ohiyac in suhlahlahlfongi ac koluk na upac.”18
Tiac ma nuhkwewa siyuckyuck sesr sin Leum tuhkuh ke srihpen luhpan kuhiyacsr, luhlahlfongi lasr, kuh ma kuht etuh. Nuhnkuh kacl Saul suc Leum El tuh tulokihnyac ke inkacnek nuh ke acn Damascus. El tiacna som nuh ke acn wo ke moul lal; ac tiac ma ke acn luhn facluh. Saul el ahksuwohsyeyucklac sin Leum. Etweyuck tohk oacna Paul, orekma luhn mwet sap lal ahkkahlwemye lah Leum El etuh tari ma el kuh in oruh ac eklac nuh kac, tiac ma el srihke in oruh oacna Saul. Oacpacna, Leum El etuh ma kais sie sesr kuh in oruh ac eklac nuh kac. Meac Mwet Sap Paul el luti? “Kut etu tuh in ma nukewa, God El oru tuh in oasr wo tuku kac nu selos su lungse El, aok elos su El pangon fal nu ke sripa lal.”19
Kuht fin suwohswohs, kena, ac kuh, kuht fin kwacfeacng in suwohs ac fal, na kuht kapwack nuh ke ma soenna luhmweyuck sesr ac wi ip se luhn “plwacn muhtahl” luhn Pahpah Inkuhsrao. Oasr sesr kais sie ohiyac muhtahl se. Ke kuht liyacl God orekma kacsr ac yohrohsr, kuht kuh in ahkkweyeyucklac, ac tarilacna ke kolyuck sacn. Ke Pahpah tuhmasr Inkuhsrao El fahk lah orekma ac wolacna lal pa in use moul kawihl ac moul ma pahtpaht luhn mwet uh,20 El sramsram ke tuhlihk nahtuhl nuh kwewa—kais sie suwos sifacna.
Poun Leum kol kowos. Ke “plwacn muhtahl,” El oasr ke ma srihsrihk ac oacyacpac ma yohk srihpac ke moul lowos. Oacna fwackyuck ke Soakas, “Lulalfongi Leum God ke insiom kewa; … ac El ac fah akkalemye inkacnek suwohs nu sum.”21 Nga fahkwack tuh El ac ahkinsewowoye kowos, ahkkweye kowos, ac usot nuh suwos mihslac. Ke ine muhtahl luhn Jisus Kraist, amen.