Gat Tras blong Lod mo blong Famli blong Yu

Ol brata. Ating i no gat wan moa gud toktok we yumi save kasem long Lod bitim hemia blong save se Hem i trastem yumi blong stap olsem ol klin man we i holem prishud mo ol gudfala hasban mo papa.

Wan tru samting i: blong gat tras blong Lod i wan blesing we i save kam tru long bigfala wok long saed blong yumi. Tras i wan blesing we i stanap long fasin blong obei long ol loa blong God. Gat tras blong Lod i kam olsem ansa blong stap tru long ol kavenan we yumi mekem long ol wota blong baptaes mo insaed long tabu tempol. Taem yumi kipim ol promes blong yumi long Lod, tras blong Hem long yumi bae i gro.

Mi lavem ol olfala skripja tugeta wetem olgeta blong tudei we i yusum toktok ia “wan hat we hem i ones” taem oli tokbaot fasin blong wan stret man.¹ Hat we i ones o nogat hat we i ones i wan impoten samting long fasin blong wan man. Ol man we oli gat “wan ones hat” oli ol man we oli save trastem olgeta—from tras oli bildim antap long fasin blong gat wan ones hat.

Blong olsem wan man we i gat ones hat i minim nomo se ol tingting blong yu, tugeta wetem ol aksen blong yu oli klin evriwan mo stret long laef blong yu, tugeta long pablik mo long praevet. Wetem evri desisen yumi mekem, yumi save gat moa long tras blong Lod o nogat tras blong Hem. Prinsipol ia i klia gud long tabu responsabiliti we oli givim long yumi olsem ol hasban mo ol papa.

Olsem ol hasban mo papa, yumi kasem wan tabu wok we i kam long ol profet, sia mo reveleta blong tudei long pepa ia “Ol Famli: Wan Ofisol Toktok i go long Wol.” Pepa ia i tijim yumi se (1), “Ol papa oli mas prisaed ova long ol famli blong olgeta long lav mo stret fasin,” (2) ol papa “oli responsibol blong provaedem ol samting we i impoten long laef” mo (3) oli responsibol blong protektem ol famli blong olgeta.²

Blong yumi blong yumi gat tras blong God, yumi nidim blong mekem ol trifala tabu responsabiliti long ol famli blong yumi long wei blong Lod. Olsem we i talem moa long wan ofisol toktok i go long wol blong famli, wei blong Lod i blong mekem ol responsabiliti ia tugeta wetem ol waef blong yumi olsem “ikwol patna.”³ Long mi, hemia i minim se yumi no mekem eni impoten desisen we i lukluk long ol trifala responsabiliti ia sapos yumi no wan fulwan wetem ol waef blong yumi.

Ol fas samting we yumi mas mekem blong gat tras blong Lod i blong putum tras blong yumi long Hem. Profet Nifae i tijim kaen fasin blong komitmen ia taem hem i prea: “O Lod, mi bin trastem yu mo bae mi trastem yu blong oltaem. Bae mi no putum tras blong mi long han blong bodi blong mit mo bun.”⁴ Nifae i komitim hem fulwan blong mekem wil blong Lod. Antap blong talem se “bae hem i go mekem ol samting we Lod i talem,” Nifae i stanap long komitmen blong hem blong mekem wok blong hem olsem i soem long toktok ia: “Olsem we Lod i stap laef, mo olsem we yumi stap laef, bae yumi no gobak long papa blong yumi long ples we i nogat man long hem, kasem taem we yumi finisim samting ia we Lod i bin talem long yumi.”⁵

From se Nifae i trastem God faswan, God i putum bigfala tras long Nifae. Lod i blesem hem wetem fulap Spirit we i blesem laef blong hem, ol laef blong ol famli blong hem, mo ol laef blong ol man blong hem. From se Nifae i prisaed long lav mo stret fasin mo provaedem mo protektem ol family mo pipol blong hem, hem rekodem, “Mifala i bin laef folem fasin blong stap hapi.”⁶

Blong soem lukluk blong wan woman long topik ia, Mi bin askem tufala mared gel blong mi blong helpem mi. Mi bin askem sapos tufala i save raetem wan laen o tu long olsem wanem lukluk blong tufala long hamas tras i impoten mo i afektem mared mo famli laef blong tufala. Hemia i ol tingting blong Lara Haris mo Kristina Hansen.

Faswan, Lara, “Wan long impoten samting long mi i blong save se taem hasban blong i go truaot long dei blong hem, hem i stap mekem ol joes we i soem respek mo lav i kam long mi. Taem mitufala i save trastem wanwan long mitufala long wei ia, i karem i kam pis long hom blong mitufala, we i mekem se mitufala i save stap glad blong lukaotem ol famli blong mitufala tugeta

Naoia tingting blong Kristina: “Blong gat tras long wan man i semmak olsem blong gat fet long mania. Sapos i nogat tras mo fet, i gat fraet mo tu tingting. Blong mi, wan long ol bigfala blesing we i kam from, mi kam blong trastem hasban blong mi fulwan; i pis—pis blong maen blong save se hem i stap mekem wanem hem i talem se bae hem i mekem. Tras i karem i kam pis, lav, mo wan ples we lav i save gro long hem.”

Lara mo Kristina tufala i neva save wanem wanwan long tufala i raetem. Hem intresting tumas long mi blong luk se wanwan long tufala i luk save blesing blong pis long hom we i stap olsem wan stret risal blong gat wan hasban we tufala i save trastem. Olsem we tufala gel blong mi i soem, prinsipol blong tras i plei wan impoten pat long fasin blong bildim wan hom we Kraes i stap long medel.

Mi bin gat janis long enjoem semmak kalja ia we Kraes i stap long medel blong hem taem mi stap groap long wan hom we papa blong mi i givim ona long prishud blong hem mo kasem tras blong ful famli from “ones hat blong hem.”⁷ Letem mi serem wetem yu wan eksperiens long yang laef blong mi we i soem ol positive aksen we i gat mining we wan papa we i andastanem mo laef folem ol prinsipol blong tras we oli bildim antap long wan ones hat i save gat long famli blong hem.

Taem mi bin yang, papa blong mi i statem wan kampani we i spesel blong fiksim ol Majin blong faktri. Bisnis enjinia ia, i mekem, mo putum ol laen blong prodaksen truaot long wol.

Taem mi stap long sekendri skul, papa blong mi i wantem blong mi lanem olsem wanem blong wok. Hem i wantem mi tu blong lanem bisnis taem mi stap groap. Fes wok blong mi i blong lukaotem gud ples mo pentem ol eria blong ol tul we ol jeneral pablik i no luk.

Taem mi go long sekendri skul, oli bin mekem mi blong wok long floa blong faktri. Mi statem blong lanem olsem wanem blong ridim ol plan mo operetem ol hevi Majin blong aean. Afta we mi winim sekendri skul, mi go long yunivesiti mo afta go long wan misin fil. Kambak hom from misin blong mi, mi gobak stret long wok. Mi nidim blong winim sam mane blong skul fi blong nekis yia.

Wan dei afta long misin blong mi, Mi bin stap wok long faktri taem papa blong mi i singaotem mi go insaed long ofis blong hem mo askem mi sapos mi wantem folem hem long wan bisnis trip long Los Anjeles. Hemia i fas taem papa blong mi i invaetem mi blong folem hem long wan bisnis trip. Hem i stap traem nomo blong letem mi go aot long pablik blong help ripresentem kampani

Bifo mitufala i aot, Hem i tokbaot long mi sam ditel long saed blong niufala kastoma ia. Faswan kastoma ia i wan koperesen blong plante ples. Seken, oli stap mekem gud laen blong olgeta truaot long wol wetem ol niu teknoloji. Nambatri, kampani blong mifala i neva saplaem ol enjin seves long olgeta bifo o teknoloji. Mo afta, top koperesen ofisa blong olgeta we i lukaotem ol peimen i bin singaotem miting blong lukluk bak long praes blong mifala long niufala projek ia. Miting i stap olsem wan niu mo ating wan impoten janis blong kampani blong mifala.

Afta we mitufala i kasem Los Anjeles, papa blong mi mo mi i go long eksekutiv hotel blong miting. Fas ajenda blong bisnis i blong tokbaot mo lukluk gud long disaen blong enjin mo ol ditel blong projek. Nekis poen blong tokbaot i abaot ol ditel blong wok, mo tu ol plan mo ol deit we bae i finis. Lasfala poen i lukluk long ol praes, mo ol kondisen. Hemia i ples we evri samting i kam interesting.

Ofisa ia i eksplenem long mifala se ofa blong mitufala i wan we i daon moa long ol narawan long projek ia. Afta hem i talem long mitufala ofa blong seken man. Afta hem i askem mifala sapos bae mitufala i wantem blong tekembak ofa blong afta sendem i kambak. Hem i talem se niufala praes blong mitufala i sut kam kolosap long hemia blong nekis hae ofa. Afta hem i eksplenem se bae hem i serem niufala praes long 50–50 wetem hem. Hem i hariap long hemia se evriwan bae i win. Kampani blong mitufala bae i win from bae mifala i mekem bigfala mane bitim hemia long fas ofa we mifala i sendem. Kampani blong hem bae i win from bae oli stil mekem bisnis wetem ofa we i loa. Afta, i tru, hem bae i win tame hem i tekem pat blong hem from wok blong hem blong putum tugeta naesfala ofa ia.

Afta hem i givim wan postofis namba long mitufala mekem se mitufala i save sendem mane we hem i askem. Afta long evri samting, hem i lukluk long papa blong mi mo askem: “?So yumi agri olsem?” Long sapraes blong mi, Papa blong mi i stanap, sekhan wetem hem mo talem long hem: “bae mitufala i jes letem yu save.”

Afta we mitufala i aot long miting, mitufala i go long trak we mitufala i rentem, mo papa blong i tanem mo luk mi mo askem, “Afta, wanem yu ting se yumitu mas mekem?”

Mi ansa mo talem se mi no ting se mitufala i sapos blong akseptem ofa blong hem.

Afta papa blong mi i askem: “?Yu no ting se yumitu gat wan responsabiliti long evri man we oli wok blong yumitu blong holemtaet wan gudfala lis blong ol fiuja wok?”

Taem mi bin stap tingting long kwestin ia, mo bifo mi save ansa, hem i ansarem kwestin blong hem bakegen. Hem i talem: “Rick, yu lisin. Taem yu tekem wan mane andanit long tebol, yu putum tru fasin blong yu long kwestin, mo i had blong yu karembak hemia. Neva mekem hemia, no mekem nating.”

From wanem mi serem eksperiens ia i minim se mi neva fogetem wanem papa blong mi i tijim mi long fas taem we mi folem hem long bisnis trip ia. Mi serem eksperiens ia blong soem hamas paoa yumi ol papa oli gat. Yufala i save tingbaot tras we mi gat long papa blong mi from ones hat blong hem. Hem i laef folem ol semmak prinsipol long praevet laef blong hem wetem mama blong mi, ol pikinini blong hem mo wetem evriwan we hem i joen wetem olgeta.

Ol brata. Hem i prea blong mi long aftenun ia se bae yumi evriwan i putum faswan tras blong yumi long Lod olsem we Nifae i soem mo afta tru long ones hat blong yumi kasem tras blong Lod, mo tu, lav blong ol waef mo ol pikinini blong yumi. Taem yumi andastanem mo praktisim tabu prinsipol blong tras we i stanap long wan tru fasin, bae yumi stap tru long ol tabu kavenan blong yumi. Bae yumi gat sakses taem yumi prisaed long ol famli blong yumi wetem lav mo stret fasin, provaedem wanem we i nid blong laef, mo protektem ol famli blong yumi from ol ivel blong wol ia. Long saed blong ol trutok ia mi testifae olsem wetem tingting we i stap daon, long nem blong Jisas Kraes, amen.