Ol Nambawan Promes we Oli Gud Tumas
Insaed long bigfala plan blong stap glad blong Papa long Heven, i gat insaed doktrin, ol odinens, mo ol nambawan promes we oli gud tumas se yumi save tekpat long ol gudfala fasin ia.
Wan long ol bigfala jalenj we wanwan long yumi i fesem evri dei i blong no letem ol wari blong wol ia oli tekova long taem mo paoa blong yumi, mekem se yumi no wantem save long ol samting we i no save finis we oli moa impoten.1 I isi tumas blong foget blong tingbaot mo lukluk nomo long ol fas wok long spirit from yumi gat tumas responsabiliti mo yumi bisi tumas. Samtaem yumi traem blong ron kwik, nao yumi fogetem weaples yumi stap go mo from wanem yumi stap ron.
Aposol Pita i rimaenem yumi se, ol disaepol blong Jisas Kraes, “long paoa blong God, hem i givim olgeta samting long yumi we yumi mas gat blong mekem ol fasin we hem i wantem. Ol samting ia i kamtru long yumi from we yumi save hem, mo hem nao i singaot yumi blong yumi gat hae nem mo stret laef olsem we hem i bin gat:
“Long fasin ia, God i givim ol nambawan presen long yumi we oli gud tumas, olsem we hem i promes blong givim. Nao taem yufala i kasem ol presen ia, yufala i gat rod blong ronwe long fasin blong wol, we i stap spolem ol man we oli wantem tumas ol samting ia, nao yufala i save kam joen long laef blong God.”2
Mesej blong mi i tokbaot bigwan olsem wanem ol nambawan promes ia we oli gud tumas, oli impoten, olsem we Pita i tokbaot, we i mekem yumi tingbaot se yumi stap wea long rod blong laef mo from wanem. Bae yumi tokbaot tu, ol rol blong Sabat dei, tabu tempol, mo hom blong yumi blong helpem yumi blong tingbaot ol impoten promes ia long saed blong spirit.
Mi prea se Tabu Spirit bae i tijim wanwan long yumi taem yumi lukluk tugeta long olgeta impoten trutok ia.
Tabu Aedentiti blong Yumi
Insaed long bigfala plan blong stap glad blong Papa long Heven, i gat insaed doktrin, ol odinens, ol kavenan, mo ol nambawan promes we oli gud tumas se yumi save tekpat long ol gudfala fasin ia. Plan blong Hem i talemaot aedentiti blong yumi we i no save finis, mo rod blong folem blong lanem samting, jenis, gro, mo long en, stap wetem hem blong oltaem.
Olsem we oli eksplenem long “Famli: Wan Ofisol Toktok i Go long Wol:”
“Evri famli blong man—man mo woman—oli mekem olgeta folem imej blong God. Wanwan long olgeta hem i wan spirit pikinini boe o spirit pikinini gel blong papa wetem mama long heven we oli laekem olgeta tumas, mo from we oli olsem wan spirit, wanwan long olgeta i gat gudfala fasin mo oli gat bigfala janis blong save kam olsem wan god.
“Long laef bifo laef long wol ia, ol spirit pikinini boe mo ol spirit pikinini gel oli bin save God mo oli bin stap wosipim Hem olsem Papa blong olgeta We i no Save Finis. Oli agri wetem glad hat long plan blong Hem, we i talem se ol pikinini blong Hem oli mas gat wan bodi blong mit mo bun, mo kasem eksperiens long wol ia blong save kam stret, mo long en, bae oli gat raet blong kasem laef ia we i no save finis.”3
God i promesem ol pikinini blong Hem se sapos oli folem ol tingting blong plan blong Hem mo eksampol blong Pikinini we Hem i Lavem, obei ol komanmen, mo stap strong wetem fet kasem en, nao, tru long paoa blong pemaot man we i kam long Sevya, “bambae oli gat laef we i no save finis, we i wan presen we i moa bigwan bitim evri nara presen we i kam long God.”4 Laef we i no save finis i nambawan promes we i gudfala tumas.
Bon Bakegen long Saed blong Spirit
Yumi andastanem moa fulwan nambawan promes ia we i gudfala tumas, mo yumi stat blong tekpat long tabu fasin ia taem yumi talem yes long singaot blong Lod blong kasem glori mo klin fasin. Olsem we Pita i tokbaot, singaot ia i kamtru taem yumi traehad blong ronwe long rabis fasin we i stap long wol.
Taem yumi stap gogohed, mo wetem fet yumi folem tingting blong Sevya, nao, from Atonmen blong Hem mo tru long paoa blong Tabu Spirit, i gat “wan bigfala jenis [i tekem ples insaed] long mifala, o insaed long hat blong mifala, mekem se mifala i nomo wantem blong mekem nogud fasin, be blong gohed blong mekem gudfala fasin oltaem.”5 Yumi “bon bakegen; yes, [yumi] bon long God, [yumi] mas jenis long fasin blong wol mo fasin blong foldaon blong [yumi] we [yumi] stap long hem, i go long stret mo gud fasin, from God i bin pemaot [yumi].”6 “Taem we God i joenem man long Kraes, hem i mekem man ya i kam wan niufala man. Ol fasin blong laef blong hem bifo oli finis, nao laef blong hem i kam niuwan olgeta.”7
Wan ful jenis olsem long fasin blong yumi i no stap hapen kwiktaem nomo, o long wan taem nomo. Olsem Sevya, yumi tu, yumi no “kasem ful paoa mo glori long wantaem, be [yumi] kasem gladhat from wan gladhat.”8 “From luk, olsem ia nao Lod God i talem: ‘Bae mi givim long ol pikinini blong ol man tijing folem tijing, rul folem rul, smol long ples ia mo smol longwe; mo oli kasem blesing, olgeta ia we oli lisin long ol rul blong mi, mo oli lisin long ol advaes blong mi, from bae oli lanem waes tingting.’”9
Ol prishud odinens mo ol tabu kavenan oli nid blong stap long taem blong ful jenis ia blong save bon bakegen; oli ol rod tu we God i bin jusum blong yumi kasem nambawan promes ia we i gudfala tumas. Ol odinens we yumi kasem taem yumi klin inaf, mo yumi tingbaot, oltaem oli openem ol rod wetem heven, we tru long olgeta, paoa olsem hemia blong God i save kam insaed long laef blong yumi. Ol kavenan we oli ona long olgeta oltaem, mo oli tingbaot olgeta, oltaem oli givim wan stamba tingting mo wan tru wei blong kasem ol blesing long laef blong wol ia mo long taem we i no save finis.
Eksampol, God i promesem yumi, folem hamas yumi fetful, blong gat oltaem kampani blong nambatri memba blong Godhed, we i Tabu Spirit;10 se tru long Atonmen blong Jisas Kraes yumi save kasem mo holemtaet fasin blong yumi kam klin aot long ol sin blong yumi,11 se yumi save kasem pis long wol ia,12 se Sevya i brekem ol rop blong ded mo i winim gref,13 mo se ol famli oli save stap tugeta blong taem naoia mo blong ful taem we i no save finis.
Yumi andastanem tu se, evri nambawan promes we i gudfala we Papa long Heven i givim long ol pikinini blong Hem, man i no save kaontem mo andastanem fulwan. Be, haf lis blong ol blesing we Hem i promesem we mi givim finis, i sapos blong mekem wanwan long yumi i “sapraes tumas,”14 mo i “foldaon mo i wosipim Papa”15 long nem blong Jisas Kraes.
Stap Tingbaot Ol Promes
Presiden Lorenzo Snow i givim woning: “Fasin ia i strong tumas long yumi blong stap fogetem bigfala stamba blong laef, from wanem Papa long Heven i sendem yumi long wol, mo tu, tabu koling ia we Hem i singaotem yumi long hem; mo i mekem se, yumi no stap girap i go antap moa long ol smol samting, be plante taem tumas, yumi letem yumi godaon i go long level blong wol mo yumi no mekem yumi rere blong kasem tabu help we God i bin givim, we help ia nomo i save mekem se yumi winim ol smol samting ia.”16
Sabat dei mo tabu tempol i tufala spesel ples blong kasem help blong heven we God i givim, blong helpem yumi blong girap i go antap moa long mak mo rabis fasin blong wol. Long fas ples, bae yumi tingting se wanem i kavremap ol stamba tingting blong kipim Sabat dei i tabu mo go long tempol oli joen be oli defdefren. Be, mi mi biliv se tufala stamba tingting ia oli semmak mo oli wok tugeta blong mekem yumi kam strong moa long saed blong spirit olsem wanwan man o woman, mo insaed long ol hom blong yumi.
Sabat
Afta we God i krietem evri samting, Hem i spel long nambaseven dei, mo i givim komanmen se wan dei long evri wik, bae i wan taem blong spel blong helpem ol pipol blong tingbaot Hem.17 Sabat i taem blong God, wan tabu taem, oli putum i stap speseli blong wosipim Hem mo blong kasem mo tingbaot ol nambawan promes blong Hem we oli gudfala tumas.
Long dispensesen ia, Lod i bin talem long yumi:
“Mo blong yu save lukaot gud blong ol samting blong wol oli no spolem yu, yu mas go long haos blong prea mo mekem ol tabu seremoni long tabu dei blong mi;
“From, i tru, hemia i wan dei we mi jusum blong yu spel long ol wok blong yu, mo blong yu mekem wosip blong leftemap nem blong Hae God we I Hae Olgeta.”18
Olsem ia nao, long Sabat, yumi stap wosipim Papa long nem blong Pikinini taem yumi tekpat long ol odinens mo stap lan abaot ol kavenan, blong stap kasem, tingbaot mo riniu olgeta. Long tabu dei ia blong Hem, ol tingting, aksen mo fasin blong yumi oli ol saen we yumi givim long God, mo i saen we i soem lav we yumi gat long Hem.19
Wan moa stamba tingting biaen long Sabat i blong mekem yumi karemaot lukluk blong yumi long ol samting blong wol ia mo yumi luk long ol blesing blong taem we i no save finis. Long tabu taem ia, taem yumi karemaot ol nomol evri dei wok blong bisi laef blong yumi, nao yumi save “lukluk long God mo stap laef”20 taem yumi save kasem mo tingbaot ol nambawan promes we oli gudfala tumas, mo long wei ia yumi tekem pat long gudfala fasin.
Tabu Tempol
Oltaem Lod i bin givim komanmen blong bildim ol tempol, ol tabu ples, we insaed long olgeta, ol sent we oli klin inaf oli mekem ol tabu seremoni mo ol odinens blong gospel, blong olgetawan mo blong olgeta we oli ded. Ol tempol oli ol ples we oli moa tabu long ol nara ples blong wosip. Wan tempol i stret haos blong Lod, wan tabu ples, we i spesel nomo blong wosipim God, blong kasem mo tingbaot ol nambawan promes blong Hem we oli gudfala tumas.
Lod i bin talem long dispensesen ia: “Oganaesem yufala; rere long evri samting we i nid; mo stanemap wan haos, we i wan haos blong prea, wan haos blong livim kakae, wan haos blong fet, wan haos blong lanem samting, wan haos blong glori, wan haos blong oda, wan haos blong God.”21 Stamba lukluk blong wosip long tempol, i blong tekpat long ol odinens, mo lanem abaot olgeta, kasem mo tingbaot ol kavenan ia. Yumi tingting, mekem samting, mo dresap defren insaed long tempol bitim eni nara ples we yumi save go long hem.
Wan stamba prinsipol blong tempol i blong yumi go antap mo yumi karemaot lukluk blong yumi long ol samting blong wol ia mo yumi luk long ol blesing blong taem we i no save finis. Yumi aot sot taem long ol samting blong wol we yumi save gud long olgeta, nao yumi save “luk long God mo laef”22 taem yumi kasem mo tingbaot ol nambawan promes we oli gudfala tumas, mo long wei ia, yumi tekpat long tabu fasin.
Plis luk gud se Sabat dei mo tempol, tufala ia, wan i wan tabu taem mo narawan i wan tabu ples, we oli putum i stap blong wosipim God mo blong kasem mo tingbaot ol nambawan promes blong Hem we oli gudfala tumas blong ol pikinini blong Hem. Olsem we God i putum, ol stamba tingting blong tufala samting ia i blong helpem yumi, oli semmak nomo: blong yumi gat paoa mo oltaem lukluk long Papa long Heven, long Wan Stret Pikinini Ia Nomo blong Hem we Hem i Lavem Tumas, mo long Tabu Spirit, mo tu, ol promes we oli kam wetem ol odinens mo ol kavenan blong gospel we i kambak we i blong Sevya.
Ol Hom blong Yumi
I impoten we, wan hom, i mas stap olsem tufala ia, wan taem mo wan ples, we ol wanwan man, woman mo famli oli tingbaot gud ol nambawan promes we oli gudfala tumas. Blong yumi aot long ol hom blong yumi mo spendem taem long ol miting long Sandei mo go insaed long tabu ples ia we i wan tempol, i gat nid from, be i no inaf. Taem nomo, yumi karem spirit mo paoa ia we oli kamaot long ol tabu aktiviti ia i gobak wetem yumi long ol hom blong yumi, long taem ia nomo bae yumi gohed blong lukluk nomo long ol bigfala stamba tingting blong laef long wol mo winim ol rabis wok we oli stap long wol. Sabat mo ol tempol eksperiens blong yumi oli mas ol strong paoa blong jenisim wanwan man, woman mo famli mo hom blong yumi wetem ol samting we oli mekem yumi tingbaot ol lesen we yumi lanem, hemia, wetem Tabu Spirit we i stap mo i givim paoa, wetem fasin blong jenisim yumi i go long Lod Jisas Kraes, oltaem mo wetem wan “stret mo klin hop”23 long ol promes blong God we i no save finis.
Sabat mo tempol i save helpem yumi blong stanemap hom blong yumi long wan “fasin we i nambawan blong folem”24 taem yumi stap kam “joen wanples long Kraes we hem i olsem hed blong olgeta samting [long heven mo long wol.]”25 Wanem yumi stap mekem insaed long ol hom blong yumi wetem tabu taem ia blong Hem mo wetem wanem yumi lanem insaed long tabu ples blong Hem, i plei bigfala pat blong tekpat long tabu fasin blong Hem.
Promes mo Testemoni
I isi blong ol evri dei wok mo samting blong wol ia oli tekova long yumi. Blong slip, kakae, dresap, wok, pleiplei, mekem spot, mo ol nara aktiviti blong evri dei, yumi nidim mo oli impoten. Be long en, wanem kaen man yumi kam, i risal blong save mo tingting blong yumi blong wantem lanem samting aot long Papa, Pikinini mo Tabu Spirit; hem i no ful risal blong ol evri dei wokbaot blong yumi tru long rod blong laef ia.
Gospel i moa bitim lis blong tikim blong ol wok blong mekem; be, hem i bigfala mat ia blong trutok, we oli “putum gud long frem,”26 mo oli wivim gud tugeta, we i stap blong helpem yumi blong kam moa olsem Papa long Heven mo Lod Jisas Kraes, we i blong tekpat long tabu fasin blong Hem. I tru, yumi blaen from yumi luk i “go bitim mak ia”27 long taem we long ril laef long spirit, ol kea, ol wari mo ol smol samting blong wol oli kavremap yumi.
Taem yumi stap waes mo invaetem Tabu Spirit blong gaedem yumi,28 mi promes se bae Hem i tijim yumi wanem i tru. “Bae Hem i testifae abaot Kraes, mo givim laet long maen blong yumi blong yumi luk heven”29 mo semtaem traehad blong kasem fiuja we i no save finis mo tekpat long tabu fasin.
Mi mi witnes se ol nambawan promes we oli gudfala tumas we oli joen long ol odinens mo kavenan blong yumi, oli tru i stap. Lod i talemaot:
“Mi givim yufala ol daereksen long olsem wanem bae yufala i mekem long fored blong mi, blong i tanem i kambak long yufala blong mi sevem yufala.
“Mi, Lod, mi mas mekem folem promes blong mi taem yufala i mekem wanem mi talem; be taem yufala i no mekem wanem we mi talem, yufala i no gat promes.”30
Mi mi witnes se Papa blong yumi long Heven i stap laef mo i man we i mekem plan ia blong fasin blong sevem man. Jisas Kraes i Wan Stret Pikinini Ia Nomo blong Hem, i Sevya mo Ridima blong yumi. Hem i stap laef. Mo mi testifae se plan mo ol promes blong Papa, Atonmen blong Sevya, mo kampani blong Tabu Spirit, oli mekem se i posibol blong gat “pis long wol ia, mo long laef we i no save finis long wol we bae i kam.”31 Long saed blong olgeta samting ia, mi testifae long tabu nem blong Lod Jisas Kraes, amen.