Meklou a Belkul el Klemerang—Ng Kired el Mouedikel
A Kot el Ues me a Profet Joseph Smith a mle uchul a klemedengei me a klemrang el ngii a meklou a belkul kirel a deureng er tial klengar me a diak a ulebengelel klengar.
Sera ak euid a rekik, e ak kulker ra delak, “Sel de demad e de bora babeluades, e kedi delak?” Ng dimlak el keltmokl el kirel a uai tial ker. Meng milasem el longer morsel ktul rebab el sebechel, ng dilu el kmo, “Ngdiak, a de ngara babeluades e kede mo rodam ma rodos. Ngmo diak delam.” Ng dimlak el nger el kulureng er ngii.
Nguriul ersel kekedeb el cheldecheduch, e a terung el mekekerei el chad a mle ra blimam. Ng mlo mechesa rengmam le demak a kilngei er tir me te soiiseb. Te dilu el kmo te misionariis er a Ikelesia ra Jesus Kristo er a Uriul-klebesei el Santo.
Tirkal elders, aki mlo mesuub el lomekedong er tir, a mlo omuchel e lolsisechakl er a telungalk er kemam. A kungil el medengelii sel blekerdelel a deurreng ma klemeriar reng ra bekl el taem sel lemei er a blimam. Tuluchais er kemam er a kekerei el chad el mlora oreomel el lolengit er a Dios ra klemerang el Ikelesia e milsa Dios ma Jesus Kristo.1Tirkal elders a ulechotii er kemam a lecheklel sel ues, e sera kisang, e ak mle medengei el kmo a Joseph Smith a meral milsang a Dios el Chedam ma Jesus Kristo. Tirkal misionariis a dilu el kmo e leng tial locholt, e sel klemerang el Ikelesia er a Jesus Kristo a mla lmuut el mera beluulechad.2
Tirkal misionariis a dirrek e lulsichakl er kemam er sel luldesuel a Dios er a deurreng e ulenger a kermam el kirel a tekingel a chelid. Tulsisechakl er kemam el kmo a telungalk a meral sebechir el di dmak ruriul er tial klengar el chedam, chedil, ma rengalk.
A telungalk er kemam a miltcholb. Ng mle ngarngii a chetiteuokel el taem ra kim molodech a teletelam, mengeroid er kemam er a siukang, e mo mesisiich el chedal a Ikelesia. Engdi ng mle klubechub ma beltik el reng er a Dios ma ulengesuir a re betok el meredel ma rechad, e aki mlo selbechakl er sel kot el rak.
Te million el chad el mla mo chedal a Ikelesia, ma re mla bult e metecholb er a bekl el sandei, a mla moumerang er sel Kot el Locholt. A Chedaol Reng a sebechel lomelekl er tial sioning meng blechoel el me rekid sel dolasem el loltirakl a ikel bleketakl el klemerang er sel ebangkelio er a Jesus Kristo.
Sel Kot el Locholt ma Profet Joseph Smith a uchul a sisebelel a lmuut el betok el klaudengei ma klemerang e lusbechall el mora deurreng er kid er tial klengar ma deurreng el lobengkel a Dios. Ak mo masech a keldei el klemerang el de ngai e kired el louedikel el kirel le kekerei el buik a mlo tubareuach el ngara rengul meluluuch.
A Dios a Omekedong ra re Profet el Mengetakl e Omekrael er Kid
Sel lorechudel el klemerang el de subii ra Kot el Locholt ma Profet Joseph Smith a kmo a Dios a omekedong ra re profet,3 omlauch, ma re melai ocholt el lolsisechakl, omekrael, mengelechel, e mengetakl er kid.4 Tirkal chad melekoi tekingel a Dios er tial beluulechad,5 loba ngerachel el melekoi e mengetmokl el lokiu a ngklel a Rubak.6Ma duldelomel loltirakl a osisecheklir, e kede mo selbechakl ra omeroled er tial beluulechad.
Mak ngalk er a skuul e ra Brigham Young University e ak ngeasek, mesobil, e mla mo merek el misionarii, e ak mlora ongdibel er a priesthood ra klou e longdibel er a Tabernacle ra Temple Square. A President Ezra Taft Benson, el mle President ra Ikelesia er sel taem a ululdubech er a re bekl el misionarii me bol kerkikl ra tekingel a chelebechiil el rellii mel kot el ngarbab el tekoi ra klengar er tir.7 Nguriul ra ongdibel, e ak mle medengei el mlo kedong el mo uchul e kirek el louedikel er a lechul a profet.
Meng mlo uaisei, mak kiltmeklak el mo ra beluak ra Brazil losiik er a bechik. Nguchei ra kurael el mo ra Brazil el ngara eru el buil lomesuub, e ak kulmekedong er a delak ma rebebil ra re sechelik er a dengua e kiltmeklii a babier ra ngklir a re teruich el redil—eldi ungil buch.
Mak ngara Brazil, luriul rak meringel lomtetab e meluluuch, e aki mlo kaseues, e kaudesiol, el tilbir, e loterkeklii a sils el ki bom kaubuch ngak ma ta er tirkal redil el ngar tial babier. Tia diak el rekord ra re ngalk er a skuul el ngara Provo, Utah, el kaudesioul e telbiil el mo bechiil, engdi ng rekord sel de ngara Brazil.
Kesai el buil ruriul, e ak mlo bechil a Elaine. Ngka ngkel betik er a renguk e ungil klengeltengat.
Ng diak kulekoi el kmo a re rokui el chad bol loruul er a osisiu el babier, ak di ouchais—locha klou er a ouchais —el kid a blecheoll el kired e louedikel sel sekum a ngar el profet er kid a kmu tekoi.
A profet er a Dios er chelechal taem a President Thomas S. Monson, e kid a mo ngeltengat sel doltirakl a osisecheklel el ngara lemeltel.
Sel Klemedengei e ra Meral Blekerdelel a Dios
A tara klemerang el desubii leng sel Kot el Locholt ma Profet Joseph Smith a sel meral blekerdelel a Dios. Ka di momdasu el kmo kede ngeltengat el medengei el kmo a Dios a chad el ngarngii a bedengel ra tech ma iuiis e uai kid,8 mel sebeched el menguul ra Dios e meral dodengelii, e mla me chemolt e lochotii ma Ngelekel el mora re profet—ra re profet ra cheoudel el me re chelechang.9 Ngii a Dios el lorenges e onger a nglunguched;10 el Dios el mengkar er kid ra babeluades el ngarbab11 e blechoel el kerkikl ra reng er kid ma klechad er kid; a Dios el mileskid a techal el melilt el di kid el moltirakl er Ngii e oltirakl a lechul e ka de morimel;12a Dios el meskid a klengeltengat e mechikid me kede obangel ongarm meng mo sebeched el mukerool e mo uai Ngii.
Ngii a ou beltik el reng el Dios el mileskid a uldasu el doeak ngii e kede ngara deurreng er tial klengar el mora diak a ulebengellel.
A Jesus Kristo a Osobeled
Ng mla er sel Kot el Locholt ma Profet Joseph Smith, e kede ngilai a klemedengei er a klemerang ma chedaol el lurerel a Rubak el Jesus Kristo, el ngii e a saus er a klichelid er kid.
Leng kodall a mlei ra beluulechad, me chelechal de ngar, e kede mo mad er a tara klebesei. A tara mo dubech er a kodall a sel mo mechut el mo chutem a bedenged; e kall sebeched el mekerang e lmuut el nguu. Ma lmuut el tang, kede rokui el reuebt er a klengit er tial klengar ra beluulechad, meng diak el sebeched el lmuut el mora Demad ra Babeluades.
Ng sebechem el mesa sel mo dubech a lak kede sang a Dios e diak kede luut el nguu a bedenged?
A Osobel e Olsobel a mle usbechal el ngubetid er a kodall ma klengit. Ngokiu a rolel a Demad ra Babeluades, e a Jesus Kristo a mlei ra beluulechad, mlo cheuarem, mlad er a kerus, e milkiis er a kodall me bol sebeched el dirrek el mekiis er a kodall e, ngara meral kleuchul el reng e meruul e oltirakl a chedaol el telbiil, me de luut el mora Dios.
A Jakobus a milsoad ra klou klungiolel a Dios. Ngii a kiltmeklii a rael el kired me de mengubet er a chimal a kodall ma ngau, el ngii a omekedong el kmong kodall er a bedenged, e dirrek el kodall er a reng.”13
A Jesus e a milketmokl el Losobel, Meruul a Llach, Ng Chedaol ra Israel, Rubak er kid, Osebeled, King er kid, Ng rokui er kid.
Mei me de rokui el melmolm el louedikel el kirel a ikal lorechudel el klemerang ma klemedengei, loldars el moltirakl er a Dios ma Betik er a Rengul Ngelekel. Loba ngklel a Jesus Kristo, amen.