Tej Kev Cog Lus Zoo Kawg Nkaus uas Muaj Nqis
Leej Txiv Saum Ntuj Ceeb Tsheej txoj hau kev zoo siab yog cov lus qhuab qhia, cov kab ke, thiab cov lus cog tseg zoo kawg nkaus uas muaj nqis uas ua rau peb lub neej yuav zoo ib yam li Vajtswv lub.
Qhov nyuaj rau peb txhua tus ua txhua hnub yog txoj kev ua kom txhob siv zog thiab siv sij hawm tas li ua tej yam ntawm lub ntiaj teb no ua rau peb thiaj li tsis nco qab txog tej yam nyob mus ib txhis uas muaj nqis tshaj plaws.1 Yooj yim rau peb ntxeev kom tsis txhob nco qab thiab tsis txhob tsom ntsoov rau tej hom phiaj ntawm sab ntsuj plig tseem ceeb vim muaj ntau yam peb yuav tsum ua thiab peb tsis muaj sij hawm. Tej lub sij hawm peb khiav mus ub mus no ua rau peb tsis nco qab peb mus qhov twg thiab vim li cas peb maj ua luaj.
Tus Thwj Tim Petus qhia peb txog Yexus Khetos cov thwj tim hais tias, “Vajtswv tus uas muaj hwj chim, nws pub txhua yam zoo rau peb uas pab peb tau txoj sia thiab ua neeg zoo li nws, vim yog peb paub tus uas hu peb los koom nws lub hwj chim ci ntsa iab thiab qhov uas nws zoo kawg nkaus:
Vajtswv muab cov lus cog tseg zoo kawg nkaus uas muaj nqis rau peb: nws ua li ntawd kom nej txhua tus uas tau cov lus cog tseg no yuav ua lub neej zoo ib yam li Vajtswv lub, kom dim kev phem kev qias uas yuav coj neeg ntiaj teb mus raug kev puas tsuaj.”2
Kuv zaj lus hais txog qhov uas cov lus cog tseg zoo kawg nkaus uas muaj nqis tseem ceeb npaum li cas, qhov uas Petus piav txog ua rau peb nco ntsoov hais tias hauv lub neej no peb xav ua dab tsi thiab vim li cas peb xav ua li ntawd. Kuv kuj yuav hais txog qhov uas Hnub Caiv, lub tuam tsev, thiab peb tsev neeg pab peb li cas kom nco txog tej lus cog tseg ntawm sab ntsuj plig tseem ceeb no.
Kuv rau siab thov kom tus Vaj Ntsuj Plig Dawb Huv yuav qhia peb txhua tus thaum peb xav txog tej yam tseem ceeb no.
Peb lub Keeb Los ntawm Vajtswv
Peb Leej Txiv Saum Ntuj Ceeb Tsheej txoj hau kev zoo siab yog cov lus qhuab qhia, cov kab ke, thiab cov lus cog tseg zoo kawg nkaus uas muaj nqis uas ua rau peb lub neej yuav zoo ib yam li Vajtswv lub. Nws txoj hau kev qhia peb txog peb lub keeb uas nyob mus ib txhis thiab txoj kev peb yuav tsum taug kom kawm, hloov, loj hlob, thiab thaum kawg nrog nraim Nws nyob tas mus li.
Ib yam li piav nyob hauv “Tsev Neeg: Ib zaj Lus Tshaj Tawm rau lub Ntiaj Teb”:
“Txhua txhia tus tib neeg—txiv neej thiab poj niam—raug tsim muaj yam ntxwv zoo li Vajtswv. Txhua txhia tus yog nkawm niam txiv saum ntuj ceeb tsheej ib tug tub ntsuj plig los yog ib tug ntxhais ntsuj plig uas nkawd hlub thiab xws li txhua tus yog li ntawd, txhua txhia tus muaj ib tug cwj pwm thiab txoj hmoov los saum ntuj los. …
“Nyob rau lub qub neej, tej tub ntsuj plig thiab tej ntxhais ntsuj plig tau paub thiab teev tiam Vajtswv ua lawv Leej Txiv uas Nyob Mus Ib Txhis Li thiab lawv tau txais yuav Nws lub tswv yim uas npaj tseg hais tias Nws cov me nyuam yuav tau ib lub cev nqaij daim tawv thiab yuav tau ib lub sij hawm saum ntiaj teb no kom thiaj xyaum tau ua neeg zoo tag nrho thiab thaum kawg ncav tau lawv txoj hmoov los saum ntuj los ua cov uas txais txoj sia nyob mus ib txhis ua lawv tug.”3
Vajtswv cog lus rau Nws cov me nyuam hais tias yog lawv ua raws li tej ntsiab cai ntawm Nws txoj hau kev thiab coj raws li Nws Leej Tub tus yam ntxwv, thiab muaj kev ntseeg nyiaj kom mus txog thaum kawg, ces vim yog los ntawm tus Cawm Seej txoj Kev Txhiv Dim, lawv “yuav tau txoj sia nyob mus ib txhis, uas yog lub txiaj ntsim zoo tshaj plaws ntawm tag nrho Vajtswv tej txiaj ntsim.”4 Txoj sia nyob mus ib txhis yog lo lus cog tseg zoo kawg nkaus uas muaj nqis tshaj plaws.
Kev Yug Dua Tshiab ntawm Sab Ntsuj Plig
Peb to taub ntxiv txog cov lus cog tseg zoo kawg nkaus uas muaj nqis thiab pib ua lub neej zoo ib yam li Vajtswv lub thaum peb ua raws li tus Tswv hu peb ua los koom nws lub hwj chim ci ntsa iab thiab qhov uas nws zoo kawg nkaus. Zoo li Petus piav hais tias, yuav muaj raws li txoj kev hu no thaum peb siv zog dim kev phem kev qias hauv lub ntiaj teb no.
Thaum peb thawb mus lawm tom hauv ntej nrog kev ntseeg tus Cawm Seej, ces vim muaj Nws txoj Kev Theej Txhoj thiab los ntawm tus Vaj Ntsuj Plig Dawb Huv lub hwj chim, “ua rau peb hloov loj heev, los sis hloov peb lub siab, xwv kom peb tsis txhob muaj siab xav ua phem ntxiv, tiam sis xav ua zoo tsis tu ncua mus li.”5 Peb “yug dua tshiab; muaj tseeb tiag, yug los ntawm Vajtswv, hloov ntawm [peb] lub siab nyiam sab cev nqaij daim tawv thiab txoj kev poob, mus rau kev ncaj ncees, uas Vajtswv tau muab lawv txhiv dim.”6 “Tus uas nrog Yexus Khetos koom ib txoj sia, tus ntawd yog neeg tshiab. Nws lub neej qub twb dua lawm nim no nws muaj lub neej tshiab.”7
Feem ntau thaum peb tej cwm pwm hloov, peb tsis hloov sai sai thiab tsis hloov thaum tib lub sij hawm xwb. Ib yam li tus Cawm Seej, peb kuj tsis “txais tag nrho txhua yam thaum xub thawj, tiam sis tau txais lub hwj chim ntxiv rau lub hwj chim.”8 “Vim saib seb, tus Tswv Vajtswv hais li no: Kuv yuav muab rau noob neej ib nqe lus ntxiv rau ib nqe lus, ib ntsiab cai ntxiv rau ib ntsiab cai, muab me ntsis nim no thiab muab me ntsis lwm hnub; thiab lawv cov uas mloog kuv tej lus ntsiab cai, thiab cuab pob ntseg rau kuv tej lus ntuas, yuav tau koob hmoov, vim lawv yuav kawm laj lim tswv yim.”9
Cov kab ke pov thawj hwj thiab kev khi lus dawb ceev yog tej yam tseem ceeb rau peb txoj kev yug dua tshiab ntawm sab ntsuj plig; tej no kuj yog tej uas Vatswv tau pom zoo kom peb txais tau Nws cov lus cog tseg zoo kawg nkaus uas muaj nqis. Cov kab ke uas peb tsim nyog txais thiab nco ntsoov tas mus li qhib lub rooj ntug kom peb txais tau Vajtswb lub hwj chim hauv peb lub neej. Yog peb ua raws li peb tej kev khi lus thiab nco ntsoov tej ntawd ces yuav ua rau peb nco txog peb lub hom phiaj thiab txais tau cov koob hmoov hauv lub neej no thiab lub neej nyob mus ib txhis.
Ua piv txwv hais tias, Vajtswv cog lus rau peb, yog peb rau siab ntseeg, peb yuav muaj tus thib peb hauv Pawg Vajtswv, uas yog tus Vaj Ntsuj Plig Dawb Huv, nrog nraim peb nyob,10 dhau los ntawm Yexus Khetos txoj Kev Theej Txhoj peb yuav txais kev zam txim rau peb tej kev txhaum tas mus li,11 peb yuav txais tau kev kaj siab lug hauv lub ntiaj teb no,12 tus Cawm Seej tau muab tej saw hlau ntawm kev tuag tu tas lawm thiab kov yeej lub ntxa lawm,13 thiab peb tsev neeg nyob tau ua ke mus ib txhis li.
Peb yeej suav los sis piav tsis tau txog tag nrho cov lus cog tseg zoo kawg nkaus uas muaj nqis uas Leej Txiv Saum Ntuj Ceeb Tsheej muab rau Nws cov me nyuam. Tiam sis, txawm yog ib feem ntawm cov koob hmoov uas Vajtswv cog lus tias peb yuav txais uas kuv nyuam qhuav hais tas lawm tsim nyog uas peb txhua tus “zoo siab uas Yexus hlub [peb],”14 thiab “txhos caug ntua thiab teev tiam Leej Txiv”15 los ntawm Yexus Khetos lub npe.
Nco txog cov Lus Cog Tseg
Thawj Tswj Hwm Lorenzo Snow ceeb toom hais tias, “Yooj yim rau peb tsis nco qab txog lub neej no lub ntsiab, lub hom phiaj uas qhia vim li cas Leej Txiv Saum Ntuj Ceeb Tsheej tau xa peb los rau hauv lub neej no, tsis hais txoj kev dawb huv uas Nws hu peb ua; thiab yog li ntawd, peb tsuas xav txog tej yam me me uas pheej hloov … , feem ntau peb cia peb tus kheej ua li neeg ntiaj teb ua xwb thiab tsis txais yuav kev pab uas Vajtswv xav muab rau peb, uas yog kev pab uas ua rau peb kov yeej [tej yam me me uas pheej hloov ntawd].”16
Hnub Caiv thiab lub tuam tsev dawb huv yog ob yam kev pab uas Vajtswv muab pub rau peb kom pab pebua zoo dua li neeg ntiaj teb ua thiab tsis ua kev phem kev qias. Tej zaum peb yuav xav tias lub hom phiaj ntawm kev hwm Hnub Caiv kom dawb huv thiab lub hom phiaj ntawm kev mus rau lub tuam tsev yeej sib txawv. Tiam sis, kuv ntseeg tias ob lub hom phiaj no yeej zoo ib yam thiab nyob ua ke yuav txhawb peb lub zog ntawm sab ntsuj plig, peb tus kheej thiab nyob hauv peb tsev neeg.
Hnub Caiv
Tom qab Vajtswv tsim txhua yam, Nws so thaum hnub xya thiab txib kom teem sij hawm ib hnub txhua lub lim tiam rau neeg so thiab pab lawv nco txog Nws.17 Hnub Caiv yog Vajtswv lub sij hawm, ib lub sij hawm dawb ceev uas tau muab tshwj tseg teev tiam Nws thiab txais thiab nco txog Nws cov lus cog tseg zoo kawg nkaus uas muaj nqis.
Nyob hauv lub caij nyoog tso cai no tus Tswv qhia hais tias:
“Thiab xwv kom [nej] yuav ceev [nej] tus kheej txhij zog kom tej yam ntawm lub ntiaj teb txhob ua rau [nej] ceb, [nej] yuav tsum mus rau hauv lub tsev thov Vajtswv thiab fij [nej] tej cim nco txog thaum yog kuv hnub dawb huv;
“Vim tseeb tiag hnub no yog ib hnub uas tau muab los rau [nej] so ntawm [nej] tej kev khwv, thiab muab [nej] tej kev hwm pub rau tus uas Siab Tshaj Plaws.”18
Yog li ntawd, thaum Hnub Caiv peb teev tiam Leej Txiv los ntawm Leej Tub lub npe thaum peb ua cov kab ke thiab kawm txog, txais, nco txog, thiab rov qab ua kev khi lus. Thaum txog Nws hnub dawb huv, peb tej kev xav, tej yam peb ua, thiab xeeb ceem yog tej cim uas peb pub rau Vajtswv qhia rau Nws tias peb hlub Nws npaum li cas.19
Ib lub hom phiaj ntxiv ntawm Hnub Caiv yog muab peb lub zeem muag uas saib tej yam ntawm lub ntiaj teb xwb tsa siab kom saib cov koob hmoov uas nyob mus ib txhis. Peb muab ntau yam uas peb yuav tsum ua hauv peb lub neej txhua hnub tshem tawm thaum lub sij hawm dawb ceev no, peb thiaj yuav “ntsia ntsoov Vajtswv xwv kom [peb] muaj sia nyob”20 thaum peb txais thiab nco txog cov lus cog tseg zoo kawg nkaus uas muaj nqis uas ua rau peb lub neej yuav zoo ib yam li Vajtswv lub.
Lub Tuam Tsev Dawb Huv
Tus Tswv yeej ib txwm txib Nws cov neeg ua cov tuam tsev, tej qhov chaw dawb huv uas Tsoom Haiv Neeg Ntseeg tsim nyog ua cov kab ke dawb ceev ntawm txoj moo zoo rau lawv tus kheej thiab rau cov tuag. Cov tuam tsev yog tej qhov chaw teev tiam Vajtswv uas dawb huv tshaj plaws. Ib lub tuam tsev yeej yog tus Tswv lub tsev, ib qho chaw dawb ceev uas tau muab tshwj tseg kom teev tiam Vajtswv thiab txais thiab nco txog Nws cov lus cog tseg zoo kawg nkaus uas muaj nqis.
Tus Tswv tau qhia nyob hauv lub caij nyoog tso cai no, “Kho nej tus kheej; npaj txhua yam uas yuav tsum muaj, thiab tsa ib lub tsev, uas twb yog ib lub tsev thov Vajtswv, ib lub tsev yoo mov, ib lub tsev muaj kev ntseeg, ib lub tsev muaj kev kawm, ib lub tsev muaj yeeb koob, ib lub tsev muaj chaw txawb chaw rau, ib lub tsev rau Vajtswv.”21 Lub hom phiaj tseem ceeb ntawm kev teev tiam hauv lub tuam tsev yog ua cov kab ke thiab kawm txog, txais, thiab nco txog tej kev khi lus. Peb xav, ua tej yam, thiab hnav khaub ncaws hauv lub tuam tsev uas txawv ntawm tej yam peb ua hauv lwm qhov chaw uas peb pheej mus.
Ib lub hom phiaj ntawm lub tuam tsev yog muab peb lub zeem muag uas saib tej yam ntawm lub ntiaj teb xwb tsa siab kom saib cov koob hmoov uas nyob mus ib txhis. Vim peb muab peb tus kheej tshem tawm ntawm tej qhov chaw hauv lub ntiaj teb uas peb pheej mus, peb thiaj “ntsia ntsoov Vajtswv xwv kom [peb] muaj sia nyob”22 thaum peb txais thiab nco txog cov lus cog tseg zoo kawg nkaus uas muaj nqis uas ua rau peb lub neej yuav zoo ib yam li Vajtswv lub.
Thov kom nej paub tias Hnub Caiv thiab lub tuam tsev yog ib lub sij hawm dawb ceev thiab ib qho chaw dawb ceev uas tau muab tshwj tseg kom teev tiam Vajtswv thiab txais thiab nco txog Nws cov lus cog tseg zoo kawg nkaus uas muaj nqis. Raws li Vajtswv tau txhim tsa, lub hom phiaj ntawm ob yam kev pab no yeej zoo ib yam: kom peb pheej tsom ntsoov rau peb Leej Txiv Saum Ntuj Ceeb Tsheej, Nws Tib Leeg Tub, tus Vaj Ntsuj Plig Dawb Huv, thiab cov lus cog tseg uas koom nrog cov kab ke thiab kev khi lus ntawm tus Cawm Seej txoj moo zoo.
Peb tej Tsev
Qhov tseem ceeb, ib lub tsev yeej yog ib lub sij hawm thiab qhov chaw uas koom ua ke es nyob haud tib neeg thiab tsev neeg nco txog Vajtswv cov lus cog tseg zoo kawg nkaus uas muaj nqis. Qhov uas peb tawm ntawm peb lub tsev mus siv sij hawm hauv kev sib ntsib thaum hnub Sunday thiab mus rau hauv qhov chaw dawb ceev uas yog ib lub tuam tsev yeej tseem ceeb heev tiam sis tsis txaus. Tsuas yog peb muab lub txiaj ntsim thiab lub zog uas los ntawm tej yam dawb huv no rov qab los rau hauv peb lub tsev xwb peb thiaj yuav tsom ntsoov rau tej lub hom phiaj ntawm lub neej no thiab kov yeej kev phem kev qias nyob hauv lub ntiaj teb. Tej yam uas peb kawm thaum Hnub Caiv thiab hauv lub tuam tsev yuav tsum ua rau peb tus kheej, peb tsev neeg, thiab peb tsev muaj tus ntsuj Plig kom nco ntsoov tsis tu tsis tseg txog tej yam tseem ceeb uas peb tau kawm, los ntawm tus Vaj Ntsuj Plig Dawb Huv lub hwj chim, kom hloov siab los ntseeg tus Tswv Yexus Khetos thiab “kev cia siab uas ci kawg nkaus”23 rau Vajtswv cov lus cog tseg uas nyob mus ib txhis.
Hnub Caiv thiab lub tuam tsev yuav pab peb tsim ib txoj kev “zoo tshaj”24 thaum peb “sau txhua yam los ua ib ke nyob hauv Khetos, tag nrho tej uas nyob saum ntuj, thiab tej uas nyob hauv ntiaj teb; tsis hais nyob hauv nws.”25 Tej yam uas peb ua hauv peb tsev nrog Nws sij hawm dawb ceev thiab tej yam uas peb kawm nyob hauv Nws qhov chaw dawb ceev yeej tseem ceeb rau peb kom ua lub neej zoo li Vajtswv lub.
Kev Cog Lus thiab Zaj Lus Tim Khawv
Yeej yooj yim rau tej yam me me uas peb pheej ua kav peb lub neej. Kev tsaug zog, noj mov, hnav khaub ncaws, ua hauj lwm, ua si, dhia cev, thiab lwm yam uas peb pheej ua yog tej yam tseem ceeb uas peb yuav tsum ua. Tiam sis, thaum kawg, peb yuav ua neeg los ntawm tej yam uas peb paub thiab xav kawm los ntawm Leej Txiv, Leej Tub, thiab tus Vaj Ntsuj Plig Dawb Huv; tsis yog los ntawm tej yam uas peb ua txhua hnub tas peb lub neej.
Txoj moo zoo tsis yog tej yam hauj lwm rau peb ua xwb; tiam sis, txoj moo zoo yeej zoo li ib daim paj ntaub txog qhov tseeb uas tau muab “sib cuam ua ke”26 thiab xaws ua ke, uas pab peb hloov los ua neeg zoo li peb Leej Txiv Saum Ntuj Ceeb Tsheej thiab tus Tswv Yexus Khetos, thiab ua peb lub neej zoo li Nkawd lub. Muaj tseeb tiag peb dig muag thaum peb ntsia dhau lub hom phiaj27 thaum peb cia sab ntsuj plig uas muaj tiag tiag no nyob hauv duab ntxoov ntxoo ntawm tej kev txhawj, tej kev xav, thiab kev dog dig ntawm lub ntiaj teb no.
Yog peb muaj tswv yim thiab caw tus Vaj Ntsuj Plig Dawb Huv coj peb txoj hau kev,28 kuv cog lus tias Nws yuav qhia peb txog qhov tseeb. “Nws ua tim khawv txog Khetos, thiab cia peb pom ntuj ceeb tsheej”29 thaum peb siv zog ua raws li peb txoj hmoov nyob mus ib txhis thiab muaj lub neej zoo li Vajtswv lub.
Kuv ua tim khawv tias cov lus cog tseg zoo kawg nkaus uas muaj nqis uas nrog rau peb cov kab ke thiab kev khi lus muaj tseeb. Tus Tswv tau hais li no tias:
“Kuv muab tej kev qhia rau nej kom nej paub coj li cas rau kuv pom, kom yuav pab nej tau nej txoj kev cawm seej.
Kuv, tus Tswv, yuav tsum ua raws li kuv cog lus thaum nej ua raws li kuv hais; tiam sis thaum nej tsis ua raws li kuv hais, nej tsis tau kev cog lus.”30
Kuv ua tim khawv tias peb Leej Txiv Saum Ntuj Ceeb Tsheej muaj txoj sia nyob thiab yog tus uas tau tsim txoj kev cawm seej. Yexus Khetos yog Nws Tib Leeg Tub, peb tus Cawm Seej thiab tus Txhiv Dim. Nws muaj txoj sia nyob. Thiab kuv ua tim khawv tias Leej Txiv txoj hau kev thiab cov lus cog tseg, tus Cawm Seej txoj Kev Theej Txhoj, thiab tus Vaj Ntsuj Plig Dawb Huv ua rau peb muaj tau “kev kaj siab lug hauv lub neej no thiab txoj sia nyob mus ib txhis hauv lub neej tom ntej.”31 Kuv ua tib zoo hais lus tim khawv li no los ntawm Yexus Khetos lub npe dawb ceev, amees.