Kmal Meklou e Mekreos el Yaksok
A uldesuel a Demad er a Babeluades el kirel a deureng a uldimukl er ngii a osisechakl, chedaol ruoll, telbiil, me a meklou e mekreos el yaksok el uchul e ng sebeched el merael mo chedaol.
A ta er a klou el olibesongel el kid el rokui a chelbangel er ngii er a bek el sils a kirel diak de bechei a tekingel tia el beluulechad me le sal mo mengesang a temed me a klisiched el uchul e kede obes aikel meklou a belkul me a diak a ulebengelel tekoi.1 Ng sebechel kmal mereched el touchakl a uldesued el uchul e ng mo diak debedebek e domtab aikel meklou a belkul chedaol tekoi le ngii el betok a ngercheled me a chelsengud. Bebil er a taem e ng soad el meruul a kmal betok el tekoi el uchul e ng sebeched lobes el kmo ngera moktek er kid e kede meruul.
A Apostol Petrus a omeklatk er kid a roltirakl er a Jesus Kristo el kmo, “sel chedaol el Klisichel a mla meskid a rokui el tekoi el melutk el kirel a klengar me a kledios, lokiu a klemedengei er ngike el ngii a mla omekedong er kid el mo nguu a klebkall me a kldung:
“Me nguleak tiaikid e ng milskid a ikel meklou e mekreos el yaksok: me bo doeak aikaikid e bo le sebeched, el olechib er kid er a ikel ngelbesel a klechad el ngii a mo tomellid er tial beluulechad.”2
A klemechek a melutk el kirel sel klou el belkul a mesisiich e mekreos el yaksok lulsaod er ngii a Petrus el meral lomeklatk er kid el kmo kede merael bedul ker er tial lomerael er a klechad e ngera uchul. Ak dirrek el mo mesaod el kirel a teletelel Chedaol sils, me a chedaol templo, me a rekeblid el ngii a mo ngosukid el dobedebek aikal meklou a belkul chedaol yaksok.
A kmal meluluuch me a Chedaol Reng bo lolisechakl er kid sel dolbedebek el kirel aikal meklou a belkul klemerang.
Sel Chedaol el Olchoted
A uldesuel a Demad er a Babeluades el kirel a deureng a uldimukl er ngii a osisechakl, chedaol ruoll, telbiil me a meklou e mekreos el yaksok el uchul e ng sebeched el merael mo chedaol. A moktek er Ngii a ochotii sel meral chedaol el olchoted me a rael el kired loltirakl er ngii e mesuub, mengodech, mukeroul, e a, uriul e kede mo kiei lobengkel el mo cherechar.
El uaisei kleuadel er a chelsel a “Telungalek: Chais el mo er a Beluulechad”:
“A rokui el chad—sechal me a redil—a ulebeob el uaia Dios. A dersta er tir a sechal malechub e ng redil el ngalek er a reng er a chedam me a chedil er a babeluades, me a, leuaisei, e a dersta er tir a chedaol a blebelel me a klechad er ngii. …
“Chelsel sel klengar ruchei, e a rengalek el sechal me a redil er a reng a mle medengelii e millengull er a Dios el Diak a Ulebengelel demerir e kilengei er a Uldesuel el uchul e a Rengelekel a mo nguu a bedengir er a tech e ngmai a klubelir er tial klechad e omakes el bedul uchei el mo cherrungel e bo lodengelii sel chedaol klengar tire er a diak a ulebengelel klengar.”3
A Dios a yaksok er a Rengelekel el kmo alsekum e te otireklii a Uldesuel me a okesiu er a Ngelekel Sechal, e oltirakl a llach, e outekangel lultuil er a klaumerang el mo er a ulebongel, e ngultuil er a Tngakireng er a Osobel, e te mo “nguu a diak a ulebengelel klengar, el ngii a kot el ngarbab el sengk er a rokui el sengkel a Dios.”4 A diak a ulebengelel klengar a ngii a kot el ngarbab e mekreos el yaksok.
Mechell el Beches
Ng sebeched el mo mui el kleuadel el kirel a ngarbab e mekreos el yaksok e omuchel el merech er a chedaol klengar kid el mo oltirakl er a okedongel a Rubak el kirel a klebkall me a kldung. El uai sel lulsaod er ngii a Petrus el kmo, tial okedong a mekedmokl sel dolasm el mengeroid er kid er a mekngit er tial beluulechad.
Me sel dolemolem el blak a rengud e merael bedul uchei lultuil er a klaumerang er a Osobel, e seikid e ngokiu a Tngakireng er Ngii me a klisischel Chedaol Reng, “e a klou el omelodech a [duubech] er a klengar kid, me a chelsel a rengud, me ng mo diak er a rengud a meruul a mekngit, e bai mo melemolem el meruul a ungil.”5 Kede “lmuut el mechell; oi, mechell lokiu a Dios, el mengodech er sel ngii a mekngit el klechad er [kid] e mo er sel, melemalt el klengar, el mla suobel lokiu a Dios.”6 “A leuaisei e a ngii di el chad el ngara Kristo, a beches el chad: e a mechut el tekoi a mo medechel; e a, rokui el tekoi a mo beches.”7
Tia el klou lomelodech er a klechad er kid a diak el mereched el tekoi malechub el mekedmokl er a di tal taem. El uaia tekingel Osobel, ng diak dengai “a rokui el tekoi er a di tal taem, kede [ngmai] lokiu a krasia.”8 “Le a Dios, a mla melekoi el kmo: Ak mesterir a rengelekel a chad a dersta el suobel, me a dersta el osisechakl, sesei er tiang me a sesei er sei; e ngeltengat tirkel lorrenges a tekingek e oltirakl a osischeklek, le te mo ngmai a klubelir.”9
A Chedaol ruoll er a priesthood me a chedaol telbiil a meklou a belkul er a chelsel tial mechell el beches; e dirrek el ngii a uchul e a Dios a mla oterkeklii el kmo kede mo ngmai a ngarbab e mekreos el yaksok er Ngii. A chedaol ruoll el dengai lultuil er a klikiid el klengar kid e dolemolem loltirakl a mekengii a rael er a babeluades el uchul e a klisichel a kledios a me soiseb er a klengar kid. A le mesisiich a rengud lotirakl a telbiil e de blechoel melbedebek e ng meskid a moktek me a klengeltengat er a chelechal klengar me a diak a ulebengelel klengar.
Okesiul tiang, e a Dios a yaksok er kid, lultiul er a blak el reng er kid, sel ongedei el chedal a Kledios, el ngii a Chedaol Reng,10 el okiu a Tngakireng er a Jesus Kristo e ng sebeched el nguu a klausubes er a kngtid,11 e sebeched el mo ngara budech er tial klengar,12 le Osobel a mla mo nguubet a kedekedel a kodall e mlo mesisiich er a debull,13 me a telungalek a sebechel dmak el mo er a diak a ulebengelel.
Kede medengei el kmo, aika el rokui el ngarbab e mekreos el yaksok el Chedam er a Babeluades a mesterir a Rengelekel a diak el mucherangel me a diak el sebeched el mui el smaod. E ng di, a bebil er a ikal klengeltengat el blak basech a kirel rullid el mo “mechas a rengud”14 e mo “tellechekl e mengull er a Chedam”15 el ngara ngklel a Jesus Kristo.
Melbedebek a Yaksok
A President Lorenzo Snow a ulemeklatk el kmo, “Kede kmal mereched lobes er a klou el moktek er a klengar, sel moktek er a Chedam er a Babeluades e ng uldureklid el mei er a beluulechad, me a sel chedaol okedong el kid a mla mokedong el kirel, me a leuaisei, e ng diak docheuekl aikel diak el sal meklou a ultutelel tekingel a beluulechad … , e bai di kid el osengkid er a tekingel a beluulechad el uchul e ng mo diak dengai a chedaol ngesou el Dios a mla kudmokl el kired, el ngii a kmal sebechel ngosukid el ngoriakl er a [tekingel a beluulechad].”16
A Chedaol sils me a chedaol templo a eru er a tekoi el uchul a chedaol ngesou el bla loterekokl a Dios el mo ngosukid el ngoriakl er a mekngit er a beluulechad. Kede mo omdasou el kmo a moktek er a omengull er a Chedaol sils me a mo er a templo a osisiu el tekoi e ng di kakerous a moktek er ngii. E ng di, ngak oumerang, el kmo aika el eru el moktek a kmal di osisiu e dmak loureor el melisiich er a dersta er kid me a rekeblid er a chedaol tekoi.
Chedaol sils
Uirul er a lebeob a rokui el tekoi a Dios, e Ngii a ulengull er a ongeuid er a klebesei e millekoi el kmo a tal sils er a chelsel a tal sandei bol sils er a ulengull el ngosuterir a rechad el mo melbedebek er Ngii.17 A Chedaol sils a sils er a Dios, el chedaol taem el mla moterekokl el omengull el sils er Ngii e taem el dolai e melbedebek a ngarbab e mekreos el yaksok er Ngii.
Chelechal taem e a Dios a mla melekoi el kmo:
Alsekum e ng soad el mo mui el cheroid er a tekingel a beluulechad, e ng kired el mo er a blil a nglunguuch e odersii a rengud er tial ngii a Chedaol sils er Ngii.
A Chedaol sils a sils el kired lolengull er a rokui el urered, e odersid el mo er ngike el Kot el Ngarbab.18
A leuaisei, e sel temel Chedaol sils e kede mengull er a Chedam el ngara ngklel a Ngelekel lokiu a omerelled er a chedaol ruoll me a omesuub, e melai, e melbedebek, e omekbeches a telbiil. Tiaikid el chedaol sils er Ngii, e a uldesued, omerelled, me a blekerdeled a olangch el de bsa Dios e olchotel a beltkil a rengud el mo er Ngii.19
A ta er a dirrek el moktek er a Chedaol sils a ngodechii osenged el kirel a tekingel a beluulechad e bai omes a diak a ulebengelel klengeltengat. Tiaikid el chedaol taem eng kired el choridid er a betok el tekoi el doruul er a bek el sils, e ngmai osenged el “bedul a Dios me bo dengar”20 e bo dengai e dolbedebek aikel meklou e mekreos el yaksok el uchul e ng sebeched el mo ngmai.
Chedaol Templo
A Rubak a di mla melekoi er a Rechedal el mo omekedechor a templo, el ngii a chedaol basio el tirkel klikiid el Santo a meruul a chedaol ruoll er a ebangkelio me a chedaol telbiil el kirir me a dirrek el kirir a re mla mad. A templo a kot el chedaol er a chelsel a rokui el chedaol basio. A mera er ngii a templo a blil a Rubak, el ngii a chedaol basio el telutk el kirel omengull el mo er a Dios me a omelai me a omelbedebek el kirel a ngarbab e mekreos el yaksok er Ngii.
A Rubak a mla melekoi er a Resanto er chelechal taem el mo mesmechokl er tir, el kedmokl a rokui el usbechall el tekoi, el kedmkelii a blai er a nglunguuch, blai er a olsengerenger, blai er a klaumerang, blai er a omesuub, blai er a klebkall, blai er a tabesul tekoi, el blil a Rubak.21 Sel kmal moktek er a omengull er a templo a meruul a chedaol ruoll e mesuub, e melai, e melbedebek, a telbiil. Kede omdasou, meruul, e ngodech a doubail sel dengara templo el diak el uaia bebil er a basio el de blechoel mo er ngii.
Sel kmal moktek er a templo a ngodechii osenged el kirel a tekingel a beluulechad el mo bedul a diak a ulebengelel klengeltengat. Sel bo decheroid er a tekingel a beluulechad el telkib el taem, e ngii a sebeched el ngmai “osenged el bedul a Dios”22 sel dolai e dolbedebek a meklou e mekreos el yaksok el uchul e kede merael mo chedaol.
A kulengit me bo modengei el kmo a Chedaol sils me a templo, a di diul chedaol taem e chedaol basio el mla moterekokl el kirel omengull el mo er a Dios el dolai e melbedebek aikel ngarbab e mekreos el yaksok er Ngii el mo er a rengelekel. Me ng milkedmokl er a Dios, e sel kmal moktek er a ika el eru el chedaol blil a ngesou a kmal diosisiu: el mo mesisiich e blechoel el ngmai a moktek me a osenged el bedul a Demad er a Babeluades, me a Chimol Ngelekel Sechal, me a Chedaol Reng, me a ikel yaksok lobengkel a chedaol ruoll me a telbiil el ngara mla moluut el ebangkelio er a Osobel.
Rekeblid
Sel kmal klou a belkul a kmo, a blai a kirel kot el basio er a sils me a taem el derstal chad me a telungalek a dobedebek aikel ngarbab e mekreos el yaksok er a Dios. Me a detobed er a rekeblid sel temel Chedaol sils el mo er a rua miting e dirrek el desiseb er a chedaol basio er a templo a klou a belkul e ng di diak el klebech. Ng di sel denguu osisiu el reng me a klisiich er a ikal chedaol omerull el muut losisebii er a chelsel a rekeblid e kid a sebeched el melemolem er a moktek er kid er a ikel ngarbab el moktek er a klengar e mosebechakl er a kngtil a beluulechad. A teletael duubech er a Chedaol sils me a chelsel a templo a kirel chedaol tekoi el mekeek a rengrir a dersta el chad me a telungalek a uleklatk er a suobel el desiluub, lobengekl a klisichel Chedaol Reng, me a melemolem e dmolech el bult el mo er a Rubak el Jesus Kristo, me a “cherrungel el urunguled”23 er sel diak a ulebengelel yaksok er a Dios.
A Chedaol sils me a templo a sebechel ngosukid el mo kudmeklii er a chelsel a rekeblid a “lmuut el bedochel el rael”24 sel sekum e kede “rokui el mo kldibel el ngara Kristo, a re ngara babeluades, me a re ngara beluulechad; luldimukl er ngii.”25 Aikel doruul er a rekeblid er a chedaol sils er Ngii me a ikel dosuub er a chedaol basio er Ngii a meklou a belkul el uchul e kede mo nguu a chedaol blebeled.
Yaksok me a Klaumerang
Ng sebeched el kmal mereched el mo mechesang el kirel a tekingel a klechad. Cheliuaiu, omengang, oubail, ureor, omilil, undo, me a lmuut el betok el omeruul el meklou a ultutelel. E ng di, sel ngii a mo klechad er kid ruriul a olchotel a klemedengei er kid me a blak el reng er kid el mesuub er a Chedam, me a Ngalek, me a Chedaol Reng; ng diak di luldekial aikal doruul tekoi er a bek el sils er a klengar kid.
A ebangkelio a lmuut el ngaruchei er a beldukl el tekoi el doruul er a bek el sils; ng bai, kmal klebokel el kakerous el klemerang el dmak”26 el cheluchaus, el ngosukid el mo uaia Demad er a Babeluades me a Rubak el Jesus Kristo, e dirrek el sebeched el mo nguu sel chedaol blebeled. Ng klemerang, el uaia de miko “el diak desa olangch”27 er a chedaol klemerang le ng uaia le berrotel er a ulekereuil, tekingel, me a teletelel a beluulechad.
Me sel bol mellomes a rengud e de siotai er a Chedaol Reng el mo omekrael er kid,28 e ak yaksok el kmo Ngii a mo osischeklid er sel ngi a klemerang. “Ngii a mo ouchais el kirel a Kristo, [e] mo omekellomes a uldesued loba llomes er bab”29 sel dolasm el merael bedul a diak a ulebengelel klengar e denguu sel chedaol blebeled.
Ak sioning el kmo a ngarbab e mekreos el yaksok lobengkel a chedaol ruoll me a telbiled a klemerang. A Rubak a dirrek el millekoi el kmo:
Ngii a mla meskid a teletael el kired loltirakl er Ngii, me luchul e bo desobel.
Ng millekoi el kmo Ngii a uaia lerrengodel sel doltirakl a Tekingel, e ng di sel lak doltirakl a Tekingel e ng diak a yaksok er Ngii el dengai.30
Ak sioning el kmo a Demad er a Babeluades a ngar e melchesel sel uldasou er a mo suobel. A Jesus Kristo a Ngii a Chimol Ngelekel, el Osebeled e Olsobel er kid. Ngii a ngar. Ak ouchais el kmo a uldesuel a Chedam me a yaksok er ngii, me a Tngakireng er a Osobel, me a kldemed er a Chedaol Reng a uchul a budech er tial beluulechad me a diak a ulebengelel klengar el merael mei.31 Aika el tekoi a kuchais el ngara chedaol ngklel a Rubak el Jesus Kristo, amen.