Pe Ua Tatou Faatuatuaina Ea o Ia? E Lelei le Faigata

E tele ina faamanatu mai ia i tatou e Peresitene Thomas S. Monson ia “faatuatua ia Ieova ma lou loto atoa; a e aua le faalagolago i lou lava atamai.”

“Ia e manatua o ia i ou ala uma, ona faatonuina ai lea e ia lava ou ala.

“Aua e te faafiapoto” (Faataoto 3:5–7).

Pe tatou te faatuatuaina ea Ana poloaiga e mo lo tatou lava lelei? O Ana taitai, e ui ina le atoatoa, e taitai lelei i tatou? O Ana folafolaga ia mautinoa? Pe o tatou faatuatuaina ea e silafia e le Tama Faalelagi ma Iesu Keriso i tatou ma finagalo e fesoasoani mai ia i tatou? E oo lava i le lotolotoi o tofotofoga, luitau, tulaga faigata, ma taimi faigata, pe tatou te faatuatuaina pea lava o Ia?

I le toe tepa i tua, sa ou aoaoina nisi o lesona silisili, i taimi sili ona faigata—pe i lo’u talavou, i le misiona, amataina o se matata fou, taumafai e faalautele o’u valaauga, tausia o se aiga toatele, po o le tauivi ina ia ola tutoatasi. Ua foliga manino mai e lelei le faigata!

O le faigata e tatou te malolosi atili ai, e faalotomaualaloina i tatou, ma aumaia ia i tatou se avanoa e faamaonia ai i tatou lava. Na oo ina iloa e o tatou paionia o taavale tosolima, le Atua i le ogaoga o o latou faigata. Aisea na lua ai mataupu mo Nifae ma ona uso e maua mai ai papatusi apamemea ae na o le tolu fuaiupu na tauanau ai le aiga o Isamaeli latou te faatasi i le vao? (tagai 1 Nifae 3–4; 7:3–5). E foliga mai na finagalo le Alii e faamalosia Nifae e ala i tauiviga mo le mauaina mai o papatusi.

E le tatau ona oo mai mea faigata o se faate’ia i o tatou olaga. O se tasi o uluai feagaiga tatou te osia ma le Alii o le ola ai lea i le tulafono o le taulaga. O le ositaulaga i lona faauigaga e aofia ai le lafoai o se mea e te fiafia i ai. O le poto masani ua tatou iloa ai o se tau itiiti lava e totogi pe a fua i faamanuiaga e mulimuli mai ai. I lalo o le taitaiga a Iosefa Samita, sa taua ai e faapea “o se tapuaiga e le manaomia ai le ositaulagaina o mea uma e leai lava se mana ona lava e maua ai le faatuatua e tatau ai mo le ola ma le faaolataga.”¹

O Sui o le Aiga Atua e masani i mea faigata. Na taulagaina e le Atua le Tama Lona Alo Pele e Toatasi i puapuaga matautia o le Togiola, e aofia ai le maliu ma le faasatauroga. Ua tau mai e tusitusiga paia “o mea sa tiga ai o Ia na aoaoina ai o Ia [Iesu Keriso] ia usiusitai” (Eperu 5:8). Sa ofofua mai o Ia e puapuaga i tiga o le Togiola. Atonu foi na talitiga le Agaga e uunaia, lapatai, ma taiala i tatou ae o nisi taimi tatou te le amanaia, faauiga sese, pe faagalogalo foi.

O le faigata o se vaega o le fuafuaga o le talalelei. O se tasi o faamoemoega o lenei olaga o le faamaonia lea o i tatou (tagai Aperaamo 3:25). E toaitiiti na sili atu mafatiaga e aunoa ma se mafuaaga nai lo le nuu o Alema. Na latou sosola mai le Tupu amioleaga o Noa ona avea ai lea ma pologa i le au sa Lamana! E ala i na tofotofoga, sa aoaoina ai i latou e le Alii faapea Na te a’oa’iina Lona nuu ma tofotofoina lo latou onosai ma lo latou faatuatua” (Mosaea 23:21).

I le taimi matautia i le Falepuipui o Liperate, sa aoao ai Iosefa Samita e le Alii ia “talitalia lelei” (MF&F 121:8) ma folafola atu afai na te faia, “o nei mea uma e te maua ai le poto masani, ma ole a avea mou lelei”(MF&F 122:7).

Sa faamalosiau mai Peresitene Thomas S. Monson, “Ia tatou matua filifili i le mea faigata e sa’o, nai lo le mea faigofie e sese.”² E faatatau i o tatou malumalu, sa ia saunoa ai e “leai se osigataulaga ua tele naua, e leai se tau ua mamafa tele naua, e leai se tauiviga ua faigata naua, ina ia maua ai faamanuiaga [o le malumalu].”³

I le lalolagi o le natura, o le faigata o se vaega o le li’o o le olaga. E faigata mo se tama’i moa ona fofoa mai i lona atigi malo. Ae a taumafai se tasi e faafaigofie, e le galueaiina e le tamai moa le malosi e tatau ai ina ia ola. I se ala foi faapena,o le tauivi o se pepe lele e sola ese mai le afuafu e faamalosia ai o ia mo le olaga o le a ia ola ai.

E ala i nei faataitaiga, ua tatou vaai ai o le faigata o le mataupu faavae lava lea! E tofu uma i tatou ma luitau. O le eseesega o le tatou tali atu i le faigata.

E i ai se taimi i le Tusi a Mamona na feagai ai tagata ma “sauaga tetele” ma “mafatiaga e tele” (Helamana 3:34). Na faapefea ona latou tali atu? “Sa latou anapopogi ma tatalo soo, ma sa faasolo malolosi ma atili malolosi ai i lo latou lotomaualalalo, ma mausali ma atili mausali ai i le faatuatua ia Keriso, seia oo ina faatutumuina o latou agaga i le olioli ma le faamafanafanaga” (Helamana 3:35). O se isi faataitaiga na tulai mai ina ua mavae tausaga o taua: “Ona o le umi tele o le taua i le va o sa Nifae ma sa Lamana, sa toatele na faamaaaina, … ae e toatele foi sa faamaluluina ona o o latou puapuaga, sa oo ina latou faalotomaualalaloina i latou lava i luma ole Atua” (Alema 62:41).

Tatou te tofu filifilia la tatou lava tali i le faigata.

A o lei valaauina au i lenei valaauga, sa avea a’u ma faufautua tautupe i Houston, Texas. O le tele o a’u galuega o tagata maumea e fai a latou lava pisinisi. E toetoe o i latou uma lava sa amataina a latou pisinisi faamanuiaina mai le leai o se mea e ala i le tele o galuega faigata. O le mea e sili ona faanoanoa ai o le faalogo atu lea i nisi o i latou o faapea mai sa latou mananao e faafaigofie atu mo a latou fanau. Sa latou le mananao ia latou fanau e pologa e faapei ona latou faia. I se isi faaupuga, o le a latou aveesea mai a latou fanau le mea tonu lava na ala ai ona latou faamanuiaina.

I se faatusatusaga ese, matou te iloa se aiga sa ese auala na latou faia. Sa musuia matua i le poto masani o J.C. Penny lea na ta’u atu e lona tama ia te ia ina ua valu ona tausaga o le a taulima e ia lava ana mea tautupe. Sa latou faia la latou lava fatuga: a o faauu tamaiti taitoatasi mai le aoga maualuga, sa latou taulimaina a latou lava mea tautupe—mo le faalauteleina o aoga (i kolisi, iunivesite, ma isi) ma mo le teuina o a latou lava tupe (o le ola tutoatasi moni) (tagai MF&F 83:4). Ma le fiafia, sa tali atu le fanau ma le poto. O i latou uma ua faauu mai kolisi, o isi ua mae’a iunivesite---ua tutoatasi i latou uma.,E lei faigofie, ae sa latou mafaia. Sa latou faia i le agai i luma ma le faatuatua.

O le fesili “Pe tatou te faatuatuaina ea o Ia?” atonu e sili ona faaupu “Pe o i ai so tatou faatuatua e faatuatuaina ai o Ia?”

Pe o i ai so tatou faatuatua e faatuatuaina ai Ana folafolaga e faatatau i le sefuluai e faapea o le 90 pasene o a tatou tupe faasili faaopoopo i ai ma le fesoasoani a le Alii, ua sili atu ai nai lo le 100 pasene o a tatou tupe maua i le tausaga pe a na o i tatou?

Pe o lava lo tatou faatuatua e faatuatuaina ai o le a asiasi mai o Ia i o tatou mafatiaga (tagai Mosaea 24:14), o le a Ia finau ma i latou o e finau ma i tatou (tagai Isaia 49:25; 2 Nifae 6:17), ma o le a Ia faapaiaina o tatou puapuaga mo lo tatou manuia? (tagai 2 Nifae 2:2).

Pe o le a tatou faaaogaina ea le faatuatua e tatau ai e tausi Ana poloaiga ina ia mafai ai ona Ia faamanuiaina i tatou i le tino ma le agaga?Ma pe o le a faaauau pea ona tatou faamaoni e oo i le iuga ina ia mafai ai ona Ia avatu i tatou i Lona afioaga? (tagai i le Mosaea 2:41).

Uso e ma tuafafine, e mafai ona i ai lo tatou faatuatua e faatuatuaina ai o Ia. E finagalo o Ia i le mea sili mo i tatou (tagai Mose 1:39) O le a Ia tali mai i a tatou tatalo (tagai MF&F 112:10). O le a Ia tausia Ana folafolaga (tagai MF&F 1:38). Ua ia te Ia le mana e tausi ai na folafolaga (tagai Alema 37:16). Na te silafia mea uma! Ma o le mea e sili ona taua, Na te silafia le mea e sili ona lelei (tagai Isaia 55:8--9).

O lo tatou lalolagi i le taimi nei ua faigata.Ua taatele mea leaga ma le piopio i atunuu uma, ua oo atu le taufaamatau i nofoaga saogalemu, o le pau o le tamaoaiga, leai ni galuega, o faama’i, o faalavelave faalenatura, o fetaua’iga, taitai pule saua, ma isi. O le a se mea e tatau ona tatou faia? Pe tatou te sosola ea pe tau? O le fea e sa’o? Po o le a lava le filifiliga e mafai lava ona matautia. Sa matautia mo Siaosi Uosigitone ma lana autau ona tau ae faapea foi i o tatou augatama paionia ona sosola. Sa matautia ia Nelesoni Mandela ona tauivi mo le saolotoga. Fai mai ina ia manumalo le leaga, ua na ona tatau lava i tagata lelei ona leai se mea e fai.⁴

Poo a lava mea tatou te fai, e le tatau ona tatou faia se faaiuga, pe gaoioi i se agaga o le fefe. E moni, “Ua le foaiina mai e le Atua ia te i tatou le Agaga e mata’u ai; a o le Agaga e faamalosi ai” (2 Timoteo 1:7). (Pe na outou iloaina o le fasifuaitau “aua tou te matatau” o loo ta’ua i tusitusiga faavae?) Ua aoaoina au e le Alii o le lotovaivai ma le fefe o auupega ia a le fili. O le tali a le Alii mo taimi faigata o le agai i luma ma le faatuatua.

Atonu e tofu i tatou ma se manatu ese pe o le a le faigata? O nisi e manatu e faigata ona totogi le sefuluai pe a utiuti mea tautupe. O nisi taimi e faigata ai i taitai ona manatu e tatau ona totogi sefuluai e matitiva. Atonu e faigata mo nisi o i tatou ona agai i luma ma le faatuatua e faaipoipo pe fai se aiga. E i ai i latou e faigata ona “malilie i mea ua tuuina mai e le Alii ia te [i latou]“ (Alema 29:3). Atonu e faigata ona malilie i o tatou valaauga o i ai nei (tagai Alema 29:6). O aoaiga faale-Ekalesia atonu e faigata tele, ae mo nisi e faailoga ai le amataga o le faagasologa o le salamo moni.

Po o le a lava le faafitauli, o le faigata e mafai ona lelei mo i latou o le a agai i luma ma le faatuatua ma faatuatuaina le Alii ma Lana fuafuaga.

Uso e ma tuafafine, ou te molimau atu o nei taitai e i o’u tua ua valaauina e le Atua. O lo latou naunauga o le auauna lelei atu i le Alii ma fesoasoani ia i tatou e faatuina le talalelei i o tatou loto. Ou te alofa ma lagolagoina i latou.

Ou te alofa i lo tatou Faaola, o Iesu Keriso. Ou te ofo i le lava o Lona alofa i le Tama ma i tatou ua avea ai ma o tatou Faaola ma Togiola, ma o le faia o lena mea na afua ai ona ona Ia “gatete ona o le tiga, ma tafe toto ai i pu afu uma, ma mafatia ai i le tino atoa ma le agaga” (MF&F 19:18). Ae e ui ina feagai ma lenei tulaga matautia ma le mea moni e mafai, sa Ia lagolagoina le Tama, “Aua le faia lo’u loto a o lou finagalo.” (Luka 22:42). Ou te olioli i upu a le agelu: “E le o iinei o ia: aua ua toe tu mai o ia” (Mataio 28:6).

O Lana faataitaiga moni o Ia “o le ala, ma le upu moni, ma le ola” (Ioane 14:6). Ua na o le mulimuli i lena faataitaiga e mafai ai ona tatou maua le “filemu i le lalolagi lenei, ma le ola e faavavau i le lalolagi a sau” (MF&F 59:23). E pei ona sa ou mulimuli i Lana faataitaiga ma faaaogaina Ana aoaoga, ua ou iloa mo au lava o Ona “mea silisili ese ma le aoga [taitasi]” (2 Peteru 1:4) e moni.

O lo’u faanaunauga silisili o le tu atu lea faatasi ma Mamona o se soo moni o Iesu Keriso (tagai 3 Nifae 5:13) ma o le a i ai se aso o faalogo atu mai Ona lava laufofoga o faapea mai, “Ua lelei ia, le auauna lelei e, ma le faamaoni” (Mataio 25:21). I le suafa, o Iesu Keriso, amene.