No Fraet blong Mekem Gud

Ol dia brata mo sista. Mi prea wetem tingting we i stap daon se bae Spirit blong Lod bae i stap wetem yumi taem mi toktok tedei. Hat blong mi i fulap long tangkyu long Lod, we Jos ia i blong Hem, from insperesen we yumi bin filim long ol strong prea, ol gudfala toktok, mo singsing blong ol enjel long konfrens ia.

Las Epril, Presiden Thomas S. Monson i givim wan mesej we i stiarem ol hat raon long wol, wetem hemia blong mi tu. Hem i tokbaot paoa blong Buk blong Momon. Hem i askem strong long yumi blong stadi, tingting hevi, mo yusum ol tijing blong hem. Hem i promesem se sapos yumi putum taem evri dei blong stadi mo tingting hevi, mo obei ol komanmen we i stap long Buk blong Momon, bae yumi gat wan strong testemoni se hem i tru, mo testemoni blong yumi abaot Kraes we i laef we bae i kamaot long hemia, bae i luk se yumi save gotru long ol taem blong trabol. (Luk long “The Power of the Book of Mormon,” Liahona, May 2017, 86–87.)

Olsem plante long yufala, mi bin harem ol toktok blong profet olsem voes blong Lod long mi. Mo, semmak olsem plante long yufala, mi disaed blong obei ol toktok ia. Nao, stat we mi smol boe, mi bin filim witnes se Buk blong Momon i toktok blong God, mo Papa mo Pikinini, Tufala i kamaot mo toktok wetem Jisas Kraes, mo we ol Aposol blong bifo oli bin kam long Profet Josef blong putumbak ol ki blong prishud long Jos blong Lod.

Wetem testemoni ia, mi bin ridim Buk blong Momon evri dei blong ova 50 yia. So maet mi bin save tekem se ol toktok blong Presiden Monson i blong wan narawan. Be yet, olsem plante long yufala, mi bin filim we Profet i leftemap tingting blong mi mo promes blong hem i invaetem mi blong traem moa had. Plante long yufala i bin mekem wanem mi bin mekem: mi bin prea wetem moa tru tingting, tingting moa hevi long ol skripja, mo mi bin traehad moa blong givim seves long Lod mo ol narawan long bihaf blong Hem.

Hapi risal long mi, mo long plante long yufala, i wanem we profet i bin promesem. Olgeta long yumi we i bin folem kaonsel blong hem wetem hat, oli bin harem Spirit i moa klia. Yumi bin faenem moa bigfala paoa blong stanap agensem temtesen, mo yumi bin filim moa bigfala fet long Jisas Kraes we i laef bakegen long ded, long gospel blong Hem mo long Jos blong Hem we i stap laef.

Long wan taem we noes blong wol i stap kam bigwan moa, blong kam strong moa long testemoni blong yumi i bin ronemaot ol tu tingting mo fraet, mo i tekem ol filing blong pis i kam. Taem mi mekem folem kaonsel blong Presiden Monson, hemia i mekem tu samting long mi: Faswan, Spirit we hem i promesem i givim mi sam kaen hop long wanem i stap long fored, nomata we wol i stap muvmuv bigwan moa. Mo nambatu, Lod i bin givim long mi—mo yu—blong mi filim moa bigwan lav blong Hem long olgeta we oli stap long bigfala nid. Yumi bin filim blong wantem moa blong go helpem olgeta narawan. Filing ia i stap olsem stamba blong seves mo tijing blong Presiden Monson.

Lod i promesem yumi blong gat lav long ol narawan mo strong paoa long tingting long Profet Josef Smit mo Oliva Kaodri taem we ol wok long fored blong tufala i bigwan tumas. Lod i talem se strong paoa long tingting we tufala i nidim bae i kam long fet blong tufala long Hem olsem strong ston blong tufala:

“No fraet blong mekem gud, ol boe blong mi, from, wanem bae yufala i planem, bambae yufala i tekem frut blong hem; from hemia, sapos yufala i planem gud samting, bambae yufala i tekem gud kaekae olsem praes blong yufala.

“From hemia, smol grup, no fraet; mekem gud; letem wol mo hel i kam wan agensem yufala, from we sapos yufala i stanap antap long strong ston blong mi, bambae oli no save win.

“Luk, mi no talem se yutufala i rong; yutufala i gohed long rod blong yutufala mo nomo mekem sin; mekem wok we mi givim oda long yutufala blong mekem wetem strong tingting.

“Lukluk long mi long evri tingting blong yutufala; no gat tu tingting, no fraet.

“Luk ol kil we spia i mekem long saed blong bodi blong mi, mo tu, olgeta mak blong nil long ol han mo leg blong mi; stap fetful, stap obei long ol komanmen blong mi mo bambae yutufala i save kasem kingdom blong heven” (luk long D&C 6:33–37).

Lod i talem long ol lida blong Hem blong Restoresen, mo Hem i stap talem long yumi, se taem yumi stanap wetem fet long strong ston blong Hem, ol tu tingting mo fraet oli go lus; tingting blong mekem gud i kam antap. Taem yumi akseptem invitesen blong Presiden Monson blong planem insaed long hat blong yumi wan testemoni abaot Jisas Kraes, yumi kasem paoa, tingting ia, mo strong paoa long tingting blong go helpem ol narawan we oli no wari long nid blong yumi.

Mi bin luk fet mo strong paoa ia long tingting plante taem, taem ol Lata-dei Sent we oli biliv oli fesem ol tes blong fraet. Eksampol, mi bin stap long Aedaho taem we Teton Dam i brok long 5 Jun 1976. Wan wol blong wota i brok. Plante taosen pipol oli ronwe long hom blong olgeta. Ol taosen blong ol hom mo bisnis oli lus evriwan. Merikel, namba blong olgeta we oli ded i no kasem 15.

Wanem we mi bin luk longwe, mi bin luk long eni taem we ol Lata-dei Sent oli bin stanap strong antap long strong ston blong wan testemoni abaot Jisas Kraes. From se oli no gat tu tingting se Hem i stap lukaot long olgeta, oli no gat fraet. Oli no lukluk long ol tes blong olgeta mo oli go helpem ol narawan. Mo oli mekem from oli lavem Lod mo oli no askem wan samting from.

Eksampol. Taem Teton Dam i brok, wan Lata-dei Sent kapol i bin stap travel, longwe long hom blong tufala. Taem oli harem nius long redio, tufala i hariap i gobak long Reksbeg. Tufala i no go long haos blong tufala blong luk se i oraet o no, tufala i go lukaotem bisop. Hem i stap long wan bilding we oli yusum olsem wan senta. Hem i stap help blong lidim ol taosen volontia we oli stap kam long ol yelo skul bas.

Kapol i wokbaot i to long bisop, mo talem: “Mitufala i jes kambak. Bisop, ?Bae mitufala i go wea blong help?” Hem i givim nem blong wan famli. Kapol ia i stap oli karemaot sofmad mo wota aot long wan hom i go long nara hom. Tufala i wok stat long moning kasem tudak. Nao tufala i spel smol blong go luk haos blong tufala. Wota i karem haos i go, i no gat samting blong klinap long hem. Nao tufala i tanem raon kwiktaem blong gobak luk bisop blong tufala. Tufala i askem: “Bisop, ?huia bakegen bae mitufala i go helpem?”

Merikel ia, blong gat kwaet strong paoa long tingting mo jareti—stret lav blong Kraes—oli paspasem ova long ol yia mo raon long wol. Hem i hapen long ol nogud taem blong agens mo tes long taem blong Profet Josef Smit long Misuri. Hem i hapen long Brigham Yang taem hem i lidim ol pipol aot long Nauvu, mo afta i tekem ol Sent i go long ol draeples long evri ples long Wes Yunaeted Stet, blong helpem wanwan blong krietem Saeon blong Lod.

Sapos yu ridim ol jenol blong ol paeonia ia, bae yu luk merikel blong fet i stap ronemaot tu tingting mo fraet. Mo yu ridim abaot ol Sent we oli livim wanem we oli wantem blong helpem wan narawan long bihaf blong Lod, bifo oli gobak long sipsip blong olgeta mo ol garen blong olgeta we oli no brasem yet.

Mi bin luk merikel ia sam dei i pas afta long Hariken Irma long Pueto Riko, Sent Tomas mo Florida, ol ples we ol Lata-dei Sent oli joen wetem ol nara jos, ol lokol komuniti grup, mo ol nasonal oganaesesen blong statem ol wok blong klinap.

Olsem ol fren blong mi long Reksbeg, wan kapol we i no memba long Florida, i lukluk nomo blong helpem komuniti be i no blong wok long haos blong olgeta. Taem sam Lata-dei Sent neiba oli talem se bae oli givhan blong katem tufala bigfala tri we i blokem rod blong trak blong tufala, kapol ia i eksplenem se oli sapraes tumas, mo oli mas go helpem ol narawan, mo gat fet se bae Lod bae i givim help we tufala i nidim long haos blong olgeta. Hasban i serem se bifo ol memba blong Jos oli kam blong givhan, kapol ia i bin stap prea. Oli kasem wan ansa se help bae i kam. I kam sam aoa afta we ansa i kam.

Mi harem wan ripot se sam oli stat singaotem ol Lata-dei Sent we oli stap werem ol yelo Han blong Help T-sot, “Ol Yelo Enjel.” Wan Lata-dei Sent i tekem trak blong hem long seves, mo man we i stap riperem trak i tokbaot long hem “spirit eksperiens” we hem i gat taem ol pipol long yelo sot oli tekemaot ol tri long yad blong hem, mo hem i talem, “oli singsing sam singsing tu long mi se, mi mi pikinini blong God.”

Wan nara man Florida—we i no blong jos blong yumi tu—i talem se ol Lata-dei Sent oli kam long haos blong hem taem hem i stap klinap long doti yad blong hem, mo hem i harem se wok i bigwan, ples i hot tumas, mo kolosap bae i krae. Ol volontia oli mekem, long toktok blong hem, “wan klin merikel.” Oli givhan mo wok strong, be tu, wetem laf mo smael, mo oli no akseptem wan samting i kambak long olgeta.

Mi luk strong wok ia mo harem ol laf ia taem we, let long wan Satedei, mi stap visitim wan grup blong ol Lata-dei Sent long Florida. Oli dresap long yelo sot blong olgeta wetem logo ia, “Ol Han blong Help”. Ol volontia oli stopem klinap blong olgeta longtaem smol blong mi save sekhan wetem olgeta. Oli talem se 90 memba blong stek blong olgeta long Jojia oli mekem wan plan blong joenem help tim long Florida long naet bifo.

Oli aot long Jojia long 4 klok moning, oli draev blong plante aoa, oli wok long dei i go kasem naet, mo oli plan blong wok bakegen long nekis dei.

Oli tokbaot evri samting ia wetem ol smael mo gud laf. Mi filim save nomo se i gat wan samting: i we oli wantem se man i stop blong talem tangkyu blong mekem se oli save gobak wok. Stek presiden i statem jenso blong hem mo stap wok long wan tri we i foldaon, mo wan bisop i stap pulum ol branj blong tri taem mifala i jiam long trak bakegen blong go from nekis help tim.

Be eli long dei ia, taem mifala i stap long nara ples mo wantem aot, wan man i wokbaot i kam long trak, i tekemaot hat blong hem, mo i talem tangkyu from ol volontia. Hem i talem: “Mi no memba blong jos blong yufala. Mi no save bilivim wanem yufala i mekem blong mifala. God i blesem yufala.” LDS volontia we i stanap kolosap long hem i smael, i saksakem solda blong hem blong talem se hem i no nidim blong oli presem hem.

Taem we ol volontia blong Jojia oli kam blong helpem man ia we i no save bilivim hemia, ol handred blong ol Lata-dei Sent blong pat ia blong Florida oli go plante kilometa longwe long wan nara ples long Florida we oli harem se samting i nogud moa long olgeta.

Long dei ia, mi tingbaot, mo mi andastanem gud moa, ol toktok blong Profet Josef Smit: “Wan man we i fulap long lav blong God, i no glad nomo blong blesem famli blong hem nomo, be i go raon long ful wol, i wantem tumas blong blesem ful famli blong ol man.” (Teachings of Presidents of the Church: Joseph Smith [2007], 426).

Yumi luk kaen lav ia long laef blong ol Lata-dei Sent evri ples. Evri taem i gat wan nogud samting long eni ples long wol, ol Lata-dei Sent oli givim samting mo oli volontia blong mekem ol yumaniterian wok blong Jos. Oli no nid blong singaot i go. Long sam taem, mifala i mas askem blong olgeta we oli wantem volontia blong wet blong no travel i go long ples we i nogud kasem taem we olgeta we bae oli lidim ol wok oli rere blong putum olgeta long wok.

Hat ia blong wantem blesem man, i frut blong ol pipol we oli kasem wan testemoni abaot Jisas Kraes, gospel blong Hem, Jos blong Hem we i kambak, mo profet blong Hem. Hemia nao ol pipol blong Lod oli no gat tu tingting mo oli no stap fraet. Hem i nao ol misinari oli volontia long evri kona blong wol. Hemia nao ol papa mo mama oli prea wetem ol pikinini blong olgeta from ol nara man. Hemia nao ol lida oli jalenjem ol yut blong olgeta blong folem rikwes blong Presiden Monson blong oli draon insaed long Buk blong Momon wetem hat blong olgeta. Frut i no kam from lida blong olgeta i askem, be from ol yut mo ol memba oli tekem aksen wetem fet. Fet ia, we oli putum long aksen, we i nidim sakrifaes we i no selfis, i mekem se i gat jenis long hat we i letem olgeta blong filim lav blong God.

Be hat blong yumi, i no save jenis sapos yumi gohed blong folem kaonsel blong profet. Sapos yumi stap blong traem afta wan hadwok, bae jenis ia i lus i go.

Ol fetful Lata-dei Sent oli mekem i kam antap, fet blong olgeta long Lod Jisas Kraes, long Buk blong Momon olsem toktok blong God mo long fasin blong putumbak ol prishud ki insaed long tru Jos blong Hem. Testemoni ia we i kam antap, i givim yumi moa strong paoa long tingting mo wari long ol nara pikinini blong God. Be blong fesem ol jalenj mo ol janis we oli stap long fored, yumi nidim moa long hemia.

Yumi no save luk ol ditel fastaem, be yumi save luk bigfala pikja we i stap. Yumi save se long ol las dei, wol bae i muvmuv. Yumi save se long medel blong wanem trabol we bae i kam, Lod bae i lidim ol fetful Lata-dei Sent blong tekem gospel blong Jisas Kraes i go long evri kantri, famli, lanwis mo pipol. Mo yumi save se ol tru disaepol blong Lod bae oli klin inaf mo rere blong welkamem Hem taem bae Hem i kam. Yumi no nid blong fraet.

So hamas finis yumi bildimap fet mo strong paoa long tingting long hat blong yumi, Lod i wantem luk moa aot long yumi—mo aot long ol jeneresen we oli kam afta long yumi. Bae oli nid blong oli strong moa, mo gat moa strong tingting from se bae oli mekem olgeta samting we oli bigwan mo strong moa bitim wanem yumi stap mekem. Mo bambae oli fesem moa agens we i kam long enemi blong sol blong yumi.

Rod blong gat hop taem yumi muv fored, Lod i bin soem long yumi: “Lukluk long mi long evri tingting blong yutufala; no gat tu tingting, no fraet” (D&C 6:36). Presiden Monson i talem yumi hao blong mekem hemia. Yumi mas tingting hevi mo praktisim ol toktok blong Buk blong Momon mo ol profet. Prea oltaem. Stap biliv. Givim seves long Lod wetem evri hat, paoa blong tingting, maen, mo paoa blong yu. Yumi mas prea wetem ful paoa blong hat blong yumi blong kasem presen we i jareti, stret lav blong Kraes (luk long Moronae 7:47–48).. Mo antap long evriwan, yumi mas strong mo oltaem folem kaonsel blong profet.

Taem we rod i had, yumi save dipen long promes blong Lod—promes we Presiden Monson i rimaenem yumi long hem plante taem, taem we hem i talem ol toktok blong Sevya: “Mo long weaples we eniwan i akseptem yufala, ples ia bae mi stap long hem tu, from we bambae mi go long fored blong yufala. Bambae mi stap long raet han blong yufala, mo long lef blong yufala, mo Spirit blong mi bambae i stap insaed long hat blong yufala, mo ol enjel blong mi oli stap raonem yufala, blong sapotem yufala” (luk long D&C 84:88).

Mi testifae se Lod i stap go fastaem long yufala taem yu stap mekem wok blong Hem. Samtaem, bae yu nao yu enjel we Lod i sendem blong leftemap ol narawan. Samtaem, yu nao bae ol enjel oli raonem yu blong sapotem yu. Be oltaem, bae yu gat Spirit blong Hem i stap insaed long hat blong yu, olsem we oli promesem yu long evri sakramen seves. Yu yu mas obei ol komanmen blong Hem nomo.

Ol nambawan dei oli stap yet blong kam long kingdom blong God long wol ia. Agens bae i mekem yumi gat strong fet long Jisas Kraes, semmak olsem long taem blong Profet Josef Smit. Fet, oltaem i winim fraet. Blong stanap tugeta i mekem yumi kam wan. Mo ol prea blong olgeta we oli stap long nid, i kasem sora mo i gat ansa blong wan God we i gat lav. Hem i no stap spel, mo Hem i no stap slip.

Mi witnes se God we i Papa i stap laef mo i wantem yu blong kam hom long Hem. Hemia i tru Jos blong Lod Jisas Kraes. Hem i save yu, Hem i lavem yu, mo Hem i stap lukaot gud long yu. Hem i pem praes from sin blong yu mo sin blong evriwan long ol pikinini blong Papa long Heven. Blong folem Hem, i wan wei ia nomo i go long laef we i no save finis.

Mi testifae olsem mo livim blesing mo lav blong mi wetem yufala. Long nem blong Jisas Kraes, amen.