Peb Yuav Tsum Ua Raws Li tej Yam Tseeb Tseem Ceeb
Thawj Zaug Ua Yog Toog Pom thiab tus Yaj Saub Yauxej Xamiv ua rau peb paub qhov tseeb thiab kev txawj ntse uas tseem ceeb rau peb txoj kev zoo siab hauv lub neej no thiab peb txoj kev tsa nto.
Thaum kuv muaj kwv yees li xya xyoo, kuv nug kuv niam hais tias, “Thaum koj thiab kuv tuag thiab mus saum ntuj, koj tseem yuav ua kuv niam los?” Nws yeej tsis tau xav tias kuv yuav nug li no. Tiam sis nws tseem teb raws li nws paub thaum ntawd, es nws hais tias, “Tsis ua, nyob saum ntuj koj yuav ua kuv tus nus thiab kuv yuav ua koj tus muam.” Kuv yuav tsis ua koj niam.” Qhov nws teb li ntawd tsis yog raws li kuv lub siab xav.
Tsis ntev tom qab wb sib tham li ntawd, ob tug tub hluas los txog lub qhov rooj vag ntawm peb lub tsev. Yeej yog ib qho txuj ci tseem ceeb uas kuv txiv cia nkawd los tsev. Nkawd hais tias nkawd yog ob tug tub txib los ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.
Ob tug txwj laug no, zoo li peb kawm hu lawv, pib qhia peb tsev neeg. Kuv tseem nco ntsoov peb txoj kev zoo siab thiab kev muaj siab txhua lub sij hawm nkawd los rau peb tsev. Nkawd qhia peb tias ib tug tub hluas tau mus rau ib koog ntoo thov Vajtswv seb lub koom txoos twg muaj tseeb thiab nws tau pom Vajtswv thiab Yexus Khetos.1 Ob tug txwj laug no muab ib daim duab txog kev ua yog toog pom no, thiab thaum kuv pom, kuv paub kiag hais tias Yauxej Xamiv twb pom Vajtswv thiab Yexus Khetos. Ob tug tub txib hais tias vim nws ua yog toog pom li no, ces twb rov qab muaj Yexus Khetos lub Koom Txoos tseeb nyob hauv lub ntiaj teb no.2
Ob tug tub txib kuj qhia peb txog Vajtswv txoj hau kev zoo siab thiab teb peb tsev neeg tej lus nug txog kev teev ntuj. Nkawd qhia peb tias peb tsev neeg yeej nyob tau ua ke tom qab lub neej no ua leej txiv, leej niam, nrog cov tub thiab cov ntxhais.
Peb tsev neeg tau ua kev cai raus dej. Tej lub sij hawm txoj kev hloov tej cwj pwm qub, tso tej kab lig kev cai tseg, thiab kev hloov los ua cov mej zeej ntawm lub Koom Txoos uas muaj siab ntseeg yeej nyuaj. Tiam sis los ntawm Vajtswv txoj kev hlub thiab nrog ntau tus mej zeej thiab cov thawj coj txoj kev pab, peb twb mus dhau thawj ob peb xyoos.
Neeg coob uas twb koom lub Koom Txoos lawm, tsis hais cov uas hloov siab los ntseeg thiab ua kev cai raus dej txhua lub lim tiam, twb tau txais ib zaj lus tim khawv txog Thawj Zaug Ua Yog Toog Pom. Tus Vaj Ntsuj Plig Dawb Huv yeej rov qab ua tim khawv rau peb ntau zaus thaum peb sim ua neej raws li qhov tseeb ntawm Yexus Khetos txoj moo zoo.
Thawj Zaug Ua Yog Toog Pom thiab tus Yaj Saub Yauxej Xamiv ua rau peb paub qhov tseeb thiab kev txawj ntse ntxiv uas tseem ceeb rau peb txoj kev zoo siab hauv lub neej no thiab peb txoj kev tsa nto thaum peb nyob ntawm Vajtswv lub xub ntiag. Kuv yuav hais txog peb qho tseeb uas peb txais tau thiab yuav tsum ua raws li peb qho no vim ib tug tub hluas twb tau txhos caug thov Vajtswv.
Vajtswv Hu cov Yaj Saub Coj Peb Kev
Ib qho tseeb tseem ceeb uas peb kawm los ntawm Thawj Zaug Ua Yog Toog Pom thiab tus Yaj Saub Yauxej Xamiv yog qhov uas Vajtswv hu cov yaj saub,3, cov pom tau, thiab cov txais kev tshwm sim kom qhia, ntuas, ceeb toom, thiab coj peb mus.4 Cov neeg no yog cov uas sawv Vajtswv cev hais lus nyob hauv lub ntiaj teb no,5 thiab muaj txoj cai hais lus thiab ua tej yam los ntawm tus Tswv lub npe.6 Yog peb ua raws nraim li lawv tej lus ntuas, Vajtswv yuav pov hwm peb thiab peb yuav txais cov koob hmoov zoo thaum peb ua neej hauv lub ntiaj teb.
Thaum kuv yog ib tug tub hluas uas tsis tau yuav poj niam uas kawm ntawv hauv Brigham Young University tom qab kuv ua ib tug tub txib lawm, kuv tau mus rau tuas pov thawj hwj ntawm lub tuam rooj sab laj nyob hauv lub Tsev Kheej nyob ntawm Tshav Tuam Tsev. Thawj Tswj Hwm Ezra Taft Benson, uas thaum ntawd yog tus Thawj Tswj Hwm ntawm lub Koom Txoos, yaum txhua tus tub txib uas rov qab los lawm kom ua tib zoo nrhiav poj niam yuav thiab saib qhov ntawd ua ib qho tseem ceeb tshaj plaws nyob hauv nws lub neej.7 Tom qab tuas no, kuv paub tias nws twb hais kom kuv hloov siab lees txim thiab kuv yuav tsum ua raws li tus yaj saub qhia.
Yog li ntawd, kuv txiav txim siab rov qab mus rau kuv lub teb chaws, Brazil, nrhiav ib tug poj niam. Ua ntej kuv mus tsev hauv Brazil kom xyaum ua hauj lwm tau ob lub hlis, kuv hu xov tooj rau kuv niam thiab ob peb tug phooj ywg, thiab sau ib daim ntawv uas muaj 10 tus ntxhais hluas lub npe—txhua tus yog ib tug uas kuv yuav tau.
Thaum kuv nyob hauv Brazil, tom qab kuv xav ntev thiab thov Vajtswv, kuv ntsib, tham, qhaib, thiab teem sij hawm yuav ib tug ntxhais hluas nyob hauv kuv daim ntawv. Yeej tsis tau sib tham thiab sib qhaib sai dua li cov tub ntxhais kawm ntawv nyob hauv Provo, Utah, tiam sis yeej sai dua li cov neeg nyob hauv Brazil.
Ob peb hlis tom qab ntawd, kuv tau yuav Elaine ua poj niam. Nws yog tus kuv hlub thiab ib txoj koob hmoov zoo kawg.
Kuv tsis hais tias txhua tus yuav tsum sau ib daim ntawv zoo li no, tiam sis kuv xav—tej zaum tsis yog kev xav xwb—hais tias peb yuav tsum ua raws li tej uas peb cov yaj saub hais.
Niaj hnub nim no Vajtswv tus yaj saub yog Thawj Tswj Hwm Thomas S. Monson, thiab peb yuav tau koob hmoov yog peb ua raws nraim li nws tej lus ntuas.
Kev Paub txog Qhov uas Vajtswv Zoo Li Cas Tiag Tiag
Ib qho tseeb ntxiv uas peb kawm los ntawm Thawj Zaug Ua Yog Toog Pom thiab tus Yaj Saub Yauxej Xamiv yog qhov uas Vajtswv zoo li cas tiag tiag. Cia li xav seb peb tau koob hmoov npaum li cas vim peb paub tias Vajtswv yog ib tug neeg uas muaj nqaij thiab pob txha ib yam li peb,8 paub tias peb teev tiam ib tug Vajtswv uas muaj tiag tiag, uas peb muaj peev xwm to taub, thiab tau muab Nws tus Kheej thiab Nws Leej Tub tshwm sim rau Nws cov yaj saub—cov yaj saub thaum ub thiab cov yaj saub nyob hauv hnub nyoog kawg no.9 Nws yog ib tug Vajtswv uas hnov thiab teb peb tej lus thov;10 ib tug Vajtswv uas saib peb nyob saum ntuj11 thiab yeej xav txog peb txoj kev nyob zoo ntawm sab ntsuj plig thiab sab cev nqaij daim tawv; yog ib tug Vajtswv uas muab kev ywj siab xaiv peb tus kheej seb peb puas coj raws li Nws thiab ua raws li Nws cov lus txib;12 ib tug Vajtswv uas foom koob hmoov rau peb thiab cia peb raug kev sim siab kom peb yuav loj hlob thiab hloov los ua neeg zoo li Nws.
Nws yog ib tug Vajtswv uas hlub peb uas muab ib txoj hau kev rau peb kom peb zoo siab hauv lub neej no thiab nyob mus ib txhis.
Yexus Khetos Yog Peb tus Cawm Seej
Los ntawm Thawj Zaug Ua Yog Toog Pom thiab tus Yaj Saub Yauxej Xamiv, peb tau txais kev txawj ntse kom paub txog tus Tswv Yexus Khetos lub luag hauj lwm dawb ceev, tus uas yog lub plawv zeb ntawm peb txoj kev teev ntuj.
Vim hais tias muaj kev tuag nyob rau hauv lub ntiaj teb no, ib yam li peb ua neej nyob tam sim no, muaj ib hnub peb txhua tus yuav tuag. Ib qho uas los ntawm kev tuag yog qhov uas peb yuav tsis muaj peb lub cev nqaij daim tawv ntxiv; peb yuav ua tsis tau dab tsi kom rov qab muaj. Tsis tas li ntawd xwb, vim hais tias peb txhua tus ua txhaum thaum peb ua neej hauv lub ntiaj teb no, peb yeej yuav tsis muaj peev xwm rov qab mus nrog peb Leej Txiv Saum Ntuj Ceeb Tsheej nyob.
Nej puas txawj xav tias yuav zoo li cas yog tias peb yeej yuav tsis nyob nrog Vajtswv thiab tsis muaj ib lub cev nqaij daim tawv ntxiv?
Yuav tsum muaj ib tug Cawm Seej thiab tus Txhiv Dim kom peb dim ntawm kev tuag thiab kev txhaum. Raws li Leej Txiv Saum Ntuj Ceeb Tsheej coj, Yexus Khetos tau los rau hauv ntiaj teb, raug kev txom nyem, tuag saum tus ntoo khaub lig, thiab sawv rov los kom peb yuav sawv rov los thiab, yog tias peb hloov siab lees txim tiag tiag thiab ua raws li peb tej kev khi lus, peb yuav rov qab los cuag Vajtswv.
Yakhauj kuj piav hais tias, “Auj peb tus Vajtswv txoj kev siab zoo yeej zoo heev, nws tau npaj ib txoj kev rau peb khiav kom dim ntawm tus tsiaj dab qias neeg no txhais tes; muaj tseeb tiag, tus tsiaj dab, txoj kev tuag thiab ntuj txiag teb tsaus, uas kuv hu ua txoj kev tuag ntawm cev nqaij daim tawv, thiab txoj kev tuag ntawm sab ntsuj plig.”13
Yexus yog tus Mexiyas uas tau cog lus tias yuav los, tus uas Pub Kev Cai, Ixayees tus Dawb Huv, peb tus Tswv, peb tus Cawm Seej, peb tus Txhiv Dim, peb tus Vaj Ntxwv, peb tus Tag Nrho.
Thov kom peb yuav ua raws li tej yam tseeb thiab kev txawj ntse tseem ceeb no, ua raws nraim li Vajtswv thiab Nws Leej Tub uas Nws Hlub. Los ntawm Yexus Khetos lub npe, amees.