Padahk Mehlel Kan—Kitail Anahne Kapwaiada
Sansal Keieuo oh Soukohp Joseph Smith ketkihda marain oh me mehlel kan me kesempwal ong atail popohl nan mour wet oh atail komourla.
Ansou me I sounpar isuh, I ahpw idek rehn ahi nohnohu, “Ansou me kita pahn mehla kita kohla nanleng, ke pahn wiewiahte ahi nohno?” E sohte kasik me I pahn wia soangen peidek wet. Ahpw e wia wen ah kak koaros en sapeng, oh nda, “Soh, kita pahn wia pirien kei nanleng. I sohte pahn wia ahmw nohno.” Kaidehkin pasapeng me I kaskasiko mwo.
Ansou kis mwurin aht koaskoasoaipenehu, kisin pwutak riemen ahpw lela ni kelen imwato. I pwuriamweiki ahi pahpahu eh mweidrahlong. Ira nda me ira wia misineri kei sang Mwomwohdiso en Sises Krais en Souleng en Imwin Rahn Akan.
Se esehla ekerkin ira, elders, ira ahpw tepda padahkong aht peneinei. I tamtaman mwomwen aht pepehm en peren oh inengieng rong ansou koaros me ira kin kohdo nimwato. Ira ndahng kiht me mie kisin pwutak pwulopwul men me kohla nan tuhkeh kau oh kapakap oh idek rehn Kauno mehnia mwomwohdiso me mehlel oh me e kilangada Koht oh Sises Krais. 1 Ira kasalehiong kiht mwomwen kasansalo, oh ansou me I kilango, I ese me mehlel me Joseph Smith kilangada Koht Sahm oh Sises Krais. Misinerihko nda me pwehki kasansal wet, Mwomwohdiso mehlel en Sises Krais pwurehngehr mih pohn sampah. 2
Misinerihko pil padahkihong kiht duwen Sapwelimen Koht pilahn en komour oh sapengala aht peidek koaros me pid sarawi. Ira padahkihong kiht me mehlel peneinei koaros kak mihmipene mwurin mour wet nin duwen pahpa, nohno oh serihkan.
Aht peneineio ahpw pepdaisla. Ekei ansou e kin apwal ni aht nanantihong sen wekidala aht mour en mahs, uhdihsang aht tiahk en mahsakan, oh wiahla tohn mwomwohdisoht kehlail kei. Ahpw pwehki sang ni limpoak en Koht iangahki sawas en kaun en mwomwohdisoht tohto oh towehkan, me kahrehda aht kak powehdi pahr apwalko.
Milion kei me iangalahr mwomwohdisoht, pil ianganhki me tohto me weliakapwala oh pepdaisla nan wihk koaros, alehdier arail kadehdehpen Kasansalo. Ngehn sarawi kak katkataman kin kitail duwen mepwukat sang ni atail pahn wenlahte oh dadaur mehlel kan en rongamwahu en Sises Krais.
Kasansalo oh Soukohp Joseph Smith wahdo pil ekei kamarain oh mehlel me pil konehng atail peren en nan mour wet oh atail lapalapala nan wein Koht. I pahn kasalehda padahk mehlel siluh me kitail alehdier oh anahne wia pwehki sang ni kisin pwutak pwulopwul men ah kelepwidi ni ngidingid oh kapakap.
Koht ketin Malipe Soukohp kan pwehn Kahlwa oh Kaweid Kitail
Ehu padahk mehlel me kitail esehla sang ni Kasansalo oh Soukohp Joseph Smith iei me Koht kin malipe Soukohp kan, 3 ohl sarawi kan, sounkaudiahl kan pwehn padahki, kahlua, kaunopada, oh kahluai kitail. 4Ohl pwukat wia sapwelimen Koht menin kedehr pohn sampah, 5 me ahneki mweimwei en koasoi oh doadoahk ni mwaren Kauno.6Ma kitail pahn insenohki idawehn arail kaweid, kitail pahn insenamwahu oh alehdi kapai pilipil erein atail seiloak pohn sampah wet.
Ni ahi wie suksukuhl BrighamYoung Univerity ansou me I pwulopwul, saik pwopwoud, oh ahpwtehn pwurasang misin, I towehda tiepenehn prisduhd ehu nan Tabernacle ni Temple Square. Presiden Ezra Taft Benson, me wia Presiden en Mwomwohdisoht ansouo, kangoangehki koaros me ahpwte pwursang nan misin en mehleliong pwopwoud oh en kediropwki mahs pwopwoud nan arail mour. 7 Mwurin tuhpenehu, I esehier me I anahne koluhla oh doadoahngki sapwelimen soukohpo kaweid.
Eri, I medewehda ien pwurala Brazil, ahi wasahn kousoan, pwe ien rapahkihda ahi pwoud. Mwohn ahi pahn mweselahng Brazil erein sounpwong riau, I ekerda ahi nohnohu oh ekei kempoakepahi, kiht eri kilelehdi eden serepein mwein meh 10—me I pahn pilada ahi pwoud sang rehrail.
Erein ahi mihmi Brazil, mwurin kapakap oh madamadau loal, I tuhong, koasoaieng, inouieng, oh koasoanehdi rahn en kopwopwoud ohng emen serepein me iang intingdiko. E sohte wia ansoun kawehla rekoht ohng tohn skuhl en Provo Utah, en ehuiengda oh inouieng serepein men ansou mwadang, ahpw e udahn kin mwadang ong mehn Brazil kan.
Mwurin soupwong kei, I ahpw pwoudkihda Elain. E wia limpoak en ahi mour oh pilipil kaselel ehu.
I sohte koskosoia me koaros en pil wiahda soangen listo, ahpw I songosong en kosoia—de pil laudsang kangoange—me kitail en ansou koaros kapwaiada mahsen en soukohp kan.
Sapwelimen Koht soukohp rahn wet iei Presiden Thomas S. Monson, oh kitail pahn kapaida ma kitail pahn idawehn sapwelime kaweid ni pwung.
Ese Mehlel Ieias en Koht
Pil ehu padahk mehlel me kitail esehla sang ni Kasansanlo oh Soukohp Joseph Smith iei mehlel en his Koht. Song medewe iauwen atail ahneki kapai pwe kitail kak ese me Koht wia paliwar ehu me mie uduk oh tih me sohte weksang atail, 8 oh me kitail kak sarawihong Koht emen me mehlel, me kitail kak wehwehki, oh me pil pein Ih oh Sapwelime Ieros pwarehngehr Sapwelime soukohp kan—me iangahki soukohp kan en mahs oh pil imwin rahn pwukat. 9 E wia Koht emen me kin karonge oh sapeng atail kapakap kan; 10 Koht emen me kin mamahsani kitail sang nanleng11 oh kin ansou koaros loaloale palingenitail oh paliwaratail; Koht emen me ket kiheng kitail saledek en pilipil pwe kitail en pein pilada en idawehn Ih oh peikiong Sapwelime kosoned kan ni soh idihd; 12 Koht emen me kin kapaikitailda oh mweidehng kitail en lelohng kahpwal pwe kitail en kak kekeirda oh duwehla Ih.
E wia Koht limpoak men me kaunopada pilahn ehu me pahn kahrehiong kitail en kak ahneki peren nan mour wet oh mour mwurin mour wet kohkohlahte.
Sises Krais Iei Atail Sounkomour
Sang ni Kasansalo oh Soukohp Joseph Smith, kitail esehla udahn mwomwen sapwelimen Kauno Sises Krais pwukoah sarawio, me wia takain pwukokeimw en atail mwomwohdiso.
Pwehki mehla eh wiawiher nan sampah wet, nin duwehn atail wie momour ansou wet, udahn kitail koaros pahn mehla ehu rahn. Ehu kasuwedpen mehla iei me kitail pahn luhs sang paliwaratail kan; oh kitail sohte pahn kak wia mehkot pwehn pwurehng alehdi. Kapatpatieng, pweh kiatail kin wiahda dihp nan seiloak wet pohn sampah, kitail sohte pahn pwurehng pwurala oh mihla rehn Samatail Nanleng.
Na song medewe dahme pahn wiawi ansou me kitail pahn lekideksang mwohn sihlang en Koht oh sohte pwurehng alehda paliwar?
Sounkomour o oh Soundoaro anahne en mie pwehn kapit kitail sang mehla oh dihp. Sang ni kaweid pen Sahm Nanleng, Sises Krais ketdo sampah, lokolok, pwoula pohn lohpwuo, oh pwurehng iasada pwe kitail en pil kak pwurehng iasada oh, sang ni atail pahn koluhla mehlel oh kolokol inou sarawi kan, kitail kak pwurala oh kousoan nan wein Koht.
Jacob kawehwehda, Oh iauwen limpoak en Koht, me kaunopada ahl ehu pwe kitail en kak pitsang me suwedo, ei, me suwedo, me iei mehla oh ehl, me I kahdaniki mehlahn paliwar, oh mehlahn pali ngehn. 13
Sises iei me Mesaia, me kin Ketkihda kosonned, Koht Sarawi en Israel, atail Kaun, atail Sounkomour oh Soundoar, atail Nahnmwarki, oh atail Mehkoaros.
Kitail doula mwowe oh kapwaiada padahk mehlel pwukat oh marain wet, meirongki atail peik ong Koht oh Sapwellime Ieros. Ni mwaren Sises Krais, amen.