2010–2019
Tsis Txhob Ntshai Ua Zoo
Kaum Hli Ntuj 2017


Tsis Txhob Ntshai Ua Zoo

Tus Tswv qhia peb tias thaum peb muaj kev ntseeg sawv saum Nws lub pob zeb, peb txoj kev ntshai thiab kev ua xyem xyav ploj zuj zus mus; kev xav ua zoo loj tuaj.

Kuv cov kwv tij thiab cov muam, kuv txo hwj chim hais tias tus Tswv tus Ntsuj Plig yuav nrog peb nyob thaum kuv hais lus hnub no. Kuv lub siab puv npo ua tsaug rau tus Tswv, rau tej kev tshoov siab uas peb tau hnov thaum neeg thov Vajtswv, hais tej lus zoo, thiab hu nkauj nyob hauv lub rooj sab laj.

Lub Plaub Hlis Ntuj tas los, Thawj Tswj Hwm Thomas S. Monson hais ib zaj lus uas tshoov tib neeg lub siab nyob thoob plaws lub ntiaj teb, tsis hais kuv lub siab los yog. Nws hais txog lub hwj chim ntawm Phau Ntawv Maumoos. Nws yaum kom peb kawm, xav txog, thiab ua raws li phau ntawv no tej lus qhia. Nws cog lus tias yog peb siv sij hawm txhua hnub kom kawm thiab xav txog thiab ua raws li tej lus txib uas nyob hauv Phau Ntawv Maumoos, peb yuav muaj ib zaj lus tim khawv hais tias phau ntawv no muaj tseeb, thiab zaj lus tim khawv txog tus Khetos uas muaj txoj sia nyob yuav pab peb thaum peb raug teeb meem. (Saib “Lub Hwj Chim ntawm Phau Ntawv Maumoos,” Liahona, Tsib Hlis Ntuj 2017, 86–87.)

Zoo ib yam li nej feem coob, kuv twb mloog tus yaj saub tej lus zoo li yog tus Tswv lub suab hais lus rau kuv. Thiab, ib yam li nej feem coob, kuv tau txiav txim siab ua raws li tej lus ntawd. Nim no, txij thaum kuv yog ib tug tub hluas, kuv twb paub tseeb tias Phau Ntawv Maumoos yog Vajtswv txoj lus, Leej Txiv thiab Leej Tub twb tshwm sim thiab hais lus rau Yauxej Xamiv, thiab cov Thwj Tim thaum ub tau los tus Yaj Saub Yauxej kom muab yuam sij pov thawj hwj txum tim rov qab los rau tus Tswv lub Koom Txoos.

Vim kuv paub li ntawd, kuv twb nyeem Phau Ntawv Maumoos txhua hnub tau 50 xyoo tawm. Yog li ntawd tej zaum tsim nyog kuv xav tias Thawj Tswj Hwm Monson hais rau lwm tus xwb. Tiam sis, ib yam li nej feem coob, kuv tau hnov tus yaj saub tej lus txhawb nqa thiab nws tej lus cog tseg caw kuv kom siv zog ntxiv. Nej feem coob tau ua li kuv tau ua: thov Vajtswv kawg siab kawg ntsws, xav txog vaj lug kub ntxiv, thiab siv zog ua hauj lwm rau tus Tswv thiab sawv Nws cev pab lwm tus.

Twb tau muaj raws li tus yaj saub cog lus rau kuv, thiab rau nej feem coob. Peb cov uas tau mloog nws tej lus ntuas twb haj yam hnov tus Ntsuj Plig ntxiv. Twb ua rau peb tiv tau kev ntxias thiab muaj kev ntseeg ntxiv txog Yexus Khetos uas sawv rov los, Nws txoj moo zoo, thiab Nws lub Koom Txoos.

Nyob hauv ib lub caij nyoog uas ntxhov siab heev, qhov uas peb zaj lus tim khawv muaj zog tuaj ua rau peb tsis ntshai thiab tsis ua xyem xyav thiab nyob kaj siab lug. Qhov uas kuv mloog Thawj Tswj Hwm Monson tej lus ntuas tau ua yam zoo rau kuv: Qhov thib ib, tus Ntsuj Plig uas nws cog lus tias yuav los ua rau kuv xav zoo txog tej uas yuav muaj los thaum yav tom ntej, txawm yog kev ntxhov hnyo loj tuaj nyob hauv lub ntiaj teb. Thiab qhov thib ob, tus Tswv tau muab rau kuv—thiab nej—ib txoj kev paub txog Nws txoj kev hlub cov uas nyuaj siab. Ua rau peb haj yam xav mus pab cawm lwm tus. Kev xav ua li ntawd yeej yog lub ntsiab ntawm Thawj Tswj Hwm Monson tej lus qhuab qhia.

Thaum tus Yaj Saub Yauxej Xamiv thiab Oliver Cowdery muaj tej yam nyuaj ua tus Tswv tau cog lus tias nkawd yuav hlub lwm tus thiab ua siab loj. Tus Tswv hais tias kev ua siab loj yuav los ntawm nkawd txoj kev ntseeg Nws uas yog nkawd lub pob zeb:

“Tsis txhob ntshai ua qhov zoo, kuv ob tug tub, vim tias tej yam uas neb yuav tseb, tej ntawd kuj yog tej uas neb yuav tau sau; yog li ntawd, yog hais tias neb tseb tej uas zoo ces neb yuav tau sau tej uas zoo los ua neb nqi zog.

“Yog li ntawd, tsis txhob ntshai, pab yaj; cia li ua tej uas zoo; cia lub ntiaj teb thiab ntuj txiag teb tsaus los koom ua ke tawm tsam neb, vim yog neb cog rau saum kuv lub pob zeb, ces lawv yuav kov tsis yeej.

“Saib seb, kuv tsis rau txim rau neb; neb mus neb thiab tsis txhob ua txhaum ntxiv; ua tiag tiag ua txoj hauj lwm uas kuv tau txib neb.

“Ntsia ntsoov kuv nrog txhua txoj kev xav; tsis txhob xyem xyav, tsis txhob ntshai.

“Saib tej qhov txhab uas raug nkaug to ntawm kuv sab tav, thiab tej caws pliav los ntawm ntsia hlau uas nyob ntawm kuv ob txhais tes thiab ob txhais ko taw; cia li rau siab ntseeg, ua raws li kuv tej lus txib, thiab neb yuav tau txais lub nceeg vaj ceeb tsheej ua neb tug” (Q&K 6:33–37).

Tus Tswv tau qhia Nws cov thawj coj txog txoj Kev Muab txoj Moo Zoo Txum Tim Rov Qab Los, thiab nws qhia peb, hais tias thaum peb muaj kev ntseeg sawv saum Nws lub pob zeb, peb txoj kev ntshai thiab kev ua xyem xyav ploj zuj zus mus; kev xav ua zoo loj tuaj. Thaum peb txais yuav Thawj Tswj Hwm Monson txoj kev caw kom cog ib zaj lus tim khawv txog Yexus Khetos nyob hauv peb lub siab, ua rau peb tau lub hwj chim, kev xav, thiab kev ua siab loj mus cawm lwm tus es peb tsis txhawj txog peb tus kheej.

Kuv twb pom kev ntseeg thiab kev ua siab loj ntau zaus thaum Tsoom Haiv Neeg Ntseeg hauv Hnub Nyoog Kawg raug kev sim siab txaus ntshai heev. Ua piv txwv hais tias, kuv nyob hauv Idaho thaum Qhov Chaw Tauv Dej Teton tawg thaum lub Rau Hli Ntuj 5, 1976. Dej los nyab txhua yam. Ntau txhiab tus neeg khiav ntawm lawv lub tsev mus. Ntau txhiab lub tsev thiab kev ua lag luam twb raug puas tsuaj. Yog ib qho txuj ci tseem ceeb uas tsuas muaj 15 tus neeg xiam.

Qhov uas kuv pom nyob ntawd, kuv twb pom thaum twg Tsoom Haiv Neeg Ntseeg hauv Hnub Nyoog Kawg sawv ruaj khov saum lub pob zeb uas yog ib zaj lus tim khawv txog Yexus Khetos. Vim lawv tsis ua xyem xyav Nws saib xyuas lawv, lawv thiaj tsis ntshai Lawv tsis xav txog lawv tej kev sim siab thiab mus pab lwm tus xwb. Thiab lawv ua li ntawd vim lawv hlub tus Tswv, lawv tsis thov kom txais nqi zog.

Ua piv txwv hais tias, thaum Qhov Chaw Tauv Dej Teton tawg, ib khub niam txiv uas yog ob tug Neeg Ntseeg hauv Hnub Nyoog Kawg twb mus ua si nyob deb ntawm nkawd lub tsev. Thaum nkawd hnov xov xwm hauv lub xov tooj cua, nkawd rov qab los rau Rexburg sai sai. Tiam sis nkawd tsis tau mus rau nkawd lub tsev seb puas puas tsuaj tas, nkawd cia li mus nrhiav nkawd tus npisov. Nws twb nyob hauv ib lub tsev uas tib neeg siv ua ib qho chaw kom npaj kho. Nws twb pab coj neeg coob uas ua siab dawb pab uas tuaj nyob hauv cov npav kawm ntawv xim daj.

Khub niam txiv no mus rau tus npisov thiab hais tias, “Wb nyuam qhuav rov qab los. Npisov, wb yuav mus qhov twg kom pab tau?” Nws muab ib tsev neeg lub npe rau nkawd. Khub niam txiv ntawd tau khawb av nkos thiab dej nyob hauv ib lub tsev dhau ib lub. Nkawd tau ua hauj lwm txij thaum sawv ntxov mus txog hmo ntuj tau ob peb hnub. Ces nkawd tau so kom mus saib nkawd lub tsev. Nkawd lub tsev twb raug dej nyab tshoob mus lawm, tsis muaj dab tsi tu tau. Nkawd thiaj li tig rov qab mus rau tus npisov. Nkawd nug hais tias, “Npisov, koj puas muaj leej twg uas wb pab tau?”

Ib xyoo dhau ib xyoo thiab nyob thoob plaws lub ntiaj teb twb pom qhov txuj ci tseem ceeb no uas yog kev ua siab loj thiab kev siab hlub—Khetos txoj kev hlub dawb paug. Twb muaj li no thaum lub sij hawm uas lawv raug kev tsim txom thiab kev sim siab hauv tus Yaj Saub Yauxej Xamiv lub caij nyoog nyob hauv Missouri. Twb muaj li no thaum Brigham Young coj tib neeg tawm ntawm Nauvoo mus ces hu Tsoom Haiv Neeg Ntseeg rau tej qhov chaw moj sab qhua nyob thoob plaws lub Teb Chaws Amelikas sab hnub poob, kom ib leeg pab ib leeg txhim tsa Xi-oos rau tus Tswv.

Yog tias nej nyeem cov pioneer no tej phau ntawv ceev xwm txheej, nej yuav pom kev ntseeg uas ntiab kev ua xyem xyav thiab kev ntshai tawm. Thaum nej nyeem txog qhov uas Tsoom Haiv Neeg Ntseeg tso lawv tej kev xav tau tseg kom pab tau lwm tus rau tus Tswv, ua ntej lawv tu lawv cov yaj los yog rov qab mus rau lawv cov tiaj nras uas tseem tsis tau laij.

Kuv twb pom qhov txuj ci tseem ceeb no ob peb hnub tas los tom qab Hurricane Irma raug Puerto Rico, Saint Thomas, thiab Florida, nyob ntawd Tsoom Haiv Neeg Ntseeg hauv Hnub Nyoog Kawg koom nrog lwm lub koom txoos, tej pawg hauv zej zog, thiab tej lub koom haum uas nyob thoob plaws lub teb chaws kom pib tu khoom.

Zoo li kuv cov phooj ywg nyob hauv Rexburg, ib khub niam txiv uas tsis yog mej zeej nyob hauv Florida tau tsom ntsoov pab cov neeg zej zog thiab tsis tau ua hauj lwm tu nkawd tus kheej qhov chaw nyob. Thaum cov neeg zej zog uas yog Haiv Neeg Ntseeg hauv Hnub Nyoog Kawg qhia tias lawv mam li pab tshem ob tug ntoo loj uas thaiv nkawd txoj kev nres tsheb, khub niam txiv no piav hais tias nkawd ntxhov siab heev es nkawd thiaj li mus pab lwm tus, nkawd muaj kev ntseeg tias tus Tswv yuav muab kev pab uas nkawd xav tau nyob ntawm nkawd lub tsev.Tus txiv tsev qhia tias ua ntej peb lub Koom Txoos cov mej zeej tuaj xav muab kev pab, nws thiab nws tus poj niam tau thov Vajtswv. Nkawd txais lus teb hais tias kev pab yuav los. Kev pab twb los ob peb teev tom qab nkawd txais kev nplij siab li ntawd.

Kuv twb hnov xov hais tias ib txhia hu Tsoom Haiv Neeg Ntseeg hauv Hnub Nyoog Kawg uas hnav tsho xim daj Helping Hands ua “Cov Tim Tswv Daj.” Ib tug Neeg Ntseeg hauv Hnub Nyoog Kawg mus kho nws lub tsheb, thiab tus txiv neej uas yuav kho piav txog lub sij hawm uas nws hnov tus ntsuj plig thaum tib neeg uas hnav tsho daj tshem cov ntoo ntawm nws lub tiaj nyom ces, nws hais tias, lawv “hu ib zaj nkauj rau kuv txog qhov uas kuv yog Vajtswv tus me nyuam.”

Ib tug uas nyob hauv Florida ntxiv—uas tsis koom peb txoj kev teev ntuj—hais txog thaum ib Tsoom Haiv Neeg Ntseeg hauv Hnub Nyoog Kawg tau los rau nws lub tsev thaum nws ua hauj lwm hauv nws lub tiaj nyom uas raug puas tsuaj tas thiab nws ntxhov siab, sov dhau, thiab xav quaj. Nws hais tias, cov uas pab dawb tau tsim “ib qho txuj ci tseem ceeb.” Tsis yog lawv rau siab ua hauj lwm xwb, tiam sis lawv kuj luag nyav thiab tso luag, tsis xav txais nqi zog dab tsi.

Kuv twb pom kev rau siab li ntawd thiab hnov kev luag thaum, hnub Saturday lig, kuv nrog ib Tsoom Haiv Neeg Ntseeg hauv Hnub Nyoog Kawg tham nyob hauv Florida. Cov uas pab dawb nres lawv txoj kev tu khoom ntev txaus cia kuv tuav tes xwb. Lawv hais tias 90 tus mej zeej ntawm lawv ceg txheem ntseeg nyob hauv Georgia tau npaj los pab cov neeg nyob hauv Florida thaum ib hmo ua ntej lawv mus xwb.

Lawv tau sawv kev los ntawm Georgia mus thaum 4:00 sawv ntxov, tsav tsheb tau peb plaub teev, ua hauj lwm txog tsaus ntuj, thiab tau npaj siab ua hauj lwm thaum hnub tom qab ntawd.

Lawv luag nyav thiab zoo siab piav rau kuv txog tag nrho tej yam no. Qhov uas lawv txhawj xwb yog qhov uas lawv tsis xav lwm tus ua lawv tsaug ntxiv lawv thiaj yuav rov qab ua tau hauj lwm. Ceg txheem ntseeg tus thawj tswj hwm tau rov qab qhib nws rab kaw uas siv roj thiab nws tab tom muab ib tug ntoo uas tau vau txiav thaum peb rov qab mus hauv tsheb mus ntsib lwm pawg uas pab neeg.

Hnub ntawd, thaum peb tawm lwm qhov chaw mus, ib tug txiv neej tau tuaj txog peb lub tsheb, hle nws lub kaus mom, thiab ua peb tsaug rau cov uas pab dawb. Nws hais tias, “Kuv tsis yog ib tug mej zeej ntawm nej lub koom txoos. Kuv ntseeg tsis tau nej tau ua li no rau peb. Thov Vajtswv foom koob hmoov rau nej.” Tus mej zeej uas pab dawb uas sawv ntawm nws ib sab luag nyav thiab tshoom xub pwg zoo li nws tsis xav lwm tus qhuas nws.

Thaum cov uas pab dawb los ntawm Georgia tau tuaj pab tus neeg uas ntseeg tsis tau no, Tsoom Haiv Neeg Ntseeg hauv Hnub Nyoog Kawg coob heev nyob hauv qhov chaw uas raug puas tsuaj ntawm Florida ntawd tau mus deb heev rau ib qho chaw ntxiv nyob hauv Florida sab qab teb thaum lawv hnov txog cov neeg uas raug kev puas tsuaj loj dua li lawv.

Hnub ntawd, kuv twb nco txog, thiab haj yam to taub tus Yaj Saub Yauxej Xamiv tej lus hais tias: “Ib tug neeg uas muaj Vajtswv txoj kev hlub puv nkaus nws lub siab, yuav tsis zoo siab vim nws tsev neeg tau koob hmoov xwb, tiam sis nws xav tawm mus thoob plaws ntiaj teb no foom koob foom hmoov rau tib neeg sawv daws” (Teachings of Presidents of the Church: Joseph Smith [2007], 426).

Peb pom txoj kev hlub nyob hauv Tsoom Haiv Neeg Ntseeg hauv Hnub Nyoog Kawg lub neej nyob txhua qhov chaw. Txhua lub sij hawm muaj tej xwm txheej ceev nyob qhov twg hauv lub ntiaj teb no, Tsoom Haiv Neeg Ntseeg hauv Hnub Nyoog Kawg ua siab dawb siv sij hawm thiab rau siab ua lub Koom Txoos tej hauj lwm pab tib neeg. Feem ntau los tsis tas thov lawv ua. Muaj tseeb tiag, tej lub sij hawm peb yuav tsum thov cov uas xav paub kom tos mus txog qhov chaw pab neeg mus txog thaum cov uas coj tej hauj lwm ntawd twb npaj lawm kom txais tau lawv.

Txoj kev xav foom koob hmoov rau lwm tus yog ib yam uas los thaum tib neeg muaj ib zaj lus tim khawv txog Yexus Khetos, Nws txoj moo zoo, Nws lub Koom Txoos, thiab Nws tus yaj saub. Yog vim li no tus Tswv cov neeg thiaj li tsis ntshai thiab tsis ua xyem xyav. Yog vim li no cov tub txib pab dawb nyob hauv txhua qhov chaw ntawm lub ntiaj teb. Yog vim li no cov niam tsev txiv tsev nrog lawv cov me nyuam thov Vajtswv pab lwm tus. Yog vim li no cov thawj coj tau twv lawv cov tub hluas ntxhais hluas ua raws li Thawj Tswj Hwm Monson hais kom nyeem Phau Ntawv Maumoos. Twb muaj li no tsis yog vim cov thawj coj yaum lawv tiam sis yog los ntawm cov tub hluas ntxhais hluas thiab cov mej zeej txoj kev rau siab ntseeg. Kev ntseeg zoo li ntawd, uas yuav tsum ua kev txi pub yus tus kheej kom muaj, ua rau lawv hloov siab uas ua rau lawv hnov tau Vajtswv txoj kev hlub.

Tiam sis, peb lub siab yuav hloov li ntawd tsuas yog thaum peb tseem ua raws li tus yaj saub tej lus ntuas. Yog peb tsum tom qab peb ua ib zaug xwb, ces peb txoj kev hloov yuav ploj zuj zus.

Tsoom Haiv Neeg Ntseeg hauv Hnub Nyoog Kawg lawv txoj kev ntseeg muaj zog tuaj, ntseeg tus Tswv Yexus Khetos, ntseeg tias Phau Ntawv Maumoos yog Vajtswv txoj lus, ntseeg tias tau muab cov yuam sij pov thawj hwj nyob hauv Nws lub Koom Txoos tseeb txum tim rov qab los. Zaj lus tim khawv no ua rau peb haj yam ua siab loj thiab txhawj txog lwm tus uas yog Vajtswv cov me nyuam. Tiam sis yuav tsum muaj ntxiv rau tej teeb meem thiab cib fim thaum yav tom ntej.

Peb pom tsis tau txhua yam, tiam sis peb paub lub ntsiab. Peb paub hais tias nyob hauv hnub nyoog kawg, lub ntiaj teb yuav ntxhov hnyo. Peb paub tias txawm yog peb raug teeb meem dab tsi los, tus Tswv yuav coj Tsoom Haiv Neeg Ntseeg hauv Hnub Nyoog Kawg mus kom qhia Yexus Khetos txoj moo zoo rau txhua haiv neeg, xeem neeg, yam lus, thiab cov neeg. Thiab peb paub tias tus Tswv cov thwj tim tseeb yuav tsim nyog thiab npaj txais Nws thaum Nws rov qab los. Peb tsis tas ntshai.

Yog li ntawd, txawm peb muaj kev ntseeg thiab ua siab loj lawm los, tus Tswv xav kom peb ua ntxiv—thiab xav kom tej tiam neeg uas yuav nyob tom qab peb ua ntxiv. Lawv yuav tsum muaj zog thiab ua siab loj tshaj vim lawv yuav ua tej yam zoo dua thiab nyuaj dua tej uas peb tau ua. Thiab lawv yuav raug tus yeeb ncuab ntawm peb tej ntsuj plig txoj kev tawm tsam uas loj zuj zus tuaj.

Tus Tswv tau qhia kom peb xav zoo thaum peb mus tom ntej: “Ntsia ntsoov kuv nrog txhua txoj kev xav; tsis txhob xyem xyav, tsis txhob ntshai” (Q&K 6:36). Thawj Tswj Hwm Monson tau qhia peb ua li ntawd. Peb yuav tsum xav thiab ua raws li Phau Ntawv Maumoos thiab cov yaj saub tej lus. Thov tsis tu tsis tseg. Cia li ntseeg. Ua hauj lwm rau tus Tswv kawg siab kawg ntsws kawg dag kawg zog. Peb yuav tsum thov Vajtswv kawg siab kawg ntsws kom muaj lub txiaj ntsim uas yog kev siab hlub, Khetos txoj kev hlub dawb pawg (saib Maulaunais 7:47–48). Thiab qhov tseem ceeb, peb yuav tsum siv zog ua raws li cov yaj saub tej lus ntuas tsis tu tsis tseg.

Thaum txoj kev ntawd nyuaj heev, peb tso siab rau tus Tswv tej lus cog tseg los tau—yog tej lus cog tseg uas Thawj Tswj Hwm Monson qhia rau peb thaum nws hais txog tus Cawm Seej tej lus no: “Yog leej twg txais yuav nej, kuv kuj yuav nyob ntawd thiab, vim kuv yuav ua nej ntej mus. Kuv yuav nyob ntawm nej sab xis thiab nyob ntawm nej sab laug, thiab kuv tus Ntsuj Plig yuav nyob hauv nej lub siab, thiab kuv cov tim tswv nyob ib puag ncig nej, los txhawb nqa nej” (Q&K 84:88).

Kuv ua tim khawv tias tus Tswv ua nej ntej thaum nej ua Nws txoj hauj lwm. Tej lub sij hawm nej yuav ua tus tim tswv uas tus Tswv xa kom txhawb nqa lwm tus. Tej lub sij hawm nej yog tus uas cov tim tswv nyob ib puag ncig kom txhawb nqa nej. Tiam sis nej yeej yuav muaj Nws tus Ntsuj Plig hauv nej lub siab, ib yam li tau cog lus rau nej nyob hauv txhua txoj kev sib ntsib txais lub cim nco txog. Nej yuav tsum ua raws li Nws cov lus txib xwb.

Tej hnub zoo tshaj plaws rau Vajtswv lub nceeg vaj hauv lub ntiaj teb yog thaum yav tom ntej. Kev tawm tsam yuav ua rau peb txoj kev ntseeg Yexus Khetos muaj zog tuaj, zoo ib yam li nyob hauv tus Yaj Saub Yauxej Xamiv lub caij nyoog. Kev ntseeg kov yeej kev ntshai txhua lub sij hawm. Kev sawv ua ke ua rau peb koom siab koom ntsws. Thiab nej tej kev thov Vajtswv kom pab cov uas xav tau los Vajtswv uas hlub peb hnov thiab teb tej lus thov ntawd. Nws tsis tsaug zog hlo li.

Kuv ua tim khawv hais tias Vajtswv Leej Txiv muaj txoj sia nyob thiab xav kom nej rov qab los cuag Nws. Nov yog tus Tswv Yexus Khetos lub Koom Txoos tseeb. Nws paub nej, Nws hlub nej, thiab Nws saib xyuas nej. Nws tau theej nej lub txhoj thiab kuv lub txhoj thiab tag nrho Leej Txiv Saum Ntuj Ceeb Tsheej cov me nyuam lub txhoj. Kev coj raws li Nws nyob hauv nej lub neej thiab thaum nej pab lwm tus yog tib txoj kev kom tau txoj sia nyob mus ib txhis.

Kuv ua tim khawv li no thiab foom koob hmoov thiab kuv txoj kev hlub rau nej. Los ntawm Yexus Khetos lub npe dawb ceev, amees.