2010–2019
Namoten mi Ennet—Ach Mochen ne Mokutukut
October 2017


Namoten Mi Ennet—Ach Mochen ne Mokutukut

Ewe Aewin Nemesepwi me ewe Soufos Joseph Smith ra wato mirit me ennet minne ra namot ngeni ach pwapwa non ei manau me ach manau feifeita.

Nupwen uwa arapakan fisu ier, ua eisini inei we, “Nupwen en me ngang sia ma me feinno ngeni nang, kopwe chiwen inei?” Ese pwan tepereni ei sokkun kapas eis. Nge a ponueni non ukukun an sinei, a apasa, “Apw, non nang kopwene mongeei nge ngang upwene fefinom. Usap chiwen inom.” Esap ina ponuen ai we kapas eis u osukusuku.

Mwirin ekis fansoun ena ekis poporous, ruemon onuwon ra wareto ren ewe titin imwem ewe. Ren ekkoch manaman, semei we a mut ngenir ar repwe tonong. Ra apasa pwe ir misineri seni ewe Mwichefenin Jises Kraist ren Aramas Mi Pin Non Fansoun Soponon.

Ekkei elter, ussun sia kaeo ach sipwe kor ngenir, ra poputa ne osukuna ach ewe famini. Uwa fokkun fatafatoch ne chemeni ach memefin pwapwa me mwasangasang iteitan ra feito ngeni imwach ewe. Ra aporousa ngenikem pwe emon onuon a feinno nein ewe potowon an epwe tingor ngeni Kot menni mwichefen a pung me a kuna Kot me Jises Kraist.1 Ekkewe elter ra akatona ngenikem echo sasingin nemesepwe, iwe nupwe uwa kuna, ua sinei pwe Joseph Smith a fokkun kuna Kot ewe sam me Jises Kraist. Ekkewe misineri ra apasa pwe pokiten ei nemesepwi, ewe ennetin Mwichefenin Jises Kraist a pwan nom sefan won ei fonufan..2

Sasing
Ewe Aewin Nemasepwi

Ekkewe misineri rapwan aitikem ussun an Kot ewe kokotun pwapwa me ponueni an ai we famini kewe kapas eis ussun mwichefen. Ra aitikich pwe ennetin famini ra tongeni repwe pwan nom sefan fengen me mwirin ei manau ussun sam, in, me nour at me nengin.

Am we famini ra papatais. Mei wor ekkoch fansoun mi aweires nupwen am ouwa siwini minenomun oruni, fangeta nonnomum, me winiti chon ewe mwichefen mi pochokun. Nge pokiten ewe chen me tong and Kot me ewe aninis seni chommong souemwen me memper, aua awesi ewe ier mi weires.

Minion ra choni ei Mwichefen, kapach ngeni ekkewe chommongun ra winino me papatais ew me ew wik, ra awora an kapasen pwarata ren ewe Aewin Nemesepwi. Ewe Ngun Mi Fel a tongeni enniwini sefani ngeni emon me emon kich ei pwarata nupwen sia achocho ne manaueni ewe ennet ussun ewe kapas annimen Jises Kraist.

Ewe Aewin Nemesepwi me ewe Soufos Joseph Smith ra wato soposopun wewe me ennet mine ra namot ngeni ach pwapwa non ei manau me ach manau feifeita me mwen mesen Kot. Upwe apasa unungat me nein kewe ennet sia anapano me sipwe mokutukut won pokiten emon onuwon a fotopuku non ennetin iotek.

Kot a Kokori Soufos Pwe Repwe Nemeni me Emweni Kich

Ew auchean ennet sia kaeo seni ewe Aewin Nemesepwi me ewe Soufos Joseph Smith pwe Kot a kokori soufos,3 chon osini me chon pwarata ar repwe aiti, emweni, esinesin me nemeni kich.4 Ekkei mwan ir noun Kot chon porous won fonufan,5 fiti ewe mumuta ar repwe porous me angang non iten ewe Samon.6 Ren ar repwe aponueta aurourer, sipwe tumun me angei feioch non ach sai won ei fonufan.

Nupwen uwa sukun Brigham Young University ussun emon onuwon, nipich emon mi awesi angangen misineri, ua fiti ew mwichen pristut ren ewe mwichenapen mwichefen non ewe Tabernacle won Temple Square. Preseten Ezra Taft Benson, ewe a presetenin ewe Mwichefen non ena atun a pesei ngeni ekkewe ra awesi ar angangen misineri ar repwe aucheani pupunu me anomu asan pwe ew mettoch mi auchea non manauer.7 Mwirin ewe mwich, uwa sinei uwa fen kokko ngeni aiersefan me upwe mokutukut won an ewe soufos ewe kapasen ourour.

Ika mwo, ua ekieki ai upwe no ngeni pukutan fonuwei, Brizil, ai upwe kuta emon punuwei. Me mwen upwe no ngeni Brazil won ew angang non pekin sukun ren ruu maram, uwa kori inei we me ekkoch chiechiei won ewe fon me forata ew iteiten arapakan engon fopun—emon me emon neir ika mi tufich epwe punuwei.

Nupwen ua nom Brazil, mwirin chommong ekiek me iotek, uwa churi, chuchufengen, kofot ngeni, me finata ew fansoun ne punueni emon me nein kewe fopun won ewe tetenin it. Ese mwochomwoch ngeni chon Provo, Utah, an emon epwe chuchchu me chiechi me kofot, nge a mwitir ren pusin nonnomun chon Brazil.

Mwirin ekkoch maram, ua punueni Elaine. I ai tong non manauei me ew feiochun finioch.

Use ura pwe meinisin repwe pwan fori ena tetenin it , nge uwa ura—meni epwe nap seni met sia ura—pwe sipwe mokut nupwen nouch soufos mi manau a kapas.

Sasing
Sasingin Preseten Thomas S. Monson

Noun Kot soufos ikenai, Preseten Thomas S. Monson, me sipwe feioch ren ach apiru non pungun an kapasen aurour.

Ach Weweiti ewe Ennetin Nonomun Kot

Pwan ew ennet sia kaeo pokiten ewe Aewin Nemesepwi me ewe Soufos Joseph Smith mi ewe ennetin nonomun Kot. Ekieki chok mwo ukukun feiochuch ach sia sinei pwe Kot I emon aramas mi wor inisin me futukan me chuun ussun chok kich,8 nge sia tongeni fen ngeni emon Kot ewe a pukupukun, ewe sia tongeni weweiti, me ewe a pwano me pwarano inisin me Noun we ngeni Noun soufos—soufosun nom me soufosun non ekkei ran.9 I emon Kot a rongorongo me ponueni ach iotek;10 emon Kot a mamasakich seni nang11 me a fokkun ekieki ussun kich non pekin ngun me pekin inis; emon Kot a ngenikich ewe pungun finata ach sipwe pusin ekieki ach sipwe tapweno mwirin me asomonu an kewe annuk sap ren an oumwesikich;12 emon Kot a ngenikich feioch me mut ngenikich ach sipwe sinei sokkun sosot pwe sipwe tongeni marita me winiti ussunI.

I emon Kot mi tong ewe a awora ew kokot ewe sipwe aani pwapwa non ei manau me feinfeino chok.

Jises Kraist I Ach Chon Amanau

Seni ewe Aewin Nemesepwi me ewe Soufos Joseph Smith, sia weweiti ewe ennetin me misin mi pin an ewe Samon Jises Kraist, ewe a foun nongonongun ach mwichefen.

Pokiten mano a fen fis me won ei fonufan, iwe wesewesen nupwen kich mi manau iei, sipwe pwan mano meinisin ew ran. Ewe ew mettoch a fis ren mano ewe inis epwe pout senikich; sisap chiwen tongeni ach sipwe fori och mettoch ach sipwe angei sefani. Pwan ew, pokiten sia tipis meinisin non ach manau won fonufan, sise tongeni chiwen niwinsefanino mwen mesen Samach won Nang.

En mi tongeni ekieki ewe osukosuken ach sia suseni fan mesen Kot me sisapw chiwen tongeni chiwen inisini inisch sefan?

Emon Chon Sena me emon Chon Amanau a murinno epwe wor an epwe angasa kich seni mano me tipis. Fan emwenien Samach won Nang, Jises Kraist a feitiw fonufan, a riaffou, mano on ewe irapenges, me a manau sefan pwe sipwe pwan tongeni manausefan me, fiti tekisosonun ach aiersefan me fori me aponueta ach kewe pwon, sia tongeni pwan nom sefan fan mesen Kot.

Jacop a awewei ewe watten umoumochun Kot. I a amonata ew an ren ach sipwe tongeni suseni kamwochunon ei anungaw; ewer, ena anungaw, mano me hell, ewe ua eitangeni manon inis, me pwan ewe manon ngun.13

Sasing
Jises me Mary ren ewe Peias

Jises I ewe Messiah mi pwon, ewe awora annuk, ewe mi Pin seni Israel, ach Samon, ach Chon Amanau, ach Chon Sena, ach King, ach meinisin.

Amo kich meinisin sipwe sopweno ne mokutukut won ekkei auchean ennet me tipachem, asorano ach anneasochis ngen Kot me Noun we Anamon. Non iten Jises Kraist, Amen.