Tai Maaku ni Karaoa ae Raoiroi

Tariu ao mwaaneu, I tataro ma te nanorinano bwa Tamnein te Uea e na raoniira ngkai I taetae n te bong aei. E onrake nanou ni kakaitau nakon te Uea, ae ana Ekaretia aio, ibukin te kairi are ti namakinna n taian tataro, kabwarabwara aika anainano, ao anene kanga aneneaki irouia anera n te maungatabu aei.

N Eberi ae nako, Beretitenti Thomas S. Monson e anga ana rongorongo are e kaungai naano ni kabuta te aonaaba, n ikotaki ma ngai. E taekina mwaakan ana Boki Moomon. E kaumakiira ni kamatebwaia, n iangoia raoi, ao ni maiuakin ana reirei. E berita bwa ngkana ti kabanei ara tai ni katoa bong, ni kamatebwaia, n iangoia raoi ao ni kawakin tuua ake inanon ana Boki Moomon, ti na karekea ara kakoaua ibukin koauana, ao ara koaua are ti karekea ibukin te Kristo ae Maiu e na buokiira ni kamanoira n taai ni kaangaanga. (Taraa “Mwaakan ana Boki Moomon,” Riaona, Meei 2017, 86–87.)

N aroia angiina ibuakomi, I ongo ana taeka te burabeti n riki bwa bwanaan te Uea nakoiu. Ao, n aroia naba angiina ibuakomi, I baireia ni kan ongo taeka akanne. Ngkai, ngke te ataeinimwaane ngai, I a tia n namakinna bwa ana Boki Momoon bon ana taeka te Atua, bwa te Tama ao te Nati a kaoti ao n taetae ma Iotebwa Timiti, ao Abotoro ake ngkoa a kawara te Burabeti Iotebwa bwa a kaoka kiingin te nakoanibonga nakon ana Ekaretia te Uea.

Ma te kakoaua anne, I a tia ni wareware n ana Boki Moomon ni katoa bong n ae riaon 50 te ririki. Ngaia ae tao iai bukin au iango bwa ana taeka Beretitenti Monson bon ibukiia tabeman riki. Ma, n angiina ibuakomi, I namakina ana kaunganano te burabeti ao ana berita e kaoai ni kanakoraoa riki au kekeiaki. Angiina ibuakomi a tia ni karaoa ae I karaoia: I tataro ma korakoran nanou, n iangoi raoi riki booki aika tabu, ao ni kataa riki are iaona ni beku ibukin te Uea ao tabeman Ibukina.

Mwiina ae kakukurei ibukiu, ao ibukiia angiina ibuakomi, bon bwaai ake e berita iai te burabeti. Angiina ibuakora ake a butimwaea ana reirei ma nanoia a ongo riki iroun te Tamnei n ae onoti riki. Ti kunea te mwaaka ae korakora n totokoa te kariiri ao n tia n namakina korakoran te onimaki iroun Iesu Kristo ae e uti, n Ana euangkerio, ao Ana Ekaretia ae maiu.

N tain rikiraken mangaongaon te aonaaba, naake a rikirake aia kakoaua e toki aia nanououa ao maakuia ao a uota te namakin ae rau nakoira. N ongo ana reirei Beretitenti Monson iai uoua mwiina aika kakukurei iaou: Te moan, te Tamnei are e beritanna e kariki namakin n iai te kantaninga ibukin baika a na riki imwiina, e ngae ngke e rikirake mangaongaon te aonaaba. Ao, te kauoua, e a tia te Uea n anganai—ao ngkoe—n namakina korakoran Ana tangira ibukiia ake a korakai. E rikirake nanora n nako ao ni kamauiia tabeman. E reke te nano anne man ana mwakuri ao ana reirei Beretitenti Monson.

E beritana te tangira te Uea ibukiia tabeman ao te ninikoria nakon te Burabeti Iotebwa Timiti ao Oliver Cowdery ngke a kuri n taraa ni karawawata aia beku ake imwaaia. E taku te Uea bwa kainnanoan te ninikoria e na kaoti mai imwiin aia onimaki Irouna bwa aan maiuia.

“Tai maaku ni karaoa ae raoiroi, ngkami natiu, bwa bwaai ni kabane are ko unikia, ko na bon taia; ngaia are, ngkana ko unika ae raoiroi ko na bon taia ae raoiroi bwa ngaia kanuangam.

“Ma ngaia are, tai maaku te nanai ae uarereke, kariaia te aonaaba ao mone ni ikotaki ni kaaitaraingkami, bwa ngkana ko kateitei i aon au bwaa, a aki kona n tokanikai.

“Nooria, I aki motika taekam, naako ni kawaimi ao tai manga bure, karaoa te mwakuri are I a tia n tuangngkami ma te taua n nano.

“Tanimai nakoiu n ami iango n taa inako; tai nanououa, tai maaku.

Noori taian ikoaki aika i rarikiu, ao mwiin naba taian neera i baiu ma waeu; bwaina te kakaonimaki, kawakin au tua, ao ko na abaaba n abanuean karawa” (R&B 6:33–37).

Te Uea e tuangiia Ana taan kariiri ake e rineiia n tain kaokan te Euangkerio, ao E tuangiira, bwa ngkana ti tei ma ara onimaki iaon Ana bwaa, e na bua te nanououa ma te maaku, e na rikirake te nano ni kan karaoa ae raoiroi. Ngkai ti butimwaea ana kakao Beretitenti Monson ni kamatoai inanora ara kakoaua ibukin Iesu Kristo, ti karekea te mwaaka, te nano, ao te ninikoria n nako ni kamauiia tabeman n aki raraomaeakin oin kainnanora.

I a tia n nooria te onimaki anne ao te ninikoria n te tai ae mwaiti ni kakoauana bwa Aomata aika Itiaki a kaitarai kaangaanga aika kakamaaku. N aron te katooto, I mena i Idaho ngke e uruaki Teton Dam n Tuun 5, 1976. E a raanganako te ran man te oo n ran. Tengaa aomata aika birinako man mweengaia. Tengaa mweenga ao bitineti aika urubekebeke. N aron ae kamiimi, e karako iaan 15 aomata aika mate.

Te bwai ae I nooria ikekei, I nooria Aomata aika Itiaki n tei ni matoa n aan aia kakoaua iroun Iesu Kristo. Ibukina bwa a aki nanououa E tararuaiia, ao aki maaku. A aki tabe ma oin katakiia a nako bwa a na buokiia tabeman. Ao a karaoia ibukin tangiran te Uea irouia, n aki tangira boon mwiina.

N aron te katooto, ngke e urubeke te Oo n Ran ae Teton, a mwananga taanga ae Aomata aika Itiaki tabeua te maaire man mweengaia. N te tai ae waekoa ngke a ongo te rongorongo iaon te reerio, a waekoa n oki nako Rexburg. Ma aki okira mweengaia n nooria ngkana arona bwa e urubeke, a nako ni kakaea te bitiobi.E mena n te auti are e kamanenaaki bwa te tienta ni kamanomano. E ibuobuoki ni kairiia tengaa taan anganano ake a roko ni bwatin te reirei ae baboobo.

A nakonako te taanga aei nakon te bitiobi ao a taku, “Ti a bon tibwa oki. Bitiobi, te tabo raa ae ti na ibuobuoki iai. E anganiia araia taian utu. Te taanga anne a kanakoa te bokaboka ao te ran man te mweenga teuana ma teuana. A mwakuri man te moaningabong nakon te roo. A motirawa teutana n nako n nooria tera ae riki ni mweengaia. E katikakinako n te ieka, n akea te bwai teuana ae tiku ae e na kaitiakaki. Ngaia are a waekoa n oki nakon te bitiobi. A titiraki, “Bitiobi, iai am aomata ibukira ae ti na buokia?”

Te kakai ane ninikoria ao te tangira ae kororaoi anne—ana tangira Kristo ae itiaki—e kaokiokaki n ririki aika bati ao ni kabuta te aonaaba. E riki ni kakamaakun ana bong ni bwainikirinaki Iotebwa Timiti i Missouri. E riki ngke Brigham Young e kaira te otinako mai Nauvoo ao ngkanne e weteia Aomata aika Itiaki nakon te rereua ni kabuta aon te United States, n ibuobuoki imarenaia ni katea Tion ibukin te Uea.

Ngkana ko wareki bwaai ake a korei bwaeoniia n aia tienoo, ko na noora te kakai n te onimaki are e oneamwiin te nanououa ao te maaku. Ao ko wareka rongorongoia Aomata aika Itiaki ni kitantabeaiangaia ni buoka temanna ibukin te Uea, imwaain okiia nakoia aia tiibu ke nakon aia tawaana ae tuai ribanaaki.

I noora te aekaki ni kakai anne tabebong n nako imwiin te Angibuaka ae Irma i Puerto Rico, Saint Thomas, ao Florida, ike a ikotaki iai Aomata aika Itiaki ma aro ake tabeua, kurubu n aba, ao bootakin aba ni moana aia mwakuri ni kaitiaki.

N aroia raoraou i Rexburg, temanna te taanga i Florida a tabe ma buokan te kaawa nakon are a na bon karaoi moa oin aia bwai. Ngke tabeman Aomata aika Itiaki aika uakaan a anga aia ibuobuoki ma uakai aroka aika bubura are a tuuka kawaia n rinnako, a kamataata te taanga bwa a kukurei ao a rairaki ni buokiia tabeman, karekean te onimaki bwa te Uea e na katauraoi buokaia are a kainnanoia inanon mweengaia. Te buumwaane e kaotia bwa imwaain rokoia kaain ara Ekaretia n anga aia ibuobuoki, a tataro te taanga aei. A karekea te kaeka are e na reke buokaia. E kaoti inanon tabeua te aoa n te kakoaua anne.

I ongo te ribooti bwa tabeman a moanna ni weteia Aomata aika Itiaki ake a kunnikainiia ni Karinano baboobo ae Baai ni ibuobuoki “Anera aika Baboobo.” Temanna te Aomata ae kain te aro e nikira ana kaa ibukin te ibuobuoki, ao te mwaane ae buokia e kabwarabwara te “taneiai n tamnei” are e karekea ngke aomata aika kunnikainiia n te baaboobo a koroi aroka man ana tabo ao ngkanne, e taku, a “anenei tabeua kuuna nakoiu ibukin Ngai natin te Atua.”

Temanna te tia maeka i Florida—tiaki kaain ara aro—e taekinna bwa a roko Aomata aika Itiaki ni mweengana ngke e mwakuri itinaniku ao n namakina te kua, te buee, ao te kan tang. Taan anganano e koreia, n oin ana taeka, “te kakai ae itiaki.” A aki tii beku ma te nanomatoa ma te ngarengare ma te momoangare, n akea boonmwiina ae a tangiria.

I noora te nanomatoa anne ao n ongo te ngare n, te bwakanakontai n te Kaonobong, I nako ma te kurubu n LDS i Florida. A kamotirawa teutana aia mwakuri ni kaitiaki taan angananoi aikai bwa I aonga n iobai ma tabeman. A taku bwa 90 kaain te aro man aia titeiki i Georgia a katea aia baire n ira waakin te kamaiu i Florida n te tairiki are mai imwaaina.

A kitana Georgia n te aoa 4 n te ingabong, a buti inanon aoa, a mwakuri ni karokoa te bong, ao ni manga mwakuri riki n te bong are imwiina.

A kabwarabwara nakoiu ma te momoangare ao te anua ni kamanga. Te rawawata are I namakinna bwa a aikoa kan karabwaaki bwa aonga n oki ni manga ibuobuoki. E a manga moan kamaiua ana taoteiti ao ni korei aroka ake a bwaka ao te bitiobi e urakin ni kanakoi mwakoron mwaanga ngkai ti rin inanon ara kaa n nakon te tiim ni kamaiu are imwiina.

Ngkai ti butinako man te tabo arei, temanna te mwaane ae keerake nakon te kaa, e kanakoa bwarana, ao ni karabwaira ibukin te anganano. E taku,“Ngai tiaki kaain ami aro. I aki kakoaua te bwai ae kam karaoia ibukira. E na kakabwaiai ngkami te Atua. Taan anganano ae Aomata aika Itiaki a tei irarikina ma ana karinano ae baboobo ni moangare ao e kakuia angana kanga e aki kan kamoamoaaki.

Ngkai a roko taan anganano mai Georgia bwa a na buoka te mwaane aei are e aki kakoaua, tebubua Aomata aika Itiaki man mwakoron raoi aon Florida are e rootaki e a bua tebubua te maaire nakon te tabo teuana i maiakin Florida ike a ongo bwa a rootaki riki aomata .

Te bong anne I uringnga ao n oota riki n ana taetae ni burabeti te Burabeti Iotebwa Timiti: “Te mwaane ae kaonaki ma ana tangira te Atua, e aki kukurei n tii kakabwaiaia ana utu n tii ngaiia, ma rinanon te aonaaba ni kabuta e ingainga ni kakabwaia te botanaomata ae bwanin” (Teachings of Presidents of the Church: Joseph Smith [2007], 426).

Ti noora te tangira ae ai aron anne ni maiuia Aomata aika Itiaki n taabo nako. Ni katoa tai e na iai taai aika riki n taabo nako n te aonaaba, Aomata aika Itiaki n angabwai ao n anganano nakon ana konabwai te Ekaretia ibukin te botanaomata. Aia bubuti taan anganano e burenibai kainnanoana. Ni koauana, n tabeua bwaai, ti riai ni butiia naake a anganano n tataninga ni mwananga nakon taabo ni kamanomano ni karokoa are naake a bairea te mwakuri a tauraoi ni butimwaiia koraki akanne.

Te nano anne ni kakabwaia bon uaaia aomata ake a karekea aia kakoaua iroun Iesu Kristo, Ana euangkerio, Ana Ekaretia ae e a tia ni kaokaki, ao Ana burabeti. Anne bukina ae ana aomata te Uea a aki nanououa ao aki maaku. Anne bukina ae a anganano mitinare n aia mwakuri n ibuobuoki ni mwakoron te aonaaba. Anne bukina ae kaaro a tataro ma natiia ibukiia tabeman. Anne bukina ae taan kairiiri a kaoa te roronrikirake ni butimwaea ana bubuti Beretitenti Monson ni kamatebwaia ana Boki Moomon ma nanoia. E kaoti mwiina tiaki man te kairoroaki ma mairouia taan kairiiri ma mairouia kairake ao kaain te aro ake a mwakuria aia onimaki. Te onimaki anne, e kamwakuraki, are e kainnanoa te anga karea ae tituaraoi, e karika te bitaki n nano are a na kona n namakina iai ana tangira te Atua.

Nanora, e ngae n anne, a teimatoa ni bitaki tii ngkana ti reitinako ni iriira aia reirei burabeti. Ngkana ti kataia ni katoka teuana ara konabwai, e na mauna te bitaki.

Aia kakaonimaki Aomata aika Itiaki a tia ni karikirakea aia onimaki iroun te Uea Iesu Kristo, n ana Boki Moomon bwa ana taeka te Atua, ao ni kaokan kiingin te nakoanibonga n Ana Ekaretia ae koaua. Te kakoaua ane e rikirake anne e anganiira te ninikoria ae korakora ao tabeaiangara ibukiia tabeman ibukiia natin te Atua. Ma kakaewenako ao tibwanga nako ake imwaaira a na kainnanoa riki ae mwaiti.

Ti aki kona n ataa te rongorongo, ma ti noora te bwai ae e na riki n taai aika a na roko. Ti ataa anne ni boong aika kaitira, te aonaaba e na mangaongao. Ti ataia bwa ribuakon baikara kaangaanga ake a na kaoti, te Uea e na kairiia Aomata aika Itiaki ni uota ana euangkerio Iesu Kristo nakoia aba, reeti, neewe, ao aomata. Ao ti ataia bwa ana reirei te Uea aika koaua a na tau ao ni katauraoi ni butimwaia ngkana E roko. Ti aki riai ni maaku.

Ngaia ae, ni mwaitin ara katauraoi ni katea te onimaki ao te ninikoria inanora, te Uea e kantaninga ae mwaiti riki mairoura—ao mairouia rooro ake imwiira. A riai ni korakora ao n ninikoria ibukina bwa a na karaoa ae korakora ao bwaai aika kaangaanga nakon ake ti a tia ni karaoi. Ao a na kaitarai kakaaitara aika rikirake mairoun ana kairiribai tamneira.

Te kawai nakon te kantaninga ngkai ti waaki nako e anga te Uea: Tanimai nakoiu n ami iango; tai nanououa, tai maaku” (R&B 6:36). E tuangiira Beretitenti Monson aron karaoana. Ti na iangoia raoi ao ni kamwakura ana Boki Moomon ao aia taeka burabeti. Tataro n Tainako. Ka kakoaua. Ti na beku ibukin te Uea ma nanora ni kabane, korakorara, ara iango ao marurungira. Ti na tataro ma nanora ni kabane ibukin te bwaintangira ae te tangira ae kororaoi, ana tangira Kristo ae itiaki (taraa Moronaai 7:47–48). Ao ni bwaai ni kabane, ti riai n teimatoa ao n nanomatoa n iriiri aia reirei burabeti.

Ngkana iai te kaangaanga, ti kona n onimakina ana berita te Uea—te berita are e kauringiira Beretitenti ngke e aki toki n taekin ana taeka te Tia Kamaiu: “Ao ane e butimwaingkami, ao N na mena naba ikekei, bwa N na rimoami. N na mena i angataimi ao n angamaingimi, ao Tamneiu e na mena i inanomi, ao au anera a mena i buakomi, n tabekiko rake” (R&B 84:88).

I kakoaua bwa te Uea e rimoami ngkana ko karaoa Ana mwakuri. N tabetai ko riki bwa te anera are e kamwananga te Uea n tabekia rake tabeman. N tabetai bon ngkoe ae a mena anera irarikim n tabekiko rake. Ma n taainako ko na karekea Tamneina bwa e na mena inanom, ngkai ko a tia n anganaki te berita n am ibuobuoki ni katoa te toa. Ko riai ni kawakin Ana tua.

Boong aika tamaroa a mena imwaaira ibukin abanuean te Atu iaon te aba. Te kakaaitara e na kakorakorai ara onimaki iroun Iesu Kristo, n aron are e riki n ana bong te Burabeti Iotebwa Timiti. Te onimaki e tokanikai iaon te maaku. Te kaai ni mwakuri e karika te katieuanaaki. Ao am tataro ibukiia naake a rootaki n te kainnano e ongo ao e kaekai te Atua ae tangira. E aki matu ke tao e kiro.

I kaota au koaua bwa te Atua te Tama e maiu ao e tangiriko bwa ko na Nakoina. Aio ana Ekaretia ae koaua te Uea Iesu Kristo. E ataiko; E tangiriko; ao E tararuaiko. E mate ibukin am bure ao ngai ma aia bure natin te Atua ni kabane. N iriiria inanon maium ao n am ibuobuoki nakoia tabeman bon te kawai nakon te maiu ae akea tokina.

I kakoaua ao I katukui au kakabwaia ao au tangira. N aran Iesu Kristo ae tabu, amen.