Sia Epinukunuku I? Weires Mi Och

Preseten Thomas S. Monson a achema ngenikich pwe sipwe “epinukunuku ewe Samon ren unusen netipach; sisap epinukunuku met sia ekieki pwe sia sinei. Kopwe chechemeni ewe Samon non mettoch meinisin ka fori, iwe epwe pwar ngonuk ewe aan mi pung.

Kopwe chechemeni ewe Samon non mettoch meinisin ka fori, iwe epwe pwar ngonuk ewe aan mi pung.

“Kosap ita ekieki pwe ka kon tipachem” (Proverbs 3:5–7).

Sia epinukunuku An kewe annuk pwe ra mwurino fanitach? Ina mwo, noun kewe souemwen rese unusoch, nge repwe tongeni emweniechu kich? An kewe pwon mi pungoch? Sia epinuku pwe Semach won nang me Jises Kraist ra sineikich me ra mochen anisikich? Non fansoun osukouk, weires, me fansoun fitikoko, sia chiwen epinuku I?

Uwa nengensefani, non ewe fansoun uwa kaeo ekkoch nesen mi auchea non fansoun weires—non ai we sarafo, non ai we angangen misineri, ai poputa angang, uwa achocho ne apwonuweta ai koko, aiti ai we waten famini, uwa achocho ai upwe pwusin tumunuwei. A fatoch pwe weires a och!

Weires a apochokunakich, atekisonakich, me a ngenikich ach tufichin apungukich. Ach kewe neo ra sinei Kot non unusen manawer. Pwata a namwot ruu sopun ren Nifai me pwiin kewe repwe angei ekkewe seleich minen piras me a chok unungat wokisin pwe chon Ishmael repwe fitir nein ewe petewen? (Nengeni pwan 1 Nifai 3–4; 7:3–5). A usun chok pwe ewe Samon a mochen apochokuna Nifai ren weiresin an epwe angei ekkewe seleich.

Sisap mairu ren ekewe metoch mi weires afis non manawach. Ewe ewin pwon sia fori ngeni ewe Samon ewe manaweni annukun asor. Asor, a wewen pwe sia fangeta och mettoch sia mochen. Ren fansoun sia weweiti pwe mi kukkun niwinin fan iten ekkewe feioch repwap tapweno. Non porousen Joseph Smith a apasa, “Ew namanam minne ese anamwota asoren mettoch meinisin ese wor manaman ne efisi nuku mi namwot fan iten manau ese much.”¹

Chochon ewe unumen non Kot ra sinei mettoch mi weires. Kot ewe Sam a asoreno Noun we Anaemon ngeni riaffoun ewe Achasefan, fiti mano won irapenges. Ekkewe pukfel ra apasa pwe Jises Kraist a kaeo “anneasosich punun an kewe riaffou” (Ipru 5:8). A pwusin riaffouni riaffoun ewe Achasefan. Ewe Ngun mi Fel epwe fokkun pesekich, esine ngenikich, me emwenikich, nge fan ekkoch kich sia nikitano, monuki, me sise weweiti mongungun,

Weires mi ew kinikinin ewe kokkotun kapas allim. Ew popun ei manau pwe sipwe pwarano ach nuku (nengeni Abraham 3:25). Ekkoch ra riafou nap seni ekewe chon Alma. Ra su seni ewe King Noah mi ngaw, o ra winiti chon angang ngeni ekkewe Chon Leiman! Non ar riaffou, ewe Samon a aitir pwe A apungano Noun kewe aramas o a sotuni “ar tipepos me ar nuku” (Mosaia 23:21).

Non ekkewe ran mi weires non ewe imwen kanopwus non Liberty, ewe Samon a aiti Joseph Smith an epwe “engino non napanapoch” (D&C 121:8) me a pwon pwe ika a engino, meinisin ekkena mettoch repwe och fan itan” (D&C 122:7)

Preseten Thomas S. Monson a tingor, “Amo sipwe fini pung ina mo ika a weires nap seni fini mi mwan pun a mecheres.”² Ren porausen ach kewe tempel, a apasa pwe “ese wor asor mi napanap, ese wor mon mi mwe watte, feiochun [tempel] ese wor osukosuk me riafou sipwe weri.”³

Me won ei fonufan, weires ina ew kinikinin non ei manaw. A weires ngeni emon chuko mi kukkun epwe suku seni sokunan we. Nge nupwen emon a amecheresi, ewe chuko ese pochokununo usun mi namwot an epwe manau. A pwan usun, weiresin ewe nipwisipwiskoon an epwe tou seni tukutukun ewe epwe apochokunata i ngeni manaw.

Seni ekkei awewe, sia kuna pwe weires mi soposopono! Kich meinisin sia weri osukosuk. Ewe mwokututkut sia fori nupwen sia weires.

Non ew fansoun, ekkoch chon ewe Puken Mormon ra osukosuk ren “eriaffou chommong” me “weires chapur” (Ileman 3:34). Met ar foffor ngeni? “Ra echikipin me iotek fan chommong, me ra pochokununo non ar tipetekison, me nukuchareno non ewe nuku usun Kraist, tori ngunur a ureno ren pwapwa me kinamwe” (Ilaman 3:35). Pwan Ew awewe a fis mwurin fitu ierin maun. “Pokiten fokkun nangatamen ewe maun nefinen ekkewe chon Nifai me ekkewe chon Leiman chommong ra tipe pochokununo, … iwe chommong ra tipe pwetete pokiten ar kewe riaffou, ina popun pwe ra etipetekisona inisir me mwen Kot” (Alma 62:41).

Sia fini ach foffor nupwen sia kuna weires.

Me mwen ai kokko ngeni ei wis uwa emon chon tumunu moni non Houston, Texas. Napengeni uwa angang ren ekewe mi fakkun pisekisek a wor pwusin ar sopai. Napengenir meinisin ra foruta ar sopai seni ar angang weires. Met a enetipengawei pwe ua rong ekkoch ra apasa pwe ra mochen epwe mecheres fan iten nour kewe semirit. Rese mochen nour kewe repwe riaffou usun ir. Non pwan ekkoch kapas, repwe fen eppeti nour kewe seni ewe ew chok mettoch a atufichi ngenir ar repwe fefeita.

Iwe nge, aiwa sinei ew famini ra ekkis sokkono. Sam me in ra sani porausen J. C. Penney minne seman we a ereni pwe nupwen a wanu ierin epwene pwusin tumunu non pekin moni. Ra pwusin fori ar kokkot: nupwen emon me emon semirit nour kewe ra sochungio seni high school, repwene pwusin tumunur non pekin moni—ren sukkun (college, sukunen angang, pwan ekkoch) me fan iten nonnomur non pekin moni (wesen pwusin tumunur) (nengeni D&C 83:4). Feiochunus, Ekkewe semirit ra fokkun tipachem. Meinisin ir ra sochungio seni college, me ekkoch ra fiti sukun watte—ra pwusin tumunur. Ese mecheres, nge ra fori. Ra fori ren ar angang weires me ar nuku.

Ewe kapas eis “sia epinukunuku I?” meni epwe fen och, “a wor ach nuku ngeni epinukunuku I?”

Mi wor ach nuku ne epinukunuku An we pwon usun asoren Ew-ne-engon pwe 90 [tiwe] ne ipukun ach peioff fiti aninisin ewe Samon, epwe och nap seni ach angei unusen ewe 100 [ipwuku] percent won pwusin winikapach?

Mi naf ach nuku ne epinukunuku pwe I epwe churi kich non ach weires (nengeni Mosaia 24:14), pwe epwe fiu ngeni ekkewe ir ra fiu ngenikich (nengeni Isaiah 49:25; 2 Nifai 6:17), me I epwe efeiochukich non ach fansoun weires ren ach sipwe mamarita ? (Nengeni 2 Nifai 2:2).

Sipwe aea ach nuku mi namwot ne anneasochisi An kewe annuk pwe Epwe efeiochukich non pekin inis me non pekin ngun? Me sipwe engino ren nukuchar pwe Epwe tongeni etiwakich fan mesan? (nengeni Mosiah 2:41).

Pwii me fefinei kana, sia tongeni nuku pwe sipwe epinukunuku I! A mochen met mi mwurino fan itach (nengeniMoses 1:39). Epwe pwonueni ach kewe iotek (nengeni D&C 112:10). Epwe apwonueta An kewe pwon (nengeni D&C 1:38). Mi wor an manamanen apwonueta ekkena pwon (nengeni Alma 37:16). A sinei mettoch meinisin! Me aucheanap, A sinei met mi fakkun och fan itach (nengeni Isaiah 55:8–9).

Ei fonufan ikanai mi aweries. A wor ngaw ekkis meinsin, tipengaw non neni meinisin, fofforun efeingaw non neni mi pin, turunon nonnomun moni, ese naf angang, a wor semweningaw, a wor fitikokon fonu, maun, souemwen mi ngaw, pwan ekkoch. Met sipwe fori? Sipwe suseni are sipwe fiu? Menni mi pung? Ew me ew a tongeni weires. A weires an George Washington me noun kewe sounfiu ar repwe fiti maun a pwan weires ngeni nouch kewe chon akkomw ra suuno. A weires an Nelson Mandela achocho ren an epwe ngasano. Chon nom ra apasa pwe mettoch mi ngaw repwe win, ika ekewe aramasech resap fori och mettoch.⁴

Non met sia fori, sisap fini are mwekut fan iten ngunun niuokus. Ennet, “Kot ese ngeni kich ewe ngunun nuokus” (2 Timothy 1:7). (Oua esinna pwe a apasa “ousap niuokus” a mak fan chommong non ekkewe pukfel?) Ewe Samon a aitiei pwe tipengaw me niuokus ir pisekin angangen Setan. Pwenuwan me ren ewe Samon fansoun weires feino chek non omw nuku.

Emon me emon kich sia sokkofesen ren met ach weires. Ekkoch ra nuku pwe a weires ar repwe monatiw ew-ne-engon nupwen ese watte ar moni. Fanekoch souemwen ra kuna pwe a weires an ekewe mi osupwang repwe monatiw asoren ew-ne-engon. Meni epwe weires ngeni kich ekkoch ach sipwe feino won ach nuku ach sipwe pupunu are nounou semirit. Mi wor ekkoch ra kuna pwe a weires ar repwe “menemenoch ren ekkewe mettoch minne ewe Samon a fen fang [ngenir]” (Alma 29:3). Mi pwan weires ach sipwe menemenoch ren wisach iei (nengeni Alma 29:6). Kopungun Mwichefen a weires, nge fan ekkoch a poputani ewe angang ren ennetin aier.

Ina mwo ren ewe osukosuk, weires a tongeni och fan iten ekkewe ir repwe feino won nuku me epinuku ewe Samon me An kokkot.

Pwii me fefinei kana, ua pwarata pwe ekkei souemwen ir mi mommot nesekuri ra kokko seni Kot. Ra mochen angang ngeni ewe Samon me anisikich ne anomu ewe kapas allim non netipach. Wa tonger me uwa etiwar.

Ua tongei ach Chon Amanau, Jises Kraist. Ua mwar pwe A tongei ewe Sam o a tongeikich pwe a winiti ach Chon Amanau me Chon Angaseno; me An riaffou a kon watte o a chechech pokiten metekin, o a suputiw chaan, me a riaffou non pekin inis me non pekin ngun” (D&C 19:18). Nge a weri ngawan nge ina mo pwe mi namwot, A ereni ewe Sam, “Nge esap netipei, nge netipom epwe pwonuweta” (Luke 22:42). Ua mwar ren kapasen ewe chon nang: “Ese chiwen nom ikei, a fen manaueta” (Matthew 28:6).

An nenien appiru mi ennet “ewe aan, ewe ennet, o ewe manau” (John 14:6). Seni chok ena nenien appiru sia tongeni kuna “kinamwe non ei fonufan, me non ewe manau ese much” (nengeni (D&C 59:23). Nupwen uwa tapweno mwurin me uwa sotuni usun met a aitiei, uwa pwusin kuna “ewe ennetin wachemuken nifangen pwon” (2 Peter 1:4) mi ennet

Ua fakkun mochen uta ren Mormon pwe i emon chon kunon Jises Kraist (nengeni 3 Nifai 5:13) me non ew ran epwe feito upwe rongorong kapasen Awan, “Fakkun murinno, en emon chon angang mi murinno o nikitu” (Matthew 25:21). Non itan Jises Kraist, amen