Eis Luhlahlfongi luhn Leum ac ke Sucu Lom

Mwet wiyuck, sahp ac wacngihn ma yohk ac fwack ke ma kuht eis sin Leum sahyacn na kuht etuh lah El luhlahlfongi kuht in mwet kuhlwacnsap wo ke pristut ac mukul tuhma ac pahpah wowo.

Ma se kahlwem uh: in eis luhlahlfongi luhn Leum pa sie mwe insewowo ma tuhkuh ke kuht sang kuhiyacsr in oruh orekma lasr. Luhlahlfongi el mwe insewowo se fal nuh ke ahkostwen lasr nuh ke masap luhn God uh. Eis luhlahlfongi luhn God tuhkuh ke kuht pwacye nuh ke olwelah lasr ma kuht oraclah ke kuht pacptaislac ac ke tempuhl muhtahl. Ke kuht sruokyacna olwelah lasr nuh sin Leum uh, Luhlahlfongi Lal kacsr uh kapwack.

Nga luhngse ma suhmuhslah mahtuh ac fuhsr uh ke orekmakihnyuck fahk se “inse pwacye” ke pacl se ahkwetuhyekucki sie mwet wo uh.¹Pwacye kuh te pwacye luhn mwet se ac ahkuhtwelyac sifacna ke orekma lal. Mwet suc ma oasr se “inse pwacye” elos pa mwet in luhlahlfongiyuck—mweyen luhlahlfongi el muhsaheack ke pwacye. Ohingacn, kuht fin luhngse wi ipeis ke luhlahlfongi luhn Leum, kuht enenuh in kampare in kahlwem ke mwe luti yohk se inge ac orekmakihn ke moul lasr uh.

In sie mwet pwacye se kalmac pa kom mwet na kena se, oacpacna nuh ke orekma lom an, ac nwacsnwacs ac suwohs ke ma nuhkwewa kom oruh ke moul lom, kwewana yen mwet kuh in liye ac yen lukmac. Ke kais sie sulaclah lom, kuht kuh in eis luhlahlfongi luhn God nuh sesr kuh ahksrihkyelah luhlahlfongi Lal. Mwe luti se inge sahp arulacna kahlwem in ahkkahlwemyeyuck ke ma kunacsr ke kuht ekihn pahpah kuh mukul se.

Ke kuht ekihn pahpah, oasr ma kunacsr sin mwet pahluh lasr mihsenge, mwet liyactwen, ac mwet fahkwack ke ma sihmlac ke “Sucu: Mwe Fahkwack Se nuh Fin Facluh.” Ma sihmlac se inge luti kuht lah (1) “pahpah uh ac karihngihn sucu ke luhngse ac suwohswohs,” (2) pahpah “sang mwe enenuh luhn sucu,” (3) kunohkohn luhn pahpah pa in karihngihn sucu lal an.²

Nuh sesr in eis luhlahlfongi luhn God, kuht enenuh in puhsrallah ma tolu ma kuneyucki in sang karihngihn sucu se ke inek luhn Leum. Ke sihmlac ke mwe fahkwack luhn sucu, inek luhn Leum uh pa in ahkpwacyei kunohkohn inge wi muhtwacn kiyacsr “in kahsruh sie sin sie in oacna sie”³ Nuh sihk, kalmacn ma se inge pa kuht enenuh in oraclah oacna sie sulwaclah oacna nuh ke kunohkohn tolu inge in tiac wacngihn insese nuh sin muhtwacn kiyacsr.

Ma se kuht enenuh in oruh in eis luhlahlfongi luhn Leum pa in fihliyac luhlahlfongi lasr in El. Mwet pahluh Nephi el ahkkahlwemye ke kain olwelah se inge ke el pruhe: “O Leum, nga luhlahlfongi Kom, ac nga fah luhlahlfongi Kom ne tok ma pahtpaht. Nga ac fah tiac fihliyac luhlahlfongi luhk nuh in poun mwet uh.”⁴ Nephi el arulacna insacnweacng in oruh luhngse luhn Leum. In weacng fahk uh elac “oruh oacna ke Leum el sapkihn nuh sel,” Nephi el tiacna ahlohloh ke ma el olwelah in oraclah ma sapkihnyuck elan oruh, oacna ke fwackyuck ke mwe fahk se: “Ke Leum El moul, ac ke kuht moul, kuht ac fah tiac som nuh yurin pahpah tuhmwacsr ke yen mwesis ne ke na kuht oraclah ma se suc Leum El sapkihn kuht kac.”⁵

Mweyen Nephi el luhlahlfongi ke God met, God El luhlahlfongwel Nephi. Leum El ahkinsewowoyacl ke ma yohk ke Nguhn ma ac ahkinsewowoye moul lal, moul luhn sucu lal, ac moul luhn mwet lal. Mweyen Nephi el karihngihn ke luhngse ac suwohs ac sang mwe enenuh ac karihngihn sucu lal ac mwet lal, el suhmuhslah, “Ac tukun ma inge kuht moulkihn engan.”⁶

Fin pa oasr aholyacn nuhnak luhn muhtwacn se ke sifac se inge, nga siyuck sin tuhlihk muhtwacn luo nuhtihk ma pahyuckyak tari in kahsrweyuc. Nga siyuck lah eltahl kuh in use sie kuh luo ma eltahl kuh in liye muh yohk srihpac ke luhlahlfongi ma oruh ac kihsrucngsrucng nuh ke pahyuck ac sucu laltahl uh. Pa inge nuhnak lal Lara Harris ac Christina Hansen.

Lara, met: “Ma se ma yohk srihpac emet nuh sihk uh pa in etuh lah ke mukul tuhmuhk el som ke lwen lal, el oruh sulwaclah ma ahkkahlwemye ahkfuhlwact ac luhngse nuh sihk. Ke kuht kuh in luhlahlfongi sie sin sie ke atac se inge, kuht sifacna akiyac mihslac nuh in sucu lasr uh, ac kuht engankihn.”

Ingena pacl in nuhnak lal Christina: “Fin kom luhlahlfongiyuck sin mwet se el oacpacna in oasr luhlahlfongi lom in mwet se. Fin wacngihn luhlahlfongi, oasr sahngweng ac tahfuh luo. Nuh sihk, sie mwe insewowo suc tuhkuh ke nga luhlahlfongi yohk ke mukul tuhmuhk uh pa mihslac—mihslac in nuhnak etuh lah el kwacna oruh ma el fahk muh elac oruh uh. Luhlahlfongi use mihslac, luhngse, ac yen se ma luhngse uh ac kuh in kapkapwack we.”

Lara ac Christina elos tiacna liye ma elos suhmuhslah ah. Arulacna sun sihk lah kwacna tuhkweni nuhnkuh ke mwe insewowo ma mihslac ke lohm se ac ma tuhkuh e ke mukul na tuhmwacltahl ah fin eltahl orekmakihn luhlahlfongi. Ke sruhmuhnyuck ke srihkasrak luhn tuhlihk muhtwacn nuhtihk uh, mwe luti ke luhlahlfongi el ma na yohk srihpac se in ahkyohkye lun lohm se.

Nga engankihn pac ke facsin se nga mahtuhlah kac ke lohm sihk suc pahpah tuhmuhk el arulacna fokoko ke pristut lal ac eis luhlahlfongi ke sucu na fohn sac fal nuh ke “inse pwacye lal.”⁷ Kollac nga in akacsruhi puhla se luhk ke pacl nga fuhsr ah, srihke ke ma na wo sahflah se papa tuhmuhk ah puhlakihn ke el kahlwem kac ac ukwe mwe luti ke luhlahlfongi pwacye ma kuh in oan in sucu lal.

Ke nga srackna fuhsr ah, pahpah tuhmuhk ah tuh orekma ke facktori se. Orekma se inge oruh kain in ma puhs nuh fin facluh nohfohn.

Ke nga tuh wi lutlut ac, pahpah tuhmuhk ah ke ngan etwaclah in orekma. El luhngse pac ngan lutlut ke kain in orekma luhlahp. Orekma se luhk emet ah pa sral ac ahknwacsnwacsye lukunum. Nga srackna esam pacl se luhk nga tuh sruhlwaclah acn in yihyih sac pacl puhkantwen ke nga lutlut ac.

Ke nga tuh welac high school ac, nga tuh kwacfeyuck in orekma ke facktori se. Nga muhtwacwacack in luti in riti iken ma ac orekmakihn insin ke facktori sac. Tukun pacl in srolah liki high school, nga wi lutlut luhlahp ac tuh wi misin se. Ke nga fohlohk liki misin luhk, nga tuh fohlohk sifilpac orekma. Nga enenuh mani nuh ke muhtwacwacack se tok ke lutlut ac.

Sie lwen ah tukun misin luhk, nga tuh orekma ke acn in orekma luhk ah ke pahpah tuhmuhk ah pahngonyuclac nuh ke ohfohs lal ah ac siyuck sihk lah nga luhngse weluhl som nuh Los Angeles fahsr ke orekma lal. Pa inge pacl se emet ma pahpah tuhmuhk ah in suliyuc in weluhl forfor ke orekma lal. El oruh tuh nga in weluhl forfor nuh ke acn sahyac in aholah inen acn se nga orekma kac ah.

Met liki kuht som, el ahkkahlwemye nuh sihk ke mwet sasuc se. Ma se met, mwet se inge el mwet orekma ke kain in acn. Ahkluo, elos ahksasucye mwe orekma nahtuhlos. Ahktolu, iwen orekma lasr uh tiacna sang nuh selos kuhfwen mwe orekma. Ac sahflah, mwet kol luhlahp se laltahl ma nuhnkuh moul nuh ke iwac se inge ac pahngon kuht in liye pet in moli lasr ke oruh sasuc se inge. Toeni sac ahkkahlwemye sasuciyac ac yohk srihpaciyacn acn in orekma se lasr inge.

Tukun ai fin acn Los Angeles, nga ac pahpah tuhmuhk ah som nuh ke acn in orekma luhn mwet kol se nuh ke meeting sac. Ma ac sruhmuhnyuck emet uh ac sramsramkihn ma enenuh in orek ke orekma lasr ah. Mwe sramsram se ahkluo sruhmuhn ke ma srihsrihk sahyac. Ma sruhmuhnyuck inge kwewa ma ke molo, ma enenweyuck in orek. Pa inge acn se ma sun uh.

Mwet luhlahp se inge fahk lah molo se kuht sang nuh seltahl inge pa pet se ma srihk emet inmahsrlon pet ma elos oracni ac. Na el siyuck lah kuht kuh in fohlohkohnlah molo sac oraclah na kuht sifilpac fohlohkohnwacng nuh sel. El fahk lah pet lasr uh enenuh in tuhkuh tok kuhtuh srihk liki pet se ma ac yohk emet an in ahkluo. Na el fahk lah kuht ac orwaclihk luhpah sasuc ma orekweni uh inmahsrlosr tahfuh tahfuh. El fahk mu inge ac oruh tuh mwet nuh kwewa in itto. Inen orekma se lasr inge kuht in itto mweyen kuht ke oraclah kuhtuh mani ac. Orekma se lal ah kuh pac in wi itto mweyen srihklac molin price lal ah. Na, ahok, el kuh in itto mweyen el sang mani wowo nuh ke srihke se inge.

Na el use pac nuh sesr nacmpuh in pohk ke post kuht in kuh in suhpwaclah mani el sohkwack ah. Tukun ma inge nuh kwewa, el ngwetwacng nuh sin pahpah tuhmuhk ah ac siyuck, “na, meac kom insese?” Nuh ke lut luhk, pahpah el tuyak, usrukyac pahol, ac fahk nuh sel lah kuht ac fohlohk nuh yohrohl.

Tukun tari toeni sac, kuht sroacng ke stosah soko, ac pahpah tuhmuhk ah forma nuh sihk ac siyuck, “Na, meac kom nuhnkuh muh kuht enenuh in oruh?”

Nga topuk fahk muh nga muh kuht kuh pacna in tiac insese ke ma el fahk ah.

Pahpah tuhmuhk ah siyuck, “Mac kom tiacna nuhnkuh lah oasr ma kunacsr nuh sin nohfohn mwet orekma lasr in karihngihn orekma laltahl?”

Ke nga nuhnkuh ke kihsensiyuck lal ac met liki nga oruh in topuk, el tohpohklah sifacna kihsensiyuck lal ah. El fahk, “Lohng, Rick, ke pacl se kom sifacna kiacpwekom kuh oruh in wacngihnlac inse pwacye lom, ac arulacna upac in fohlohkohnma. Nimet kom muh oruh, tiac sie pacl.”

Ma se oruh nga akacsruhi puhla luhk uh kalmac pa nga tiacna muhlkuhnlah ma pahpah tuhmuhk el lutiyuc ke som se luhk el ke orekma lal ah. Nga fahk puhla se luhk inge in ahkkahlwemye lah meac nga kom ekihn pahpah kuh in oruh. Srihke motko ke luhlahlfongi luhk sin pahpah tuhmuhk fal nuh ke inse pwacye luhn insiyacl. El orekmakihn na mwe luti inge ke moul lal weacng ninac kiyuck, tuhlihk nahtuhl, ac mwet nuhkwewa el wi.

Mwet wiyuck, pa inge pruhe luhk ke ekuh se inge tuh kuht nuhkwewa in sang luhlahlfongi lasr emet nuh sin Leum, oacna Nephi el ahkkahlwemye, ac fin kuht inse pwacye kuht kuh in eis luhlahlfongi sin Leum, oacna nuh ke luhlahlfongi luhn muhtwacn kiyacsr ac tuhlihk nahtuhsr. Ke kuht kahlwem ac oruh mwe luti muhtahl inge ke luhlahlfongi muhsaheack ke ma pwacye, kuht ac fah pwacye nuh ke olwelah muhtahl lasr. Kuht ac kuh in puhla wo ke karihngihn lasr ke sucu lasr ke luhngse ac suwohs, sang mwe enenuh nuh ke moul, ac karihngihn sucu lasr liki ma koluk luhn facluh se inge. Nga fahk ma inge ke inen Jisus Kraist, amen.